O Mai ma Avea ma ni Ō
Matou te valaaulia fanau uma a le Atua i le lalolagi atoa ia auai faatasi ma i tatou i lenei taumafaiga tele.
O’u uso e ma tuafafine pele, a’u uo pele, o vaiaso taitasi, e tapuai ai tagata o Le Ekalesia a Iesu Keriso o le Au Paia o Aso e Gata Ai i le lalolagi atoa i lo tatou Tama Faalelagi pele, o le Atua ma le Tupu o le atulaulau, ma Lona Alo Pele, o Iesu Keriso. Tatou te manatunatu loloto ai i le soifuaga ma aoaoga a Iesu Keriso—na o le pau lea o le tamaalii e leai se agasala sa soifua ai, o le Tamai Mamoe lē ponā a le Atua. Tatou te aai ma feinu i le faamanatuga e manatua ai Lana taulaga ma aloaia ai o Ia o le totonugalemu o o tatou olaga.
Tatou te alolofa ia te Ia ma faamamaluina o Ia. Ona o Lona alofa maoae ma le faavavau, sa puapuagatia ai Iesu Keriso ma maliu mo oe ma a’u. Na Ia talaia faitotoa o le oti, ma nutililii papupuni sa tuueseesea ai uo ma ē pele,1 ma aumaia le faamoemoe i ē ua leai ni faamoemoe, faamalolo i ē mama’i, ma faasaolotoina ē nofopologa.2
Tatou te tuuto atu o tatou loto ia te Ia, o o tatou ola, ma a tatou tapuaiga i aso taitasi. Mo lea mafuaaga, “tatou te tautalatala ai ia Keriso, [ma] tatou olioli ia Keriso, [ma] tatou tala’i atu Keriso, … ina ia mafai ona iloa e a tatou fanau po o le a le puna e mafai ona latou tepa taulai i ai mo se faamagaloga o a latou agasala.”3
Faataitai Ona Avea ma So’o
Peitai, o le avea ai ma se so’o o Iesu Keriso e aofia ai le anoanoai o mea nai lo le talanoa ma tala’i atu Keriso. O le Faaola lava Ia na toefuataiina mai Lana Ekalesia e fesoasoani ai ia te i tatou i luga o le ala ia avea atili ai e faapei o Ia. O Le Ekalesia a Iesu Keriso o le Au Paia o Aso e Gata Ai ua mamanuina e maua ai avanoa e faatino ai elemene faavae o le avea ai ma so’o. E ala i lo tatou auai e faatino i le Ekalesia, tatou te aoao ai ma faatinoina uunaiga a le Agaga Paia. Tatou te atiina ae le mausa o le aapa atu i le agaalofa ma le agalelei i isi.
O se taumafaiga lenei o le olaga atoa, e manaomia ai le faataitai.
O le au afeleti e faamanuiaina, latou te faaaluina itula e le mafaitaulia e faataitai ai elemene faavae o a latou taaloga. O tausisoifua, o le augalulue i upega tafailagi, o enisinia niukilia, ma e oo lava ia te a’u o se kuka fiatautavā i le umukuka a Harriet e gafataulimaina ma popoto pe afai tatou te faata’ita’ia ma le maelega a tatou faivaalofilima.
I le avea ai ma se kapeteni vaalele, e tele taimi sa ou aoaoina ai pailate i le faaaogaina o se masini faafoliga—o se masini faatonutonu na te toe faata’ita’ia le potomasani faalele. O le masini faafoliga e le gata ina fesoasoani i pailate e a’oa’o ai ia elemene faavae o le lele, ae e mafai ai foi e i latou ona maua le poto masani e tali atu ai i mea tutupu faafuasei e mafai ona latou fetaiai pe a latou faatautaia le vaalele moni.
E faatatau foi ia mataupu faavae e tasi mo so’o o Iesu Keriso.
O le auai atoatoa i le Ekalesia a Iesu Keriso ma ona avanoa eseese e tele, o le a fesoasoani ia i tatou e saunia lelei ai mo tulaga fesuia’i o le olaga, pe o a lava ia mea. I le avea ai ma ni tagata o le Ekalesia, ua uunaia i tatou e faatofu i tatou lava i afioga a le Atua e ala i Ana perofeta, anamua ma ona po nei. E ala i le tatalo faamaoni ma le lotomaualalo i lo tatou Tama Faalelagi, tatou te a’oa’o ai ia iloa le siufofoga o le Agaga Paia. Tatou te taliaina valaauga e galulue, faiaoga, fuafua, auauna atu, ma faatautaia. O nei avanoa ua mafai ai e i tatou ona tuputupu ae i le agaga, mafaufau, ma uiga faaletagata.
