Saunia e Feiloai ma le Atua

Saunia e Elder Quentin L. Cook

O Le Korama a Aposetolo e Toasefululua

O le tulimataia o tiutetauave na tofia mai le lagi i le amiotonu, lotogatasi, ma le tutusa o le a saunia ai i tatou e fetaiai ma le Atua.

I le talanoa ai o Eliza R. Snow e uiga i le faapaiaga o le Malumalu o Katelani (lea na ia auai) na ia faapea mai ai: “O sauniga o lena faapaiaga e mafai ona toe faatinoina, ae e leai se gagana faaletino e mafai ona faamatalaina faaaliga faalelagi o lena aso e le mafaagaloina. Na faaali mai agelu i nisi, a o le lagona o le faatasi mai o au o le lagi na lagonaina e tagata uma na auai, ma na faatumuina loto taitasi uma i le olioli ai ma fiafia e le matalatalaina, e silisili ese lava.”¹

O faaaliga paia na tutupu i totonu o le Malumalu o Katelani, o ni faavae i le faamoemoega o le Ekalesia toefuataiina a Iesu Keriso e faataunuuina ai le faaolataga ma le faaeaga o fanau a lo tatou Tama Faalelagi.² A o tatou sauniuni e fetaiai ma le Atua, e mafai ona tatou iloa pe o a o tatou tiute ua atofa mai le lagi, e ala i le toeiloiloina o ki paia na toefuatai mai i totonu o le Malumalu o Katelani.

I le tatalo o le faapaiaga, na talosagaina ai ma le lotomaualalao e le Perofeta o Iosefa Samita le Alii “ia talia lenei fale … lea na e poloaiina i matou e fausia.”³

E tasi le vaiaso mulimuli ane, i le Aso Sa o le Eseta, na faaali atu ai le Alii i se faaaliga maoae ma sa talia ai Lona malumalu. Na tupu lenei mea i le aso 3 Aperila 1836, ua toetoe atoa lelei le 182 tausaga talu ai mai le Aso Sa o le Eseta. O le vaitau foi o le Paseka—o se tasi o na taimi e le masani ai ina ua pauu faatasi le Eseta ma le Paseka. Ina ua tapunia le faaaliga, sa faaali mai perofeta anamua e toatolu, o Mose, Elaia, ma Elia, ma tauaaoina atu ki ia na tatau ai mo le faataunuuina o le faamoemoega o le Alii mo Lana Ekalesia toefuataiina i lenei tisipenisione. O lena faamoemoega sa faaupuina faigofie, ae faagaeetia, o le faapotopotoina o Isaraelu, e faamau ai i latou o ni aiga, ma saunia ai le lalolagi mo le Afio Mai Faalua o le Alii.⁴

O le faaali uma mai o Elia ma Mose o se “’uigatutusa ofoofogia’ … [ma] ‘tumasani faaIutaia, e faapea e taunuu faatasi mai Mose ma Elia i le ‘iuga o taimi.’”⁵ I la tatou aoaoga faavae, o lea faaali mai ua faataunuu ai le toefuataiga faalefaavae o ki patino “na tuuina atu … mo le taimi mulimuli, lea ua i ai le tisipenisione o le atoaga o taimi.”⁶

O le Malumalu o Katelani, i le tulaga ma le telē, sa matua tau le iloa lava. Peitai e tusa ai ma lona taua tele i le tagata, sa i ai lona aafiaga e faavavau. Na toefuatai mai e perofeta anamua ia ki o le perisitua mo sauniga faaola e faavavau o le talalelei a Iesu Keriso. Na taunuu lenei mea i le olioli lofituina mo tagata faamaoni o le au paia.

O nei ki ua aumaia ai le “mana mai luga”⁷ mo tiute na atofa mai le lagi ia e aofia ai le faamoemoega autu o le Ekalesia.⁸ I lena aso matagofie o le Eseta i le Malumalu o Katelani, e tolu ki na toefuatai mai ai:

Muamua, na faaali mai Mose ma tauaao atu ki o le faapotopotoina o Isaraelu mai itu e fa o le lalolagi, o le galuega faafaifeautalai lea.⁹

Lona lua, na faaali mai Elaia ma tauaaoina atu ia ki o le tisipenisione o le talalelei a Aperaamo, lea e aofia ai le toefuataiga mai o le feagaiga faaAperaamo.¹⁰ Na aoao mai e Peresitene Russell M. Nelson e faapea o le faamoemoega o ki o feagaiga o le saunia ai lea o tagata o le au paia mo le malo o le Atua. Na ia saunoa, ”Ua tatou iloa pe o ai i tatou [ua tatou iloa] le mea o loo faamoemoe mai ai le Atua ia i tatou.”¹¹

