Faapei Ona Faamagalo mai Keriso ia te Outou, ia Faapea Foi Outou
Saunia e Elder Larry J. Echo Hawk
O Le Fitugafulu
E mafai ona tatou maua uma le filemu le mafaamatalaina ma faipaaga ai ma lo tatou Faaola a o tatou aoao e faamagalo atu fua ia i latou ua “agaleaga mai” ia te i tatou.
“O le uluai aso o le vaisapati, ua latou o atu ai i le tuugamau i le tafa o ata, ua ave mea manogi na latou saunia, o isi foi … sa faatasi ma i latou.
“Ua iloa e i latou ua fulieseina le maa nai le tuugamau.
“Ona latou ulu atu lea i totonu, a e lei iloa le tino o le Alii o Iesu.
“Ua fememea’i i latou i lenei mea, faauta foi, ua tutu mai ia te i latou tagata e toalua ua oofu i ofu pupula:
“Ua matatau i latou, ua punou foi o latou mata i le eleele, ona la fai mai lea ia te i latou, Se a le mea tou te saili ai le ua soifua i e ua oti?
“E le o iinei o ia, a ua tu.”1
O taeao, o le Sapati o le Eseta, o le a tatou manatua ai i se auala faapitoa mea na faia e Iesu Keriso mo i tatou: “Aua ua faapea lava ona alofa mai o le Atua i le lalolagi, ua ia auina mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”2 O le a mulimuli ane, o le a tatou toetutu mai e pei o Ia, ma ola e faavavau.
E ala i le vavega o le Togiola paia a Iesu Keriso, ua mafai ai foi e i tatou ona mauaina le meaalofa o le faamagaloga o a tatou agasala ma mea sese, pe afai tatou te taliaina le avanoa ma le tiutetauave o le salamo. Ma e ala i le mauaina o sauniga talafeagai, tausiaina o feagaiga, ma le usiusitai i poloaiga, e mafai ai ona tatou maua le ola e faavavau ma le faaeaga.
O le asō, ou te fia taulai atu ai i le faamagaloga, o se meaalofa taua ma le faapelepele ua ofoina mai ia i tatou mai lo tatou Faaola ma le Togiola, o Iesu Keriso.
I se po o Tesema i le 1982, sa ma feala ai i luga ma lo’u toalua, o Terry i se telefoni na valaau atu i lo matou fale i Pocatello, Idaho. Ina ua ou taliina le telefoni, sa na o le masūsū na ou faalogo atu i ai. Mulimuli ane, sa fai mai lo’u tuafafine i se leo tau le magagana, “Ua oti Tommy.”
O se avetaavale 20 tausaga le matua sa faasuā’avā, sa masau atu i le silia ma le 85 maila (135 km) i le itula, sa faatalale ma lei tu ai i moli i se aai maotua o Denver, Kolorato. Sa matua feto’ai matautia ma le taavale sa aveina e lo’u uso laitiiti, o Tommy, ma maliliu ai lava i le taimi lena ma lona toalua, o Joan. Sa fo’i atu i la’ua i le fale i se afafine laitiiti i le mavae ai o se patī o le Kerisimasi.
Sa ma felelei vave atu ma lo’u toalua i Denver ma ma o atu ai i le falemaliu. Sa matou potopoto ma o’u matua ma uso ma tuafafine ma faavauvau i le maliliu ai o a matou pele o Tommy ma Joan. Ua maliliu i la’ua i se amioga le mafaufau faasolitulafono. Sa nutimomoia o matou loto, ma sa faafefeteina le ita e faasaga i lenei talavou solitulafono i totonu ia te a’u.
Sa auauna atu Tommy o se loia i le Matagaluega o Faamasinoga i le Iunaite Setete ma sa i ai i se ala e avea ma se faufautua malosi mo le puipuiga o eleele tau Amerika Mao’i ma punaoa faalenatura mo tausaga a sau.
Ina ua mavae sina taimi, sa faia ai loa le faamasinoga mo le falepuipuiina o le alii talavou na nafa ma le fasioti faigata pa’ivalea i le faalavelave tau taavale, I lo latou lotofaavauvau ma le faanoanoa faifai pea, sa auai ai o’u matua ma lo’u tuafafine matua, o Katy i le faamasinoga. Sa i ai foi iina matua o le avetaavale onā, ma ina ua uma le faamasinoga, sa la’ua saofafai i luga o se nofoa umi ma fetagisi ai. Sa nonofo latalata ane i ai o’u matua ma lo’u tuafafine a o latou saili ina ia puleaina o latou lava lagona. I le mavae ai o sina taimi, sa tutu i luga o’u matua ma lo’u tuafafine ma savavali atu i matua o le avetaavale ma ofo atu ia i la’ua upu faamafanafana ma le faamagaloga. Sa lulu lima alii; sa uu lima tamaitai; sa matua loloto le faanoanoa ma loimata maligi mo tagata uma ma le iloaina sa matua mafatia tele aiga uma e lua. Sa taitaia e Tina, Tama, ma Katy le ala i lo latou malosiaga leleoa ma le lototele ma faaali mai i lo matou aiga foliga o le faamagaloga.
