O Mana o le Perisitua
Saunia e Peresitene Dallin H. Oaks
Fesoasoani Muamua i le Au Peresitene Sili
O le faalauteleina o le perisitua paia o loo e umiaina e taua tele i le galuega a le Alii i o outou aiga ma i o outou valaauga i le Ekalesia.
Ou uso e pele, ua tatou faalogo atu i se faasilasilaga faafaaaliga mai ia Peresitene Russell M. Nelson. Ua tatou faalogo atu i ni faamaninoga taua a Elder Christofferson ma Elder Rasband faapea ai ma Peresitene Eyring. O mea o le a talanoaina, e aofia ai nisi mea mai ia Peresitene Nelson, o le a faamanino ai mea o le a outou faia nei, o taitai a le Alii ma e umia le perisitua, i o outou tiutetauave. Ina ia fesoasoani i lena mea, o le a ou iloiloina nisi o mataupu faavae autu o loo puleaina le perisitua o loo e umiaina.
I. O Le Perisitua
O le Perisitua Mekisateko o le pule paia lea a le Atua ua faamatuu mai e faataunuu ai Lana galuega o le “aumaia o le … ola faavavau o le tagata” (Mose 1:39). I le 1829, sa faaee atu ai i luga o Iosefa Samita ma Oliva Kaotui e Aposetolo a le Faaola, o Peteru, Iakopo, ma Ioane (tagai i le MF&F 27:12). E paia ma mamana tele e sili atu ma lo tatou malosi e faamatalaina ai.
O ki o le perisitua o mana ia e faatonutonu ai le faaaogaina o le pule o le perisitua. O lea, ina ua faaee atu e Aposetolo le Perisitua Mekisateko i luga o Iosefa ma Oliva, sa latou tuu atu foi ia i laua ki e faatonutonu ai lona faaaogaina (tagai i le MF&F 27:12–13). Ae sa lei faaee atua ki uma o le perisitua i lena taimi. O ki uma ma le malamalama e manaomia mo lenei “tisipenisione o le atoaga o taimi” (MF&F 128:18) e tuuina mai i lea “fasifuaitau i lea fasifuaitau” (fuaiupu 21). O isi ki faaopoopo na tuuina mai i le Malumalu i Katelani i le fitu tausaga mulimuli ane (tagai i le MF&F 110:11–16). O nei ki na tuuina mai e faatonutonu ai le pule o le perisitua i tofiga faaopoopo na tuuina mai i lena taimi, e pei o le papatisoga mo e ua maliliu.
O le Perisitua Mekisateko e le o tulaga po o se faailoga faapipii. O se mana faalelagi ua taofia i le faatuatuaga e faaaoga mo le manuia o le galuega a le Atua mo Lana fanau. E tatau ona tatou manatua i taimi uma o alii o loo umiaina le perisitua e le o “le perisitua.” E le talafeagai le faasino atu i le, “o le perisitua ma tamaitai.” E tatau ona tatou faasino atu i ai, “o e umiaina le perisitua ma tamaitai.”
II. O Se Galuega o Auaunaga
Ia se’i o tatou iloiloina nei le mea ua faamoemoeina e le Alii o Iesu Keriso mai ia i latou o loo umiaina Lana perisitua—le auala e ao ona tatou aumaia ai agaga ia te Ia.
