O Se Faavae Lelei mo Aso Atalī
I tausaga a oo mai, sei o tatou faataga ia faaleleiga ua faia i le Malumalu o Sate Leki e uunaia ma musuia ai i tatou.
Talafaasolopito o le Malumalu o Sate Leki
Tatou manatu faapea o loo tatou i ai i se aoauli vevela i le aso 24 Iulai, 1847 pe tusa o le 2:00 i le aoauli. Ina ua mavae se malaga faigata i le 111 aso ma le 148 tagata o le Ekalesia sa tuufaatasia i le uluai vaega na agai atu i sisifo, o le taimi lea na gasegase ai Polika Iaga, a o Peresitene i le Korama a Aposetolo e Toasefululua, ma sa vaivai mai le fiva faavaomatua, ma sa ulufale atu i le Vanu o Sate Leki.
E lua aso mulimuli ane, a o faasolosolo manuia mai lona gasegase, sa taitai ai e Poliika Iaga ni isi o uso o le Korama a Aposetolo e Toasefululua ma isi i se malaga suesue. Sa tusifaamaumau e William Clayton: “Pe tusa ma le tolu kuata o se maila i matu o le tolauapiga, ae matou taunuu i se fanua matagofie e mafola pei se laulau, e mafola lelei ma manaia lona lilifa agai i sisifo”1
A o vailiilia ma le vaega le fanua, sa faafuasei ona tu Polika Iaga ma sunu’i lona tootoo i le eleele, ma alaga, “O iinei o le a tu ai le Malumalu o lo tatou Atua.” O se tasi o ana soa o Elder Uilifoti Uitilafi, o le sa ta’ua faapea o le saunoaga “na taia ai o [ia] e pei o se uila,” ma sa ia tutu’iina se lala laau i le eleele e maka ai le mea tonu na iloga i le tootoo o Peresitene Iaga. Sa filifilia le fasefulu eka (16 ha) mo le malumalu, ma sa tonu ai faapea e tatau ona faataatia le aai ia “faatafafa lelei i Matu & Saute, sasae & sisifo” ma le malumalu i le totonugalemu.2
I le konafesi aoao ia Aperila 1851, na autasi ai le palota a tagata o le Ekalesia e lagolagoina se manatu faatu e fau se malumalu “i le suafa o le Alii.”3 E lua tausaga mulimuli ane, i le aso 14 Fepuari, 1853, sa faapaiaina ai le nofoaga e Heber C. Kimball i se sauniga faitele sa auai ai le fia afe o le Au Paia, ma sa suatiaina le eleele mo le faavae o le Malumalu o Sate Leki. I ni nai masina mulimuli ane, i le aso 6 Aperila, na faataoto ai maatulimanu tetele o le malumalu ma sa faapaiaina i sauniga felanulanuai na aofia ai ma se vaega na tauaveina le tagāvai ma faaili ma se solo umi na taitaia e taitai o le Ekalesia mai le tapeneko tuai e oo atu i le tulaga o le malumalu, i le mea na tuuina atu ai saunoaga ma tatalo i le mea na i ai maa taitasi e fa.4
I le sauniga o le suatiaina o le eleele, sa toe ta’ua ai e Peresitene Iaga sa ia vaaia se faaaliga ina ua ia faatoa tuvae i le laueleele, a o latou vailiilia le laufanua o le vanu, e faapea, “Sa ou iloa [i lena taimi], e faapei lava ona ou iloa nei, o le eleele lenei e faatuina ai se malumalu—sa i o’u luma.”5
E sefulu tausaga mulimuli ane, ae fofogaina mai e Polika Iaga le malamalamaaga lenei faaperofeta i le konafesi aoao ia Oketopa 1863: “Ou te manao e vaai i [le] malumalu o fauina i se faiga o le a tumau e oo i le meleniuma. E le na o le pau lea o le malumalu o le a tatou fauina; ae o le a faitau selau malumalu e fauina ma faapaiaina i le Alii. O le a lauiloa lenei malumalu o le uluai malumalu e fauina i mauga e le Au Paia o Aso e Gata Ai. … Ou te manao i lena malumalu … e tu o se maafaamanatu mitamita o le faatuatua, lavapapale, ma le galulue malolosi o le au paia a le Atua i atumauga.”6
O le iloiloina o lenei talafaasolopito puupuu, ua ou maofa ai i le mana faaletagatavaai o Polika Iaga—muamua, o lona faamautinoaina faapea, i le mea e gata mai ai le mafai ma le, faaaogaina o metotia faufale na i ai i lena taimi ma le nofoaga, o le a fauina ai le Malumalu o Sate Leki i se ala e tumau ai e oo i le Meleniuma ma le lona lua, o lona valoiaina o le faatupulaia o malumalu i le lumanai i le lalolagi atoa, e oo lava i le faanumeraina i le tai selau.
