Elder Jack H. Gerard
Fitugafulu a le Au Pulega Aoao
A o tamaitiiti, sa ala ae Elder Jack N. Gerard i taeao uma pe tusa o le 5:00 i le taeao, e fesoasoani i le tausiga o povi taususu a le aiga. A o soifua ae i se nuu faifaatoaga laitiiti e lata i le Mud Lake, Idaho, ISA, sa aoao ai o ia e le gata ina galue malosi ma tauave ni tiutetauave ae sa ia iloa ai foi le taua o tagata taitoatasi o fanau a le Atua.
“E tofu tagata uma ma se matafaioi e faatino ma e tofu tagata uma iinei ma se faamoemoega, tusa lava po o a tofi po o tulaga i le olaga,” na saunoa ai Elder Gerard, o le sa lagolagoina i le aso 31 Mati, 2018 o se Fitugafulu o le Pulega Aoao. O lena lesona sa avea o se meaalofa i lona soifuaga atoa.
O lana matata, lea sa aofia ai matafaioi lauiloa faaletaitai mo le tele o faapotopotoga—e pei o le National Mining Association, le America Chemistry Council, ma talu ai nei, le American Petroleum Institute—na ia maua ai avanoa e fegalegaleai ai ma tagata o soo se ituaiga o le olaga.
Sa soifua mai Elder Gerard i le 1957 ia James ma Cecil Gasser Gerard. Ina ua uma ona faamisiona o ia i le Misiona a Sini Ausetalia, sa aoga Elder Gerard i le Iunivesite o Idaho, lea na maua ai sona avanoa faigaluega faataitai ma sosoo ai ma se tulaga e faigaluega tumau ai i aufaigaluega a se tagata konekaresi a Idaho.
A o faigaluega ai o ia i Uosigitone D.C., sa ia feiloai ai ma Claudette Neff, o le sa fesoasoani i se aufaigaluega a se senate Iuta. “Sa susulu mai ia te ia le malamalama o le talalelei,” sa saunoa ai Elder Gerard e uiga i le la feiloaiga. Sa faaipoipo i la’ua i le aso 4 Aperila, 1984, i le Malumalu o Sate Leki; E toavalu o laua alo ma fanau a fanau e toafa.
Sa maua e Elder Gerard se tikeri o le tagata malaga [BA] ma le tikeri i saienisi faaupufai ma se tikeri o le tofamanino i le tulafono mai le Iunivesite o George Uosigitone.
Sa avea ia Elder Gerard o se epikopo, peresitene o le siteki, Fitugafulu Eria, faiaoga o Mataupu Faavae o le Talalelei, ma le peresitene o le Aoga Sa.
Na saunoa Elder Gerard e tofu i la’ua ma lona faletua ma se naunautaiga e fai le finagalo o le Alii. “I le avea ai o ni tagata vaivai, ua ma tautino atu po o le a lava le mea e finagalo le Alii ma te faia, ma faalotomaualaloina ma faamamaluina i ma’ua … e faapaiaina o ma taimi ma taumafaiga i le galuega a le Alii.