[Maua] Lona Agaga e Faatasi ma Outou
Saunia e Peresitene Henry B. Eyring
Fesoasoani Lua i le Au Peresitene Sili
Ou te tatalo atu ma lo’u loto atoa ina ia outou lagona le siufofoga o le Agaga, lea ua auina atu ia te outou ma le agalelei tele.
O’u uso e ma tuafafine, ou te faafetai mo le avanoa i le asō e lauga atu ai ia te outou i le Sapati a le Alii, i le konafesi aoao o Lana Ekalesia, i lenei vaitau o le Eseta. Ou te faafetai i lo tatou Tama Faalelagi mo le meaalofa o Lona Alo Pele, o le na afio mai ma le lotomalie i le lalolagi e avea ma o tatou Togiola. Ou te faafetai i le iloaina na Ia totogiina a tatou agasala ma toetu mai i le Toetu. O aso uma ua faamanuiaina ai a’u i le iloaina o lena mea, ona o Lana Togiola, o le a mafai ai i se aso ona ou toetu ia ola faavavau ai i se aiga alofa.
Ua ou iloa na mea i le na o le pau lava le auala ua mafai ai e soo se tasi o i tatou ona iloaina. Ua fetalai mai le Agaga Paia i lo’u mafaufau ma lo’u loto e moni na mea—e le na o le faatasi ae e faatele. Sa ou manaomia lena faamafanafanaga faifaipea. Tatou te oo uma i faalavelave lea tatou te manaomia ai le faamautinoaga a le Agaga. Sa ou lagonaina i se tasi aso a’o o’u tu faatasi ma lo’u tama i le falema’i. Sa ma vaaia le faia e lo’u tina o ni manava pupuu—ona maliu loa lea. A o ma tilotilo atu i ona foliga, sa ataata o ia a’o aluese atu le tiga. Ina ua mavae sina taimi filemu, sa saunoa muamua lo’u tama. Sa fai mai o ia, “Ua foi i le aiga se teineitiiti.”
Sa ia fai mai ma le lemu. Na foliga mai ua ia maua le filemu. Sa ia faasoa mai se mea ua ia iloa e moni. Sa amata ona ia ao mai ma le filemu mea totino a Tina. Sa ia alu atu i fafo i le auala savali o le falemai e faafetai i tausima’i ma fomai uma o e na tausia o ia mo le tele o aso.
Sa i ai i lo’u tama le mafutaga a le Agaga Paia i lena taimi e lagona ai, iloa, ma faia le mea na ia faia i lena aso. Sa ia mauaina le folafolaga, e pei ona maua e le toatele: “Ina ia latou maua lona Agaga e faatasi ma i latou” (MF&F 20:79).
O lo’u faamoemoe i le asō o le faateleina lea o lo outou manao ma lo outou gafatia e talia ai le Agaga Paia. Manatua, o Ia o le sui lona tolu o le Aiga Atua. O le Tama ma le Alo o ni tagata toetutu. O le Agaga Paia o se peresona agaga. [Tagai i le MF&F 130:22.) O lau lava filifiliga pe e talia o Ia ma aveina atu o Ia i totonu o lou loto ma lou mafaufau.
O tulaga e mafai ai ona tatou taliaina lena faamanuiaga uigaese ua faamanino mai i upu ua talanoaina faalevaiaso ae masalo e le o gotouga ifo i taimi uma i totonu o tatou loto ma o tatou mafaufau. Ina ia maua le Agaga ua auina mai ia i tatou e tatau ona tatou “manatua pea” le Faaola ma “tausi i ana poloaiga” (MF&F 20:77).
E fesoasoani lenei taimi o le tausaga ia i tatou ia manatua ai le taulaga a le Faaola ma Lona toetu mai mai le tuugamau o se tagata toetu. O loo tamauina pea e le toatele o i tatou ata o na vaaiga i o tatou manatuaga. Sa ou tu i se tasi taimi faatasi ma lo’u toalua i fafo o le tuugamau i Ierusalema. E talitonu le toatele o le tuugamau lena na tulai ae ai le Faaola sa faasatauroina o se Atua toetu ma soifua.
Na talotalo mai le lima a le taiala faaaloalogia i lena aso ma fai mai ia i maua, “O mai, vaai i le tuugamau gaogao.”
