Faauta i le Tagata!
Saunia e Elder Dieter F. Uchtdorf
O Le Korama a Aposetolo e Toasefululua
O i latou o e maua se auala e vaai moni ai lava i le Tagata e maua le ala i le olioli aupito silisili o le olaga ma le pulu pasama mo atuatuvalega e sili ona ogaoga.
O’u uso e ma tuafafine pele, uo pele, ou te faafetai ua tatou mafuta i le faaiuga o lenei vaiaso o le konafesi aoao. Ua ma fiafia ma Harriet faatasi ai ma outou e faafeiloai Elders Gong ma Soares ma le toatele o uso ma tuafafine o e na maua ni valaauga fou taua i le gasologa o lenei konafesi aoao.
E ui ua ou misia la’u uo pele o Peresitene Thomas S. Monson, ae ou te alofa, talia, ma lagolagoina lo tatou perofeta ma Peresitene, o Russell M. Nelson, ma ona fesoasoani tamalii.
Ou te faafetai lava ma toe faamamaluina le galulue vavalalalata ma la’u Usoga pele o le Korama a le Toasefululua.
E silisili ai, ua matua faalotomaualaloina lava a’u ma matua fiafia lava i le avea ai ma tagata o Le Ekalesia a Iesu Keriso o le Au Paia o Aso e Gata Ai, lea ua faitau miliona alii, tamaitai, ma fanau ua naunau e sii i luga le mea o latou tutu ai—po o le a lava le matafaioi po o le valaauga—ma taumafai ma o latou loto atoa e auauna atu i le Atua ma uso a tagata, e fausia le malo o le Atua.
O le asō o se aso e paia. O le Aso Sa o le Eseta, ua tatou faamanatuina ai lea taeao matagofie ina ua motusia e le Faaola ia noataga o le oti1 ma ulufafo mai ma le manumalo mai le tuugamau.
O Le Aso Aupito Silisili i le Talafaasolopito
Talu ai nei sa ou fesili ai i le initoneti, “O le a le aso na sili ona suia ai aluga o le talafaasolopito?”
O tali e amata mai malamalamaaga uiga ese ma faateia ai ma le faatupu manatu. O se tasi [o na tali], o le aso na taia ai e se paneta papa tele i le muai talafaasolopito le Penisula o Iukatana; po o le 1440 ina ua faamaea e Johannes Gutenberg lona falelomitusi; ma ioe, o le aso i le 1903 ina ua faaalia e le au uso o Wright i le lalolagi e faapea e mafai moni lava e tagata ona felelei.
Pe afai e fai atu lea lava fesili e tasi ia te oe, mata o le a lau tala?
I lo’u mafaufau e manino lava le tali.
Ina ia maua le aso aupito taua i le talafaasolopito, e tatau ona tatou toe mafaufau i lena afiafi ua toetoe 2000 tausaga talu ai i le Faatoaga o Ketesemane ina ua tootuli ifo Iesu Keriso i le tatalo lotulotu ma ofoina atu Ia lava e fai ma togiola mo a tatou agasala. O le taimi o lea taulaga maoae e le i’u o le mafatiaga e le mafaatusalia i le tino ma le agaga na afutoto ai Iesu Keriso, o le Atua, i pu afu uma. Mai lena alofa atoatoa, na Ia tuuina atu ai mea uma ina ia mafai ai ona tatou maua o mea uma. O Lana taulaga silisiliese, e faigata ona malamalama i ai, e na o o tatou loto atoa ma le mafaufau atoa e mafai ona lagonaina ai, ua faamanatu mai ai le laugatasia o lo tatou nofoaitalafu i le lotofaafetai ia Keriso mo Lana meaalofa paia.
I se taimi mulimuli ane i lena po, sa aumaia ai Iesu i luma o taitai faalelotu ma faaupufai o e sa tauemuina o Ia, sasa ia te Ia, ma faasalaina o Ia i se oti mataga. Sa tautau o Ia ma le tiga i luga o le satauro, seia i’u ina “[ua] mae’a.”2 Sa faataoto lona tino maliu i se tuugamau na nono. Ona oo lea i le taeao, o le aso lona tolu, sa ulufafo mai Iesu Keriso, le Alo o le Atua Silisili Ese mai le tuugamau o se tagata toetu o le mamalu, malamalama, ma le malualii.