Toe Faafouga o le Malumalu o Sate Leki
E faapei foi o Polika Iaga, o loo tausia e o tatou perofeta o ona po nei le Malumalu o Sate Leki ma isi malumalu uma ma le faautautaga tele. I le gasologa o tausaga, e fautuaina ai le Au Peresitene Sili, mai lea taimi i lea taimi le Au Epikopo Pulefaamalumalu ina ia mautinoa o mausali le faavae o le Malumalu o Sate Leki. A o o’u galue ai i le Au Epikopo Pulefaamalumalu, i le talosaga a le Au Peresitene Sili, sa matou faia ai se toeiloiloga aoao o le Malumalu o Sate Leki, e aofia ai le iloiloga o faafouga aupito lata mai o le mamanu o auala faatusiata mo le puipuiga ma auala o fausaga.
O ni vaega ia o le iloiloga na tuuina atu i le Au Peresitene i lena taimi: “I le mamanu ma le fausaga o le Malumalu o Sate Leki, sa faaaogaina ai punaoa faaenisinia aupito silisili, tomai faalegaluega, anomea faufale, o meaafale ma isi punaoa na maua i lea vaitau. Talu mai lona faapaiga i le 1893, sa tu mausali lava le malumalu ma sa avea o se faatusa o le faatuatua [ma le] faamoemoe ma o se malamalama i tagata. Sa faaaogaina se faaeteetega tele e faagaoioia ai, faamama, ma tausia le malumalu i se tulaga lelei. O tino maamora i fafo ma utupoto fesaua’i mai le tasi itu i le isi i le anoafale o loo tulaga lelei. Ua faamautu i ni suesuega talu ai nei e faapea, o le tulaga na filifilia e Polika Iaga mo le malumalu e lelei tele lona eleele ma e maualuga le maopo lelei e le faaleagaina ai le fausaga.”7
Sa faaiuina le iloiloga faapea sa manaomia ni lipea ma ni toe faaleleiga masani e toe faafou ma faamautu ai le malumalu, e aofia ai le tafafa taalaelae ma vaega i fafo, o tulaga faaeletise ua le toe aoga i aso nei, ma vaega mo papatisoga. Peitai, sa fautuaina foi le fuafuaina o se faafouga lavelave faatusiata mo le puipuiga e amata mai le faavae o le malumalu ma agai atu ai i luga.
O Le Faavae o le Malumalu
Atonu tou te manatua, o Peresitene Polika Iaga lava ia sa aofia tele ai i le fauga o le uluai faavae o le malumalu, lea na tautua lelei ai le malumalu talu mai ona maea i le 127 tausaga talu ai. O itutino uma ma elemene o le faafouga fautuaina mo le puipuiga o le malumalu o le a faaaoga ai nofoaga tutasi faatekinolosi, lea sa lei mafaufauina i le taimi na fausia ai. O lea faiga ua manatulia o le faatufugaga faaenisinia aupito lata mai mo le puipuiga mai mafuie.
O lea tekinolosi, e fou lona atina’ega, ua amata i le faavae tonu o le malumalu, e maua ai se puipuiga malosi mai le faaleagaina e se mafuie. O le itu aupito taua, e faamalosia ai le fausaga o le malumalu ina ia tu mausali, tusa lava pe galulu le eleele ma ona siosiomaga i ni mafuie.
O le faafouga o le malumalu o le a faaaoga ai lea tekinolosi sa fofogaina mai e le Au Peresitene Sili i le tausaga ua te’a. I lalo o le taitaiga a le Au Epikopo Pulefaamalumalu, sa amataina le fausaga i ni nai masina talu ai, ia Ianuari 2020. Ua fuafua e mae’a pe a ma le fa tausaga.
Faamautinoaina o Lou Faavae Patino
A o ou manatunatu loloto i le isi fa tausaga o le ola o lenei Malumalu matagofie, mamalu, faaeaina, ma le ofoofogia o Sate Leki, ou te vaai i ai o se taimi o le faafouga nai lo se taimi o le tapunia! I se tulaga e tutusa ai, e mafai ona tatou fesili ifo ia i tatou lava, “E mafai faapefea ona musuia i tatou e lenei faafouga tele o le Malumalu o Sate Leki e fai o tatou lava faafouga, toefausia, toefanauina, toefaaolaola, pe toefuataifaaleagaga?”
O se iloiloga o’oo’o e ono faaali mai ai e faapea, e mafai foi e i tatou ma o tatou aiga ona manuia mai lo tatou faia o ni nai teuteuga faaleagaga moomia ma galuega toe faufau, e oo lava i le faafouga mo le puipuiga mai mafuie. E mafai ona tatou amataina se na faagasologa i le fesili:
“E faape’i ni foliga o lo’u faavae?
