Auauna Atu e pei ona Faia e le Faaola
Saunia e Jean B. Bingham
Peresitene Aoao o le Aualofa
Tau ina ia tatou faaalia lo tatou lotofaafetai ma le alofa mo le Atua e ala i le auauna atu ma le alofa i o tatou uso ma tuagane e faavavau.
E maeu le faamanuiaga o le ola ai i se vaitaimi o faaaliga faifai pea mai le Atua! A o tatou tulimatai atu ma taliaina le “toefuataiga o mea uma,”1 ia ua oo mai ma o le a oo mai e ala i mea ua valoiaina e tutupu i o tatou taimi, ua sauniaina i tatou mo le Afio Mai Faalua o le Faaola.2
Ma e maeu le ala sili atu e saunia ai e fetaiai ma Ia nai lo le tauivi e avea ia pei o Ia e ala i auaunaga alofa i le tasi ma le isi! E pei ona aoao atu e Iesu Keriso Ona soo i le amataga o lenei tisipenisione, “Afai e te alofa mai ia te a’u, e te auauna mai ia te a’u.”3 O la tatou auaunaga i isi o se faailoaga lea o le avea ma soo ma lo tatou lotofaafetai ma le alofa mo le Atua ma Lona Alo, o Iesu Keriso.
O nisi taimi tatou te manatu ai e ao ona tatou faia se mea silisili ma toa e “faitaulia” ai o se auaunaga i o tatou tuaoi. Ae o ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia. O le a le mea na faia e le Faaola? E ala i Ana meaalofa faalelagi o le Togiola ma le Toetu—lea tatou te faamanatuina i lenei Aso Sa matagofie o le Eseta—“e leai lava se isi na i ai se uunaiga loloto faapea i e uma na soifua ma e o le a soifua i luga o le fogaeleele.”4 Ae sa Ia ataata foi i [isi], talanoa i [isi], savavali ma [isi], faalogo atu i [isi], faaavanoa se taimi mo [isi], faamalosiau atu, aoao atu, fafaga, ma faamagalo atu. Sa Ia auauna atu i aiga ma uo, tuaoi ma tagata ese foi, ma sa Ia valaaulia ē masani ma ē pele ia olioli i faamanuiaga silisili o Lana talalelei. O na faatinoga “faigofie” o auaunaga ma le alofa ua maua ai se mamanu mo a tatou auaunaga i aso nei.
A o e maua ai le avanoa e fai ai ma sui o le Faaola i au taumafaiga faaleauaunaga, ia fesili ifo ia te oe lava ia, “E mafai faapefea ona ou faasoaina atu le malamalama o le talalelei i lenei tagata po o le aiga? O le a le mea o loo musuiaina a’u e le Agaga e fai?
E mafai ona faia auaunaga i le anoanoai o auala eseese e faapatinoina. E faape’i la ona foliga?
O auaunaga e foliga i au peresitene o korama a toeaina ma le Aualofa o loo fefautuaai ma le agaga tatalo e uiga i tofiga. Nai lo taitai e tufa atua ni fasi pepa, e foliga i fefautuaiga patino faafesaga’i e uiga i tagata taitoatasi ma aiga a o tuuina atu tofiga i tuagane ma uso o loo faia le auaunaga. E foliga i le o mo se savaliga, o mai faatasi mo se po taalo, ofoina atu o le auaunaga, po o le feauaunaa’i faatasi. E foliga i le asiasi atu i le tagata pe talanoa i luga o le telefoni pe talatalanoa i luga o le initoneti po o feau tusitusia. E foliga i le tilivaina o se kata o se aso fanau ma le tapuaia o se taaloga soka. E foliga o le faasoaina atu o se mau po o se upusii mai se lauga o le konafesi o le a anoa i lena tagata. E foliga i le talanoaina o se fesili o le talalelei ma le faasoaina atu o le molimau e aumaia ai le alofa mama ma le filemu. E foliga i le avea ma se vaega o le olaga o se tasi ma le popole mo ia. E foliga i se faatalanoaga faaleauaunaga lea e talanoaina ai ma le nofouta ma le talafeagai ia manaoga ma malosiaga. E foliga i le aufono a le uarota o loo faatulagaina e tali atu i se manaoga tele.
