Aoao Atu i le Fale—o se Tiutetauave Fiafia ma le Paia

Saunia e Devin G. Durrant

Fesoasoani Muamua i le Au Peresitene Aoao o le Aoga Sa

Ou te talosagaina le fesoasoani mai le lagi a o tatou taumafai e avea ma faiaoga e faapei o Keriso i o tatou fale.

O lo’u toalua, o Julie ma a’u, sa tausia ni fanau faapelepele se toaono, ma e lei leva tele atu ua gaogao ii ai lo ma faamoega. Ua ou matua misia lava le i ai o le ma fanau i lo matou fale i aso uma. Ua ou misia le aoao mai ia te i latou ma le aoao atu o i latou.

O le aso e faasinotonu la’u tautalaga i matua uma ma i latou uma o e mananao e avea o ni matua. O le toatele o outou o loo tausia nei ni fanau. Mo isi, atonu e le o toe mamao ona oo mai lea o lena taimi. Ma mo isi foi, o le avea ma matua atonu o se faamanuiaga i le lumanai. Ou te tatalo ia tatou iloa uma o le tiutetauave fiafia ma le paia o le aoao atu lea o se tamaitiiti.¹

I le avea ai ma matua, tatou te faailoa atu a tatou fanau i le Tama Faalelagi ma Lona Alo, o Iesu Keriso. Tatou te fesoasoani i fanau e fai la latou tatalo muamua. Tatou te ofo atu i ai le taitaiga ma le lagolago a o latou ulu i le ala o le feagaiga² e ala i le papatisoga. Tatou te aoao atu i latou ia usitai i poloaiga a le Atua. Tatou te a’otauina i latou e uiga i Lana fuafuaga mo Ana fanau, ma e tatou te fesoasoani ia i latou ia iloa ia musumusuga a le Agaga Paia. Tatou te ta’u atu ia i latou ia tala e uiga i perofeta anamua ma fautuaina i latou ia mulimuli i perofeta soifua. Tatou te tatalo mo o latou faamanuiaga ma tiga faatasi ma i latou i taimi o o latou tofotofoga. Tatou te molimau atu ia tatou fanau e uiga i faamanuiaga o le malumalu, ma e tatou te taumafai e saunia lelei i latou e avea ma faifeautalai faamisiona. Tatou te ofoina atu fautuaga pe a oo ina avea a tatou fanau o ni matua. Peitai—e oo lava foi i lena taimi—e le taofia ai lava le avea o i tatou ma o latou matua. E le taofia lava le avea ai o i tatou ma o latou faiaoga. E le faamaloloina lava i tatou mai nei valaauga e faavavau.

O le aso, sei o tatou manatunatu lava i nai avanoa laiti matagofie ua tatou maua e aoao atu ai a tatou fanau i o tatou fale.

Aoao Atu i Afiafi Faaleaiga

Sei o tatou amata i le afiafi faaleaiga, lea ua avea o se faamuamua maualuga i le fale e faatumulia i le faatuatua i le mea sa ou ola a’e ai. Ou te le manatuaina ni lesona patino na aoao i afiafi faaleaiga, ae ou te manatuaina e lei misia lava se vaiaso.³ Sa ou iloaina le mea sa taua i o’u matua.⁴

Ou te manatua se tasi o a matou gaoioiga ou te fiafia lava i ai i afiafi faaleaiga. E valaaulia e Papa se tasi o lana fanau e sue “Le Suega.” Na tuu atu i le tamaitiiti se faasologa o faatonuga e pei o le, “Muamua, alu i totonu o le umukuka ma tatala ma tapuni le pusaaisa. Ona tamoe lea i totonu o lo’u potumoe ma aumai se pea totini mai la’u pusatu. Ona toe sau lea ia te au, osooso i luga ma lalo faatolu, ma fai mai, ‘Tama, ua uma ona ou faia!”

Sa ou fiafia lava i ai pe a oo mai le faasologa ia te au. Sa ou manao e fai ia sa’o lelei sitepu taitasi, ma sa ou faamemelo i le taimi e mafai ona ou fai atu ai, “Tama, ua uma ona ou faia!” Sa fesoasoani lea gaoioiga e fausia ai lo’u talitonuga maua’i ma faafaigofie ai mo se tamaitiiti e le fifilemu ona gauai atu i le taimi e aoao mai ai e Tina po o Tama se mataupu faavae o le talalelei.

