O A’u ea o se Atalii o le Atua?

Saunia e Elder Brian K. Taylor

O Le Fitugafulu

E mafai faapefea e i tatou taitoatasi ona lagonaina le mana o le malamalama i lo tatou faasinomaga paia? E amata i le saili atu ia iloa le Atua, lo tatou Tama.

Talu ai nei sa ma o ai i le lotu ma lo’u tina lelei i le matou falesa maa tuai. O le tosina atu i ni leo laiti na sau mai le potu Peraimeri e tasi lava lea sa ou auai ai i le tele o tausaga ua tuanai, sa ou savali atu i tua ma mataua ai taitai alolofa o aoao atu le autu o le tausaga lenei: “O A’u o se Atalii o le Atua.”¹ Sa ou ataata a o ou manatua faiaoga onosai ma le alolofa, o e sa masani ona vaai mai ia te au i le taimi o a matou pesepesega i na vaitaimi—lena tama tiotio laitiiti i le pito o le nofoa umi, e peisea’i o latou tomanatu, “O ia moni ea o se atalii o le Atua? Ma o ai na auina maia o ia iinei?”²

Ou te valaaulia outou e tatala o outou loto i le Agaga Paia, o lē “molimau mai i o tatou agaga, o fanau i tatou a le Atua.”³

E manino ma taua upu a Peresitene Boyd K. Packer: “O oe o se atalii [po o se afafine] o le Atua. O Ia o le tama o lou agaga. I le faaleagaga, na e fanau mai i se [gafa] tautupu, o se atalii [po o se afafine] o le Tupu o le Lagi.Ia tāmau lena upumoni i lou mafaufau ma taofi mau i ai. Po o le a lava le tele o augatupulaga i lou augatuaa faaletino, po o le a foi le ituaiga po o ni tagata e te tupuga mai ai, ae o le gafa o lou agaga e mafai ona tusia i se laina se tasi. O oe o se atalii [po o se afafine] o le Atua!”⁴

Na faamatala e Polika Iaga, “Pe a e … vaai i lo tatou Tama, o le a e vaaia se tagata ua leva ona e masani muamua i ai, ma o le a Ia talia oe i Ona aao, ma o le a e sauni e faapa’u atu i Lona opo mai ma sogi ia te Ia.”⁵

O Le Taua Tele i le Faasinomaga Paia

Sa aoao Mose e uiga i lona tupuaga paia i le talanoa ai faafesaga’i ma le Alii. I le mavae ai o lena aafiaga, “Sa alu ane Satani ma faaosooso,” ma le faaōleōle, ae pulunaunau malosi e faasese, ma faaumatia le faasinomaga o Mose, “ua fai mai: Mose e, le atalii o le tagata, ifo mai ia te a’u. Ma sa … vaai atu Mose ia Satani ma fai atu: O ai oe? Aua faauta, o a’u o se atalii o le Atua.”⁶

O lenei taua tele i le faasinomaga paia o loo finauina pea, a o faateteleina pea metotia taufaasese a Satani ua faamoemoe e faaumatia ai lo tatou talitonuga ma le malamalama e uiga i lo tatou sootaga ma le Atua. O le mea e faafetai ai, ua faamanuiaina i tatou i se malamalamaaga manino o lo tatou faasinomaga moni mai le amataga: “Ona fetalai ane lea o le Atua, Ina tatou faia ia o le tagata i lo tatou faatusa, ia foliga ia i tatou,”⁷ ma ua tautino mai e perofeta soifua, “O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”⁸

O le iloa o nei upumoni ma le mautinoa⁹ e fesoasoani ia i tatou e faatoilalo ai tofotofoga, faafitauli, ma puapuaga o soo se ituaiga.¹⁰ Pe a fesiligia, “E mafai faapefea ona tatou fesoasoani ia i latou o tauivi ma [se luitau patino]?” sa aoao mai se Aposetolo a le Alii, “Aoao atu ia i latou lo latou faasinomaga ma lo latou faamoemoega.”¹¹

“O Le Malamalama Aupito Sili ona Mamana ua Ou Mauaina”

O nei upumoni mamana sa suia ai le olaga mo la’u uo o Jen,¹² o se talavou sa mafua ai se faalavelave tau taavale matautia. E ui sa tuga lona mafatiaga faaletino, ae sa ia lagonaina le tiga sili ona matuitui ona sa maliu le isi avetaavale. “Ua maliu le tina o se tasi tagata, ma o a’u e tuua’ia,” o lana tala lea. Jen, o le sa na o le lua aso na muamua atu, na tu ai ma taulotoina le, “O i matou o afafine a lo matou Tama Faalelagi, e alofa ia i matou,”¹³ ua fesili nei, “Pe faapefea ona Ia alofa ia te a’u?”

