Faatautaia o le Galuega Faafaifeautalai

I le ono masina talu ai, sa tele ni laasaga na faaaoga e le Ekalesia e faatautaia ai le galuega faafaifeautalai.

O fesili faatonuina. Sa folasia mai e le Au Peresitene Sili se seti o fesili faatonuina mo epikopo ma peresitene o siteki e faaaoga a o faatalanoa ia faifeautalai faamisiona tala’i faaolioli. Sa latou fautuaina taitai, matua, ma le autalavou ia faamasani i fesili.

O tulaga faatonuina e atagia mai i fesili e le o suia pe faaopoopo i tulaga manaomia mo le galuega faamisiona tala’i, ae o le iloiloina e le aunoa o le a mafai ai e faifeautalai faaolioli ma matua ona aoaoina ia mataupu faavae ma faailoa ia vaega e ono manaomia ai le faaleleia po o ni tapenaga faaopoopo.

Faaaogaina o tekinolosi. O le aofaiga o misiona ua faaaogaina masini feaveai ua faateleina mai le 87 i le 162 ma ua suia komepiuta feaveai i telefonipoto. O le a fesoasoani telefoni i faifeautalai e suesue ai, saili ai, ma aoao atu ai.

Ua faaaogaina foi tekinolosi e maua mai ai anotusi i le initoneti mo tagata o loo saili mo tali i fesili faalelotu. Sa amata e le Ekalesia ona faaaoga ia nofoaga tutotonu e aoao atu ai i le initoneti i le ono tausaga talu ai, ma o le taimi nei ua 20 nofoaga tutotonu e aoao atu ai i le initoneti i le salafa o le lalolagi.

Faafetai i tekinolosi, o tagata o le au paia e faasino atua uo i faifeautalai ua mafai nei ona fesootai ma faifeautalai o loo aoaoina a latou uo. E mafai ona latou talanoaina mea e manaomia ma faifeautalai ma auai i lesona e ala i le initoneti. Saili pe faapefea i le lds.org/referrals.

Faafetaia’ia o manaoga i le taimi nei. E amata atu ia Iulai 2018, o le a fetuunai ai e le Ekalesia ia tuaoi o misiona e 19, ma misiona fou e 5 o le a amatalia. O lea faiga o le a suia ai le aofaiga o misiona mai le 421 i le 407 O misiona fou o Pasila Rio de Jaeiro i Saute, Cote d’Ivoire Yamoussoukro, Nigeria Ibadan, Filipaina Cabanatuan, ma Zimbabwe Bulawaydo. O auiliiliga e uiga i misiona o le a tuufaatasia o le a avatu i fesootaiga i le lumanai mai peresitene o misiona i matua o faifeautalai i misiona o le a aafia ai.

Talu mai le suiga o tausaga o le matutua mo le auauanga faafaifeautalai na fofogaina mai i le 2012, sa amatalia ai e le Ekalesia ia misiona fou e 76 e taulima ai le faatupulaia lofituina o faifeautalai mai le 58,000 i le 88,000. O le mua’i lolofi mai o faifeautalai talu mai lena taimi ua tau maui atu, e foliga mai sa faamoemoeina, ma ua tusa nei ua 68,000 faufeautalai o loo galulue auauna i le taimi nei. O lona uiga, mo le taimi nei, ua manaomia na o ni nai misiona. Ae o lona uiga foi, ua manaomia ai le gauai patino e faatulagaina ma le tatau ia faifeautalai i eria e manaomia ai i le salafa o le lalolagi.

Nofoaga autu e aoao ai faifeautalai. O le Nofoaga Autu i Provo mo le Aoaoina o Faifeautalai i Iuta, ISA ma le MTC i Filipaina ua faateteleina nei ma ua toefaapaiaina, ma ua faapaiaina foi le nofoaga autu mo le aoaoina o faifeautalai i Kana. O nofoaga autu mo le aoaoina o faifeautalai i Sepania ma Chile, o le a tapunia ia Ianuari 2019, ma o faifeautalai sa tatau ona auai atu i se tasi o nei nofoaga autu o le a aoaoina i se tasi o isi nofoaga autu mo le aoaoina o faifeautalai i le salafa o le lalolagi.