O Se Valaauga e Faapitoa Lona Tamalii

Saunia e Joy D. Jones

Peresitene Aoao o le Peraimeri

I le avea ai ma tamaitai o le faatuatua, e mafai ona tatou mafaufau i mataupu faavae o le upumoni mai aafiaga o le Perofeta o Iosefa lea e tuuina mai ni malamalamaaga mo le mauaina o a tatou lava faaaliga.

Ou te faafetai i le taulai atu o la’u tautalaga i matafaioi faifaipea a tamaitai i le Toefuataiga. E manino lava i le talafaasolopito atoa sa i ai lava se nofoaga faapitoa a tamaitai i le fuafuaga a lo tatou Tama Faalelagi. Na aoao mai Peresitene Russell M. Nelson: “O le a le mafai ona fua le faatosinaga a … tamaitai, e le gata i aiga ae faapea i le Ekalesia a le Alii, o ni ava, tina, ma tinamatutua; o ni tuafafine ma ni aunts; o ni faiaoga ma taitai; aemaise ai o ni faataitaiga aupito silisili ma ē puipuia ma le faamaoni le faatuatuaga.” ¹

I le popofou o le Aualofa i Navu, i le 178 tausaga ua mavae, na apoapoai atu ai le Perofeta o Iosefa Samita i tamaitai ina ia “ola e tusa ai ma lo [latou] avanoa.” ² O a latou faataitaiga o loo aoao mai ai i tatou i aso nei. Sa latou mulimuli ma le lotogatasi i le siufofoga o le perofeta ma ola ma le faatuatua mausali ia Iesu Keriso a o latou faataatiaina le faavae ua tatou tutu ai nei. Uso e, o lo tatou taimi lenei. Ua i ai se tatou galuega paia mai le Alii, ma o a tatou sao faamaoni ma tulagaese e taua tele.

Na faamatalaina mai e Peresitene Spencer W. Kimball: “O le avea ma se tamaitai amiotonu i le taimi faaiu i lenei lalolagi, a o lumanai le afio mai faalua o lo tatou Faaola, o se valaauga e faapitoa lona tamalii. O le malosi ma aafiaga o tamaitai amiotonu i aso nei e mafai ona faasefuluina [le tulaga] e oo i ai i taimi e sili atu ona filemu.” ³

Na faapena foi ona talosaga mai Peresitene Nelson: “Ou te augani atu ai i o’u tuafafine o [le] Ekalesia … e laa i luma! Tu i lou tulaga tonu ma le manaomia i lou aiga, i lou nuu, ma i le malo o le Atua—ia sili atu nai lo le mea sa e i ai muamua.” ⁴

Talu ai nei, na faamanuiaina a’u, faatasi ai ma se vaega o tamaiti Peraimeri, e feiloai ma Peresitene Russell M. Nelson i se fale e faatusa i le fale o le aiga o le au Samita i Palamaira, Niu Ioka. Faalogo ao aoao atu e lo tatou perofeta tamaiti i mea e mafai ona latou faia e laa ai i luma.

1:55

Sister Jones: “Ou te fia iloa pe i ai sau fesili e te fia fesili ai ia Peresitene Nelson. O loo e saofai iinei ma le perofeta. E i ai se mea ua leva ona e fia fesili ai i se perofeta? Ia, Pearl.”

Pearl: “E faigata le avea ma se perofeta? E te, pisi tele?”

Peresitene Nelson: ”Ioe e faigata. O mea uma e faatatau i le avea atili ma Faaola e faigata. Mo se faataitaiga, ina ua finagalo le Atua e tuu atu ia Mose Tulafono e Sefulu, o fea na Ia ta’u atu ia Mose e alu i ai? I luga o le tumutumu o se mauga, i luga o le Mauga o Sinai. O lea na savali ai Mose i luga o le tumutumu o lena mauga e aumai Tulafono e Sefulu. Ia, atonu na mafai ona fetalai mai le Tama Faalelagi, ‘Mose, amata mai oe iina, ae amata atu a’u iinei, ma o le a ou faafetauia oe i le afa o le auala.’ Leai, e fiafia le Alii i taumafaiga, aua o taumafaiga e aumaia ai taui lea e le mafai ona oo mai e aunoa [ma taumafaiga]. Mo se faataitaiga, na ave ni au lesona piano?”

Tamaiti: ”Ioe.”

Pearl: “E ave la’u vaiolini.”

Peresitene Nelson: “Ma e te faataitaia?”