Ioe, e tele mea na tutupu i le talafaasolopito atoa ua matua aafia tele ai le taunuuga o malo ma tagata. Peitai a tuufaatasi uma, e le mafai ona amata faatusatusa i le taua o le mea na tupu i lena taeao o le uluai Eseta.
O le a le mea ua avea ai le taulaga e le i’u ma le Toetu o Iesu Keriso ma mea aupito sili ona taua na tupu i le talafaasolopito—sili atu ona tosinaina ai nai lo taua o le lalolagi, mala matautia faataumaoi, ma mea fou faasaeanisi e suia ai le olaga?
Ona o Iesu, Ua Mafai Ai Ona Tatou Toe Ola
E maua le tali i luitau tele e lua e le mafaatoilaloina lea e fetaiai ma i tatou taitoatasi.
Muamua, tatou te oti uma lava. Po o le a lava lo tatou laiti, aulelei, maloloina, po o le a foi lou faaeteete, e i ai le aso o le a oti ai lou tino. O le a faavauvau uo ma aiga ona o oe. Peitai latou te le mafaia ona toe faafoi mai lou ola.
Ae ui o lea, ona o Iesu Keriso, o le a le tumau ai lou oti. O le a i ai se aso o le a toe tuufaatasia ai lou agaga ma lou tino. O lea tino toetu o le a le toe oo i le oti,3 ma o le a e ola i le faavavau, ua saoloto mai tiga ma mafatiaga faaletino.4
O le a tupu lenei mea ona o Iesu Keriso, o le na tuuina ifo Lona soifua ma toe aveina a’e.
Na Ia faia lenei mea mo i latou uma o e talitonu ia te Ia.
Na Ia faia lenei mea mo i latou uma o e le talitonu ia te Ia.
Na Ia faia foi lenei mea mo i latou o e tauemu, faatiga, ma ta’u fua Lona suafa.5
Ona o Iesu Keriso, ua Mafai ai Ona Tatou Toe Mau faatasi ma le Atua
Lona lua, ua tatou agasala uma lava. O le a faavavau ona taofia i tatou e a tatou agasala mai le nonofo faatasi ai ma le Atua, aua “e leai se mea eleelea e mafai ona ulu atu i lona malo.”6
O le taunuuga, sa le mafai ona toe foi atu alii uma, o tamaitai, ma tamaiti i Lona afioaga—o lona uiga, seia oo ina ofoina atu e Iesu Keriso, le Tamai Mamoe e leai se pona, Lona soifua e fai ma togiola mo a tatou agasala. Ona sa le’i agasala Iesu na te manaomia ai se faamasinogatonu, o lea sa mafai ai e Ia ona totogi a tatou agasala ma faafetaiaia manaoga o le faamasinogatonu mo agaga uma. Ma o lena mea e aofia ai oe ma a’u.
Na Ia totogiina le tau mo a tatou agasala.
O agasala uma lava.
I lena aso aupito taua i le talafaasolopito, na talaia ai e Iesu Keriso ia faitotoa o le oti ma fuliese papupuni na taofia ai i tatou mai le pasi atu i faapaologa paia ma le mamalu o le ola e faavavau Ona o lo tatou Alii ma le Faaola, ua toina mai ai ia te oe ma au se meaalofa taua e le mafaatauina—po o a mea na tatou faia i taimi ua sola, e mafai lava ona tatou salamo ma mulimuli i le ala e tau atu i le malamalama ma le mamalu selesitila, o loo siosiomia e fanau faatuatua a le Tama Faalelagi.
Mafuaaga Tatou Te Olioli Ai
O le mea lea tatou te faamanatuina i le Aso Sa o le Eseta—tatou te faamanatuina le ola!
Ona o Iesu Keriso, o le a tatou toetutu ai mai faanoanoaga o le oti ma opo atu i latou tatou te alolofa i ai, ma loimata maligi o le olioli lofituina ma le lotofaafetai ua taumasuasua. Ona o Iesu Keriso, o le a tatou ola ai o ni tagata e faavavau, o lalolagi foi e le muta.