Sa ma punonou e ulufale i totonu. Sa ma vaaia se nofoa ma’a e pipii i le puipui. Ae sa oo mai se isi ata i lo’u mafaufau, sa moni lava e pei ona tatou vaaia i lena aso. O Maria, lea na tuua e Aposetolo i le tuugamau. O le mea lena na faataga a’u e le Agaga ia ou vaaia ma oo foi ina lagona i lo’u mafaufau, sa manino lava e pei na ou i ai iina:
“A o Maria ua tu o ia i fafo e lata ane i le tuugamau, ua tagi ai: ua tagi o ia ma punou i le tuugamau,
“Ona iloa atu lea e ia o agelu e toalua ua oofu i ofu sisina, ua nonofo i le mea na tuu ai le tino o Iesu; o le tasi e i ulu, o le tasi e i vae.
“Ua la fai mai ia te ia, Funa e, se a le mea e te tagi ai? Ua faapea atu ia ia te i laua, Aua ua latou ave ese lo’u Alii, ou te lei iloa foi le mea ua latou tuuina ai o ia.”
“Ua ia fai atu na upu, ona faliu lea i tua; ona iloa atu lea e ia o Iesu ua tu mai: a e lei iloa e ia o Iesu lava lea.”
“Ua fetalai atu Iesu ia te ia, Funa e, se a le mea e te tagi ai? O ai ea e te sailia? A o le fafine, fa te ia o le leoleo ia o le fanua, ua fai mai ia te ia, Le Alii e, afai ua e ave ese ia te ia, ta’u mai ia ia te au po o fea le mea ua e tuuina ai o ia, ona ou aveeseina lea o ia.
“Ua fetalai atu Iesu ia te ia, Maria e. Ona faliu lea o ia, ua fai atu ia te ia, Raponi e; o lona uiga, Le A’oa’o e.
“Ua fetalai atu Iesu ia te ia, Aua e te tago mai ia te au; aua ou te lei alu ae lava i lo’u Tamā: a ia e alu i o’u uso, ma fai atu ia i latou, Ou te alu ae i lo’u Tamā ma lo outou Tamā; o lo’u Atua ma lo outou Atua” (Ioane 20:11–17).
Sa ou tatalo ina ia faatagaina ia lagonaina se mea na lagona e Maria i le tuugamau ma le mea na lagona e isi soo e toalua i le auala i Emau a’o latou savavali faatasi ma le Faaola toetu, ma manatu ai o Ia o se tagata asiasi i Ierusalema:
“A ua la pulunaunau ia te ia, ua faapea mai, Tatou te nonofo ma i maua nei: aua ua taugagaifo le la, ua lata i le afiafi. Ona ulufale atu lea o ia, latou te nonofo.
“Ua taoto ia e taumafa faatasi ma i laua, ona tago ai lea i le areto, ua faafetai, ua tofitofi, ma avatu ia te i laua.
“Ona pupula ai lea o laua mata, ua la iloa o ia; a ua mou o ia mai ia i laua.
“Ona la fetautalatala’i lea, E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua?” (Luka 24:29–32).
O nisi o na upu sa toe ta’ua i se sauniga faamanatuga sa ou auai i le silia ma le 70 tausaga ua mavae. I na aso o sauniga faamanatuga na faia i le afiafi. Sa pogisa fafo. Sa lagiina e le faapotopotoga nei upu masani. Sa ou faalogo i ai i le tele o taimi. Ae o lo’u manatuaga tumau o le lagonaina lea o se tasi o po faapitoa. E faalatalataina atili atu ai a’u i le Faaola. Masalo afai ou te tauloto atua ia upu, o le a oo ina toe oo mai ia i tatou uma:
Iesu, ia e faatasi mai.
Ua te’a nei le ao.
Ua afiafi le asō.
Ua lata mai le po.
Maliu mai i lo’u loto nei,
Ma lo’u apitaga.
Iesu, ia e faatasi mai.
O lou faatasi mai
Ua mu ai lo’u loto nei;
I lou mafuta mai.
Ua tumu lo’u agaga nei,
E sili atu le taua o manatuaga o le pa’i mai o le Agaga Paia i o tatou loto ma Lona faamautinoaga faifai pea o le upumoni nai lo manatuaga o mea na tutupu. E sili atu le taua o le toe manatuaina o lagona lea e o mai faatasi ma le leo filemu o le Agaga nai lo le vaai ma o tatou mata, po o le manatuaina o upu na fetalai maia ma faitauina. E seasea lava, na ou lagonaina e pei lava o tagata malaga i luga o le ala i Emau—e pei o se mumu vaivai ae e le mafaaseseina i le loto. O le tele o taimi, o se lagona o le malamalama ma le faamautinoaga filemu.
