O Mea Laiti ma Faatauvaa
Saunia e Peresitene Dallin H. Oaks
Fesoasoani Muamua i le Au Peresitene Sili
E manaomia ona faamanatu mai ia i tatou i se tuufaatasiga ma i se taimi umi, o nei mea laiti naua o le a faataunuu ai mea tetele.
I.
O’u uso e ma tuafafine pele, e pei foi o outou, ua matua ootia ma faagaeetia ma uunaia a’u e savali ma musika ma lagona o lenei taimi faatasi ai. Ou te mautinoa ou te talanoa atu mo outou i le faaalia ai o le faafetai i o tatou uso ma tuafafine o e, i le avea ai ma meafaigaluega i aao o le Alii, ua tuuina mai ia i tatou se aafiaga malosi o lenei taimi faatasi ai.
Ou te fiafia e talanoa atu i lenei aofia i le Aso Sa o le Eseta. O le aso ua tatou aufaatasi ai ma isi Kerisiano i le faamanatuina o le Toetu mai o le Alii o Iesu Keriso. Mo tagata o Le Ekalesia a Iesu Keriso o le Au Paia o Aso e Gata Ai, o le Toetu moni o Iesu Keriso o se poutu lea o lo tatou faatuatuaga.
Aua ua tatou talitonu i tala i le Tusi Paia faapea le Tusi a Mamona e uiga i le Toetu moni mai o Iesu Keriso, ua tatou talitonu ai foi i le anoanoai o aoaoga faatusi paia e faapea o le a oo mai foi se toetu faapea i tagata uma o e ola ai i luga o lenei fogaeleele. O lena toetutu ua aumaia ai ia i tatou le mea sa ta’ua e le Aposetolo o Peteru “o se faamoemoe ua ola” (1 Peteru 1:3). O lena faamoemoe ola o lo tatou talitonuga maumaututu lea o le oti e le o le faaiuga lea o lo tatou faasinomaga ae ua na o se laasaga e tatau ai i le fuafuaga alofa mutimutivale a lo tatou Tama Faalelagi mo le faaolataga o Ana fanau. O lena fuafuaga e manaomia ai se siitaga mai le tino faaletino i le tino ola pea. E totonugalemu i lena siitaga i le lagoto o le oti ma le taeao mamalu ua mafai ona o le Toetu o lo tatou Alii ma le Faaola ua tatou faamanatuina i lenei Aso Sa o le Eseta.
II.
I se viiga maoae na tusia e Eliza R. Snow upu, tatou te lagiina ai:
I le faaauau ai o lena mamanu paia ma le ogatasi, tatou te potopoto ai i sauniga, e aofia ai lenei konafesi, e aoao atu ma fefaamalosiaua’i ai le tasi ma le isi.
O le taeao nei ua ou manatu e faaaoga e fai ma a’u matua le aoaoga a Alema i lona atalii o Helamana, o loo tusia i le Tusi a Mamona: “O mea laiti ma faatauvaa e faataunuu ai mea tetele” (Alema 37:6).
Ua aoaoina i tatou i mea laiti ma faatauvaa e tele i le talalelei a Iesu Keriso. E manaomia ona faamanatu mai ia i tatou i se tuufaatasiga ma i se taimi umi, o nei mea laiti naua o le a faataunuu ai mea tetele. Ua tele saunoaga a le Pulega Aoao faapea foi isi faiaoga faaaloalogia e uiga i lenei mataupu. E matua taua tele le mataupu o lea ua ou lagona ai le toe talanoa atu ai foi.
Sa faamanatu mai ia te a’u le mana o mea laiti ma faatauvaa i le gasologa o taimi, e se mea sa ou vaai i ai i se savaliga i le taeao. O le ata lea na ou pueina. Ua ta’eta’ei le auala savali sima malosi ma le mafiafia. Pe o se taunuuga lenei o nisi o mea tetele ma mamana? E leai, o lea ta’eta’ei na afua i se tama’i tuputupu ae lemu o se tasi o a’a sosolo mai le laau i talaane. O se isi faataitaiga talitutusa lenei sa ou vaaia i se tasi magaala.
O le mana malosi na ta’eta’ei ai nei auala savali sima mamafa sa matuai laitiiti tele e fua i ai i se tulaga i aso taitasi po o le faalemasina foi, ae o lona aafiaga i le aluga o taimi e matautia le mamana.