Na fautua mai Peresitene Gordon B. Hinckley: “Afai o i ai lava ni o outou masalosaloga e uiga i le aoga o afiafi faaleaiga, faataitai i ai. Faapotopoto mai ia te outou a outou fanau, aoao i latou, tuuina atu le molimau ia i latou, faitau faatasi i tusitusiga paia, ma ia maua faatasi se taimi fiafia.⁵

O le a i ai pea lava mea faafeagai i le faia o afiafi faaleaiga.⁶ Po o le a lava, ou te valaaulia outou e sue se auala e foia ai faigata ae avea afiafi faaleaiga o se faamuamua—ma ia mautinoa o se aafiaga malie.

Aoao Atu i Tatalo Faaleaiga

O tatalo faaleaiga o se tasi lea o avanoa lelei tele e aoao atu ai.

Ou te fiafia lava i le auala na aoao atu ai e le tama o Peresitene N. Eldon Tanner o ia i le taimi o le tatalo faaleaiga: O le mea lea na ta’ua e Peresitene Tanner:

“Ou te manatua se tasi o afiafi ina ua matou tootutuli i le tatalo faaleaiga, na fai atu ai lo’u tama i le Alii, ‘E i ai se mea na fai e Eldon ananei sa le tatau ona ia faia; ua salamo o ia, ma afai o le a e faamagaloina o ia, na te le toe faia lava.’

“O iina na ou naunautai ai e le toe faia—e sili atu nai lo se mea semanu e faia e le sasa.”⁷

A o ou tamaitiiti, o nisi taimi ou te le fiafia i le soona uumi tele o a matou tatalo faaleaiga, ma ou mafaufau ifo ai ia te au lava, “Pe le’i faatoa uma atu foi se matou tatalo i ni nai minute talu ai?” I le taimi nei, i le avea ai o se matua, ua ou iloa e le mafai ona faapea ua tele tele ia tatalo faaleaiga.⁸

E faagaeetia pea lava au i le ala e faailoa mai ai Iesu Keriso e le Tama Faalelagi o Lona Alo Pele.⁹ Ou te fiafia lava e tatalo mo la’u fanau e ta’u o latou igoa a o latou faalogologo mai ia te au o faailoa atu i le Tama Faalelagi le pele o i latou ia te au. E foliga mai e leai lava se isi taimi e sili atu e ta’u atu ai le alofa i a tatou fanau nai lo le taimi e tatalo faatasi ai ma i latou pe faamanuiaina i latou. A oo ina potopoto ia aiga i le tatalo faamaulalo, e mamana ma tumau lesona e aoao mai ai.

Aoao Atu i Soo Se Taimi

O le aoao atu faamatua e pei o se fomai e valaau e tiute i soo se taimi. E manaomia lava lo tatou saunia i taimi uma e aoao a tatou fanau aua tatou te le iloa lava le taimi e maua ai le avanoa.

E faapei i tatou o le Faaola, o ana aoaoga e tele “e lei tupu i totonu o se sunako ae i nofoaga le taualoa, o aso uma—ao taumamafa ma Ona soo, utu vai mai se vai eli, po o le savali ma pasia se laau o le mati.”¹⁰

I le tele o tausaga ua mavae, sa faamatala mai ai e lou tina e faapea o le lua o ana talanoaga aupito sili o le talalelei ma lo’u uso matua, o Matt, o se taimi a o gaugau lana tagamea a o le isi taimi a o ia aveina o ia i le fomai fainifo. O se tasi o le mau mea ou te faamemelo ai i lo’u tina, o lona saunia e aoao lana fanau.

E le muta lava ana aoaoga faamatua. A o avea au o se epikopo, sa fai mai lo’u tina, a ua 78 tausaga le matua i lena taimi, e manaomia ona ‘oti lo’u lauulu. Sa ia iloaina e manaomia ona avea au ma faataitaiga, ma sa lei faatuatuai e ta’u mai ia te au. Ou te alofa foi ia te oe, Mama!