Ua tatou maua le folafolaga le mafaatauina o le Agaga Paia e avea ma se soa ma ua tatou maua foi taitaiga moni i le ala e maua ai lena meaalofa. Ua fofogaina mai upu nei e le auauna faatagaina a le Alii ma tuuina ona lima i luga o tatou ulu: “Talia le Agaga Paia.” I lena lava taimi, ua ta mauaina le faamautinoaga o le a auina mai o Ia. Peitai o la tatou tiute o le filifili ia tatala o tatou loto ina ia maua le auaunaga a le Agaga, i le olaga atoa.
O aafiaga a le Perofeta o Iosefa Samita ua ofo mai ai se taiala. Sa ia amata ma faaauauina lana auaunaga ma le faaiuga ua le lava lona lava poto e iloa ai po o le a le auala e tatau ona ia taulai atu i ai. Na ia filifili ia lotomaualalo i luma o le Atua.
Ma le isi, sa filifili Iosefa e ole atu i le Atua. Sa ia tatalo i le faatuatua ina ia tali mai le Atua. Sa oo mai le tali ao ia talavou lava. Na oo mai na savali ina ua ia fia iloa po o le a le auala ua finagalo le Atua e faatulagaina ai Lana Ekalesia. Sa faamafanafana ma taitaia o ia e le Agaga Paia i lona olaga atoa.
Sa ia usiusitai i musumusuga i le taimi ua faigata ai. Mo se faataitaiga, sa ia mauaina faatonuga e auina atu le Toasefululua i Egelani i le taimi na ia manaomia tele ai. Na ia auina atu i latou.
Sa ia taliaina faasa’oga ma le faamafanafanaga mai le Agaga i le taimi sa falepuipui ai o ia ma sa matua mafatia ai le Au Paia. Ma sa usitai o ia ina ua alu atu i le nuu o Karefasi e ui lava ina ia iloaina na ia feagai ma tulaga lamatia faaletino.
Sa seti e le Perofeta o Iosefa Samita se faataitaiga mo i tatou i le auala e maua ai le taitaiga ma le faamafanafanaga faaleagaga faifai pea e ala i le Agaga Paia.
O le filifiliga muamua na ia faia o le faamaualalo lea i luma o le Atua.
O le lona lua o le tatalo atu lea ma le faatuatua i le Alii o Iesu Keriso.
O le lona tolu o le usiusitai atoatoa. O le usiusitai e ono faauigaina o le vave faatino. Atonu o lona uiga o le saunia. Pe atonu o lona uiga ia faatalitali ma le onosai mo nisi musumusuga.
Ma le lona fa o le tatalo atu lea ia iloa manaoga ma loto o isi ma pe faapefea ona fesoasoani atu ia i latou mo le Alii. Sa tatalo Iosefa mo le Au Paia mafatia a’o i ai o ia i le falepuipui. O se avanoa mo a’u le matauina o perofeta a le Atua a’o latou tatalo, ole atu mo musumusuga, mauaina le taitaiga, ma galulue ai.
Na ou vaai i le faatele ona latou tatalo e faatatau i tagata latou te alolofa ma auauna atu i ai. O le latou popolega mo isi e foliga mai e tatalaina ai o latou loto ia taliaina musumusuga. E mafai foi ona moni lena mea mo outou.
O le a fesoasoani musumusuga ia i tatou e auauna atu ai i isi mo le Alii. Ua tou vaaia lena mea i tou aafiaga, e pei foi o a’u. Sa fai mai lo’u epikopo ia te a’u i se tasi taimi—i se taimi sa matua mafatia ai lo’u toalua i lona lava olaga—“Soo se taimi lava ou te faalogo ai i se tasi i le uarota o manaomia se fesoasoani, pe a ou oo atu iina e tuu atu le fesoasoani, ou te maua atu ai iina lou toalua ua muamua atu ia te a’u. E faapefea ona ia faia lena mea?”