O lenei ituaiga o auaunaga sa faamalosia ai se tasi uso na masii atu i se nofoaga e mamao ese mai le aiga ina ua amatalia e lona toalua se aoga e faauu ai. Faatasi ma le leai o se telefoni e ola ma se pepe meamea e tausi, sa ia lagona ai le le toafimalie i le nofoaga fou, na matua le mautonu ma tuuatoatasi. Sa saunoa ma se muai faailoa atu, sa alu atu ai se uso o le Aualofa i lona faitotoa ma avatu se pea seevae mo le pepe, faaoso i laua i totonu o lana taavale, ma ave i laua e sue le faleoloa meaai. Sa lipoti mai e le uso lotofaafetai lea, “O ia o lo’u vaa faaola!”
O se auaunaga moni na faaalia e se uso matua i Aferika lea sa tofia e saili se uso sa lei auai i sauniga o le Ekalesia mo se taimi umi. Ina ua alu atu o ia i le fale o le uso, sa ia iloa ai sa fasia le fafine ma gaoia ana mea, itiiti ana mea e ai, ma sa leai ni lavalava sa ia lagona na talafeagai mo sauniga Lotu o le Aso Sa. O le fafine na tofia e auauna atu ia te ia sa ia saunia e faalogo atu, aumai fua mai lana faatoaga, o mau e faitau, ma se faauooga. Sa lei pine ae toe foi mai le uso na “misi” i le lotu ma ua i ai nei sona valaauga ona ua ia iloa e alofaina ma faatauaina o ia.
I le tuufaatasia ai o ia taumafaiga a le Aualofa ma korama a toeaina ua toefaatulagaina nei o le a aumaia ai se lotogatasi lea e mafai ona fua mai ai ni taunuuga ofoofogia. Ona avea lea o le auaunaga ma se taumafaiga se tasi ua faamaopoopoina e faataunuu ai le tiute faaleperisitua o le “asiasi atu i fale o tagata taitoatasi o le ekalesia” ma ia “leoleo i luga o le ekalesia e le aunoa, ma faatasi ma faamalosi i latou,”5 faapea ai ma le ausiaina o le faamoemoega o le Aualofa ina ia fesoasoani i le tasi ma le isi e saunia mo faamanuiaga o le ola e faavavau.6 O le galulue faatasi i lalo o le taitaiga a le epikopo, au peresitene o le korama a toeaina ma le Aualofa e mafai ona musuiaina a o latou sailia ni auala silisili e leoleo ai ma tausia tagata taitoatasi ma aiga.
Sei o’u tuuina atua se faataitaiga. O se tina sa maua i le kanesa. Sa lei pine ae amatalia ana togafitiga, ma sa vave ona o atu uso o le Aualofa e galulue, sa fuafuaina pe faapefea ona fesoasoani lelei i meaai, femalagaaiga i taimi faatulagaina faafomai, ma isi fesoasoaniga. Sa latou asiasi soo ia te ia, ma tuuina atu se faauooga fiafia. I le taimi lava lea e tasi, sa vave foi ona galulue le korama a le Perisitua Mekisateko. Sa latou galulue e faaopoopo se potumoe toefaafouina ma se faletaele e faafaigofie ai le tausiga o le uso gasegase. Sa tuuina atu foi e alii talavou la latou lagolagosua e auai ai i lena taumafaiga taua. Sa aofia ai foi ma tamaitai talavou: sa latou faatulagaina ma le fiafia e faasavali ma le faamaoni le ta’ifau i aso taitasi. A o gasolo ai le taimi, sa faaauau pea e le uarota la latou auaunaga, faaopoopo ma fetuunai i tulaga e talafeagai ai. Sa manino lava o se galuega o le alofa, o tagata taitasi na ofo atu o ia lava, sa faaalia ma le lotogatasi le popole i ni auala patino na faamanuiaina ai e le gata o le uso mafatia ae o tagata taitoatasi o lona aiga.
I le mavae ai o se taumafaiga lototoa, sa i’u lava ina maliu le uso i le kanesa ma lagomau ai i [lona] mapusaga tumau. Pe na mapuea i le toomaga le uarota ma manatu o se galuega na lelei ona faia ma ua maea? Leai, o loo faaauau pea ona faasavali e tamaitai talavou le ta’ifau i aso taitasi, faaauau e korama a le au perisitua ona auauna atu i le tama ma lona aiga, ma faaauau pea ona aapa atu uso o le Aualofa i le alofa e iloilo ia malosiaga ma manaoga. Uso e ma tuagane, o le auauna atu lenei—o le alofa lenei e pei ona faia e le Faaola.