“O a ni mea o fau ai maatulimanu puipui-mafiafia, mautu, malolosi o se vaega o lo’u faavae patino, lea o loo taoto ai la’u molimau?”
“O a elemene faalefaavae o lo’u tagata faaleagaga ma faalelagona o le a ou mafai ai ma mafai e lo’u aiga ona tumau mausali ma le lē maluelue, e tatalia ai le galulu o le lalolagi ma gaoioiga ogaoga mo le puipuiga o le a oo mai i o matou olaga?”
O nei mea na tutupu, e tai pei o se mafuie, e tele ina faigata ona muai iloa ma e oo mai i maualuga eseese o le malosi—e tauivi ma fesili po o le masalosalo, e fetaiai ma mafatiaga po o puapuaga, e aafia mai le lototiga o le tagata ia i taitai o le Ekalesia, i tagata o le ekalesia, i aoaoga faavae, po o aiaiga faavae. O le puipuiga sili lava mai nei mea o loo taoto i lo tatou faavae faaleagaga.
Mata o a ni maatulimanu faaleagaga o o tatou olaga faaletagata lava ia ma faaleaiga? Atonu o mataupu faavae faigofie, manino, ma le taua o le ola ai i le talalelei—tatalo faaleaiga; suesuega o tusitusiga paia, e aofia ai le Tusi a Mamona; auai i le malumalu; ma le aoaoina o le talalelei e ala i le Sau, Mulimuli Mai ia te A’u ma afiafi faaleaiga. O isi punaoa aoga e faamalosi ai lou faavae faaleagaga e mafai ona aofia ai Mataupu Faavae o le Faatuatua, le folafolaga i aiga, ma le “O Le Keriso Soifua.”
Mo a’u lava ia, o mataupu faavae ua aofia ai i fesili e talanoaina o se vaega o le mauaina o se pepa faataga o le malumalu ua avea o se amataga malosi mo se faavae faaleagaga—aemaise o fesili muamua e fa. Ou te vaai i ai o ni maatulimanu faaleagaga.
E moni, ua tatou masani ma nei fesili, e pei ona faitau auaua’i mai e Peresitene Russell M. Nelson ia i tatou i le konafesi aoao talu ai.
-
E i ai sou faatuatua ma sau molimau i le Atua, le Tama Faavavau; o Lona Alo, o Iesu Keriso; ma le Agaga Paia?
-
E i ai sau molimau i le Togiola a Iesu Keriso ma Lana matafaioi i le avea ai ma ou Faaola ma Togiola?
-
E i ai sau molimau i le Toefuataiga o le talalelei a Iesu Keriso?
-
E te lagolagoina le Peresitene o Le Ekalesia a Iesu Keriso o le Au Paia o Aso e Gata Ai o le perofeta, tagatavaai, ma tali faaaliga ma ua na o ia lava le tagata i le lalolagi ua faatagaina e faaaogaina ki uma o le perisitua?8
Pe o mafai ona e vaai atu i le ala e mafai ona e mafaufau ai i nei fesili o ni elemene taua i lou faavae patino e fesoasoani ai e fauina ma toefaamalosi ai? Na aoao atu Paulo i Efeso e uiga i se ekalesia sa “atina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea; ua faatatauina ia te ia le fale atoa, o loo alu ae, ina ia fai ma malumalu paia i le Alii.”9
O se tasi o olioliga sili o lo’u olaga o le mafuta lea ma musuia e tagata o le Ekalesia i le salafa o le lalolagi o ē o ni faataitaiga o le faatuatua ia Iesu Keriso ma Lana talalelei. E malolosi o latou faavae patino ua mafai ai e i latou ona tatalia mea matautia e tutupu ma le malamalama mausali, e ui i lo latou loto nutimomoia ma le tiga.
Ina ia faaalia lenei mea i se tulaga sili ona patino, sa ou lauga i le falelauasiga o se āvā lalelei, malosi talavou ma o se tina (o se uo foi a lo matou aiga). Sa avea o ia ma tagata taalo soka iloga i le Vaega 1 ina ua ia feiloai ma faaipoipo i lana tane sa a’oga faafomai nifo. Sa faamanuiaina i la’ua i se afafine lalelei, ma le atamai. Sa tauivi o ia ma le lototoa ma ituaiga kanesa eseese mo tausaga faigata e ono. E ui i le uogo o tiga faalelagona ma faaletino sa ia oo i ai, ae sa ia faalagolago i lona Tama Faalelagi alofa ma sa tele ina ta’ua soo e i latou sa lagolagoina o ia i faasalalauga faaagafesootai i lana faaupuga lauiloa: “O loo i ai le Atua i auiliiliga uma o o tatou olaga.”