Ona o Iesu Keriso, e le gata ina mafai ona soloiesea a tatou agasala; ae e mafai foi ona faagalo.
E mafai ona faamamaina i tatou ma faaeaina.
Paia.
Ona o lo tatou Faaola Pele, ua mafai ai ona tatou feinu e faavavau mai le punavai o le vai e puna a’e pea i le ola e faavavau.7 E mafai ona tatou nonofo e faavavau i maota o lo tatou Tupu e faavavau, i se mamalu e le mafaamatalaina ma le fiafia atoatoa.
Pe Ua Tatou “Vaai atu i le Tagata”?
E ui i nei mea uma, e toatele tagata i le lalolagi o e a le o iloa pe le o talitonu i le meaalofa taua ua tuuina mai e Iesu Keriso ia i tatou. Atonu ua latou faalogo ia Iesu Keriso ma iloa e uiga ia te Ia o se tagata iloga o le talafaasolopito, ae latou te le o vaai atu ia te Ia pe o ai moni o Ia.
A ou mafaufau i lenei mea, ua faamanatu mai ai ia te a’u le Faaola ao tu i luma o le taitai Roma i Iutaia, o Ponotio Pilato, i le toe o na o ni nai itula oo i le maliu o le Faaola.
Sa vaai atu Pilato ia Iesu mai se vaaiga a’ia’i faalelalolagi. Sa i ai se galuega a Pilato e tatau ona fai, ma sa aofia ai ni faatinoga tetele se lua: o le aoina o lafoga mo Roma ma le tausiga o le filemu. Ia o lea ua aumaia e le Au Saneterini Iutaia i ona luma se tagata sa latou fai mai o se faasalavei i ia mea uma e lua.8
Ina ua maea le suesueina o lana pagota, sa faasilasila atu e Pilato, “Ou te lei iloa se mea e sala ai o ia”9 Peitai sa ia manatu e tatau ona ia faamalieina e na molia mai Iesu, o lea sa tapa ai e Pilato se agaifanua i le lotoifale lea e faatagaina ai ona tatala mai se pagota e tasi i le vaitau o le Paseka. Pe lei onomea ea ona latou tatala ia Iesu nai lo le tagata ua lauiloa i le faomea ma le fasioti tagata o Parapa?10
Peitai na vavao le motu o tagata leaga ia tatala atu e Pilato ia Parapa ae faasatauro Iesu.
“Aisea?” Sa fesili ai Pilato? “Se a se mea leaga na ia faia?”
Ae sa na ona atili ai ona latou alalaga leotetele. “Faasatauro ia te ia!”11
I se toe taumafaiga mulimuli e tasi e faamalie ai le motu o tagata, sa poloaiina ai e Pilato ona tagata e sasa ia Iesu.12 Sa faapena ona latou faia, ma tuua ai o Ia ua lavatoto ma totolia. Sa latou faatauemu ia te Ia, ma tuu atu le paletuitui i Lona ao, ma faaofu ia te Ia i se ofu paauli.13
Atonu na manatu Pilato o le a faamalieina ai le manao o le motu o tagata i lona toto. Atonu o le a latou nau alofa ai i le tagata. “Faauta, ou te taitaiina atu o ia i fafo ia te outou,” na fai atu ai Pilato, “ina ia outou iloa ou te lei iloa se mea e sala ai o ia. … “Faauta i le tagata!”14
Ua tu le Alo o le Atua i la le tino i luma o tagata o Ierusalema.
Sa mafai ona latou vaai ia Iesu, ae latou te lei vaai moni atu ia te Ia.
Sa lei i ai ni o latou mata e vaai ai.15
I se uiga faafaatusa, ua valaaulia foi i tatou e “vaai i le tagata.” E eseese manatu o le lalolagi e uiga ia te Ia. Ua molimau mai perofeta anamua ma ona po nei o Ia o le Alo o le Atua. Ou te faia foi lenei mea. E iloga ma taua lo tatou tofu iloa mo i tatou lava. O le mea lea, pe a e manatunatu i le soifuaga ma le galuega a Iesu Keriso, o le a se mea e te vaai atu i ai?