O se isi faamanuiaga o nei faasilasilaga musuia o le avanoa mo tamaitai talavou e 14 i le 18 tausaga le matutua e auai i le auaunaga o ni soa i uso o le Aualofa, e pei ona auauna atu ai alii talavou o lo latou tupulaga o ni soa auauna i uso o le Perisitua Mekisateko. E mafai e le autalavou ona fefaasoaai a latou meaalofa tulagaese ma tuputupu a’e faaleagaga a o latou auauna atu faatasi ma tagata matutua i le galuega o le faaolataga. O le faaaofiaina ai o le autalavou i tofiga faaleauaunaga e mafai foi ona faateleina ai le aapa atu o le Aualofa ma korama a toeaina e tausi isi e ala i le faateleina o le aofai o tagata e auai ai.
A ou mafaufau atu i tamaitai talavou ofoofogia ou te iloa, ou te fiafia lava mo na uso o le Aualofa o e o le a mauaina le avanoa e faamanuiaina ai i le naunautaiga, o taleni ma le nofouta faaleagaga o se tamaitai talavou a o latou auauna atu ai faatasi pe tautuaina ai foi e i latou. Ma e tutusa foi lo’u fiafia i le avanoa o le a maua e tamaitai talavou e fautuaina ai ma aoaoina ma faamalosia e o latou uso i le Aualofa. O lenei avanoa e auai ai i le fausiaina o le malo o le Atua o le a avea ma se manuia tele i tamaitai talavou, fesoasoani ia i latou ia saunia lelei atili e faataunuu a latou matafaioi o ni taitai i le Ekalesia ma nuu ma le avea ai ma ni paaga faisaofaga i o latou aiga. E pei ona faasoa atu e Sister Bonnie L. Oscarson ananafi, e “mananao [tamaitai talavou] ia auauna atu. E manaomia ona latou iloa e faatauaina i latou ma e taua [i latou] i le galuega o le faaolataga!”7
O le mea moni, o loo auauna atu lava tamaitai talavou i isi, e aunoa ma se tofiga [e auauna atu] po o le faamamaluina [o sana auaunaga]. Ou te iloaina se aiga sa malaga ese i le faitau selau o maila i se nofoaga fou i le mea sa leai ma se tasi latou te iloaina. I totonu o le vaiaso muamua, sa tu atu ai i lo latou faitotoa se teneitiiti e 14 tausaga le matua mai le latou uarota fou ma se ipu kuki, ma faafeiloai i latou i le eria. Sa tu ma laumata fiafia i ona tua atu lona tina o se avetaavale naunautai, o loo lagolagoina le manao o lana tama teine e auauna atu.
Sa popole se isi tina i se tasi aso ona ua le oo atu lana tama teine e 16 tausaga le matua i le fale i le taimi e masani ai. Ina ua taunuu mulimuli ane le teine, sa fesiligia o ia e lona tina faatasi ma se atuatuvale po o fea sa i ai o ia. Sa toetoe lava tali atu ma le matamuli le [teine] e 16 tausaga sa ia avatu se fugalaau i se fafine ua oti lana tane sa nofo latalata ane. Sa ia matauina foliga tuuatoatasi o le uso matua lea ma lagona ai le uunaiga e asiasi atu ia te ia. Faatasi ai ma le faamaoniga atoa a lona tina, sa faaauau ai pea ona asiasi atu le tamaitai talavou i le olomatua lea. Sa avea i laua ma ni uo lelei, ma o le la fegalegaleaiga mafana sa faaauau pea mo le tele o tausaga.
O nei tamaitai talavou taitasi, ma le isi toatele e pei o i latou, sa matauina le manaoga o se tasi ma galue ai e faafetaiaia. O loo i ai i tamaitai talavou se manao faalenatura e tausi ma faasoa atu lea e mafai ona faatonutonuina lelei e ala i auaunaga faapaaga ma se uso matua.