I luga o se tasi o ana tusiga faasalalau faaagafesootai, sa ia tusia ai e faapea sa fesili atu se tasi ia te ia, “E faapefea ona i ai pea lou faatuatua faatasi ma le lototiga uma o loo vagaia ai oe?” Sa ia tali atu ma le mausali i upu nei: “Aua o le faatuatua o le mea lea o loo mafai ai ona ou ola i nei taimi o le pogisa. O le i ai o le faatuatua e le faapea o le a leai se mea leaga e tupu. O le i ai o le faatuatua e faatagaina a’u e talitonu o le a toe i ai foi le malamalama. Ma o lena malamalama o le a sili atu ona susulu aua sa ou savali e ui atu i le pogisa. E ui ina tele le pogisa sa ou molimauina i le tele o tausaga, ae ua molimauina le tele atu o le malamalama. Ua ou vaai i vavega. Ua ou lagonaina agelu. Ua ou iloa sa lagolagoina a’u e lo’u Tama Faalelagi. E leai se mea o na mea semanu ou te oo i ai, pe ana faigofie le olaga. Atonu o le a le iloa le lumanai o lenei olaga, ae o lo’u faatuatua e le uma. Afai ou te filifili ia leai so’u faatuatua, ona ou filifili lea e na ona savali i le pogisa. Aua a aunoa ma le faatuatua, ua na o le pogisa e totoe.”10
O lana molimau e le malulue o le faatuatua i le Alii o Iesu Keriso—i ana upu ma i ana faatinoga—o se musumusuga mo isi. E ui o lona tino sa vaivai, ae sa ia siitia isi ina ia malolosi atu.
E faapei o lenei tuafafine, ou te mafaufau i le tele o isi tagata o le Ekalesia, o toa e pei o ia, o ē savavali i aso taitasi i le faatuatua, tauivi ia avea ma soo moni e le solomuli o lo tatou Faaola, o Iesu Keriso. Latou te a’oa’o e uiga ia Keriso. Latou te tala’i atu Keriso. Latou te tauivi e faataitai ia te Ia. Pe mausali pe lē mausali aso o o latou olaga, e malosi lava lo latou faavae ma e le masiiese.
O i latou nei o agaga tuuto o e ua malamalama i le uiga loloto o upu “Le faavae malosi, le au paia e” ma le “e sulu ia Iesu e malu i latou.”11 E le mafuatiaina lo’u lotofaafetai i le ola faatasi ai ma i latou o ē ua saunia se faavae faaleagaga ua agavaa ai i le igoa o le Au Paia ma i latou e malolosi ma lava le uta e tatalia ai le tele o faigata o le olaga.
Ou te le manatu e mafai ona gata lo tatou faamamafaina o le taua o lena faavae malosi i o tatou olaga patino. E oo lava i le popofou o le olaga, e a’oa’oina a tatou fanau Peraimeri a o latou pepese i lenei upumoni:
Le fale o le poto ua fau i luga o le papa,
Ona to mai lea o le timui lalo. …
Ua to mai le timuua alu ae le tafe,
Ona tu pea lea i le papao le fale.12
O loo toe faamalosia e tusitusiga paia lenei aoaoga faalefaavae. Sa a’oa’o atu e le Faaola ia tagata i Amerika:
“Ma afai tou te faia pea nei mea amuia lava outou, ona ua outou atiae i luga o la’u papa.
“Ae o soo se tasi e i totonu ia te outou na te faia se mea e sili atu pe itiiti mai nai lo nei mea, ua le atiae i luga o la’u papa, a ua atiae i luga o se faavae oneone; ma pe a to mai uaga, ma oo mai lologa, ma agi mai matagi, ma taia ai i latou, o le a pauu i latou.”13
O le faamoemoega faamaoni o taitai o le Ekalesia ia saofaga ia faafouga maoae o le Malumalu o Sate Leki i le faataunuuga o le manao o Polika Iaga ia vaai “i [le malumalu o fauina i se faiga o le a tumau ai e oo i le meleniuma.” I tausaga a oo mai, sei o tatou faataga nei faaleleiga ua faia i le Malumalu o Sate Leki e uunaia ma musuia ai i tatou, o ni tagata taitoatasi ma aiga, ina ia faapena foi i tatou—i se faatusatusaga—ina “ia fauina i se auala o le a tumau ai e oo i le meleniuma.”
O le a tatou faia pe a tatou faataunuuina le poloaiga a le Aposetolo o Paulo ia “[teuina] mo [i tatou lava] oloa o le faavae lelei mo aso atali, ina ia [tatou] fetagofi atu i le ola e faavavau.”14 O la’u tatalo pulunaunau ia mautu ma mausali lo tatou faavae faaleagaga, ia avea la tatou molimau i le Togiola a Iesu Keriso ma Lana matafaioi i le avea ai ma o tatou Faaola ma le Togiola, ma o tatou lava maatulimanu autu, o le ou te molimau atu ai i Lona suafa, o Iesu Keriso lea, amene.