Na aoao mai Peresitene Iosefa F. Samita: “Ua faamaonia le faapea mai o le Ekalesia ua atoatoa lona faatulagaina. Pau le faaletonu o nei faalapotopotoga ua le manatu atoatoa i le valaauga ua i o latou luga. Afai o le a latou magafagafa i ai i tulaga moomia mo i latou, o le a latou faataunuuina o latou tiute ma le faatuatua, ma o le a sili ona malosi le galuega a le Alii ma sili le mamana ma faatosinaloto i le lalolagi.”1
Sa lapatai mai foi Peresitene Samita:
“O suafa ua tuuina mai e le Atua o le mamalu … faatasi ai ma tofi eseese ma le faatulagaga o le Perisitua Paia, e le tatau ona faaaogaina pe mafaufau i ai e faapei o suafa ua faia e tagata; ua le mo ni teuteuga pe o le faaalia o le tomai faapitoa, ae o le valaauga mo se auaunaga ma le lotomaualalo i le galuega a le Matai e toatasi ua tatou folafola atu tatou te auauna i ai. …
“… Ua tatou galulue mo le faaolataga o agaga, ma e ao ona tatou lagona o le tiute silisili lenei ua tuuina mai ia i tatou. O lea, e ao ona tatou lagona le naunautai e ositaulaga mea uma, pe a manaomia, mo le alofa i le Atua, le faaolataga o tagata, ma le manumalo o le malo o le Atua i luga o le fogaeleele.”2
III. O Tofi o le Perisitua
I le Ekalesia a le Alii, o tofi i le Perisitua Mekisateko e eseese ia matafaioi. O loo faasino atu le Mataupu Faavae ma Feagaiga i faitaulaga sili o “peresitene nofomau po o ni auauna i luga o siteki eseese ua salalau lautele” (MF&F 124:134). O loo faasino i toeaiina o ni “faifeau nonofomau i la’u ekalesia” (MF&F 124:137). O isi nei o aoaoga e uiga i nei matafaioi tuu eseese.
O se faitaulaga sili e taitai ma taulimaina mea faaleagaga (tagai i le MF&F 107:10, 12). Sa faapea foi ona aoao mai Peresitene Iosefa F. Samita, “E pei ona faauuina ai o ia o se faitaulaga sili, e tatau ona [ia] lagonaina e noatia o ia … e fai se faataitaiga agavaa e mulimuli uma i ai tagata matutua ma talavou, ma tuu o ia lava i se tulaga e avea ai ma se faiaoga o le amiotonu, e le na o mataupu ae ia sili atu ona patino i faataitaiga—ma tuuina atu ai i le autalavou le manuia o le potomasani o le matua o tausaga, ma o lea e avea ai tagata taitoatasi o se mana i le lotolotoi o le nuu o loo ia nofomau ai.”3
I tiute o se toeaina, sa aoao mai ai Elder Bruce R. McConkie o le Korama a Aposetolo e Toasefululua e faapea: “O se Toeaina o se auauna lea a le Alii o Iesu Keriso. … Ua tofia o ia e faatino matafaioi ma fai ma sui o lona Matai … e auauna atu i ona uso a tagata. O ia o le sui vaaia o le Alii.”4
Sa faitioina e Elder McConkie le manatu e faapea o se tasi ua “na o se toeaina.” “E tutusa lava le tele o le pule o le perisitua o loo i ai i toeaina uma, ma le tele o le pule o le perisitua o loo i ai i le Peresitene o le Ekalesia … ,” sa ia saunoa ai. “O le a le mea e ta’u o se toeaina? O ia o se leoleo mamoe, o se leoleo mamoe e galue i le lafu mamoe a le Leoleo Mamoe Lelei.”5
I lenei matafaioi taua e auauna atu i le lafu mamoe a le Leoleo Mamoe Lelei, e le o i ai se eseesega i le va o tofi o le faitaulaga sili ma le toeaina i le Perisitua Mekisateko. I le vaega maoae 107 o le Mataupu Faavae ma Feagaiga, o loo tautino mai ai e le Alii e faapea, “O faitaulaga sili e tusa ma le faatulagaga o le Perisitua Mekisateko ua i ai se aiā e galulue ai i o latou lava tulaga, i lalo o le taitaiga a le au peresitene, i le taulimaina o mea faaleagaga, ma i le tofi foi o se toeaina, [po o se isi tofi i le Perisitua Arona]” (MF&F 107:10, tagai foi i le fuaiupu 12).
O le mataupu faavae sili ona taua mo ē uma o loo umiaina le perisitua o le mataupu faavae na aoaoina e le perofeta o Iakopo o le Tusi a Mamona. Ina ua uma ona faapaiaina o ia ma lona uso o Iosefa o ni ositaulaga ma ni aoao o tagata, sa ia tautino atu: “Ma sa ma faalauteleina o maʼua tofiga i le Alii, ma ave i o maʼua luga le tiutetauave, e tali i luga o o maʼua lava ulu agasala a le nuu, pe afai ma te lē aoao atu ia te i latou le afioga a le Atua ma le filiga atoa” (Iakopo 1:19).
