Faaaliga mo le Ekalesia, Faaaliga mo o Tatou Olaga
Saunia e Peresitene Russell M. Nelson
I aso a sau, o le a le mafai ona tatou ola faaleagaga e aunoa ma le taiala, taitaiga, faamafanafanaga, ma le faatosinaga faifaipea a le Agaga Paia.
O se avanoa faamamaluina le faamanatuina o le Eseta faatasi ma outou i lenei Aso Sa o le konafesi aoao! E leai se isi mea e sili atu ona talafeagai nai lo le faamanatuina o le mea sili ona taua sa tupu i lenei lalolagi e ala i le tapuai atu i le tagata e aupito sili ona taua sa savalia lenei fogaeleele. I lenei Ekalesia a Iesu Keriso o le Au Paia o Aso e Gata Ai, tatou te tapuai atu ia te Ia o le na faataunuuina Lana Togiola le i’u i le Faatoaga i Ketesemane. Sa finagalo o Ia e mafatia mo agasala ma vaivaiga o i tatou taitoatasi, o ia mafatiaga na mafua ai ona “tafe toto [mai Ona] pu afu uma.”1 Sa faasatauroina o Ia i luga o le satauro i Kalevario2 ma toetu mai ai i le aso tolu e avea ma tagata na muamua toetu mai o le fanau a lo tatou Tama Faalelagi. Ou te alofa ia te Ia ma molimau atu o loo soifua o Ia! O Ia lava lea o loo taitaia ma taialaina Lana Ekalesia.
A aunoa ma le Togiola le i’u a lo tatou Faaola, e leai ma se tasi o i tatou e maua le faamoemoe e toefoi atu i lo tatou Tama Faalelagi. Ana le seanoa ma Lona Toetu, o le oti lava la le mutaaga. O le Togiola a lo tatou Faaola ua mafai ai ona maua le ola e faavavau ma avea ai le tino ola pea o se mea moni mo tagata uma.
Ua mafua ona o Lana misiona maoae ma le filemu na Ia faamatuu mai i Ona soo lea sa ma mauaina ma lo’u toalua o, Wendy, i le po o le aso 2 o Ianuari, 2018, ina ua ma feala i se telefoni na ta’u mai ai ia i ma’ua ua laa ese atu Peresitene Thomas S. Monson i le veli.
Oka so tatou misia o Peresitene Monson! Tatou te faamamaluina lona soifuaga ma lona talatuu. O se tamalii faaleagaga maoae, ua ia tuua se aafiaga lemafaagaloina i luga o i latou uma e iloaina o ia ma luga o le Ekalesia na te alofa i ai.
I le Aso Sa, 4 o Ianuari, 2018, i le potualuga o le Malumalu i Sate Leki, sa toefaatulagaina ai le Au Peresitene Sili i le mamanu faigofie ae paia na faavaeina e le Alii. Ona oo lea ananafi i le faapotopotoga paia, sa sii ai e tagata o le Ekalesia i le lalolagi atoa o latou lima e faamautu faatinoga na muai faia e Aposetolo. Ou te faafetai ma le lotomaualalo mo la outou palota lagolago.
Ou te faafetai foi mo i latou na muamua atu ia te a’u. O se avanoa mo a’u le auauna ai i le Korama a Aposetolo e Toasefululua mo le 34 tausaga ma iloa patino ai le toa 10 o Peresitene e 16 na muamua atu o le Ekalesia. E tele mea ua ou aoaoina mai ia i latou taitoatasi.
E tele foi mea ou te nofoaitalafu ai i o’u tuaa. O o’u matua o matua matutua uma e toavalu o ni tagata liliu mai i le Ekalesia i Europa. O agaga totoa taitoatasi uma nei sa ositaulagaina mea uma e o mai ai i Siona. Peitai, i le gasologa o augatupulaga, e lei tumau le tuuto atoa atu o ou tuaa uma. O se taunuuga, sa le’i tausi a’e a’u i se aiga e faatotonugalemu i le talalelei.
Sa ou faamemelo i o’u matua. O i la’ua o mea uma ia te a’u ma ou aoaoina ai ni lesona taua tele. E le lava lo’u faafetai ia i laua mo le olaga fiafia i le aiga sa la’ua fatuina mo a’u ma o’u tei. Ae, e oo foi lava a o o’u tamaitiiti, sa ou iloa lava sa ou misia se mea. I se tasi aso sa ou oso ai i luga o se taavale la’u pasese ma alu i se faletusi o le Ekalesia e sue se tusi e uiga i le Ekalesia. Sa ou fiafia lava e aoao e uiga i le talalelei.