I le avea ai o se tama, e faaosofia lava au e suesue patino ma manatunatu loloto i tusitusiga paia ina ia mafai ai ona ou tali atu pe a tuu mai e la’u fanau po o a latou fanau se avanoa faafuasei e aoao atu ai.¹¹ “O nisi o avanoa aupito lelei o le aoao atu e amata i se fesili po o se atugaluga i le loto o se tagata o le [aiga].”¹² Pe o tatou faalogologo ea i na taimi?¹³

Ou te fiafia lava i le valaaulia a le Aposetolo o Peteru e faapea: “Ia saunia pea lava outou e tali atu ma le agamalu ma le mata’u ia i latou uma o e fesili mai ia te outou i le uiga o le faamoemoe o loo ia te outou.”¹⁴

A o ou talavou, ma te fiafia lava ma lo’u tama e taufai lu’i e le tasi le isi e vaai po o ai e aupito malosi lana ‘u’u. E oomi e le tasi le lima o le isi i le mea e gata mai ai le mau i se taumafaiga ia ‘atigu le isi i le tiga. Ua le toe foliga malie i le taimi nei, ae peitai sa malie lava i na aso. Ina ua uma se tasi o na tauiviga, sa pupulato’a mai Tama i o’u mata ma fai mai, “E malolosi tele ou lima, Atalii. Ou te faamoemoe o le a i ai pea i ou lima le malosi e le pa’i atu ai lava i se tamaitai talavou ma le le talafeagai.” Ona ia valaaulia lea o au e ola mama ma fesoasoani i isi ia faapena foi ona fai.

Sa faasoa mai e Elder Douglas L. Callister le mea lenei e uiga i lona tama: “A o malaga mai i le fale mai le galuega i se tasi aso, sa te’i ua faapea mai le Tama, ‘Sa totogi ananei la’u sefuluai. Sa ou tusia le “faafetai” i tua o le siaki. Ou te matua faafetai lava i le Alii i le faamanuiaina o lo tatou aiga.”

Ona saafi lea o Elder Calliser i lona tama-faiaoga: “Sa ia aoao maia faatinoga ma uiga faaalia o le usiusitai.”¹⁵

Ou te manatu e poto le fesili ifo ia i tatou lava i nisi taimi, “O le a le mea o le a ou aoao atu, pe o le a se mea o o’u aoao atu, i la’u fanau e ala i a’u faatinoga ma uiga faaalia o le usiusitai?”

Aoao Atu i Suesuega Faaleaiga o Tusitusiga Paia

O suesuega faaleaiga o tusitusiga paia o se saofaiga lelei lea mo le aoao atu o aoaoga faavae i le fale

Na saunoa Peresitene Russell M. Nelson, “E le gata ina tatau i matua ona pipiimau i le afioga a le Alii, ae ua ia te i latou se tiutetauave paia e aoao atu ia latou fanau.”¹⁶

A o ma tausia ma Julie le ma fanau, sa ma taumafai ia faifai pea ma fatufatu mea fou. I se tasi tausaga, sa tonu ai matou te faitaua o se aiga le Tusi a Mamona i le faaSipaniolo. Pe o le mafuaaga lena sa valaauina ai e le Alii le ma fanau uma o e sa auauna atu faamisiona i se misiona o le gagana Sipaniolo.? Es posible [E mafai].

Sa ou matua ootia lava ina ua faasoa mai e Uso Brian K. Ashton ia te au e faapea sa la faitauina faatasi ma lona tama itulau taitasi o le Tusi a Mamona i le taimi o lona tausaga sinia i le aoga maualuga. E fiafia lava Uso Ashton i tusitusiga paia. Ua tusia i lona mafaufau ma i lona loto. Sa toto e lona tama lena fatu i le taimi o talavou Uso Ashton, ma o lena fatu¹⁷ ua ola ma avea ma laau o le upumoni ua loloto ona a’a. Ua faia foi e Uso Ashton lena lava mea e tasi i lana fanau matutua.¹⁸ Sa fesili talu ai nei ia te ia lona atalii ua valu-tausaga-le-matua, “Tama o afea ou te faitauina ai le Tusi a Mamona ma oe?”