O i latou o e maua se auala e vaai moni ai lava i le Tagata e maua le ala i le olioli aupito silisili o le olaga ma le pulu pasama mo atuatuvalega e sili ona ogaoga.
O lea la, pe a siosiomia oe i le faanoanoa ma le tiga, faauta i le Tagata.
Pe a e lagona ua e se pe ua faagaloina oe, faauta i le Tagata.
Pe a e atuatuvale, tuulafoaiina, le mautonu, faaleagaina, pe faatoilaloina, faauta i le Tagata.
O le a Ia faamafanafana ia te oe.
O le a Ia faamalolo ia te oe ma avatu le aano o lau malaga. O le a Ia liligi ifo Lona Agaga ma faatumu ai lou loto i le olioli tele lava.16
Na te avatua le “malosi i e ua vaivai; a o e ua leai se malosi, na te faatuputele i ai le malosi.”17
Pe a tatou vaai moni i le Tagata, tatou te aoao e uiga ia te Ia ma saili e faaogatusa o tatou olaga ma Ia. Tatou te salamo ma taumafai e faaleleia atoatoa o tatou natura ma tatou latalata teisi atu ia te Ia i aso taitasi. Sa tatou faatuatuaina o Ia. Tatou te faaali atu lo tatou alolofa ia te Ia e ala i le tausia o Ana poloaiga ma ola e tusa ai ma a tatou feagaiga paia.
I se isi faaupuga, ua avea i tatou ma Ona soo.
E matua faatumuina atoa o tatou agaga i Lona malamalama e faamamaina ai. O Lona alofatunoa e siitia ai i tatou. E faamamasagiaina a tatou avega, e faalolotoina lo tatou filemu. Pe a tatou vaai moni i le Tagata, ua tatou maua le folafolaga o se lumanai faamanuiaina lea e musuia ai ma lagolagoina i tatou i le ala gaoa fepi’opi’oa’i o le malaga i le olaga. Pe a toe tilotilo i tua, o le a tatou iloa ai sa i ai lava se mamanu faalelagi, ma e fesootai moni lava togi [dots].18
A e talia Lana taulaga, avea ma Ona soo, ma i’u ina tau atu i le faaiuga o lau malaga i le olaga nei, o le a le mea o le a tupu i faanoanoaga sa e onosaia i lenei olaga?
O le a mou atu.
O le a le mea o le a tupu i le le fiafia, o faalata, sauaga sa outou feagai ai?
O le a mou atu.
O le a le mea o le a tupu i mafatiaga, lototiga, tausalaga, maasiasi, ma le ita sa e ui mai ai?
O le a mou atu.
Ua galo atu.
Pe o se mea ea e ofo ai lo “matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, … ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala”?19
Pe o se mea ea e ofo ai lo tatou taumafai ma o tatou loto atoa e vaai moni i le Tagata?
O’u uso e ma tuafafine pele, ou te molimau atu o le aso aupito sili ona taua i le talafaasolopito o le tagata o le aso na manumalo ai Iesu Keriso, le Alo o le Atua soifua, i le oti ma agasala mo fanau uma a le Atua. Ma o le aso aupito sili ona taua i lou soifua ma lo’u olaga o le aso sa tatou aoao ai e “vaai i le tagata”; ina ua ta vaai ia te Ia i Lona tagata moni; ina ua tatou faaaogaina ma o tatou loto ma mafaufau atoa Lona mana togiola, ina ua tatou tautino atu e mulimuli ia te Ia ma le naunautaiga ma le malosi ua faafouina. Ou te faamoemoe ia avea lena o se aso e tulai mai pea lava pea i le gasologa o o tatou olaga.
Ou te tuu atu la’u molimau ma faamanuiaga a o tatou “vaai atu i le tagata,” o le a tatou maua le uiga, olioli, ma le filemu i le olaga nei ma le ola e faavavau i le lalolagi a sau. I le suafa paia o Iesu Keriso, amene.