Ina ua oo ina ou malamalama i le Upu o le Poto, sa ou manao i ou matua ia ola i lena tulafono. O lea la, i se tasi aso a o ou talavou, sa ou alu ai i le matou fola pitoilalo ma ta’ei uma ai fagu malosi i luga o le fola sima. Sa ou faamoemoeina lo’u tama na te faasalaina a’u, ae sa leai ma sana tala.
Ina ua ou matua ma amata ona malamalama i le ofoofogia o le fuafuaga a le Tama Faalelagi, sa tele ina ou faapea ifo ia te a’u lava ia, “Ou te le toe fia manao lava i se isi meaalofa o le Kerisimasi! Ua na o lo’u manao lava ia faamauina i o’u matua.” Sa le’i tupu lea mea na leva ona ou faananau i ai seia oo ina pasia e o’u matua lo la ta’i 80 tausaga, ona tupu loa lea. E le mafai ona ou faaalia atoa atu le olioli lea sa ou lagonaina i lena aso,3 ma ou te lagonaina i aso taitasi lena olioli o le la faamauga ma lo’u faamau atu ia i laua.
I le 1945, a o ou i ai i le aoga faafomai, sa ou faaipoipo atu ia Dantzel White i le Malumalu i Sate Leki. Sa faamanuiaina i ma’ua i ni afafine ofoofogia se toaiva ma le atalii faapelepele e toatasi. O le asō o le matou aiga ua matua faatoateleina o se tasi lea o olioliga silisili o lo’u olaga.
I le 2005, i le mavae ai o le toeitiiti 60 tausaga o le ma faaipoipoga, sa faafuasei ai ona valaauina la’u pele o Dantzel e toe foi atu i le aiga. Mo se vaitau, sa toetoe lava a ou pipili i lo’u lotofaavauvau. Ae o le savali o le Eseta ma le folafolaga o le toetu sa lagolagoina a’u.
Ona aumai lea e le Alii ia Wendy Watson i o’u autafa. Sa faamauina i ma’ua i le Malumalu o Sate Leki i le aso 6 o Aperila, 2006. E ese lo’u alofa ia te ia! O ia o se tamaitai tulagaese—o se faamanuiaga maoae ia te a’u, i lo matou aiga, ma i le Ekalesia atoa.
O nei faamanuiaga taitasi na oo mai o se taunuuga o le saili atu ma le faalogo i uunaiga a le Agaga Paia. Sa saunoa mai Peresitene Lorenzo Snow, “O le avanoa sili lea mo Au Paia o Aso e Gata Ai taitasi … o la tatou aiā tatau le mauaina o faaaliga a le Agaga i o tatou olaga i aso taitasi.”4
O se tasi o mea na uunaia soo e le Agaga i lo’u mafaufau talu mai lo’u valaauga fou o le Peresitene o le Ekalesia o le naunau o le Alii e faaali mai Lona mafaufau ma le finagalo. O le avanoa o le mauaina o faaaliga o se tasi lea o meaalofa silisili a le Atua i Lana fanau.
E ala mai i faaaliga a le Agaga Paia, o le a fesoasoani mai ai le Alii i a tatou sailiga amiotonu uma. Ou te manatua i se potu o taotoga, sa ou tu ai i autafa o se gasegase—sa le mautinoa pe faapefea ona faatino se taotoga fou ma le lemailoa—ma sa lagonaina le faamalamalamaina mai e le Agaga Paia o le metotia i lo’u mafaufau.5
Ina ia faamalosia la’u talosaga ia Wendy, sa ou fai atu ai ia te ia, “Ou te malamalama e uiga i faaaliga ma le auala e maua ai.” I le viia ai o ia—ma, ina ua ou iloaina, ona uiga masani—ua uma lava ona ia saili atu ma mauaina lana lava ia faaaliga e uiga ia i ma’ua, lea na ia maua ai le lototele e fai mai ai ioe.
I le avea ai ma se uso o le Korama a Aposetolo e Toasefululua, sa ou tatalo i aso uma mo faaaliga ma avatu le faafetai i le Alii i taimi uma na fetalai mai ai o Ia i lo’u loto ma le mafaufau.
Mafaufau i le vavega o lena mea! Po o le a lava lo tatou valaauga i le Ekalesia, e mafai ona tatou tatalo i lo tatou Tama Faalelagi ma maua mai le taiala ma le taitaiga, ia lapata’ia e uiga i mea lamatia ma mea faalavefau, ma ia mafai ai ona faataunuu mea e le mafai ona tatou faia e i tatou lava ia. Afai tatou te maua moni lava le Agaga Paia ma aoao ia iloatino ma malamalama i Ana uunaiga, o le a taialaina i tatou i mataupu tetele ma laiti.