Uso e, o o tatou tiutetauave i le avea ai ma ē umiaina le perisitua, o ni mataupu ogaoga ia. O isi faalapotopotoga e mafai ona faamalieina i tulaga faalelalolagi o faatinoga i le tuuina atu o a latou savali ma le faatinoina o isi o a latou matafaioi. Ae o i tatou o ē umia le perisitua a le Atua, ua i ai le mana faalelagi lea e puleaina ai le ulufale atu i totonu i le malo selesitila o le Atua. Ua ia i tatou le faamoemoega ma le tiutetauave na faamanino mai e le Alii i le faatomuaga ua faaalia i le Mataupu Faavae ma Feagaiga. E ao ona tatou folafola atua i le lalolagi:
“Ae ia mafai e tagata taitoatasi ona tautala i le suafa o le Atua le Alii, le Faaola lea o le lalolagi;
“Ina ia mafai foi ona faateleina o le faatuatua i le lalolagi;
“Ina ia mafai ona faatuina o laʼu feagaiga tumau-faavavau;
“Ina ia mafai ona folafola atu le atoatoaga o la’u talalelei e e vaivai ma e faatauvaa i tuluiga o le lalolagi” (MF&F 1:20–23).
Ina ia faataunuuina lenei tofiga faalelagi, e tatau ona tatou faamaoni i le “faalauteleina” o o tatou valaauga ma tiutetauave faaleperisitua (tagai i le MF&F 84:33). Na faamalamalama mai e Elder Harold B. Lee le uiga o le faalauteleina o le perisitua: “Pe a umia e se tasi le perisitua, ua avea o ia ma sui o le Alii. E ao ona ia mafaufau i lona valaauga o loo i ai o ia i le feau a le Alii. O le uiga lena o le faalautele o le perisitua.”6
O le mea lea, uso e, afai e fesili mai le Alii lava Ia ia te oe e te fesoasoani atu i se tasi o Ona atalii po o afafine—lea o loo Ia faia e ala mai i Ana auauna—mata e te faia? Ma afai e te faia, mata e te galue e fai ma Ona sui, “i le feau a le Alii,” i le faalagolago atu i Lana fesoasoani folafolaina?
E i ai le isi aoaoga a Elder Lee e uiga i le faalauteleina o le perisitua: “A e uuina se tioata faamatamatatetele i luga o se mea, o le a foliga lapoa atu lena mea nai lo le mea o e vaai moni i ai; o se tioata faamatamatatetele lena. O lenei … afai e faalauteleina e se tasi lona perisitua—o lona uiga, ia faateleina nai lo le mea muamua na latou manatu na i ai ma sili atu ona taua nai lo le mea na manatu muamua i ai se tasi—o le auala lena e te faalauteleina ai lou perisitua.”7
O se faataitaiga lenei o sē umia le perisitua o loo faalauteleina lona tiutetauave faaleperisitua. Sa ou faalogo i le mea lenei mai ia Elder Jeffrey D. Erekson, o la’u soa i se konafesi faalesiteki i Idaho. I le avea ai ma se toeaina talavou ua faaipoipo, sa matua mativa lava ma lagonaina le le mafai ona faamaea lana tausaga mulimuli o le kolisi, sa tonu ai ia Jeffrey e faamaamulu mai le a’oga ma talia se ofa mata’ina o se galuega. I ni nai aso mulimuli ane sa alu atu ai lana peresitene o le korama a toeaina i lona fale. “E te malamalama i le taua tele o ki o le perisitua o loo ou umia?” sa fesili atu ai le peresitene. Ina ua fai atu Jeffrey ioe, sa ta’u atu e le peresitene ia te ia e faapea, talu mai le taimi na ia faalogo ai i lona faamoemoe e faamaamulu mai le kolisi, sa faatiga o ia e le Alii i ni po sa lē mămoe ai e avatu le savali lenei ia Jeffrey: “I le avea ai ma ou peresitene o le korama a toeaina, ou te fautua atu ia te oe e aua ne’i e faamaamulu mai le kolisi. O se savali lena ia te oe mai le Alii.” Sa nofo ai pea Jeffrey i le a’oga. I ni tausaga mulimuli ane sa ou feiloai ai ia te ia o se tagata faipisinisi faamanuiaina ma faalogo atu o ia faamatala atu i se aofia e uiga i ē umiaina le perisitua, “O lena [fautuaga] sa faia le eseesega atoa i lo’u olaga.”
