Tatalaina o le Lagi mo se Fesoasoani
Ia tatou tuu lo tatou faatuatua i le Alii o Iesu Keriso i ni faatinoga!
E ma’eu le tulagaese ma le matagofie o lenei sauniga! Faafetai lava Laudy ma Enzo pele. Ua matua lelei le avea o oulua ma sui o tamaitai talavou ma alii talavou ofoofogia o le Ekalesia.
O’u uso e ma tuafafine pele, ua tatou faalogo i le tele o mea i le asō e uiga i le Toefuataiga o le Ekalesia—le Ekalesia lava lea na faatuina e lo tatou Faaola, o Iesu Keriso, i le taimi o Lana galuega i le lalolagi. O lena Toefuataiga na amata i le 200 tausaga talu ai i lenei tautotogo ina ua faaali mai le Atua le Tama ma Lona Alo, o Iesu Keriso i le taule’ale’a o Iosefa Samita.
I le sefulu tausaga talu ona mavae lenei faaaliga maoae, sa valaauina ai le Perofeta o Iosefa Samita ma le isi toalima e avea ma sui faavae o le Ekalesia toefuataiina a le Alii.
Mai lena vaega toalaiti na faapotopoto i le aso 6 o Aperila, 1830, ua oo mai ai se faalapotopotoga i le lalolagi atoa ua silia ma le 16 miliona tagata. O le lelei o loo faataunuuina e lenei Ekalesia i le lalolagi atoa e faamāmā i mafatiaga o tagata ma tuu atu le toomaga mo tagata, ua matua lauiloa. Ae o lona faamoemoega autu lava o le fesoasoani lea i alii, tamaitai, ma tamaiti ia mulimuli i le Alii o Iesu Keriso, tausi i Ana poloaiga, ma agavaa mo le faamanuiaga aupito silisili o faamanuiaga uma—o le ola e faavavau lea faatasi ma le Atua ma ē pele ia i latou.
A o tatou faamanatuina ai le mea na tupu na tatalaina i le 1820, e taua le manatuaina e faapea e ui tatou te faaaloalogiaina Iosefa Samita o se perofeta a le Atua, ae e le o se lotu lenei a Iosefa Samita, po o se lotu foi a Mamona. O le Ekalesia lenei a Iesu Keriso. Na Ia poloai mai i le igoa tonu e tatau ona faaigoa ai Lana Ekalesia: “Aua e faapea lava ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai.”
Sa ou talanoa muamua e uiga i se faasa’oga na manaomia i le ala tatou te faasino atu ai i le igoa o le Ekalesia. Talu mai lena taimi, e tele mea ua faia e faataunuu ai lenei faasa’oga. Ou te faafetai tele ia Peresitene M. Russell Ballard ma le Korama atoa a Aposetolo e Toasefululua, o e na faia le tele o mea e taulamua ai i nei taumafaiga faapea ai foi ma i latou e fesootai i se isi ta’imua lea o le a ou faasilasilaina i lenei afiafi.
O taitai ma matagaluega a le Ekalesia, o totino fesootai, ma le faitau miliona o tagata o le Ekalesia—ma isi—ua faaaogaina nei le igoa sa’o o le Ekalesia. Ua toe fetuuna’ia le taiala o le mamanu aloaia a le Ekalesia. O le uepisaite autu a le Ekalesia ua i ai nei o le ChurchofJesusChrist.org. O tuatusi mo imeli, igoa o domain, ma alaleo o faasalalauga faaagafesootai ua toe faafouina. O le tatou aufaipese faapelepele ua ta’ua nei o le Aufaipese a le Tapeneko i le Lotoa o le Malumalu.
Ua tatou oo i nei taumafaiga tulagaese aua a tatou aveesea le suafa o le Alii mai le igoa o Lana Ekalesia, ua tatou aveesea e aunoa ma le iloaina o Ia o le taulaiga totonugalemu o la tatou tapuaiga ma o tatou olaga. Ina ua tatou aveina le suafa o le Faaola i o tatou luga i le papatisoga, ua tatou tautino e molimau atu, e ala i a tatou upu, mafaufauga ma amioga, o Iesu o le Keriso.
Talu ai nei, sa ou folafola atu ai afai o le a tatou “faia le mea sili tatou te mafaia e toefuatai ai le igoa sa’o o le Ekalesia a le Alii,” o le a Ia “liligi mai … Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava.” Ou te faafouina lena folafolaga i le asō.
Ina ia fesoasoani ia i tatou ia manatua o Ia ma ia iloa O Le Ekalesia a Iesu Keriso o le Au Paia o Aso e Gata Ai o le Ekalesia a le Alii matou te fiafia lava e faalauiloa atu se faatusa o le a faailoa ai le tulaga totonugalemu o Iesu Keriso I Lana Ekalesia.
O lenei faatusa ua aofia ai le igoa o le Ekalesia o loo i ai i totonu o se maatulimanu. O Iesu Keriso o le maatulimanu autu.
I le totonugalemu o le faatusa o loo i ai se ata o le faatagata maamora a Thorvaldsen le Christus. O loo faaalia ai le Alii toetu ma soifua o loo aapa atu e opo mai tagata uma o le a o mai ia te Ia.
I se faatusa, o loo tu ai Iesu Keriso i lalo o se faaofuofu. O le faaofuofu ua faamanatu mai ai ia i tatou le Faaola toetu ua toetu mai le tuugamau i le aso tolu na sosoo ma Lona Faasatauroga.
O lenei faatusa e tatau ona masani ai le toatele, aua ua loa ona tatou faailoaina le talalelei toefuataiina i le Keriso soifua, ua toetu.
