Elder Carlos A. Godoy

Au Peresitene o Fitugafulu

I le faaiuga o le 1980, sa faatoa faamalolo mai ai Elder Carlos A. Godoy o se epikopo. Sa faauu foi o ia mai le kolisi, ma sa faigaluega i se kamupani manuia, ma sa manatu e leai se isi mea e toe sili atu i le olaga—seia oo ina asiasi mai se uo ua leva.

Sa faamalo atu lena uo ia te ia ona ia fai atu lea o se fesili sa tuua ai o ia ua fememeai: “Afai e faaauau pea ona e ola e pei ona e ola ai nei, mata o le a faataunuuina faamanuiaga na folafola atu ia te oe i lou faamanuiaga faapeteriaka?”

Sa iloa ai e Elder Godoy e manaomia ona ia faia ni suiga pe afai e manao na te maua uma ona faamanuiaga folafolaina. E ui i lona fiafia, sa tonu ia te ia e galue i lona tikeri o le matuaofaiva. Sa faamavae mai lana galuega, faatau ese uma atu mea sa ia umia, ma sa tuua e ia ma lona aiga mea masani o Pasila ae alu e aoga i le Iunaite Setete.

Na saunoa Elder Godoy, o le na tofia i le Au Peresitene o Fitugafulu i le aso 31 Mati, 2018, e uiga i lenei aafiaga na aoao ai o ia i le tele o mea e uiga i le faalagolago i le fuafuaga a le Alii ma naunau e tuua le mea ua fiafia i ai.

“Ou te iloa e i ai se fuafuaga a le Alii mo i tatou i lenei olaga,” sa ia molimau mai ai i le konafesi aoao ia Oketopa 2014. “Na te silafia i tatou. Na te silafia le mea e lelei mo i tatou. E le faapea ua sologa lelei ni mea ona lē tatau ai lea ona iloilo mai lea taimi i lea taimi pe le’o i ai se isi mea e sili atu.”

Sa lagolagoina Elder Godoy o se Fitugafulu o le Pulega Aoao i le aso 5 Aperila, 2008. O loo avea nei o ia ma Peresitene o le Eria a Amerika Saute i Matusisifo ma o le a nofoia le Au Peresitene o Fitugafulu i le aso 1 Aokuso, 2018.

Muamua atu i lenei valaauga i le Au Fitugafulu, sa faigaluega Elder Godoy o se pule o punaoa mo tagata faigaluega mo faalapotopotoga autu e lua a o lei amataina lana lava kamupani faafaufautua. Sa maua lona tikeri o le tagata malaga [BA] i le tamaoaiga ma le saienisi faaupufai mai le Iunivesite Katoliko i São Paulo Pontifical i le 1987, ma se tikeri o le matuaofaiva i amioga faafaalapotopotoga mai le Iunivesite o Polika Iaga i le 1994.

Na faamisiona tala’i ia Elder Godoy i le Misiona a Pasila São Paulo i Saute, epikopo, fautua maualuga, sui o le uelefea a le itulagi, Fitugafulu Eria, ma le peresitene o le Misiona a Brazil Belém .

Na soifua mai o ia i Porto Alegre, Pasila, i le aso 4 Fepuari, 1961. Sa faaipoipo o ia ia Monica Soares Brandao ia Mati 1984, ma e toafa o laua alo.