Aoao Atu i Faataitaiga

O le mea mulimuli, o la tatou aoao atu faamatua e sili ona tosina ai o a tatou faataitaiga. Ua fautuaina i tatou “e fai ma faaa’oa’o i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.”¹⁹

I se malaga talu ai nei, sa ma o ai ma Julie i le lotu ma sa ma vaai ai i le fuaiupu lenei i lona faatinoga. O se alii talavou, e le o toe mamao ona malaga lea mo lana misiona, sa lauga i le sauniga faamanatuga.

Sa ia fai mai, “Tou te manatu uma lava e ese le lelei o lo’u tama i le lotu, ae …” Na tu o ia, ma sa ou matua fiailoa lava pe o le a lana tala o le a sosoo ai. Na faaauau ona ia faapea mai, “O ia o se tagata e sili atu i le fale.”

Sa ou faafetai i lenei alii talavou ina ua maea mo le saafiafiga musuia na ia tuuina atu i lona tama. Ona ou iloa ai lea o lona tama o le epikopo o le uarota. E ui ina sa auauna atu lenei epikopo ma le faamaoni i lana uarota, ae sa lagona e lona atalii o lana galuega aupito sili sa faia lea i le fale.²⁰

Ua fautua mai Elder D. Todd Christofferson: “E tele o tatou avanoa e aoao atu ai … tupulaga faia’e, ma e tatau ona tatou tuuto atu o tatou mafaufauga ma taumafaiga aupito sili e faaaoga uma na avanoa. O le mea aupito sili i na mea uma, e tatau ona faaauau pea ona tatou fautuaina ma fesoasoani i matua ia avea ma faiaoga sili atu ma ia faia pea e le aunoa … aemaise e ala i faataitaiga.”²¹

O le ala lena e aoao atu ai le Faaola.²²

I le tausaga ua tuanai, i le taimi o se tafaoga ma le ma fanau laiti e toalua, sa fautuaina ai e Julie matou te faia papatisoga sui i Malumalu o St. George ma San Diego. Sa ou tomumu—ia te au lava—ma le mafaufau, “Matou te o i le malumalu i le mea matou te nonofo ai, ma o lea ua matou o e tafafao. Aisea e le faia ai se mea sili atu e talafeagai ma se tafaoga?” Ina ua uma ia papatisoga, sa manao ia Julie e pue ni ata i fafo o le malumalu. Sa ou toe—muimui le leoa foi. E mafai ona outou mate maia le mea na sosoo ai: sa fai matou puegaata.

E manao ia Julie ia i ai manatuaga e le ma fanau o le ala na matou fesoasoani ai i o matou tuaa, ma isi. Sa matou le manaomia se lesona aloa’ia i le taua o malumalu. Sa matou ola ai—faafetai i se tina e alofa i le malumalu ma manao e faasafua atu i lana fanau lena alofa.

Pe a faataua e matua le tasi ma le isi ma tuuina atu faataitaiga amiotonu, e faamanuiaina fanau e faavavau.

Faaiuga

Mo outou uma o loo taumafai e faia le mea silisili e aoao atu ai i o outou fale, ia outou maua le filemu ma le olioli ia outou taumafaiga. Ma afai tou te lagona o i ai se avanoa e faaleleia atili ai pe manaomia foi se tapenaga sili atu, faamolemole tali atu ma le lotomaualalo a o uunaia outou e le Agaga ma tautino atu oe lava e faatino.²³

Na saunoa Elder L. Tom Perry, “O le malosi o soo se sosaiete, o le fiafia o ona tagata, o lo latou manuia, ma lo latou filemu e afua uma mai lava i le aoaoina o fanau i le aiga”²⁴

Ioe, ua matou le toe nonofo nei ma le ma fanau, ae o loo ou faatalitali pea, sauniuni ma le naunautai ia maua ni isi avanoa taua e aoao atu ai la’u fanau ua matutua, o a latou fanau, ma ou te faamoemoe ia i ai se aso, o fanau a a latou fanau.

Ou te talosagaina le fesoasoani mai le lagi a o tatou taumafai e avea ma faiaoga e faapei o Keriso i o tatou fale. I le suafa, o Iesu Keriso, amene.

Faamatalaga

1. Tagai Mataupu Faavae ma Feagaiga 68:25; 93:40.

   Sa aoao mai Elder L. Tom Perry: “Ua matua salalau le faatosinaga a le fili, ma ua faia ana osofaiga, ma taumafai e tafi ese ma lepetia le faavae tonu o lo tatou sosaiete, o le aiga lea. E tatau i matua ona faamautu le talitonuga e faapea, o aoaoga i le fale o se tiutetauave e aupito sili ona paia ma taua” (“O Tina e Aoaoina Fanau i le Fale,” Liahona, Me 2010, 30).