E pei ia o i latou o e o ni auauna maoae i le malo o le Alii. E foliga mai e lua mea latou te faia. O auauna maoae ua agavaa mo le Agaga Paia e avea ma se soa tumau i le toetoe lava o taimi uma. Ma ua latou agavaa mo le meaalofa o le alofa, o le alofa mama lea o Keriso. O na meaalofa ua tuputupu ae ma i latou aua sa latou faaaogaina e auauna atu ai i le alofa mo le Alii.
O le auala ua galulue faatasi ai le tatalo, musumusuga, ma le alofa o le Alii i la tatou auaunaga ua faamatalaina ma le atoatoa mo a’u i upu nei:
“Afai tou te ole atu i se mea i lo’u igoa, ou te faia lava.
“Afai tou te alofa mai ia te aʼu, ia outou tausi mai i aʼu poloaiga.
“Ou te fai atu foi i le Tama, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau;
“O le Agaga lea … [o] le upu moni, e le mafai e le lalolagi ona talia o ia, aua ua le vaaia o ia, ua le iloa foi o ia; a o outou, ua outou iloa o ia, aua e tumau pea ia ia te outou, e i ai foi o ia i totonu ia te outou.
“Ou te le tuua outou o matuaoti: ou te sau ia te outou.
“E toe itiiti ona le vaai mai lea o le lalolagi ia te au; a e vaai mai pea outou ia te au: ou te ola a’u o le mea lea e ola ai outou.
O lea aso e iloa ai e outou, ou te i totonu o lo’u Tama, o outou foi o i totonu ia te a’u, o a’u foi o i totonu ia te outou.
“O le ua ia te ia a’u poloaiga ma tausi i ai, o ia lea e alofa mai ia te a’u: o lē alofa mai foi ia te a’u e alofaina o ia e lo’u Tama, ou te alofa foi ia te ia, ma ou faaali ia te ia” (Ioane 14:14–21).
Ou te tuuina atu lau molimau patino ua silafia e le Tama i lenei lava taimi outou, o outou lagona, faatasi ai ma manaoga faaleagaga ma faaletino o tagata uma o siomiaina outou. Ou te molimau atu ua auina mai e le Tama ma le Alo le Agaga Paia i tagata uma o e ua i ai lena meaalofa, ole atu mo lena faamanuiaga, ma saili ina ia agavaa ai. E lei faamalosia e le Tama, po o le Alo, po o le Agaga Paia i latou lava i o tatou olaga. Ua tatou saoloto e filifili. Ua fetalai mai le Alii i tagata uma:
“Faauta, ou te tu atu i le puipui ma tuitui atu: ai se tasi e faalogo mai i lo’u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma a’u.
“O lē manumalo ou te avatua ia te ia ma te nonofo faatasi ma a’u i lo’u nofoalii, e pei o a’u foi ona ou manumalo, ua ma nonofo foi faatasi ma lo’u Tama i lona nofoalii.
“O le ua i ai taliga, ina faalogo mai ia o ia i le mea ua fetalai mai ai le Agaga” (Faaaliga 3:20–22).
Ou te tatalo atu ma lo’u loto atoa ina ia outou lagona le siufofoga o le Agaga, lea ua auina atu ia te outou ma le agalelei tele. Ma ou te tatalo o le a outou tatalaina e le aunoa o outou loto ia taliaina o Ia. Afai tou te ole atu ma le manatu moni ma le faatuatua ia Iesu Keriso mo se musumusuga, o le a outou mauaina i le ala a le Alii ma i Lana taimi. Na faia e le Atua lena mea mo Iosefa Samita talavou. Ua ia faia i lenei taimi mo lo tatou perofeta soifua, o Peresitene Russell M. Nelson. Ua Ia tuuina outou i ala o isi fanau a le Atua ina ia auauna atu ai ia i latou mo Ia. Ou te iloa e le gata i mea ua ou vaai i ai i o’u lava mata ae ma le mamana tele e ala i mea ua musumusu mai e le Agaga i lo’u loto.
Na ou lagonaina le alofa o le Tama ma Lona Alo Pele mo fanau uma a le Atua i le lalolagi ma mo Ana fanau i le lalolagi o agaga. Na ou lagonaina le faamafanafanaga ma le taitaiga a le Agaga Paia. Ou te tatalo ina ia outou mauaina le olioli i le i ai o le Agaga e faatasi ma outou e avea ma a outou soa i taimi uma. I le suafa, o Iesu Keriso, amene.