Lona tolu, na faaali mai Elia ma tauaao atu ia ki o le mana faamau i lenei tisipenisione, o galuega o talafaasolopito o aiga ia ma sauniga o le malumalu e mafai ai ona maua le faaolataga mo e o soifua ma e ua maliliu.¹²

O loo i ai, i lalo o le taitaiga a le Au Peresitene Sili ma le Korama a Aposetolo e Toasefululua, ni aufono faaleautaitai e tolu i le laumua o le Ekalesia e faafoea nei tiutetauave ua atofa mai le lagi e faavae i luga o ki sa toefuatai mai i totonu o le Malumalu o Katelani. O le Aufono Faaleautaitai o Faifeautalai, o le Aufono Faaleautaitai Perisitua ma le Aiga, ma le Aufono Faaleautaitai o Talafaasolopito o Aiga.

O Fea Tatou Te Tutu ai Nei i le Faataunuuina o Nei Tiutetauave ua Atofa Mai le Lagi?

Muamua, e tusa ai ma le toefuataiina mai e Mose o ki mo le faapotopotoina o Isaraelu, o le taimi nei pe tusa ma le 70,000 faifeautalai o loo salalau i le salafa o le lalolagi e folafola atu Lana talalelei e faapotopoto ai Lana au filifilia. O le amataga lea o le faataunuuga o le galuega tele ma le ofoofogia na muai vaai i ai Nifae i Nuuese faapea le aiga o Isaraelu. Na vaai Nifae i o tatou taimi o le a i ai le Au Paia a le Atua i tuluiga uma o le lalolagi, ae o le a itiiti lo latou aofai ona o le amioleaga. Peitai, na ia muai vaaia o le a “faaauupegaina i latou i le amiotonu ma le mana o le Atua i le mamalu tele.”¹³ Pe a vaai atu i ai i le talafaasolopito puupuu o le Ekalesia toefuataiina, o taumafaiga faafaifeautalai ua aupito sili ona ofoofogia. Ua tatou vaaia le faataunuuga o le faaaliga a Nifae. E ui ina toaitiiti o tatou faitau aofai, ae o le a faaauau pea a tatou taumafaiga ma aapa atu ia i latou o le a tali mai i le savali a le Faaola.

Lona lua, sa oo mai Elaia, ma tauaao mai le tisipenisione o le talalelei a Aperaamo, fai mai o le a faamanuiaina ai i maʼua ma a maʼua fanau, tupulaga uma mulimuli mai pe a mavae atu i maʼua. I le konafesi lenei, e maoae le taitaiga na tuuina mai e fesoasoani ai i le faaatoatoaina o le Au Paia ma saunia ai i latou mo le malo o le Atua.¹⁴ O le faasilasilaga i le sauniga perisitua e faatatau i korama a toeaina ma faitaulaga sili o le a tatala ai le mana ma le pule o le perisitua. O faiaoga o aiga ma faiaoga asiasi, ua avea nei ma “auaunaga” e pei ona aoaoina atu ma le matua manino i lenei sauniga, o le a saunia ai le Au Paia o Aso e Gata Ai e feiloai ma le Atua.

Lona tolu, na tauaao mai e Elia ia ki o faamauga o lenei tisipenisione. Mo i tatou o soifua i lenei taimi, o le faateleina o malumalu ma le galuega o talafaasolopito o aiga e maoae. O lea saoasaoa o le a faaauau pea ma faanatinati seia oo i le Afio Mai Faalua o le Faaola ne’i “faama’umauina atoa le lalolagi i lona afio mai.”¹⁵

O le galuega o talafaasolopito o aiga, ua faamanuiaina e le lagi e ala i tekinolosi, ua matua faateleina naua i nai tausaga ua mavae atu. Tatou te le atamamai ai pe a faamalieina e uiga i lenei tiutetauave paia ua atofaina ma faamoemoe o le a taulimaina e Aunt Jane po o se isi tagata o le aiga. Sei ou faasoa atua ni manatu faaalia tuusao a Peresitene Iosefa Filitia Samita: “E leai se tasi e fai alofaga mai i lenei matafaioi maoae. E manaomia mai le aposetolo faapea foi le alii faifeau aupito faatauvaa [po o le tuafafine]. O le nofoaga, po o le eseesega, po o le umi o le auaunaga i le Ekalesia … e le agavaa ai se tasi e manatu mama i le faaolataga o se tasi ua maliu.”¹⁶

Ua i ai nei o tatou malumalu i le salafa o le lalolagi ma punaoa tau tupe e lagolagoina ai tagata ulu e fesoasoani ai i e e manaomia ae mamao mai se malumalu.

I le avea ai ma tagata taitoatasi, o le a lelei pe a tatou iloiloina a tatou taumafaiga i le tulimataia o galuega faafaifeautalai, malumalu ma le talafaasolopito o aiga, ma sauniuni ai e fetaiai ma le Atua.