Ina ua ou feagai talu ai nei ma se tiute faigata tele o le filifilia o ni fesoasoani se toalua, sa ou tuufesili pe mafai faapefea ona ou filifilia na o le toalua mai le toasefululua o tamalii o e ou te alofa ma faaaloalo i ai.
Ona ou te iloa o lena musumusuga lelei sa faavae i luga o faamatalaga lelei, sa ou feiloai taitoatasi ma le agaga tatalo ma Aposetolo taitasi.6 Ona ou tuumuli atu lea na o a’u i se potu patino i le malumalu ma saili atu i le finagalo o le Alii. Ou te molimau atu na faatonuina a’u e le Alii e filifili Peresitene Dallin H. Oaks ma Peresitene Henry B. Eyring e auauna atu e avea ma o’u fesoasoani i le Au Peresitene Sili.
I se tulaga lava faapena, ou te molimau atu ai na musuiaina e le Alii le valaauina o Elder Gerrit W. Gong ma Elder Ulisses Soares ina ia faauuina e avea ma Ana Aposetolo. Tatou te faafeiloai atu ia i la’ua i lenei usoga tulagaese o auaunaga.
A matou potopoto o se Aufono a le Au Peresitene Sili ma le Korama a le Toasefululua, e avea a matou potu fono ma potu o faaaliga. E iloagofie le afio ai o le Agaga. A matou tauivi ai ma ni mataupu lavelave, e matala mai se faagasologa faagaeetiaina a o faaalia ma le saoloto e Aposetolo taitoatasi ona mafaufauga ma manatu. E ui atonu e eseese i matou i o matou manatu i le amataga, ae o le alofa matou te lagonaina mo le tasi ma le isi e tumau. E fesoasoani lo matou lotogatasi ia i matou e iloatino le finagalo o le Alii mo Lana Ekalesia.
I a matou fonotaga, e le mafuli ni faaiuga i le itu e toatele i latou e tutusa manatu! Matou te faalogo ma le agaga tatalo i le tasi ma le isi ma talanoa ma le tasi ma le isi seia oo ina matou autasi. A oo la ina matou ausia le tasi atoatoa, o le faatosinaga autasi a le Agaga Paia e matua faagaeetiaina lava. Matou te lagonaina le mea na silafia e le Perofeta o Iosefa Samita ina ua ia aoao mai, “E ala i le gatasi o lagona tatou te maua ai le mana faatasi ma le Atua.”7 E leai se uso o le Au Peresitene Sili po o le Korama a le Toasefululua na te faia ni faaiuga mo le Ekalesia a le Alii i ana lava ia faaiuga [e aunoa ma le Alii]!
Uso e ma tuafafine, e mafai faapefea ona avea i tatou ma alii ma tamaitai—o auauna e pei o Keriso—e manaomia e le Alii ona avea ai i tatou? E mafai faapefea ona tatou maua tali i fesili o loo faafenumia’ia i tatou? Afai o le aafiaga paia o Iosefa Samita i le Vao Paia ua aoao mai ai se mea ia i tatou, o lona uiga ua matala le lagi ma ua fetalai mai le Atua i Ana fanau.
Ua faatulagaina e Iosefa Samita se mamanu mo i tatou i le foiaina o a tatou fesili. I le gauai atu i le folafolaga a Iakopo pe afai ua leai se poto ia i tatou ia tatou ole atu i le Atua,8 sa avatu ai e le taulealea o Iosefa lana fesili ma tuusao atu i le Tama Faalelagi. Sa ia saili atu i faaaliga faaletagata lava ia, ma o lana sailiga na matala ai lenei tisipenisione mulimuli.
I se tulaga faapena, o le a se mea e tatala mai e lau sailiga mo oe? O le a le poto e le o ia te oe? O le a se mea e te lagonaina ua manaomia vave ona iloa pe malamalama i ai? Mulimuli i le faataitaiga a le Perofeta o Iosefa. Saili se nofoaga filemu e mafai ona e alu soo i ai. Ia faamaualaloina oe lava ia i luma o le Atua. Liligi atu lou loto i lou Tama Faalelagi. Liliu atu ia te Ia mo ni tali ma le mafanafana.
Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona faalogo lea! Tusi i lalo manatu e oo mai i lou mafaufau. Faamaumau i lalo ou lagona ma tulitatao i faatinoga e uunaia oe e fai. A e faisooa lenei faagasologa i lea aso ma lea aso, masina ma lea masina, tausaga ma lea tausaga, o le a e “ola ai i le mataupu faavae o faaaliga.”9
O finagalo moni ea le Atua e fetalai atu ia te oe? Ioe! “E pei ona le mafai e le tagata ona faaloaloa atu lona lima faatauvaa e taofi ai le vaitafe o Misuri i lona ala faatonuina pe … taofia le Malosi Aoao mai le sasaa mai i lalo o le malamalama mai le lagi i luga o ulu o le Au Paia o Aso e Gata Ai.”10
E te le tau tuufesili po o le a le mea e moni.11 E te le tau mafaufau po o ai e mafai ona e faatuatuaina ma le saogalemu. E ala mai i faaaliga faaletagata lava ia, e mafai ai ona e mauaina lau oe lava ia molimau o le Tusi a Mamona o le afioga a le Atua, o Iosefa Samita o se perofeta, ma o le Ekalesia lenei a le Alii. Po o a lava tala po o mea e fai e isi, e leai se tasi e mafai ona aveesea se molimau na fanau a’e i lou loto ma le mafaufau e uiga i le mea e moni.
Ou te uunaia outou ina ia faateleina lou tomai faaleagaga o i ai nei e maua ai faaaliga faaletagata lava ia, aua ua folafola mai e le Alii e faapea “afai e te [saili] mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau.”12
Oi, e matua anoanoai mea e finagalo lou Tama o i le Lagi ia e iloa. E pei ona aoao mai Elder Neal A. Maxwell, “Ia i latou e i ai mata e vaai ai ma taliga e faalogo ai, ua manino lava o loo tufa fua mai e le Tama ma le Alo ia mealilo o le atulaulau!”13
E leai se mea na te tatalaina le lagi e pei o le tuufaatasiga o le mama a’ia’i, usiusitai sa’olele, sailiga ma le naunautai, taumafa i aso taitasi i le afioga a Keriso i le Tusi a Mamona,14 ma taimi faisoo e tuuto atu i le galuega o malumalu ma talafaasolopito o aiga.
Ina ia mautinoa, atonu e i ai taimi e te lagonaina ai e peisea’i o loo tapunia le lagi. Ae ou te folafola atu a e faaauau pea ona usiusitai, faaalia le lotofaafetai mo faamanuiaga uma ua foai atu e le Alii ia te oe, ma afai e te faamamaluina ma le onosai le taimi a le Alii, o le a foai atu ia te oe le poto ma le malamalama o loo e sailia. O faamanuiaga uma o loo i ai i le Alii mo oe—e oo lava i vavega—o le a mulimuli mai. O le mea lena o le a faia e faaaliga faaletagata lava ia mo oe.
Ou te faamoemoe o le a lelei le lumanai. O le a faatumulia i avanoa mo i tatou taitoatasi e agai ai i luma, faisaofaga, ma avatu le talalelei i tulu’iga uma o le lalolagi. Ae ou te nofouta foi i aso o lumanai. Ua tatou ola i se lalolagi ua matua faigata ma faateteleina le fefinauai. O le maua pea o ala faasalalau faaagafesootai ma se taamilosaga 24 itula o talafou ua lofituina ai i tatou i savali e le muta. Afai e ao ona tatou maua se faamoemoe o le suesueina o le tele o manatu ma filosofia a tagata ia e osofaia le upumoni, e tatau ona tatou aoao e maua ia faaaliga.
O lo tatou Faaola ma le Togiola, o Iesu Keriso, o le a faatinoina nisi o Ana galuega mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga. Ae i aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.
O’u uso e ma tuafafine pele, ou te aioi atu ia te outou ia faateleina lo outou gafatia faaleagaga e maua ai faaaliga. Ia avea lenei Aso Sa o le Eseta o se taimi e fai ai ni suiga i lou olaga. Filifili e fai le galuega faaleagaga e manaomiaina e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga.
Faatasi ai ma Moronae, ou te apoapoai atu ia te outou i lenei Sapati o le Eseta ia “o mai ia Keriso, ma taofimau i meaalofa lelei uma,”15 e amata i le meaalofa o le Agaga Paia, le meaalofa lea e mafai ma o le a suia ai lou olaga.
O i tatou o soo o Iesu Keriso. O le upumoni aupito sili ona taua o le a molimau atu e le Agaga Paia ia te oe e faapea o Iesu o le Keriso, le Alo o le Atua soifua. O loo soifua o Ia! O Ia o lo tatou Fautua i le Tama, lo tatou Faataitaiga, ma lo tatou Togiola. I lenei Aso Sa o le Eseta, tatou te faamanatu ai Lana taulaga togiola, Lona Toetu moni, ma Lona paia.
O Lana Ekalesia lenei, na toefuatai mai e ala mai i le Perofeta o Iosefa Samita. Ou te molimau atu ai, faatasi ma le faailoaga o le alofa mo outou taitoatasi, i le suafa paia o Iesu Keriso, amene.