Sauniga/Fonotaga i Aso Sa Lona Fa

O Aso Sa lona fa o masina taitasi, o le a talanoaina ai e korama a toeaina ma Aualofa se autu ua filifilia e le Au Peresitene Sili ma le Korama a Aposetolo e Toasefululua. O autu o le Aso Sa lona fa o le a faafouina pe a mavae ia konafesi aoao taitasi. Mai lenei lava taimi seia oo i le isi konafesi aoao e sosoo ai, o le autu o le “Auauna Atu i Isi.” O masina taitasi, e mafai e taitai po o faiaoga ona filifili e taitai ni talanoaga i soo se mataupu faavae nei e fesootai i le auaunaga.

Mo nisi punaoa e lagolago ai ia talanoaga e uiga i le auaunaga, tagai i le ministering.lds.org ma tusiga o le “Mataupu Faavae o le Auaunaga” i lomiga o i le lumanai o le Liahona.

O le a le uiga o le auauna atu?

O le a le uiga o le auaunaga i tagata o lau uarota po o paranesi? Ina ia silafia, e mafai ona e tusia le Auaunaga i luga o le laupapa ona valaaulia lea o tagata o le ekalesia e tusi upu e siosio ai e fesootai ma le auaunaga. E mafai e tagata ona maua upu po o fuaitau e faaopoopo atu i le lisi mai mau e pei o mau nei: Mataio 25:34–40; Luka 10:25–37; 2 Nifae 25:26; Mosaea 18:8–9; 3 Nifae 18:25; and Mataupu Faavae ma Feagaiga 81:5. O le a le mea ua tatou aoao mai i nei fuaiupu e uiga i le auaunaga? E mafai ona e fai atu i tagata o le ekalesia e faasoa mai ni faataitaiga o auaunaga ua latou vaai i ai. E mafai faapefea e la tatou auaunaga ona fesoasoani ia fetaiai manaoga faaleagaga ma faaletino o tagata? E mafai faapefea ona fesoasoani i tagata ia o mai faalatalata ia Keriso?

O le Faaola o lo tatou faataitaiga sili o le auaunaga.

Ina ia aoao e uiga i le auala e auauna atu ai ma le mataalia, e mafai e tagata o le ekalesia ona fefaasoaai tala mai mau ia na auauna atu ai le Faaola i isi—e tele faataitaiga e mafai ona maua i le Ioane 4–6 ma le Mareko 2:1–12. E mafai e tagata o le ekalesia ona faasoa mai mea na uunaia i latou e uiga i nei tala ma po o a mataupu faavae sa latou aoaoina e uiga i le auaunaga. Mo se faataitaiga, na faapefea ona faapatinoina e le Faaola Lana auaunaga i isi? Na faapefea ona Ia faafetaiaia manaoga faaleagaga o tagata faapea foi ma manaoga faaletino? E mafai ona faasoa mai e tagata o le vasega taimi na latou vaai ai i tagata o faaaoga nei mataupu faavae ia latou auaunaga.

O le auaunaga e musuia e ala i le alofa faaKeriso.

Ina ia saili i le mana o le auaunaga ua musuia e ala i le alofa faaKeriso, e mafai ona tusia fuaiupu nei i luga o le laupapa ma valaaulia tagata e fautua mai ni auala e faatumu ai avanoa: Pe a ou alofa moni lava i tagata ou te auauna i ai, ou te . Pe a ou auauna atu mo nisi mafuaaga, ou te . O le a se mea e mafai ona tatou faia e faamautinoa ai o la tatou auaunaga i isi ua musuia e le alofa faaKeriso? E faapefea ona tatou atiinaeina le alofa faaKeriso mo i latou ua tofia i tatou e auauna atu i ai? (tagai Moronae 7:43–48). Atonu e mafai ona faasoa mai e tagata o le ekalesia ni faataitaiga o le auaunaga lea na musuia e le alofa faaKeriso.

E finagalo le Atua mo Ana fanau uma ina ia leoleoina ma tausiaina.

Na saunoa mai Peresitene Russell M. Nelson, “O se faailoga o le Ekalesia moni ma le ola a le Alii o le a avea pea ma se taumafaiga faatulagaina ma faatonutonuina e auauna atu i fanau taitoatasi a le Atua ma o latou aiga” (“Auauna Atu i le Mana ma le Pule a le Atua,” Liahona, Me 2018, 69.). O le a se mea ua aoao mai e Peresitene Nelson i nisi o auala “faatulagaina ma faatonutonuina” lea ua fesoasoani ai le Ekalesia ia i tatou ina ia tausia lelei ia tagata taitoatasi? O le a se mea ua avea ai nei taumafaiga ma “se faailoga o le Ekalesia moni ma le ola a le Alii”? (tagai Mosaea 18:21–22 ma le Moronae 6:4–6 mo nisi manatu). O a faamanuiaga na oo mai i o tatou olaga po o olaga o isi ona o le auaunaga a tagata i o latou valaauga po o tofiga a le Ekalesia?

Ua tele lava le taua o agaga i le silafaga a le Atua.