O le a fesoasoani ia i tatou e saunia e osia ma tausia feagaiga paia o le a faamanuiaina ai i tatou i lenei olaga ma le olaga a sau.
Sau, Auai faatasi ma i Matou!
Matou te valaaulia fanau uma a le Atua i le lalolagi atoa ia auai faatasi ma i tatou i lenei taumafaiga tele. O Mai ia ina matamata! E oo lava i lenei taimi faigata o le koronavairasi, tatou feiloai i le upega tafailagi. Feiloai ma o matou faifeautalai i le upega tafailagi. Saili mo outou lava mea uma e uiga i lenei Ekalesia! A oo ina mavae atu lenei taimi faigata, tatou feiloai i o matou fale ma i o matou nofoaga tapuai!
Matou te valaaulia outou e o mai ma fesoasoani mai! O mai ma auauna faatasi ma i matou, auauna atu i fanau a le Atua, mulimuli i tulagaaao o le Faaola, ma faia lenei lalolagi o se nofoaga e sili atu.
O mai ma avea ma ni ō! O le a outou faamalosia atili i matou. Ma o le a outou lelei atili, agalelei atili, ma fiafia atili foi. O le a faalolotoina lo outou faatuatua ma tupu atili le maufetuunai—atili gafatia ona tatalia faatalutaluā (po o faigata) ma tofotofoga e lei faamoemoeina o le olaga.
Ma e faapefea la ona tatou amata? E tele auala e mafai ai.
Matou te valaaulia outou e faitau le Tusi a Mamona. Afai e leai sau kopi, e mafai ona e faitau i ai i luga o le ChurchofJesusChrist.org4 pe sii mai le app o le Tusi a Mamona. O le Tusi a Mamona o se tasi molimau ia Iesu Keriso ma o se soa i le Feagaiga Tuai ma le Feagaiga Fou. Matou te fiafia lava i nei tusitusiga paia uma ma a’oa’o mai ai.
Matou te valaaulia outou e faaalu sina taimi i le ComeuntoChrist.org e iloa ai pe o a mea o a’oa’o atu e tagata o le Ekalesia ma talitonu i ai.
Valaaulia ia faifeautalai tou te talatalanoa i luga o upega tafailagi pe i lou fale i nofoaga e mafai ai lenei mea—e i ai sa latou savali o le faamoemoe ma le faamalologa. O nei faifeautalai o o matou atalii ma afafine faapelepele o e galulue i le tele o nofoaga i le lalolagi atoa i o latou lava taimi ma a latou lava tupe.
I le Ekalesia a Iesu Keriso, o le a e maua ai se aiga o tagata e matua ese lava mai ia te outou. O le a outou maua ai tagata e manaomia la outou fesoasoani ma o ni e e mananao e fesoasoani ia te oe, a o e taumafai ia avea oe ma lou lava tagata aupito sili—le tagata sa foafoaina e le Atua ia avea ai oe.
O Le Opoopo a le Faaola e Mo Tagata Uma
Atonu e te mafaufau, “Sa ou faia ni mea sese i lo’u olaga. Ou te le iloa pe mafai ona ou lagonaina o ni ō a’u o le Ekalesia a Iesu Keriso. E le fia naunau mai le Atua i se tasi e pei o a’u.”
O Iesu le Keriso, e ui o Ia o le “Tupu o tupu,”5 o le Mesia, “o le Alo o le Atua soifua,”6 ae popole tele o Ia i fanau taitasi uma a le Atua. E popole mai tusa lava po o le a le tulaga o se tagata—pe o le a le mativa po o le mauoa, po o le a le lē atoatoa po o le faamaonia o le agavaa o se tagata. I le taimi o Lona soifuaga faaletino, sa auauna atu le Faaola i tagata uma: i ē fiafia ma faamanuiaina, i ē lotomomomo ma ua sē, ma i latou ua leai se faamoemoe. O le tele o taimi, o tagata na Ia tautuaina ma auauna atu i ai e le o ni tagata lauiloa, aulelei, pe maumea. O le tele o taimi, o tagata na Ia siitia i luga sa leai ni mea latou te toe avatu ae o le lotofaafetai, o se loto ua faamaulalo, ma le manao ia i ai le faatuatua.
Afai na faaalu e Iesu Lona soifuaga faaletino e auauna atu ai i “se aupito itiiti o i latou nei,”7 mata o le a le alofa foi o Ia ia i latou i le asō? Pe le o i ai ea se nofoaga i Lana Ekalesia mo fanau uma a le Atua? E oo lava mo i latou o ē lagonaina le lē agavaa, ua faagaloina, pe tuuatoatasi?
