Elder Terence M. Vinson

Au Peresitene o Fitugafulu

E talitonu Elder Terence M. Vinson e le mamao ese lava le Faaola. “E latalata mai pea lava o Ia, aemaise i nofoaga paia, ma i taimi e manaomia ai,” sa ia molimau mai ai i le konafesi aoao ia Oketopa 2013. “O nisi taimi, pe a ou tau le mafaufau i ai, ou te lagona toetoe lava e pei e pa’i mai o Ia i lou tauau e tau mai ia te au e alofa o Ia ia te au.”

Sa i ai se taimi, a o savavali Elder Vinson ma Elder Jeffrey R. Holland o le Korama a Aposetolo e Toasefululua, sa faauouo e Elder Holland lona lima i le tauau o Elder Vinson ma fai atu ia te ia e alofa ia te ia. Na saunoa Elder Vinson, “Ou te talitonu afai tatou te mauaina le avanoa e savavali faaletino ai ma le Faaola, o le a tatou lagonaina Ona aao o faauouo i o tatou tauau e faapei lava o lena.”

Fai mai Elder Vinson, o le sa lagolagoina o se uso o le Au Peresitene o Fitugafulu i le aso 31 Mati, 2018 o le alofa o le Atua “o le lagona e aupito suamalie.”

O Elder Vinson, o le o le a galue i lona valaauga fou i le aso 1 Aokuso, 2018, sa lagolagoina o se Fitugafulu o le Pulega Aoao o le Ekalesia i le aso 6 Aperila, 2013. I le taimi lea, sa auauna atu ai o se uso o le Korama Lona Valu o Fitugafulu i le Eria o le Pasefika. O loo avea nei o ia ma Peresitene o le Eria a Aferika i Sisifo.

Sa maua le tikeri o le tagata malaga [BA] o Elder Vinson i le matematika ma fuainumera faamaumauina, tipiloma faaleaoaoga ma faafaiaoga, ma se tikeri o le matuaofaiva i mea tautupe. O ana matata sa aofia ai le faiaoga, tuuina atu aoaoga faatino, ma faiaoga i iunivesite. Sa faigaluega tele o se faufautua i mea tautupe ma pulea tupe.

A o ia suesue i le Ekalesia o se talavou matua, sa maua e Elder Vinson se uunaiga malosi faaleagaga. Sa manino lona lagona ua tatau ona auai o ia i le Ekalesia ina ia mafai ai ona agai i luma i le sailia o tali i fesili o totoe. Sa papatiso o ia ma faamauina i le vaiaso na sosoo ai.

Mai lava i lena taimi e oo mai i le aso, “Sa ou iloa le mea sa faamoemoeina e le Alii ou te faia ina ia maua ai e sa’o lava e i ai tali o a’u fesili uma.”

Talu mai lona papatisoga i le 1974, sa avea Elder Vinson o se fesoasoani i se au epikopo, epikopo, fautua maualuga, fesoasoani i le au peresitene o le siteki, sui risone, fesoasoani i se au peresitene o le misiona, fai sauniga i le malumalu, ma le Fitugafulu Eria.

Sa fanau mai o ia i Sini, Ausetalia, i le aso 12 Mati, 1951. Sa faaipoipo o ia ia Kay Anne Carden ia Me 1974. O i laua o ni matua o se fanau e toaono.