Elder Robert C. Gay
Au Peresitene o Fitugafulu
A o avea ai o se peresitene misiona i Kana, sa maua e Elder Robert C. Gay se uunaiga i se tasi aso e tu ma fesoasoani i se tamaitiiti sa tagi. Muamua, sa ia le amana’iaina lena uunaiga ae mulimuli ane sa ia auina atu se tagata o le Ekalesia e sue ma aumai lena tamaitiiti ia te ia.
Sa aoaoina e Elder Gay, o le sa lagolagoina o se uso o le Au Peresitene o Fitugafulu i le aso 31 Mati, 2018, o le tamaitiiti e faatauina i’a faalala mo le e tausia o ia. O lena aso, sa leiloa ai tupe na maua e le tamaitiiti ona o se pu o lana taga.
“Afai ae toe foi atu e aunoa ma le tupe, o le a ta’upepeloina o ia, atonu foi o le a sasaina, ona tuli lea o ia i le aualatele,” sa ta’ua ai e Elder Gay, “Sa ma faatoafilemuina lona fefe, totogi atoa atu lana tupe na leiloa, ma toe ave o ia i le fale o le tagata na tausia o ia.”
A o ia faamatalaina i le konafesi aoao ia Oketopa 2012, e faapea o lena aafiaga na aoao atu ai ia Elder Gay ni upumoni sili se lua: “Muamua, e leai se isi taimi na ou iloaina ai e silafia e le Atua i tatou taitoatasi ma o le a Ia le tuulafoaia lava i tatou; ma lona lua, sa ou iloa e tatau ona tatou gauai atu i le leo o le Agaga ma “ō loa lava” po o fea lava na te aveina i ai i tatou, e ui i lo tatou fefefe po o le faigata.”
Sa lagolagoina Elder Gay o se Fitugafulu o le Pulega Aoao i le aso 31 o Mati, 2012. I le taimi o lona valaauga i le Au Peresitene o Fitugafulu, sa avea o ia ma Peresitene o le Eria i Asia i Matu. Na galue talu ai o ia i le laumua o le Ekalesia o se taitaifono o Auaunaga o le Ola Faalagolago o le Tagata Ia Te Ia Lava/Komiti o le Tupe Faaagaaga mo Aoga, faatasi ai ma tiutetauave mo auaunaga i le lalolagi atoa mo le ola faalagolago o le tagata ia te ia lava.
A o lei valaauina o ia i le Au Fitugafulu, sa avea o ia ma faatonusili o se kamupani o tupeteu sa avea ai o ia ma se tasi o faapogai. O ia foi o se tasi o faapogai ma sa avea o se faatonu i le tele o faalapotopotoga o fesoasoaniga mo tagata i le lalolagi ma sa faigaluega i faletupe mo tupeteu i Wall Street, o se faufautua taupulega, ma o se faiaoga o le tamaoaiga i le Iunivesite o Harvard.
Sa maua le tikeri o le tagata malaga [BA] o Elder Gay i le tamaoaiga e faamamafa i fuainumera faamaumauina mai le Iunivesite o Iuta, ma se Tofamanino [PhD] i le tamaoaiga tau pisinisi mai le Iunivesite o Harvard.
Sa faamisiona tala’i ia Elder Gay i Sepania, taitai vaega o faitaulaga sili, peresitene o Alii Talavou i le uarota, fautua maualuga, fesoasoani i se au epikopo, ma le Fitugafulu Eria.
Sa soifua mai o ia i Los Angeles, Kalefonia, ISA, i le aso 1 Setema, 1951. Sa faaipoipo o ia ia Lynette Nielson ia Aperila 1974. O i laua o ni matua o se fanau e toafitu.