“Ua mavae atu mafatiaga faaletino,” sa ia fai mai ai, “ae ou te manatu o le a le faamaloloina lava a’u mai i manu’aga faalelagona ma faaleagaga.”

Ina ia ola pea, sa matua natia e Jen ona lagona, ma sa amata ona taumamao ese ma gase foi lagona. I le mavae ai o le tausaga, ina ua i’u ina mafai ona ia talanoa e uiga i le faalavelave, sa valaaulia o ia e se faufautua musuia e tusi le fuaitau “O au o se atalii o le Atua” ma ta’u faa-10 i aso taitasi.

“O le tusiaina o upu sa faigofie,” sa ia ta’ua ai, “ae sa le mafai ona ou tautala ai. … Sa faigata tele lena mea, ma sa ou le talitonu moni sa finagalo le Atua e avea a’u ma Sona afafine. Sa ou faapupuu ma tagi.”

I ni nai masina na mavae ai, sa i’u lava ina mafai e Jen ona faamaeaina le galuega i aso uma. “Sa ou sasaa atu lou agaga atoa,” na ia fai mai ai, “ma augani i le Atua. … Ona amata lea ona ou talitonu i upu.” O lenei talitonuga na mafai ai e le Faaola ona amata faamalolo le agaga na manu’a [o le tamaitai]. Na aumaia e le Tusi a Mamona le mafanafana ma le lototele i Lana Togiola.¹⁴

“Sa lagona e Keriso o’u tiga, o’u faanoanoaga, lo’u ta’usalaina,” na faai’u ai le tala a Jen. “Sa ou lagonaina le alofa lē pona o le Atua ma ou te lei lagonaina muamua se mea ua matuai mamana! O le iloaina o a’u o se afafine o le Atua o le malamalama aupito sili lea ona mamana ua ou mauaina!”

Saili Atu ia Iloa le Atua, lo Tatou Tama

Uso e ma tuafafine, e mafai faapefea e i tatou taitoatasi ona lagonaina le mana o le malamalama i lo tatou faasinomaga paia? E amata i le saili atu ia iloa le Atua, lo tatou Tama.¹⁵ Na molimau mai Peresitene Russell M. Nelson, “E tupu se mea mamana pe a saili atu se atalii [po o se afafine] o le Atua ia iloa atili e uiga ia te Ia ma Lona Alo Pele.”¹⁶

O le aoao ma le mulimuli i le Faaola e fesoasoani ia i tatou ia iloa le Tama. “O le avea ai … ma faatusa o lona [Tama],”¹⁷ na aoao mai ai Iesu, “E le mafai e le Atalii ona fai o se mea, na o ia lava, a o mea na te vaai atu i le Tama o faia.”¹⁸ O afioga ma galuega uma a Keriso e faaalia ai le natura moni o le Atua ma lo tatou sootaga ia te Ia.¹⁹ Sa aoao mai Elder Jeffrey R. Holland, “Faatasi ai ma le toto na puna mai i puninii uma ma se olega ma le loto mafatia i Ona fofoga, na saili atu ai Keriso ia te Ia o Le na te sailia i taimi uma—o Lona lava Tama. ‘Ava,’ na Ia tagi atu ai, ‘Papa.’”²⁰

A o saili atu ma le naunautai Iesu i Lona Tama i Ketesemane, sa faapena foi le taulealea o Iosefa Samita, i le 1820, sa ia saili atu ma le agaga tatalo i le Atua i le Vao Paia. I le maea ai ona faitau, “A e afai ua leai se poto i so outou, ina ole atu ia i le Atua,”²¹ sa alu atu ai Iosefa e tatalo.