O aafiaga a atalii o Mosaea na faaalia ai o le auala tatou te vaai ai i tagata e aafia ai le ala tatou te auauna atu ai ia i latou. E mafai ona e tusiina i luga o le laupapa Auala na vaai ai sa Nifae ia sa Lamana ma le Auala na vaai ai atalii o Mosaea ia sa Lamana. Ona valaaulia lea o tagata e sailii le Mosaea 28:1–3 ma le Alema 26:23–26 e sue ai upu ma fuaitau e tusi i lalo ifo o faamatalaga nei. O le a se mea o aoao mai ia i tatou e lenei faatusatusaga e uiga i le aafia ai o le auala o tatou auauna atu ai i tagata ona o le auala o tatou vaai ai ia i latou? E faapefea ona tatou aoao ia vaai atili atu i tagata e pei ona silasila mai le Atua ia i latou? (tagai MF&F 18:10–16).

O auaunaga faamaoni e taulai atu i manaoga o isi.

Ina ia fesoasoani i tagata ia malamalama lelei atili i le taua o le taulai atu i manaoga o isi a’o tatou auauna atu, e mafai ona e faatusatusa le auauna atu i le foai atu ma le taliaina o meaalofa. Na tatou mauaina ea se meaalofa aoga mai se tasi o le sa iloa manino lava mea tatou te manaomia pe na mananao i ai? E faapefea ona tutusa le auauna atu i le foai atu o se meaalofa na mafaufauina? Mafaufau e talanoaina ni tala mai le konafesi aoao e sili ona lata mai lea e faaalia ai le auala na auauna atu ai tagata e tusa ma manaoga o isi (tagai, mo se faataitaiga, Jean B. Bingham, “Auauna Atu e pei ona Faia e le Faaola,” Liahona, Me 2018). E mafai foi e tagata o le ekalesia ona faasoa atu isi tala ia e faaali atu ai lenei mataupu faavae.

E mafai faapefea ona tatou iloa po o a mea o manaomia e isi? Valaaulia tagata taitoatasi e fai se lisi o nisi o tagata o e latou te auauna atu i ai. I autafa o igoa taitasi e mafai ona latou tusi ai se tali i le fesili “O le a se mea e manaomia e lenei tagata ia latalata atili ai ia Keriso?” Pe a talafeagai ai, uunaia tagata o le ekalesia ina ia faaaofia ai sauniga o ono manaomia le mauaina e tagata taitoatasi. Valaaulia tagata o le ekalesia e mafaufau e uiga i le fesili lenei ma saili ni musumusuga e fesoasoani ai ia i latou e faafetaiaia ai manaoga o isi.

E finagalo le Alii ina ia tatou taliaina auaunaga mai isi.

Na saunoa Elder Robert D. Hales: “O le fuafuaga a le talalelei e manaomia ai le foai atu ma le taliaina. … O tagata taitoatasi o i ai ni aafiaga faigata e matele ina fai mai: ‘O le a ou faia e a’u lava ia,’ … ‘E mafai ona ou tausia a’u lava.’ E i ai se faamatalaga faapea e leai se tasi ua matua mauoa tele ua ia le manaomia ai se fesoasoani mai se isi, e leai foi se tasi ua matua mativa lava ua le aoga ai i nisi auala i lona uso a tagata. O le tulaga o le fesiligia o se fesoasoani mai isi ma le mautinoa, ma o le tuuina mai ma le agalelei, e tatau ona avea ma se vaega o lo tatou lava natura” (“We Can’t Do It Alone,” Ensign, Nov. 1975, 91, 93). Aisea tatou te faalotolotolua ai i nisi taimi e talia se fesoasoani mai isi? E faapefea e lo tatou naunau e talia le fesoasoani ona faamanuiaina ai i latou o e auauna mai ia i tatou? Tuu atu i tagata o le ekalesia sina taimi e mafaufau loloto ai i ni auala e mafai ai ona matala o latou mafaufau mo le taliaina o auaunaga a isi. O le a se mea o fautua mai e le 1 Korinito 12:13–21 e uiga i le mafuaaga tatou te manaomia ai le tasi ma le isi?

E tele auala e mafai ona tatou auauna atu ai i isi.

Ina ia fesoasoani i tagata o le ekalesia e mafaufau i le tele o auala latou te mafai ona auauna atu ai i le tasi ma le isi, e mafai ona e valaaulia i latou e toe iloilo le savali a Elder Jeffrey R. Holland “Ia Faatasi ma Faamalosi i Latou” (Liahona, Me 2018, 101–3; tagai foi i le “Ministering Principles” i lomiga a sau o le Liahona). E mafai ona vaevae tagata i ni vaega toalaiti, ma e mafai ona mafaufau vaega taitasi i ni vaaiga eseese lea e ono manaomia ai e se tagata se fesoasoani. Ona latou palepalealugaina lea o ni auala eseese lea e mafai ai e tagata ona auauna atu ai i manaoga faaleagaga ma faaletino o tagata taitoatasi o loo i ai i vaaiga. Fai atu i vaega e faasoa mai o latou manatu ma manatunatu loloto pe o ni manatu na talanoaina e mafai ona faamanuia ai tagata ia latou te auauna atu i ai.