E faapena foi le aafiaga mamana i le gasologa o taimi o mea laiti ma faatauvaa ua aoao ai i tatou i tusitusiga paia ma perofeta soifua. Mafaufau i le suesueina o tusitusiga paia ua aoaoina i tatou e tuu i totonu o o tatou olaga i aso taitasi. Pe mafaufau foi i tatalo faaletagata lava ia ma tatalo tootutuli faaleaiga o ni faiga masani mo le Au Paia faamaoni o Aso e Gata Ai. Mafaufau i le auai i le seminare mo autalavou po o vasega o le inisitituti mo talavou matutua. E ui o nei faiga taitasi atonu e laiti ma faatauvaa, ae a mavae le taimi e taunuu i le siitia mamana ma le tuputupu a’e faaleagaga. E tupu lenei mea aua o mea laiti ma faatauvaa nei e valaaulia ai le mafutaga a le Agaga Paia, o le Molimau o Le e faamalamalamaina i tatou ma taiala i tatou i le upumoni, e pei ona faamatalaina e Peresitene Eyring.
O se isi punavai o le siitia ma le tuputupu ae faaleagaga o se faiga faifai pea lea o le salamo, e oo lava i nai solitulafono iti lava. E mafai ona fesoasoani ia i tatou a tatou lava iloiloga patino musuia e iloa ai pe faapefea ona tatou toilalo ma pe mafai faapefea foi ona tatou faia ia sili atu. O lena ituaiga o salamo e tatau ona tamua mai i lo tatou aai ma feinu faalevaiaso i le faamanatuga. O nisi o mataupu e mafaufau i ai i lenei faagasologa o le salamo o loo fautuaina mai i le viiga “Ua Ou Faia Ea se Lelei?”
Ua ou faia ea se lelei i le aso?
Ua ou fesoasoani ea?
Ua ou faafiafia ea, i se ua faanoanoa?
A leai, ua le aoga.
Ua ou faamama i se ua mafatia
Ma faamafanafana i ai?
O e ua mama’i, ua ou tausia ea?
Ma faainu ma fafaga i ai?2
E moni o nei mea e laiti, ae e moni lava o ni faataitaiga lelei ia o mea na aoao atu e Alema i lona atalii o Helamana: “Ma e galue le Alii le Atua i auala e faataunuu ai ona faamoemoega tetele ma faavavau; ma o auala laiti lava e faamaasiasi ai e le Alii e popoto, ma aumai ai le olataga o agaga e toatele” (Alema 37:7).
Na tuuina atu e Peresitene Steven C. Wheelwright i se aofia i le Iunivesite o Polika Iaga–Hawaii le faamatalaga musuia lenei o aoaoga a Alema: “Ua faamautu e Alema mo lona atalii e faapea e moni lava o le mamanu e mulimuli ai le Alii pe a tatou faaaoga le faatuatua ia te Ia ma mulimuli i ana fautuaga i mea laiti ma faatauvaa, e na te faamanuiaina i tatou i vavega laiti i aso taitasi, ma i le aluga o taimi, i galuega ofoofogia.”3
Na aoao mai Peresitene Howard W. Hunter e faapea “o le tele o taimi o galuega masani … e aupito tele lona aafiaga lelei i olaga o isi, pe a faatusatusa i mea e tele ina ta’ua soo e le lalolagi o mea maoae.”4
O se aoaoga faatauanau faalepoto salalau o le mataupu faavae lava lenei e maua mai le Senate ua mavae o Dan Coats o Initiana, o le sa tusia: “Na pau le tapenapenaga mo lena faaiuga maoae e tasi lea e mafai ona suia ai se olaga, po o se atunuu foi, o na faaiuga e faitau selau ma faitau afe e faalemanatu i ai, e fuafua ai pe o ai moni i tatou, e foliga mai [o faaiuga] e le taua e faia e oe lava ia.”5
O na faaiuga patino “e foliga e matua le taua” e aofia ai le ala tatou te faaaoga ai o tatou taimi, o mea tatou te matamata ai i le televise ma le initoneti, o mea tatou te faitauina, o ata ma musika e siosiomia ai i tatou lava i le galuega ma le fale, o mea tatou te sailia mo faafiafiaga, ma le ala tatou te faaaoga ai a tatou tautinoga ina ia faamaoni ma tautala sa’o. O se tasi mea e matua laitiiti lava ma faatauvaa o le tauagafau ma le laufofoga fiafia i a tatou fegalegaleaiga patino.