“Sa ou tootuli i lalo,” sa ia tusia, “ma amata ona tuu atu manaoga o lo’u loto i le Atua. …

“… Na ou vaaia ai se malamalama faaniutu i luga a’e tonu lava o lo’u ulu. …

“… Sa ou vaaia ni Tagata e toalua, o lo laua pupula ma le mamalu e le mafaamatalaina, o tutu mai i o’u luga a’e i le ea. Sa fetalai mai le tasi o i laua ia te au, ma fofoga mai ia te au i lou igoa ma fetalai mai, ao tusi ane i le tasi—[Iosefa,] O Lo’u Atalii Pele lenei. Faalogo ia te Ia!^”22

A tatou mulimuli i faataitaiga a le Faaola ma le Perofeta o Iosefa i le saili atu ma le naunautai i le Atua, o le a tatou malamalama ai i se auala moni lava, e pei ona [malamalama] i ai Jen, e silafia i tatou e lo tatou Tama i o tatou igoa, ma o i tatou o Lana fanau.

I tina talavou, o ē e masani ona lagona le lofituina ma luitauina a o taumafai e tausi a’e se “tupulaga e mafai ona tetee atu i le agasala,”²³ aua lava ne’i manatu māmā i la outou matafaioi tutotonu i le fuafuaga a le Atua. I taimi o le ātuātuvale—masalo o le taimi e te tuliina ai tamaiti laiti faatasi ma se manogi mu mai le umukuka e ta’u atu ia te oe o lau taumafataga o le afiafi ua avea nei o se taulaga mu—ia iloa e faapaiaina e le Atua ou aso sili ona faigata.²⁴ “Aua e te fefe, aua ou te ia te oe,”²⁵ Ua Ia faamautinoa mai ma le filemu. Matou te faamamaluina outou a o outou faataunuuina le faamoemoe o Sister Joy D. Jones, o le na ta’ua, “E tatau ona malamalama a tatou fanau i lo latou faasinomaga paia.”²⁶

Ou te valaaulia outou taitoatasi e saili atu i le Atua ma Lona Alo Pele. Ua saunoa mai Peresitene Nelson, “E leai ma se isi mea o loo manino ma mamana atili ai le aoaoina o na upumoni nai lo le Tusi a Mamona.”²⁷ Tatala ona itulau ma aoao e faapea e faia e le Atua “o mea uma mo lo [tatou] manuia ma le fiafia”;²⁸ o Ia e “alofa mutimutivale ma agalelei, e telegese Lona toasa, e onosai ma tumu i le agalelei”;²⁹ ma e “tutusa tagata uma [ia te Ia].”³⁰ A e lagonaina le tiga, lemautonu, fefe, le fiafia, faanoanoa, matelaina, po o le tualafoaiina e aunoa ma se faamoemoe i faigata o le olaga³¹—tatala le Tusi a Mamona, ma o le a e iloa “O le a le tuulafoaia lava e le Atua i tatou. Na te lei tuulafoaiina lava i tatou ma o le a Ia le tuulafoaiina lava i tatou. E le mafai ona Ia faia. E le o Sona uiga [le faia o lena mea].”³²

O le iloaina o lo tatou Tama e suia ai mea uma, aemaise o o tatou loto, a o faamautu mai e Lona Agaga agamalu lo tatou faasinomaga moni ma le taua tele i Lana silafaga.³³ E savali faatasi le Atua ma i tatou i luga o le ala o feagaiga a o tatou saili atu ia te Ia e ala i aioiga ma le agaga tatalo, suesueina o tusitusiga paia, ma tauiviga o le usiusitai.

O Le Silisiliese o le Uiga o le Atua—O La’u Molimau

Ou te alofa i le Atua o ou tama,³⁴ “le Alii Atua Silisiliese,”³⁵ ma ou te iloa e tutulu o Ia faatasi ma i tatou i o tatou faanoanoaga, e onosai e aoai lo tatou amioletonu, ma olioli pe a tatou saili atu e “lafoai ese a [tatou] agasala uma ina ia iloa [o Ia].”³⁶ Ou te tapuai ia te Ia, o le “tama ia o e ua matuaoti,”³⁷ ma se soa i e ua leai ni soa. Ma le agaga faafetai, ou te molimau atu ua ou iloa le Atua, lo’u Tama, ma molimau atu i le atoatoa, uiga, ma le “silisiliese o [Lona] tagata.”³⁸

Ina ia mafai e i tatou uma taitoatasi ona malamalama moni ma faapelepele i lo tatou “tofi tautupu”³⁹ o se atalii po o se afafaine o le Atua e ala i le iloaina o Ia, “le Atua moni e toatasi, atoa ma le ua [Ia] auina mai, o Iesu Keriso lea”⁴⁰ o la’u tatalo faatauanau lea.