O le a faaaoga nei le faatusa e fai ma se faailo vaaia mo tusitusiga aloaia, talafou, ma mea e tutupu a le Ekalesia. O le a faamanatu atu ai i tagata uma o le Ekalesia lenei a le Faaola ma o mea uma tatou te fai, o ni tagata o Lana Ekalesia, e faatotonugalemu ia Iesu Keriso ma Lana talalelei.
O lenei, o’u uso e ma tuafafine pele, o taeao o le Aso Sa o le Laupama, e pei ona matua aoao mai ma le lelei e Elder Gong. Ona tatou ulufale atu ai lea i se vaiaso faapitoa e faamaea i le mea sili ona taua o le Eseta. I le avea ai ma soo o Iesu Keriso, o le ola ai i se aso ua tuu ai e le faama’i pipisi o le COVID-19 le lalolagi atoa i le vāvāō, ‘aua ne’i tau na ona tatou talanoa ia Keriso pe tala’i atu Keriso pe faaaoga se faatusa e faaalia ai Keriso.
Ia tatou tuu lo tatou faatuatua i le Alii o Iesu Keriso i ni faatinoga!
E pei ona outou silafia, e tausia e tagata o le Ekalesia le tulafono o le anapogi i se aso se tasi o masina taitasi.
O le aoaoga faavae o le anapogi e anamuā. Sa faatinoina e toa faaletusi paia mai i aso anamua. O Mose, Tavita, Esera, Neemia, Eseta, Isaia, Tanielu, Ioelu, ma le toatele o isi na anapopogi ma tala’i atu le anapogi. E ala i tusitusiga a Isaia, na fetalai mai ai le Alii: “E le o lenei ea le anapogi ou te loto i ai? Ina ia tatalaina fusi na faia i le amio leaga, e tatala fusi o le amo, e tuuina atu ia saoloto e ua faasauaina?”
Sa apoapoai mai le Aposetolo o Paulo i le Au Paia i Korinito ia “[outou] faasaga i le anapogi ma le tatalo.” Sa tautino mai e le Faaola Lava Ia e faapea e i ai mea faapitoa e “na o le tatalo ma le anapogi e o ese ai.”
Sa ou fai atu talu ai nei lava i se ata o faasalalauga faaagafesootai e faapea “i le avea ai ma se fomai ma se fomai tipitipi, ou te faamemelo tele mo aufaigaluega faafomai, saienitisi, ma i latou uma o loo galulue faasoloatoa e faaitiitia le pipisi o le COVID-19.”
O lenei, i le avea ai ma Peresitene o Le Ekalesia a Iesu Keriso o le Au Paia o Aso e Gata Ai ma se Aposetolo a Iesu Keriso, ou te iloa ua i ai i le Atua le mana uma, ma le poto uma, ma le malamalama uma; ua silafia e ia mea uma, ma o ia o se Tagata alofa mutimutivale, e oo i le olataga, o i latou o e e salamo ma talitonu i lona suafa.”
O lea la, i taimi o le luluti o tiga, ma pe a oo faama’i i tulaga pipisi ogaoga, o le mea sili ma masani mo i tatou e fai o le valaau atu lea i lo tatou Tama Faalelagi ma Lona Alo—le Fomai Sili—e faaali mai lo La’ua mana ofoofogia e faamanuia ai tagata o le lalolagi.
I la’u savali faavitio, sa ou valaaulia ai tagata uma ia auai i le anapogi i le Aso Sa, 29 o Mati, 2020. E toatele outou na vaai i le vitio ma auai i le anapogi. O nisi atonu e le’i anapogi. O loo tatou manaomia pea i le taimi nei le fesoasoani mai le lagi.
O le po nei la, o’u uso e ma tuafafine pele, i le agaga o atalii o Mosaea, o ē na tuu atu i latou lava i le anapogi ma le tatalo tele, ma i le avea ai ma se vaega o la tatou konafesi aoao ia Aperila 2020, ua ou valaau atu ai mo se isi anapogi i le lalolagi atoa. Mo tagata uma e gafatiaina e lona soifua maloloina, ia tatou toe anapopogi, tatalo, ma tuufaatasi lo tatou faatuatua. Ia tatou aioi atu ma le agaga taalo mo se toomaga mai lenei faama’i pipisi i le lalolagi atoa.
Ou te valaaulia tagata uma, e aofia ai i latou e le o nisi o lo tatou faatuatuaga, ia anapopogi ma tatalo i le Aso Maliu, Aso Faraile 10 o Aperila, ina ia mafai ona togafitia le faama’i pipisi o i ai nei, ia puipuia tausima’i, faamalosia le tamaoaiga, ma toe foi i le olaga masani.
E faapefea ona tatou anapogi? E lua meaai po o se taimi 24 itula ua masani ai. Ae tatau ona e filifili po o le a se mea e fai ma se taulaga mo oe, pe a e manatua le taulaga silisili na faia e le Faaola mo oe. Ia tatou lotogatasi i le aioi atu mo se faamalologa i le lalolagi atoa.
O le Aso Maliu o le aso sili lea o le a faafofogaina ai e lo tatou Tama Faalelagi ma Lona Alo i tatou!
Uso e ma tuafafine pele, Ou te faailoa atu lo’u alofa loloto mo outou, faatasi ai ma la’u molimau e uiga i le paia o le galuega o loo tatou punouai ai. O Le Ekalesia lenei a Iesu Keriso o le Au Paia o Aso e Gata Ai . O loo tu o Ia i lona faauluuluga ma taitai mea uma tatou te faia. Ou te iloa o le a Ia tali mai i aioiga a Lona nuu. Ou te molimau atu ai i le suafa paia o Iesu Keriso, amene.