   Ua aoao mai e le Au Peresitene Sili ma le Korama a Aposetolo e Toasefululua: “O le tane ma le ava ua i ai le tiutetauave paia e alolofa ma tausia e le tasi le isi ma a la’ua fanau. ‘O le fanau o se tofi mai le Alii’ (Salamo 127:3). Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia faaletino ma le faaleagaga, ma ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea latou te nonofo ai. O tane ma ava—tina ma tama—o le a tulituliloaina i luma o le Atua mo le faatinoina o nei matafaioi” (“O Le Aiga: O Se Folafolaga i le Lalolagi,” Liahona, Me 2017, 145).

2. Tagai i le Russell M. Nelson, “A’o Tatou Agai Faatasi Atu i Luma,” Liahona, Ape. 2018, 7.

3. Na saunoa Elder David A. Bednar: “O le taimi nei a mafai ona outou fesili atu i o ma atalii ua matutua po o a ni mea o latou manatua e uiga i le tatalo faaleaiga, suesuega o tusitusiga paia, ma afiafi faaleaiga, ou te talitonu ua ou iloa la latou tali. Atonu latou te faailoa atua se tatalo faapitoa po o se taimi tonu o se suesuega o tusitusiga paia, aemaise ai lava se lesona ‘anoa o se afiafi faaleaiga faapea o se taimi taua o lo latou atiina ae faaleagaga. O le mea o le a latou fai mai na latou manatua o le faapea, i le avea ai o se aiga sa matou faia e le aunoa” (“Ia Matua Maelega ma Mafaufaui leAiga,” Liahona, Nov. 2009, 19).

4. Tagai “O Se Lagi Se Aiga,” Viiga nu. 179.

5. Aoaoga a Peresitene o le Ekalesia: Gordon B. Hinckley (2016), 74.

6. Tagai 2 Nifae 2:11.

7. N. Eldon Tanner, “Aua Nei Maasiasi i le Talalelei a Keriso,” Liahona, Apeb. 1980, 42.

8. Tagai 3 Nifae 18:21.

9. Tagai Mataio 3:16–17; 3 Nifae 11:6–8; Mataupu Faavae ma Feagaiga 18:34–36; Iosefa Samita—Talafaasolopito 1:17.

10. “Take Advantage of Spontaneous Teaching Moments,” Teaching in the Savior’s Way (2016), 16. Aoao Atu i le Ala a le Faaola e aofia ai motugaafa ma meafaigaluega eseese mo le aoao atu i le fale.

11. Tagai Mataupu Faavae ma Feagaiga 11:21; 84:85.

12. Aoao Atu i le Ala a le Faaola, 16.

13. Tagai “Faalogo,” Tala’i La’u Talalelei: O Se Taiala mo le Galuega Faafaifeautalai (2004), 185–86.129.

14. 1 Peteru 3:15.

15. Douglas L. Callister, “Most Influential Teacher—Emeritus Seventy Pays Tribute to Father,” Aug. 29, 2016, news.lds.org.

16. Russell M. Nelson, “Ia Faatonu Lou Aiga,” Liahona, Ian. 2002, 81.

17. Tagai Alema 32:28–43.

18. E suitulaga Sister Melinda Ashton i tiutetauave pe a malaga ese atu lona toalua, o Brother Ashton.

19. 1 Timoteo 4:12; tagai foi Alema 17:11.

20. E auauna atu Epikopo Jeffrey L. Stewart i le Uarota Lua o Southgate i St. George, Iuta. O lona atalii o Samuelu, o loo auauna atu nei i le Misiona o Colombia Medellín.

21. D. Todd Christofferson, “Strengthening the Faith and Long-Term Conversion of the Rising Generation,” in General Conference Leadership Meeting, Sept. 27, 2017.

22. Tagai 3 Nifae 27:21, 27.

23. Tagai Mataupu Faavae ma Feagaiga 43:8–9.

24. L. Tom Perry, “O Tina e Aoaoina Fanau i le Fale,” 30.