E leai se maualuga patino o le atoatoaga e tatau ona e maua ina ia mafai ai ona e agavaa mo le alofa tunoa o le Atua. O au tatalo e le tau faaleoteleina pe susua pe sa’o le kalama ina ia mafai ai ona au i le lagi.
O le mea moni, e le faaalia mai e le Atua se alofa faapito8—o mea e faataua e le lalolagi o mea noa ia ia te Ia. Na te silafia lou loto, ma e alofa o Ia ia te oe tusa lava po o le a lou tulaga, pe o le a le tele o au tupe, po o le tele o e taumulimuli ia oe i le Instagram.
A o lilifa atu o tatou loto i lo tatou Tama Faalelagi ma faalatalata atu ia te Ia, o le a tatou lagonaina o Ia o latalata mai ia i tatou.9
O i tatou uma o Ana fanau pele.
E oo lava ia i latou e teenaina o Ia.
E oo foi ia i latou o ē, faapei o se tamaitiiti ulumalo, ma faalogogata, ua ita i le Atua ma Lana Ekalesia, ua tapena latou ato ma tele’a’i i fafo o le faitotoa ma folafola mai e sosola ese ma e le toe foi mai lava.
A oo ina solaese se tamaitiiti mai le fale, atonu na te matauina ia matua popole o autilo atu mai le faamalama. Faatasi ai ma loto momomo, la te vaai atu i lo la atalii po o se afafine o alu—ma le faamoemoe o le a aoaoina e le la tama pele se mea mai lenei aafiaga taufaamata’u ma atonu e vaai atu i le olaga i ni mata fou—ma i’u ai ina toe foi mai i le fale.
E faapena foi i lo tatou Tama Faalelagi alofa. O loo faatalitali mai o Ia mo lo tatou toe foi atu.
O loo faatalitali mai lou Faaola, ma loifofoga o le alofa ma le agalelei i Ona fofoga mo lou toe foi atu. E oo lava pe a e lagonaina ua e mamao ese mai le Atua, o le a Ia silasila atu ia te oe; o le a agaalofa o Ia ia te oe ma faataalise atu e opo mai oe.10
O mai ma avea ma ni ō.
E Faataga e le Atua i Tatou e A’oa’o mai ia Tatou Mea Sese
O i tatou o tagata malaga sopo i le ala o le olaga nei i se sailiga tele mo le uiga ma le upumoni taua. E tele taimi, na pau lava le mea tatou te vaai i ai o le ala o loo i luma tonu—e le mafai ona tatou iloa atu le mea e tau i ai pi’oga o le ala. E le’i tuuina mai e lo tatou Tama Faalelagi alofa ia i tatou tali uma. O loo faamoemoe o Ia tatou te faavasegaina le tele o mea mo i tatou lava. O loo faamoemoe o Ia ia tatou talitonu—tusa lava pe faigata ona faia.
O loo faamoemoe o Ia tatou te faamalolosia o tatou tau’au ma atia’e sina faaiuga—sina ivitu itiiti—ma fai se isi laa i luma.
O le auala lena tatou te a’oa’o ai ma tuputupu ae.
Mata e te manao moni e sipela atu mea uma i ona auiliiliga uma? Mata e te manao moni e tali atu fesili uma? Ma faasino atu taunuuga uma?
Ou te talitonu o le toatele o i tatou o le a vave ona mumusu i lenei ituaiga o pulega malosi auiliili faalelagi. Tatou te aoaoina lesona taua o le olaga e ala i aafiaga. E ala i le aoaoina mai i a tatou mea sese. E ala i le salamo ma le iloaina mo i tatou lava o le “amioleaga e le o le fiafia lea.”11
O Iesu Keriso, le Alo o le Atua, na maliu ina ia mafai ai ona le ta’usalaina i tatou i a tatou mea sese ma nape ai e faavavau lo tatou alualu i luma. Ona o Ia, ua mafai ai ona tatou salamo, ma ua mafai ai ona avea a tatou mea sese ma ala tatou te oo atu ai i le mamalu e sili atu.
E te le tau uia na o oe lenei auala. E le’i tuua i tatou e lo tatou Tama Faalelagi e feseta’i i le pogisa.”
O le pogai lea, i le tautotogo o le 1820, na Ia faaali atu ai ma Lona Alo, o Iesu Keriso i se alii talavou, o Iosefa Samita.
Mafaufau i lena mea mo sina minute! Ua faaali mai le Atua o le atulaulau i le tagata!
