Ua Toe Tu Mai le Alii

Saunia e Elder Gerrit W. Gong

O Le Korama a Aposetolo e Toasefululua

O le Aso Sa lenei o le Eseta. I lenei Aso Sa o le Eseta, ou te molimauina ma le migao ma tuuina atu la’u molimau paia i le Keriso soifua—o Ia o Le sa “maliu, sa tanumia, ma ua toetu mai i le aso tolu.”

Uso e ma tuafafine pele, a’o laiti lava le ma fanau tama, sa ou faamatala atu ia i latou tala i le taimi e momoe ai e uiga i tamai taifau ma hamuina pese e faamomoe ai, e aofia ai le “Ua Toetu mai le Alii.”¹ O nisi taimi ou te fiamalie ai ma suia upu: “O le taimi lenei e momoe ai—aleluia. E masani lava ona vave momoe o ma atalii; pe atonu sa latou iloa afai ou te manatu ua latou momoe, o le a tuu la’u usuusu pese.

O upu—o a’u upu—e le mafai ona faaali atu ai lagona lofituina talu ona tauaaoina e Peresitene Russell M. Nelson o’u lima i ona aao, faatasi ai ma la’u pele o Susan i o’u autafa, ma tuuina mai lenei valaauga paia mai le Alii lea na ou le manava ai ma tuua ai a’u e tagi mo le tele o taimi i nai aso ua mavae atu.

I lenei Sapati o le Eseta, ou te pese fiafia, “Aleluia.” O le pese o le alofa togiola a lo tatou Faaola ua toetu² ua faamanatu ai le ogatusa o feagaiga (e fesootai ai i tatou i le Atua ma i le tasi ma le isi) ma le Togiola a Iesu Keriso (lea ua fesoasoani e tuu ese ai le tagata ma le tamaitai natura ae ua’i atu i tosinaga a le Agaga Paia³).

I le tuufaatasi ai, o a tatou feagaiga ma le Togiola a lo tatou Faaola ua mafai ai ma faapaiaina ai. I le tuufaatasi ai, ua fesoasoani ia i tatou e pipiimau ai ma faamatuu atu. I le tuufaatasi ai, ua faasuamalieina, faasaoina, faapaiaina, ma togiolaina.

Na saunoa mai le Perofeta o Iosefa Samita: “Atonu e foliga i ni isi o se mataupu faavae faasausili tele ua tatou tautala i ai—o se mana lea e faamaumau pe fusia ai i le lalolagi ma fusia ai i le lagi. E ui i lea, i vaitausaga uma o le lalolagi, soo se taimi na tuu mai ai e le Alii se tisipenisione o le perisitua i soo se alii e ala i faaaliga moni, po o i soo se vaega o alii, sa tuuina mai lenei mana i taimi uma.”⁴

Ma e moni lenei mea i le asō. O feagaiga paia ma sauniga, e le maua lava i se isi lava mea, e maua i maota paia e 159 o le Alii i atunuu e 43. O faamanuiaga folafolaina e oo mai e ala mai i ki o le perisitua ua toefuatai mai, aoaoga faavae, ma le pule, atagia o lo tatou faatuatua, usiusitai, ma folafolaga a Lona Agaga Paia ia i tatou i o tatou augatupulaga, i le olaga nei ma le faavavau.

Uso e ma tuafafine pele i atunuu uma, ituaiga, ma gagana, i le salafa o la tatou Ekalesia aoao i le lalolagi, faafetai atu mo lo outou faatuatua ola, faamoemoe, ma le alofa mama i tulagaaao uma. Faafetai mo le avea ai ma se faapototopotoga atoatoa o molimau ma aafiaga a le talalelei toefuataiina.

Uso e ma tuafafine pele, o i tatou e mo le tasi ma le isi. E mafai ona “lagaina faatasi [i tatou] i le lotogatasi ma i le alofa”⁵ i mea uma ma i nofoaga uma.⁶ A’o valaauliaina i tatou taitoatasi e le Alii o Iesu Keriso, po o fea lava o tatou i ai, po o a lava o tatou tulaga, faamolemole ia “o mai vaai.”⁷

I lenei aso ou te tuuina atu ai ma le lotomaualalo le malosi ma tomai uma o lo’u agaga,⁸ po o le a lava le mea latou te i ai pe avea ai, i lo’u Faaola, i la’u pele o Susan ma lo’u aiga, i lo matou Usoga, ma ia te outou taitoatasi, o’u uso ma tuafafine pele.

O mea uma e lelei ma faavavau e faatotonugalemu i le moni o loo soifua le Atua lo tatou Tama e Faavavau ma Lona Alo, o Iesu Keriso, ma Lana Togiola, ua molimauina e le Agaga Paia.⁹ O le Aso Sa lenei o le Eseta. Ou te molimauina ma le migao ma tuuina atu la’u molimau paia i le Keriso soifua—o Ia o Le sa “maliu, sa tanumia, ma ua toetu mai i le aso tolu, ma ua afio a’e i le lagi.”¹⁰ O Ia o le Alefa ma le Omeka¹¹—faatasi ma i tatou i le amataga, o loo faatasi pea o Ia ma i tatou seia oo i le iuga.

Ou te molimau atu i perofeta o aso e gata ai, mai lava i le Perofeta o Iosefa Samita e oo mai i lo tatou Peresitene Russell M. Nelson pele, o le ua tatou lagolagoina ma le fiafia. E pei ona lagiina e a tatou fanau Peraimeri, “Mulimuli i le perofeta; na te iloa le ala.”¹² Ou te molimau atu, e pei ona sa valoia mai i tusitusiga paia, e aofia ai ma le Tusi a Mamona: O Le Isi Molimau ia Iesu Keriso, “ua toe faatuina le malo o le Alii i le lalolagi, e sauniuni ai mo le toe Afio Mai Faalua o le Mesia.”¹³ I le suafa paia ma mamalu o Iesu Keriso, amene.