O le Amiotonu, Lotogatasi, ma le Tutusa i luma o le Alii ua Fausia ai se Faavae o Nei Tiutetauave Paia

E tusa ai ma le amiotonu, o le olaga lenei o le taimi mo i tatou uma e sauniuni ai e fetaiai ma le Atua.¹⁷ O le Tusi a Mamona ua aumaia ai le mau faataitaiga o taunuuga matautia pe a le usitai ia tagata taitoatasi po o vaega e tausi ia poloaiga a le Atua.¹⁸

I le taimi o lo’u olaga, o faafitauli ma popolega o le lalolagi na fesiitai mai lea o’oo’oga i le isi—mai tulimataiga faavasivasi ma e le taua i le legavia matuia. E faafetai ona sa i ai ni amioga le mama faatautala na faaalia ma sa tausalaina.¹⁹ O na amioga le mama faatautala e le tusa ai ma tulafono a le Atua ma le malo. O i latou ua malamalama i le fuafuaga a le Atua e tatau foi ona tetee i amioga le mama faatautala, o se agasala foi. O le folafolaga i le aiga i le lalolagi ua lapatai mai ai faapea o “tagata taitoatasi o e solia feagaiga o le ola mama, o e saua i toalua po o fanau … o le a i ai se aso e tutu atu ai e tali atu i luma o le Atua.”²⁰

A o faasolosolo la tatou vaai, tatou te iloa atu ai le faatafunaga o le amioleaga ma mea ua fai ma vaisu i soo se itu. Afai, i le avea ai ma tagata taitoatasi, ua tatou popole moni lava e uiga i le faamasinoga mulimuli a lo tatou Faaola o i tatou, ua tatau ona tatou sailia le salamo. Ou te fefe ua toatele tagata ua le o toe manatu e tali atu i le Atua ma latou le liliu atu i tusitusiga paia po o perofeta mo se taitaiga. Afai, i le avea ai o i tatou ma tagata lautele, o le a manatunatu i taunuuga o le agasala, o le a i ai se tetee tele faalauaitele i ponokalafi ma le faatasinaga o fafine.²¹ E pei ona sa ta’u atu e Alema i lona atalii o Korianetona i le Tusi a Mamona, “E lei avea lava le amioleaga ma fiafia.”²²

E tusa ai ma le lotogatasi, na tautino mai e le Faaola, “Afai tou te le tasi e le a a’u outou.”²³ Ua tatou iloa o le agaga o finauga e mai le tiapolo.²⁴

I o tatou taimi, o le poloaiga faatusipaia o le lotogatasi ua matua le amanaiaina lava, ma o le toatele o tagata o le faamamafa ua taaituaiga,²⁵ ua tele ina faavae i tulaga, itupa, lanu, ma le tamaoaiga. I le tele o atunuu, pe afai e le o le toatele, ua matua vaeluaina lava tagata i le ala e ola ai. I le Ekalesia a le Alii, na pau le aganuu tatou te mulimuli ai ma aoao atu o le aganuu o le ekalesia a Iesu Keriso. O le lotogatasi tatou te sailia o le ogatasi lea ma le Faaola ma Ana aoaoga.²⁶

A o tatou vaavaai atu i faamoemoega autu o le Ekalesia, e faavae uma lava i le tutusa i luma o le Alii²⁷ ma mulimuli i le aganuu o le talalelei a Iesu Keriso. E tusa ai ma le galuega faafaifeautalai, o agavaa autu mo le papatisoga o le faalotomaualaloina o le tagata i luma o le Atua ma sau i luma ma se loto nutimomoia ma le agaga salamo.²⁸ O aoga, tamaoaiga, ituaiga, po o le tupuaga faalemalo e le faitaulia lava.

E le gata i lea, o faifeautalai e auauna atu ma le lotomaualalo i le mea e tofia i ai. Latou te le taumafai e auauna atu i luga o tulaga faatauaina e le lalolagi o tulaga po o ni tapenapenaga mo ni galuega i le lumanai. Latou te auauna atu ma o latou loto atoa, manatu, mafaufau ma le malosi atoa po o fea lava e tofia i ai i latou. Latou te le filifilia a latou soa faafaifeautalai, ma e latou te saili ma le maelega e atinae ia uiga faaKeriso,²⁹ ia e totonugalemu i ai le aganuu a Iesu Keriso.