Tamaiti: ”Ioe.”

Peresitene Nelson: “O le a le mea e tupu pe a e le faataitaia?”

Pearl: “E galo ia oe.”

Peresitene Nelson: “Ioe, e te le alualu i luma, a ea? O le tali la o le ioe, Pearl. E manaomia ai le taumafaiga, le tele o le galue malosi, tele o suesuega, ma e leai se iuga. Manaia! Manaia, ona o loo tatou alualu pea i luma. E oo lava i le olaga a sau o loo tatou alualu i luma.”

O le tali atu a Peresitene Nelson i nei fanau pele ua faalauteleina mai ia i tatou taitoatasi. E fiafia le Alii i taumafaiga, ma o taumafaiga e aumaia ai taui. Tatou te aoao pea. O loo tatou alualu pea i luma pe a tatou taumafai e mulimuli i le Alii. ⁵ E le o faamoemoe mai o Ia ia atoatoa i le asō. Tatou te feaei pea i la tatou lava Mauga o Sinai. E pei o taimi ua mavae, ioe, e manaomia e la tatou faigamalaga se taumafaiga, galue malosi, ma le suesue, peitai o lo tatou tautino atu ia alualu i luma e aumai ai ni taui e faavavau. ⁶

O a nisi mea tatou te aoaoina mai le Perofeta o Iosefa Samita ma le Uluai Faaaliga e uiga i taumafaiga, galue malosi, ma le suesue? E tuuina mai ia i tatou e le Uluai Faaaliga le taiala mo o tatou matafaioi tulagaese ma faaauauina. I le avea ai ma tamaitai o le faatuatua, e mafai ona tatou mafaufau i mataupu faavae o le upumoni mai aafiaga o le Perofeta o Iosefa lea e tuuina mai ni malamalamaaga mo le mauaina o a tatou lava faaaliga. Mo se faataitaiga:

Tatou te galulue i lalo o tulaga faigata.
Tatou te liliu atu i tusitusiga paia ia maua ai le poto e faatino ai.
Tatou te faataitaia lo tatou faatuatua ma le faalagolago i le Atua.
Tatou te faaaogaina lo tatou malosi e augani atu ai i le Atua e fesoasoani mai ia i tatou e tetee atu i le faatosinaga a le tiapolo.
Tatou te ofoina atu manaoga o o tatou loto i le Atua.
Tatou te taulai atu i Lona malamalama e taitaia a tatou filifiliga o le olaga ma ia i ai i o tatou luga pe a tatou liliu atu ia te Ia.
Ua tatou iloa Na te silafia i tatou taitoatasi i le igoa ma e i ai matafaioi patino mo i tatou e faataunuu. ⁷

E le gata i lea, na toefuatai mai e Iosefa Samita le malamalama faapea o loo ia i tatou le gafatia paia ma le taua e faavavau. Ona o lena sootaga ma lo tatou Tama Faalelagi, ou te talitonu Na te faamoemoeina i tatou ia maua faaaliga mai ia te Ia.

Na faatonuina e le Alii Ema Samita ina ia “maua le Agaga Paia,” aoao atili, “tuu ese mea o lenei lalolagi, … saili mo mea o se lalolagi sili atu ona lelei,” ma “pipii i [ana] feagaiga” ma le Atua. ⁸ O le aoaoina e taua mo le alualu i luma, aemaise lava ona o le mafutaga faifaipea a le Agaga Paia o loo aoaoina i tatou i mea e manaomia mo i tatou taitoatasi ona tuu ese—o lona uiga o mea e ono faalavelave ia i tatou pe faatuai lo tatou alualu i luma.

Na saunoa Peresitene Nelson, “Ou te aioi atu ia te outou ia faateleina lo outou gafatia faaleagaga e maua ai faaaliga.” ⁹ O loo tumau pea upu a lo tatou perofeta ia te a’u a o ou mafaufau ai i le gafatia a tamaitai e laa ai i luma. O lona aioi mai ia i tatou, o se faailoga lea o le taua. O loo ia aoao mai i tatou i le ala e ola ai faaleagaga i se lalolagi e ma’i-faaleagasala e ala i le mauaina ma faatino ia faaaliga. ¹⁰ A o tatou faia, faamamaluina ma ola i poloaiga a le Alii, ua folafola mai ia i tatou, e pei o Ema Samita, “se pale o le amiotonu.” ¹¹ Na aoao mai e le Perofeta o Iosefa le taua o le iloaina faapea o le ala o loo tatou tulitulimatai atu i ai i lenei olaga ua faamaonia e le Atua. A aunoa ma lena malamalama o le a tatou “vaivai i [o tatou] mafaufau ma matapogia.” ¹²