O le ofoina atu o lena faamagaloga i na taimi na mafua ai ona faamalūlūina lo’u lava ia loto ma tatala ai se ala i le faamalologa. I le aluga o taimi sa ou aoao ai i le auala e maua ai i se loto faamagalo. Sa na o le fesoasoaniga lava a le Alii o le Filemu sa mafai ona aveesea ai la’u avega tiga. O le a misia pea e lo’u loto Tommy ma Joan, ae o le faamagaloga ua faatagaina ai nei a’u e manatua i la’ua i le olioli saoloto. Ma ou te iloa o le a matou toe faatasia o se aiga.
Ou te le o fautua atu e faapea tatou te faatagaina amioga faasolitulafono. Ua tatou iloaina lelei e tatau ona tali atu le tagata lava ia mo ana lava amioga faasolitulafono ma mea sese faalemalo. Peitai,ua tatou iloa foi, i le avea ai ma ni atalii ma ni afafine o le Atua, tatou te mulimuli i aoaoga a Iesu Keriso. E tatau ona tatou faamagalo atu e tusa lava pe foliga mai e le alagatatau lo tatou faamagaloina o isi.
Na aoao mai le Faaola:
“Aua afai tou te faamagaloina atu tagata i a latou agasala, e faamagaloina foi outou e lo outou Tama o i le lagi:
“Ae afai tou te le faamagalo atu i tagata i a latou agasala o le a le faamagaloina foi e lo outou Tamā a outou agasala.”3.
E mafai ona tatou maua uma le filemu le mafaamatalaina ma faipaaga ai ma lo tatou Faaola a o tatou aoao e faamagalo atu fua ia i latou ua “agaleaga mai” ia te i tatou. O lenei faigapaaga e aumaia ai le mana o le Faaola i o tatou olaga i se ala le mafaaseseina ma le mafaagaloina lava.
Na apoapoai mai le Aposetolo o Paulo:
“O lenei ia oofu outou i le alofa mutimutivale, ma le agalelei ma le loto maualalo, ma le agamalu ma le onosai, faapei o e ua filifilia e le Atua;
“Ia fefaapalepalea’i, ma ia fefaamagaloa’i outou … : faapei ona faamagalo mai o Keriso ia te outou, ia faapea foi outou.”4
Na tautino mai e le Alii lava Ia:
“O le mea lea, Ou te fai atu ai ia te outou, e tatau ona outou faamagalo i le tasi [ma le isi]; ona o ia o lē e lē faamagalo atu i lona uso i ana agasala, e tu taʼusalaina o ia i luma o le Alii; aua e tumau ia te ia le agasala tele atu.
“O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.”5
Ua manino lava aoaoga a lo tatou Faaola ma le Togiola; e tatau i le tagata agasala ona loto e faamagalo atu i isi pe afai e faamoemoe o ia ina ia mauaina le faamagaloga.6
Uso e ma tuafafine, o i ai ni tagata i o tatou olaga ua faatiga ia te i tatou? Pe o tatou teulotoina ea ni mea ua foliga mai e faamaonia atoatoa ai lagona o le lototiga ma le ita? O tatou faatagaina ea le faamaualuga e taofia i tatou mai le faamagalo atu ma le faagalo? Ou te valaaulia i tatou uma ina ia faamagalo atu atoatoa ma faataga le faamalologa e tupu mai i totonu. E tusa lava foi pe le oo mai le faamagaloga i le aso nei, ae ia iloa a tatou mananao i ai, ma galulue i ai, o le a oo mai lava—e pei lava ona faia mo a’u i le mavae ai o le maliu o si o’u uso.
Faamolemole ia manatua foi o se elemene taua o le faamagaloga e aofia ai le faamagaloina o i tatou lava ia.
“O lē ua salamo i ana agasala, e faamagaloina o ia, ma o a’u, le Alii, ou te le toe manatua lava.”7
Ou te augani atu ia i tatou uma lava i lenei aso ina ia manatua ma mulimuli i le faataitaiga a Iesu Keriso. I luga o le satauro i Kolokota, i Ona tiga, na Ia fetalai ai i nei upu, “Lo’u Tama e, ia e faamagalo atu ia te i latou, aua ua latou le iloa le mea ua latou faia.”8
E ala i le mauaina o se agaga faamagalo ma le faatinoina, e pei o o’u matua ma lo’u tuafafine matua, e mafai ai ona tatou iloaina le folafolaga a le Faaola: “Ou te tuuina atu ia te outou le [filemu]; o lo’u [filemu] ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”9
Ou te molimau atu o le a oo mai lenei filemu i o tatou olaga pe a tatou usiusitai i aoaoga a Iesu Keriso ma mulimuli i Ana faataitaiga e ala i le faamagalo atu i isi. A tatou faamagalo atu, ou te folafola atu o le a faamalosia e le Faaola i tatou, ma o le a tafe mai Lona mana ma le olioli i o tatou olaga.
O loo avanoa le tuugamau. O loo soifua Keriso. Ou te iloa o Ia. Ou te alofa ia te Ia. Ou te faafetai mo Lona alofatunoa, o le mana faamalosiau lea ua lava e faamalolo ai mea uma. I le suafa paia o Iesu Keriso, amene.