Ua tuuina mai e tusitusiga paia le taitaiga mo le tele o a tatou sootaga taua. Ua aoao mai e le Faaola e faapea o le poloaiga muamua o le “alofa i le Alii lou Atua.” Ma le lona lua o le “alofa i lou tuaoi e pei o oe lava.”³⁰

Ona faamalamalama mai ai lea e le Faaola e faapea o tagata uma lava o o tatou tuaoi.³¹ Ua faamanino mai e le Tusi a Mamona e faapea e le tatau ona i ai ni -vaevaega i ituaiga, po o ni faavasegaga.³² E tatau ona tatou lotogatasi ma tutusa i luma o le Atua.

O sauniga paia ma tiutetauave faalelagi e fausia i luga o le faavae lenei. Ou te faamoemoe o outou aafiaga i le malumalu e faapei o lo’u [foi aafiaga]. Pe a ou tuua lo’u aso faigaluega i San Francisco ma taunuu atu i le Malumalu i Oakland, ou te lagonaina se lagona lofituina o le alofa ma le filemu. O se vaega tele o lena mea o le lagonaina lea ua ou latalata i le Atua ma Ona faamoemoega. O sauniga faaola o la’u taulaiga autu lea, ae o se vaega tele o na lagona matagofie o le tutusa lea ma le lotogatasi e faatumulia ai le malumalu. E oofu papae tagata uma. E leai se faailoga o le tamaoaiga, tulaga, po o ni ausiaga faaleaoaoga; o i matou uma o uso ma tuafafine ua faamaualaloina i matou lava i luma o le Atua.

I le potu paia o faamauga, o le sauniga faaipoipoga e faavavau e tutusa mo tagata uma. Ou te fiafia i le mea moni e faapea o le ulugalii mai se talaaga aupito maualalo ma le ulugalii mai se talaaga aupito mauoa, e tutusa lelei lava aafiaga e maua. Latou te ofuina ofutalaloa lava e tasi ma osia feagaiga i luga o le fatafaitaulaga lava e tasi. Latou te mauaina foi ia faamanuiaga e tasi e faavavau faaleperisitua. E faataunuuina lenei mea i se malumalu matagofie na fausia i sefuluai a le Au Paia e fai ma maota paia o le Alii.

O le faataunuuina o tiutetauave e atofa mai le lagi, e faavae i luga o le amiotonu, lotogatasi, ma le tutusa i luma o le Atua, e aumaia ai le fiafia ma le filemu patino i lenei lalolagi ma saunia ai i tatou mo le ola e faavavau i le lalolagi a sau.³³ E saunia ai i tatou e fetaiai ma le Atua.³⁴

Matou te tatalo ia taitasi outou, tusa lava po o a outou tulaga o i ai i le taimi nei, o le a talanoa ma lou epikopo ma ia agavaa mo se pepa faataga o le malumalu.³⁵

Matou te faafetai ona ua toatele atu ia tagata o loo sauniuni e o i le malumalu. Sa i ai se faatelega tele i le faitauga o tagata matutua ua umia pepa faataga o le malumalu mo le tele o tausaga. Ua matua faateleina foi pepa faataga e faatapulaa mo talavou agavaa i le lua tausaga talu ai. Ua manino foi o le faitau aofai autu o le Ekalesia e lei i ai se isi taimi na malosi atu ai.

I le faaiuga, faamolemole ia mautinoa o taitai sinia o le Ekalesia o e o pulefaamalumalu i faamoemoega ua atofa mai le lagi o le Ekalesia e mauaina le fesoasoani mai le lagi. O lenei taitaiga e maua mai le Agaga ma o nisi taimi e tuusao mai le Faaola. Ua tuuina mai ia ituaiga e lua o taitaiga faaleagaga. Ou te faafetai lava i le mauaina o lea fesoasoani. Peitai e tuuina mai le taitaiga i le taimi a le Alii, o lea fuaiupu ma lea fuaiupu ma lea mataupu ma lea mataupu,³⁶ pe a filifili ma le toto’a le “Alii e silafia mea uma e aoao i tatou.”³⁷ O le taitaiga mo le Ekalesia atoa e na o Lana perofeta e auala mai ai.

Sa tatou maua uma le avanoa le laumaua e lagolago ai Peresitene Russell M. Nelson e avea ma o tatou perofeta ma Peresitene o Le Ekalesia a Iesu Keriso o le Au Paia o Aso e Gata Ai i lenei konafesi. O le Toasefululua, i le avea ai o se vaega ma tagata taitoatasi, ua i ai se aafiaga iloga faaleagaga ina ua tuu o matou lima i luga o le ao o Peresitene Nelson ma Peresitene Dallin H. Oaks, sa avea ma siufofoga sui, e faauuina ma vaetofia o ia e fai ma Peresitene o le Ekalesia. Ou te molimau atu sa muai faauuina o ia ma sa sauniaina i lona soifuaga atoa e avea ma perofeta a le Alii i o tatou aso. I le suafa, o Iesu Keriso, amene.