E leai se mea o nei mea laiti ma faatauvaa e manaomia o le a fesoasoani tatou te agaigai atu ai i le avea ma tagata maoae sei vagana ua faatinoina pea lava pea e le aunoa. Sa lipotia mai Peresitene Polika Iaga lea na saunoa: “O o tatou olaga e fausia i tulaga iti ma faatauvaa ia a tuufaatasi e taua tele, ma maua ai le olaga atoa o se alii po o se tamaitai.”6
Ua siosiomia i tatou e tosinaga o faasalalauga ma mea ua lilifa i ai faaleaganuu o le a afua ai ona tuu i lalo o tatou tulaga faatauaina pe afai tatou te le teenaina pea lava. Ina ia tatou agai atu pea i la tatou sini e faavavau, e tatau ona tatou taualo pea lava e le aunoa. E fesoasoani pe afai o i tatou o se vaega o le ‘au lea o loo alo faatasi, e pei o se auvaa o loo galulue faatasi. Ina ia faaaoga atili lena faataitaiga, ua matua aave tele au ma o lea afai tatou te taofi le taualoina, o le a o tatou tafefea agai atu i tai i se taunuuga tatou te le o sailia, ae o le a le maalofia pe afai tatou te le taumafai pea lava e agai i luma.
Ina ua maea ona faamatala mai se mea e matuai itiiti lava na tupu sa maoae ni taunuuga, na tusia e Nifae, “Ma ua faapea ona tatou vaai ai e mafai e le Alii ona faataunuu mea tetele i ala faatauvaa” (1 Nifae 16:29). O le Feagaiga Tuai o loo aofia ai se faataitaiga mamana o lenei mea. O iina tatou te faitau ai i le ala na pagatia ai tagata Isaraelu i gata uogo. E toatele tagata na feoti mai le uina (tagai Numera 21:6). Ina ua tatalo Mose mo se fesoasoani, sa musuia o ia e fai “se gata apa memea, ma tuu i luga i se laau.” Ona, “afai ua utia se tagata e se gata, pe a vaai o ia i le gata apa memea ua ola lava ia” (fuaiupu 9). O se mea laitiiti faapena mo se taunuuga faavavega! Peitai, e pei ona sa faamatala mai e Nifae ina ua ia aoao atu lenei faataitaiga ia i latou o e sa fouvale i le Alii, e oo lava foi ina sa saunia e le Alii se ala faigofie e mafai ai ona faamaloloina i latou, “ma ona o le faatauvaa o le ala, po o lona faigofie tele, sa i ai le toatele o e na fano” (1 Nifae 17:41).
O lena faataitaiga ma lena aoaoga ua faamanatu mai ai ia i tatou e faapea o le faatauvaa o le ala po o le faigofie o le galuega na poloaiina ai e le mafai ona faapea ai e le taua ona faataunuuina lo tatou manaoga amiotonu.
E faapena foi, e oo lava i nai taga laiti o le le usitai po o nai toilalo iti e mulimuli i faiga amiotonu e mafai ona tata’i ese mai ai i tatou i se taunuuga ua uma ona lapataia ai i tatou e aloese mai ai. Ua aumaia e le Upu o le Poto se faataitaiga o lenei mea. E faapena foi le aafiaga o le tino o se sikareti se tasi po o se inu se tasi i le ava oona po o se inumaga se tasi o se isi fualaau faataumaoi e le mafai ona fuaina. Ae i le aluga o taimi, e malosi tele le aafiaga ma e mafai ona le toe fetuunaia.Manatua le ta’eta’ei o le auala savali i nai tatupu laiti o a’a o le laau. E tasi le mea ua mautinoa, o taunuuga matuia o le faaaogaina o soo se mea e mafai ona avea ma mausa, e pei o fualaau faataumaoi ia e osofaia ai o tatou tino po o anomea faaponokalafi e faaleaga ai o tatou mafaufauga, e matuai mafai lava ona taumamao mai ai pe afai tatou te le faaaogaina lava mo le taimi muamua—pe na o le tasi foi.