Po o le a lava lo tatou matutua, a tatou iloiloina pe faapefea ona auauna atu ma le mataalia silisili, tatou te fesili, “O le a se mea o ia manaomiaina?” O le o faatasi o lena fesili ma se manao faamaoni e auauna atu, o le a taitaia ai i tatou e le Agaga e fai mea o le a siitia ma faamalosia ai le tagata. Ua ou faalogo i le mau tala e tele e uiga i tuagane ma uso sa faamanuiaina e sina taga faatauvaa o le faaaofiaina ma le talileleia i le lotu, o se imeli magafagafa po o se feau tusitusia, se fesootaiga patino i se taimi faigata, se valaaulia ia auai i se gaoioiga faavaega, po o se ofo atu e fesoasoani i se tulaga lu’itauina. O matua nofotoatasi, tagata fou liliu mai, tagata le toaaga, tina ma tama ua oti taitoalua, po o talavou faigata atonu e manaomia se gauaiga faaopoopo ma se fesoasoaniga faamuamua mai uso ma tuagane e faia auaunaga. O le faamaopoopoga i le va o au peresitene o le korama a toeaina ma le Aualofa e faatagaina ai le faia o ni tofitofiga talafeagai.
A uma ona talanoaina ma faia mea uma, o le auaunaga moni lava e ausiaina taitoatasi faatasi ma le alofa e fai ma uunaiga. O le tau ma le taua ma le ofoofogia o auaunaga faamaoni e suia moni ai olaga! A tatala atu o tatou loto ma naunau ia alolofa atu ma faaaofia [tagata], faamalosiau atu ma faamafanafana, o le a le mateenaina le mana o la tatou auaunaga. Faatasi ma le alofa e fai ma uunaiga, o le a tutupu vavega, ma o le a tatou maua auala e aumaia ai o tatou uso ma tuagane o loo “misi” i totonu o le ofaga o le talalelei a Iesu Keriso mo tagata uma.
O le Faaola o lo tatou faataitaiga i mea uma—e le gata i mea e tatau ona tatou faia ae pe aisea foi e tatau ai ona tatou faia.8 “O Lona soifuaga i le lalolagi o [se] valaaulia ia i tatou—ia siitia maualuga teisi la tatou vaai, ia faagalo o tatou lava faafitauli ma [ia] aapa atu i isi.”9 A o tatou taliaina le avanoa e auauna atu ai ma le loto atoa i o tatou uso ma tuagane, e faamanuiaina i tatou i le faaleleiga atili faaleagaga, o le a ogatasi atili ma le finagalo o le Atua, mafai atili ona malamalama i Lana fuafuaga e fesoasoani atu i tagata taitoatasi ia toe foi atu ia te Ia. O le a tatou iloaina lava Ana faamanuiaga ma naunau e faasafua atu na faamanuiaga i isi. O le a vivii o tatou loto ma o tatou leo i le leo e tasi:
Ou te alofa i lo’u uso
Pei o Oe ia te a’u,
Oe lo’u sulu, lo’u malosi,
Fai a’u ma au auauna.
Faaola e, ou te mulimuli—
Atu ia te oe.10
Tau ina ia tatou faaalia lo tatou lotofaafetai ma le alofa mo le Atua e ala i le auauna atu ma le alofa i o tatou uso ma tuagane e faavavau.11 O le taunuuga, o le a lotogatasi i lagona e pei ona fiafia ai tagata i Amerika anamua i le 100 tausaga ina ua mavae le afio mai o le Faaola i lo latou laueleele.
“Ma sa oo ina leai se finauga i le laueleele, ona o le alofa o le Atua sa mau i loto o tagata.
“… Ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua.”12
Ou te tuu atu ma le fiafia la’u molimau patino o nei suiga faafaaaliga ua musuia e le Atua ma, a tatou taliaina ma loto naunautai, o le a tatou saunia lelei atili e feiloai atu i Lona Alo, o Iesu Keriso, i Lona afio mai. O le a tatou latalata atili i le avea ma nuu o Siona ma o le a tatou lagonaina le olioli silisili faatasi ma i latou na tatou fesoasoani i ai i luga o le ala o le avea ma soo. Ia faapea lava ona tatou faia, o la’u tatalo faatauanau ma le faamaualalo lea i le suafa o Iesu Keriso, amene.