Sa faalautele e sē umia le perisitua lona perisitua ma le valaauga, ma sa faia ai e lena mea “le eseesega atoa” i le olaga o se isi atalii [po o se afafine] o le Atua.
IV. Perisitua i totonu o le Aiga
E oo mai i lenei taimi, o loo ou talanoa atu lava i matafaioi o le perisitua i le Ekalesia. O lenei la o le a ou talanoa atu i le perisitua i totonu o le aiga. Ou te amata atu i ki. O le mataupu faavae e faapea o le pule o le perisitua e faatoa mafai ona faaaoga i lalo o le taitaiga a lē o loo umiaina ki mo lena matafaioi e taua tele i le Ekalesia ae e le faatatau lea i le faaaogaina o le pule o le perisitua i totonu o le aiga.8 O se tama o loo umiaina le perisitua e pulefaamalumalu i lona aiga e ala i le pule o le perisitua o loo ia umiaina. Na te le manaomiaina ona maua le taitaiga po o le faamaoniga o ki o le perisitua ina ia mafai ai ona fautuaina tagata o lona aiga, faia fonotaga faaleaiga, tuu atu faamanuiaga faaleperisitua i lona toalua ma le fanau, pe tuu atu foi ni faamanuiaga o faamalologa i tagata o le aiga ma isi.
Afai o le a faalauteleina e tamā lo latou perisitua i totonu o o latou lava aiga, o le a faalauteleina [e le perisitua] le misiona a le Ekalesia e pei o le tele o isi mea uma e mafai ona latou faia. O tamā o loo umiaina le Perisitua Mekisateko e tatau ona tausia poloaiga ina ia latou maua le mana o le perisitua e tuu atu ai faamanuiaga i tagata o o latou aiga. E tatau foi i tamā ona faafaileleina sootaga alofa faaleaiga ina ia mananao ai tagata o le aiga e talosaga atu i o latou tamā mo ni faamanuiaga. Ma e tatau i matua ona uunaia ni faamanuiaga faaleperisitua se tele atu i totonu o le aiga.
Tamā, ia outou galulue o ni “paaga tutusa” ma a outou āvā, e pei ona aoao mai ai le folafolaga i le aiga.9 Ma, tamā, a outou maua le avanoa e faaaoga ai mana ma faatosinaga a le pule o lou perisitua, ia e faia e ala “i le faatauanau, i le tali-tiga, i le agamaualalo ma le agamalu, ma le alofa faamaoni” (MF&F 121:41). O lena tulaga faatonuina mo le faaaogaina o le pule o le perisitua e aupito sili ona taua i totonu o le aiga. Sa tuuina mai e Peresitene Harold B. Lee lenei folafolaga ina ua faatoa avea o ia ma Peresitene o le Ekalesia: “E leai se [taimi] e sili ona [ofoofogia] ai le mana o le perisitua o loo outou umia, nai lo le taimi e i ai se to’atugā i lou aiga, se ma’i tigaina po o ni faaiuga ogaoga e tatau ona faia. … O loo i ai i le mana o le perisitua, le mana lea o le Atua Silisili Ese, le mana e faatino ai vavega pe a finagalo i ai le Alii, ae peitai ina ia mafai ona tatou faaaoga lena perisitua, e tatau ona tatou agavaa e faaaogaina. O le le malamalama i lenei mataupu faavae, o le le mauaina foi lea o faamanuiaga o le umiaina o lena perisitua maoae.”10
O’u uso pele, o le faalauteleina o le perisitua paia o loo outou umiaina e taua tele i le galuega a le Alii i o outou aiga ma i o outou valaauga i le Ekalesia.
Ou te molimau atu ia te Ia o lē ana le perisitua. E ala mai i Ona mafatiaga togiola ma le taulaga ma le toetu, ua maua ai e alii ma tamaitai uma le faamautinoaga o le tino ola pea ma le avanoa mo le ola e faavavau. E tatau ia i tatou taitoatasi ona faatuatua ma filiga i le faia o la tatou vaega i lenei galuega maoae a le Atua lo tatou Tama Faavavau, i le suafa o Iesu Keriso, amene.