Elder Ulisses Soares
Korama a Aposetolo e Toasefululua
O perofeta soifua e aofia ai ma Peresitene Russell M. Nelson, o se faailoga o le alofa o le Atua mo Ana fanau, na molimau atu ai Elder Ulissess Soares i lana uluai saunoaga i le konafesi muamua o se uso o le Korama a Aposetolo e Toasefululua.
“Pe le o se faamanuiaga ea le i ai o perofeta, tagatavaai, ma talifaaaliga i le lalolagi i nei aso ua tatou ola ai, o e o saili ia iloa le finagalo o le Alii ma mulimuli ai? O se faamafanafanaga lava le iloa e le o tuua na o i tatou i le lalolagi, tusa lava po o a luitau o tatou feagai i le olaga.”
E ui ina sa ia lagonaina le le agavaa mo lona valaauga o se Aposetolo, ae sa saunoa Elder Soares, “o upu a [Peresitene Nelson] ma le silasila agamalu i ona fofoga a o ia tuuina mai lenei tiutetauave na ou lagonaina ai le opoina o au i le alofa o le Faaola.”
O le lagolagoina o ia i le aso 31 Mati, 2018, na avea ai Elder Soares ma uluai Aposetolo a le Ekalesia mai Amerika Latina. I luma atu o lona valaauga, sa avea o ia o se uso o le Au Peresitene o Fitugafulu talu mai le aso 6 Ianuari, 2013 ma sa galue i se tofiga faapitoa mo le Au Epikopo Pulefaamalumalu i le Aai o Sate Leki.
Sa lagolagoina Elder Soares o se Fitugafulu o le Pulega Aoao i le aso 2 Aperila, 2005. I lena tulaga, sa avea ai o ia ma fesoasoani i Eria a Sautesasae i Aferika ma Eria a Pasila i Saute ma se Peresitene o le Eria a Pasila.
E tele valaauga eseese o le Ekalesia na auauna atu ai Elder Soares. Sa faamisiona talai o ia i le Misiona a Pasila Rio de Janeiro, peresitene o le korama a toeaina, fesoasoani i se au epikopo, fautua maualuga, failautusi faapitoa i le siteki, sui o le uelefea a le itulagi, peresitene o le siteki, ma le peresitene o le Misiona a Potukale Porto mai le 2000 i le 2003.
O se tasi o ona valaauga sili ona taua i le 15 ai o ona tausaga ina ua talosagaina o ia e le epikopo e faiaoga mo se taimi le tumau i se vasega mo talavou i le Aoga Sa. I le tapenaga mo se lesona pe faapefea ona maua se molimau, sa tonu ai i le taulealea o Ulisses e tatalo mo se faamautuuga o le moni o le talalelei.
“Ina ua ou tootuli i lalo ma ole atu i le Alii pe moni le talalelei,” sa ia toe ta’ua, “na oo mai i lo’u loto iina se lagona manaia lava, o se leo lemu sa faamautu maia ia te au e tatau ona faia pea. Sa matuai malosi tele ma sa le mafai ona ou faapea atu sa ou le i iloaina.”
I le 1995, sa ia maua ai se tikeri o le tagata malaga [BA] i le tausitusi ma le tamaoaiga mai le Aoga o Saienisi o le Tamaoaiga i le Iunivesite Katoliko o São Paulo Pontifical. Ina ua maea ona maua sona tikeri o le matuaofaiva i le pulega taupisinisi, sa faigaluega o ia o se tausitusi ma suetusi i faalapotopotoga tuufaatasi faalemalo i Pasila ma se faatonusili o mataupu faaletino i le Ekalesia i le ofisa o le eria São Paulo.
Na soifua mai Ulisses Soares i São Paulo, Pasila, i le aso 2 Oketopa, 1958. Sa faaipoipo o ia ia Rosana Fernandes ia Oketopa 1982. I lana saunoaga i le konafesi aoao, na saafi atu ai Elder Soares i lona faletua mo lona alofa ma lana lagolago.
“Sa avea o ia o se faataitaiga o le agalelei, alofa, ma le tuuto atoatoa atu i le Alii ma mo au ma lo’u aiga,” e aofia ai le la fanau e toatolu ma fanau e toatolu a le la fanau, sa ia ta’ua ai i lana saunoaga i le konafesi. “Ou te alofa ia te ia ma lo’u fatu atoa, ma ou te faafetai lava mo lana tosinaga lelei mo i matou.”