E tele tausaga ua mavae, sa faamatalaina ai e Elder M. Russell Ballard i se aofia o le konafesi aoao “le ala e mafai ai e mea laiti ma faatauvaa ona le lelei ma faataumaoi i se faaolataga o se tagata.” Na ia aoao mai: “E faapei o ni moi’a’a mai se manoa, ona avea ai lea ma fuati, ma i’u ina avea o se maea, o nei mea laiti a tuufaatasia e mafai ona matua malosi ma le mafai ona motusi. E tatau ona tatou nofouta i le mana e mafai ona i ai i mea laiti ma faatauvaa i le fausiaina o le faaleagaga,” na ia saunoa mai ai. O le taimi foi lea, e tatau ai ona tatou nofouta o le a faaaoga e Satani ia mea laiti ma faatauvaa e taitai atu ai i tatou i le leai o se faamoemoe ma le faanoanoa.”7
Na tuuina atu foi e Peresitene Wheelwright se lapataiga e faapea i lana aofia i le BYU-Hawaii: “O loo i ai i le toilalo e faia mea laiti ma faatauvaa e fememeai ai le faatuatua, e leai ai ni vavega, ma muamua taofia le agaigai i luma i le Alii ma Lona Malo ona amata ai lea ona lavelave aua ua suia le saili atu i le malo o le Atua i tulimataiga atili i la le tino ma manaoga faalelalolagi.”8
Ina ia puipuia mai aafiaga le lelei faatupulaia ia e faataumaoia lo tatou alualu i luma faaleagaga, e manaomia lo tatou mulimuli i le mamanu faaleagaga o mea laiti ma faatauvaa. Na faamatala e Elder David A. Bednar lenei mataupu faavae i se Konafesi a Tamaitai o le BYU: “E mafai ona tatou aoaoina le tele o mea e uiga i le natura ma le taua o lenei mamanu faaleagaga mai le faiga o le … faatulutulu malie o le vai i luga o le palapala,” e ese mai le faalolovaia pe soona faapasi o le tele o le vai i mea atonu e le o manaomia ai.
Sa ia faamatalaina: “O mataua faato’ato’a o le suavai e magoto tele i le eleele ma maua ai se tulaga maualuga o le susu i le palapala lea e mafai ai ona ola lauusiusi ia laau. E faapena foi, afai e taulai tumau oe ma a’u, i le mauaina e le aunoa o mataua o meaai faaleagaga, ona mafai lea ona gotouga ifo a’a o le talalelei i o tatou agaga, e mafai ona faatuina ma le mausali ma maua se faavae lelei, ma mafai ona fua mai ai fua maoae ma le suamalie.
O le faaauau pea, na ia saunoa mai ai, “O le mamanu faaleagaga o mea laiti ma faatauvaa i le aumaia i luma o mea tetele e fua mai ai le mausali ma le mautu, tuuto ua loloto, ma le liua ua atoatoa atili i le Alii o Iesu Keriso ma Lana talalelei.”9
Na aoao mai e le Perofeta o Iosefa Samita lenei mataupu faavae i upu ua aofia ai nei i le Mataupu Faavae ma Feagaiga: “Ia le tuu atu i se tagata ia manatu i ia mea o ni mea faatauvaa; aua e tele … e faatatau i le au paia, ua faalagolago i luga o ia mea” (MF&F 123:15).
E tusa ai ma uluai taumafaiga e faavae le Ekalesia i Misuri, sa fautuaina ai e le Alii ia onosai aua “o le a oo mai mea uma i lo latou taimi” (MF&F 64:32). Ona Ia tuuina mai ai lea o lenei aoaoga sili: “O le mea lea aua le faavaivai i le faia o mea lelei ona o lo o oulua faataatiaina le faavae o se galuega tele. Ma o mea iti e tutupu mai ai mea tetele (MF&F 64:33).
Ou te talitonu tatou te mananao uma lava e mulimuli i le lu’i a Peresitene Russell M. Nelson e fetuleni atu i luma “i le ala o le feagaiga.”10 O la tatou tautinoga e faia lea mea e faamalolosia i le mulimuli e le aunoa i “mea iti” ua aoaoina ai i tatou e le talalelei a Iesu Keriso ma taitai o Lana Ekalesia. Ou te molimau atu ia te Ia ma ou talosagaina Ana faamanuiaga i luga o i latou uma o e saili e tumau i luga o le ala o Lana feagaiga, i le suafa o Iesu Keriso, amene.