O le uluai taimi lea o le mau taimi ua fetaiai ai Iosefa ma le Atua ma isi tamaalii faalelagi. O le tele o upu na tulei atu ai na tamaalii paia ia te ia o loo tusia i tusitusiga paia a Le Ekalesia a Iesu Keriso o le Au Paia o Aso e Gata Ai. E faigofie lava ona maua. Soo se tasi e mafai ona faitauina ma a’oa’o ai mo i latou lava le savali a le Atua mo i tatou i o tatou taimi.
Matou te valaaulia oe ia suesue i ai mo oe lava.
Sa fai lava si talavou o Iosefa Samita ina ua ia mauaina nei faaaliga. O le tele lava na oo mai a o lei atoa lona 30 tausaga le matua.12 Sa le’i i ai sona poto masani, ma i nisi o tagata, atonu sa foliga e lei agavaa o ia e avea ma perofeta a le Alii.
Ae peitai, na valaauina lava o ia e le Alii—o loo mulimulitaia se mamantu tatou te maua i tusitusiga paia uma.
Sa le’i faatali le Atua e sue se tagata e atoatoa e toefuataia Lana talalelei.
Pe ana faapea na Ia suea [se tagata atoatoa], se manu o lae lava e faataliali o Ia.
O Iosefa sa pei lava foi o oe ma a’u. E ui sa ia faia ni mea sese, ae sa faaaogaina e le Atua o ia e faataunuuina Ona faamoemoega sili.
Sa tele taimi e fai soo ai e Peresitene Thomas S. Monson upu nei o le fautuaga: “O le ua valaauina e le Alii, e faaagavaaina e le Alii.”13
Sa apoapoai atu le Aposetolo o Paulo i le Au Paia i Korinito: “Ua outou iloa lo outou valaauina, le au uso e; e le toatele o e popoto i la le tino, e le toatele faipule, e le toatele alii.”14
E faaaoga e le Atua mea vaivai ma le manino e faataunuu ai Ona faamoemoega. E tu atu lenei upumoni o se molimau o le mana o le Atua, ae le o le tagata, e faataunuuina Lana galuega i le lalolagi.15
Faalogo ia te Ia, Mulimuli ia te Ia
Ina ua faaali atu le Atua ia Iosefa Samita, sa Ia faailoa atu Lona Alo, o Iesu Keriso, ma fetalai atu, “Faalogo ia te Ia.”16
Sa faaaluina aso na totoe o lona soifua e faalogo atu ai ia te Ia ma mlulimuli ia te Ia.
E faapei foi o Iosefa, o lo tatou avea ai ma soo e amata i le faaiuga e faalogo ma mulimuli i le Faaola o Iesu Keriso.
Afai tou te mananao e mulimuli ia te Ia, faaputuputu lo outou faatuatua ma ave i o outou lava luga Lona satauro.
O le a e iloa ai o oe lava o ni ō i Lana Ekalesia—o se nofoaga o le mafanafana ma le talileleia, lea e mafai ai ona e auai i le sailiga tele o le avea ai ma soo ma fiafiaga.
O lo’u faamoemoega, i lenei faamanatuga o le lua seneturi o le Uluai Faaaliga, a o tatou manatunatu ma a’oa’o e uiga i le Toefuataiga o le Ekalesia a Iesu Keriso, o le a tatou iloaina ai ua le na o se mea faasolopito na tupu. E tofu i ta’ua ma se vaega taua e fai i lenei tala maoae ma faifai pea.
O le a la lau vaega ma la’u vaega?
O le a’oa’o lea e uiga ia Iesu Keriso. Ia suesue Ana afioga. Ia faalogo ia te Ia ma mulimuli ia te Ia e ala i le auai ma le mataalia i lenei galuega tele. Ou te valaaulia outou ia omai ma avea ma ni ō [le Ekalesia]!
E le faapea se’i outou atoatoa. Pua le mea ia i ai sou manao e atia’e lou faatuatua ma faalatalata atili atu ia te Ia i aso taitasi.
O la tatou vaega o le alolofa ma auauna atu i le Atua ma alofa ma auauna atu i fanau a le Atua.
A outou faia lena mea, o le a siomia outou e le Atua i Lona alofa, olioli, ma le taiala patino i lenei olaga atoa, e oo lava i tulaga aupito sili ona ogaoga ma sili atu.
Ou te molimau atu ai i lenei mea ma tuu atu la’u faamanuiaga ma le lotofaafetai loloto ma le alofa mo outou taitoatasi, i le suafa paia o lo tatou Faaola, o lo tatou Matai—i le suafa o Iesu Keriso, amene.