Elder José A. Teixeira

Au Peresitene o Fitugafulu

Ua toe ta’ua e Elder José A. Teixeira se lesona na ia aoaoina o se alii talavou i Potukale. I se taimi o se toetuufaatasiga faaleaiga, sa ia sola ai e fagota. Sa ia lagona e tatau ona ta’u i ona matua le mea o le a alu i ai, ae sa tonu ia te ia e le ta’ua i ai aua o la sa mua ona talanoa.

I ni nai itula mulimuli ane, sa maua o ia e ona matua atuatuvale i le auvai o le vaitafe. Mai lena mea na tupu, sa ia aoao ai e usitai e le gata i ona matua ae faapea foi musumusuga a le Agaga Paia.

Talu mai lena taimi, na faia ai e Elder Teixeira se mausa o le uai atu i le leo itiiti, lemu. Sa folasia atu le talalelei ia te ia ma lona aiga i le 1976, ina ua tatala ia Potukale le galuega faafaifeautalai. Sa papatisoina o ia i le 16 o ona tausaga ma sa faamisiona talai mulimuli ane i le Misiona a Lisbon Potukale.

“O a tatou filifiliga o loo i ai le mana e le mafaafitia o le suia o o tatou olaga,” o le tala lea a Elder Teixeira, o le sa lagolagoina o se uso o le Au Peresitene o Fitugafulu i le aso 31 Mati, 2018. “O lea meaalofa o se faailoga tulaga ese o le faatuatuaina o i tatou ma i lea foi taimi o se tiutetauave patino e faaaoga ma le poto,” na ia aoao mai ai i le konafesi aoao ia Aperila 2009.

Sa maua e Elder Teixeira ni tikeri i le tausitusi ma le pulega o pisinisi ma sa faigaluega o se pulefaafoe faavaomalo i le Ekalesia. Sa tautua foi o ia i le Ea Fosi a Potukale o se vaega o le iunite a le NATO. I lena taimi, sa tofia o ia o se faatonu sili o mataupu tau i le va i fafo faaleatunuu o le Ekalesia. E lei umi, ae feiloai o ia ma lona faletua, o Maria Filomena Lopes Tels Grilo. Sa faaipoipo i la’ua i le 1984 i le Malumalu o Bern Suitiselani ma o matua i la’ua o se fanau e toatolu.

Na soifua mai José Augusto Teixeira da Silva i Vila Real, Potukale, i le aso 24 Fepuari, 1961. Na avea o ia o se fesoasoani i le au epikopo, peresitene o le itu, peresitene o le siteki, Fitugafulu Eria, ma le peresitene o le Misiona a Pasila São Paulo i Saute. Sa lagolagoina o ia o se Fitugafulu o le Pulega Aoao i le aso 5 o Aperila, 2008. O loo avea nei o ia ma Peresitene o le Eria o Amerika i Saute i Saute ma o le a amata lana auaunaga i le Au Peresitene o Fitugafulu i le aso 1 Aokuso, 2018

I luga atu o na mea uma, sa fautuaina i tatou e Elder Teixeira i le konafesi aoao ia Aperila 2015 ia “faaloloto lo tatou malamalama i le Faaola. … Aua nei o tatou tuua ni mea mo taeao o mea e mafai ona tatou faia i le asō. O le taimi lenei ua tatau ona tatou o mai ia Keriso.”