I lenei konafesi, o le a tatou faalogo ai i upumoni lea e uunaia i tatou ia suia, faaleleia, ma faamama o tatou olaga. O faaaliga patino, o le a mafai ai ona tatou taofia mea na ta’ua e nisi o le “lofituina e le konafesi aoao”—pe a tatou o ese mai ma le naunautai ia faia o mea uma i le taimi nei. E tele pulou e pulouina e tamaitai, ae e le mafai, ma e le manaomia, le pulouina uma i le taimi e tasi. E fesoasoani le Agaga ia i tatou e fuafua po o fea le galuega e taulai i ai i le asō. ¹³

O le faatosinaga alofa a le Alii e ala i le Agaga Paia e fesoasoani mai ia i tatou ina ia iloa mea Na te faamuamua mo lo tatou alualu i luma. O le usitaia o faaaliga patino e taitai atu ai i le alualu i luma patino. ¹⁴ Tatou te faalogo ma faatino. ¹⁵ Na fetalai mai le Alii, “Ole atu i le Tama i lo’u igoa, i le faatuatua ma le talitonu o le a oulua maua, ma o le a oulua maua ai le Agaga Paia, lea na te faaali atu mea uma e tatau mo le fanauga a tagata.” ¹⁶ O lo tatou matafaioi faifaipea o le mauaina o faaaliga faifaipea.

Pe a tatou mauaina se tikeri sili atu o le agavaa i le faia o lea mea, o le a mafai ona tatou maua le mana sili i a tatou matafaioi taitoatasi e auauna atu ai ma faataunuu le galuega o le faaolataga ma le faaeaga—ina ia “tuu ese [moni ai] mea o lenei lalolagi, ma saili mo mea o se lalolagi sili atu ona lelei.” ¹⁷ Ona mafai lea ona tatou uunaia ma le mataalia la tatou tupulaga faia’e e fai lea mea e tasi.

Uso e ma tuagane, tatou te saili uma lava le mana o le Atua i o tatou olaga. ¹⁸ E i ai se lotogatasi matagofie i le va o tamaitai ma alii i le faataunuuina o le galuega a le Atua i lenei vaitaimi. Tatou te mauaina le mana o le perisitua e ala i feagaiga, lea na muai osia i vai o le papatisoga ona sosoo ai lea ma totonu o puipui o malumalu paia. ¹⁹ Na aoao mai Peresitene Nelson, “O tamaitai uma ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua.” ²⁰

O la’u tautinoga patino i le asō i le avea ai ma se tamaitai, ou te le’i iloaina lava muamua i lo’u olaga na ou mauaina, e ala i a’u feagaiga, le mana o le perisitua. ²¹ Uso e, ou te tatalo o le a tatou iloaina ma faapelepele i le mana o le perisitua ao tatou “pipii atu [ia tatou] feagaiga,” ²² opogi le moni o tusitusiga paia, ma usitai i upu o o tatou perofeta soifua.

Sei o tatou tautino atu ma le lototoa lo tatou tuuto i lo Tama Faalelagi ma lo tatou Faaola, “ma le faatuatua lē mafaagaeetia ia te ia, ma le faalagolago atoa i galuega a ia o lē ua malosi aoao e laveai.” ²³ Sei o tatou faaauauina ma le fiafia lenei faigamalaga e agai atu i lo tatou gafatia maualuga faaleagaga ma fesoasoani ia i latou o siomia i tatou ia faia lea mea e tasi e ala i le alofa, auaunaga, taitaiga, ma le agaalofa.

Na faamanatu mai ma le alofa ia i tatou e Elder James E. Talmage, “O le siamupini maoae i le lalolagi o tamaitai ma le tulaga faatamaitai o Iesu Keriso.” ²⁴ I le iloiloga mulimuli o matafaioi faifaipea a tamaitai i le Toefuataiga, ma mo i tatou uma, o le a le matafaioi e sili ona taua? Ou te molimau atu o le faalogo ia te Ia, ²⁵ mulimuli ia te Ia, ²⁶ faalagolago ia te Ia, ²⁷ ma ia avea ma se faalautelega o Lona alofa. ²⁸ Ou te iloa o loo soifua o Ia. ²⁹ I le suafa paia o Iesu Keriso, amene.