Elder Kyle S. McKay

Fitugafulu a le Au Pulega Aoao

E le gata i lona aiga ma le Ekalesia, o le faanaunauga sili o Elder Kyle S. McKay o le tietie lea i lana solofanua i atumauga.

“E le o la’u tapuaiga,” na ia saunoa ai, “ae e le fesiligia le faamalosia ai o lo’u [faatuatua]. Ou te fesuia’ia i le va o mauga o le Alii ma le mauga o le maota o le Alii. Ma te feiloai ma Ia i ia nofoaga uma e lua.”

E faatusa e Elder McKay ia mauga i luga ae o Huntsville, Iuta, ISA i le vai ma le vao o Mamona ma lo latou taua mo le nuu o Alema—o iina, i lona talavou, na ia iloa ai lona Togiola.

Na soifua mai Elder McKay i le aso 14 Fepuari, 1960 i Sikako, Ilinoi, ISA, ia Barrie Guinn McKay ma Elaine Stirland McKay, o e na te avatu i ai le faamalo mo le tosinaina o ia i le tagata ua i ai nei.

Na momotu lana aoga i le Iunivesite o Polika Iaga i le 1979 ae faamisiona tala’i i Kobe, Iapani. E lei leva ona foi mai lana misiona ae faamaea lona tikeri i le Igilisi, ma sa feiloai Elder McKay ma Jennifer Stone, o le sa faatoa foi mai le Misiona i Egelani Bristol. Sa suesue foi e ia le Igilisi. Sa faaipoipo i la’ua i le Malumalu o Oakland Kalefonia i le aso 12 Iuni, 1984.

Faatasi ai ma le aiga i le totonugalemu o lona soifuaga, fai mai Elder McKay, o ia ma Sister McKay e maua mai lo la olioli silisili mai a la’ua fanau. A o nonofo ai le au McKay i Kaysville, Iuta, ISA, e faaalu e le aunoa lo la tatimi ma a la fanau e toaiva i Huntsville, i le mea sa faamautu ai o la tuaa i le 1860.

Sa faauu Elder McKay ma se tikeri o le tofamanino i le tulafono i le 1987 mai le J.Reuben Clark School of Law i le BYU, ma sa taliaina ai loa lava se galuega i se kamupani tele a loia faaitulagi i Portland, Oregon, ISA. Sa ia toe taliu mulimuli ane i Iuta e tulimatai se avanoa i se tasi kamupani loia a’o lei taliaina e ia se tulaga i le Kroger Company. Sa faigaluega o ia o se peresitene lagolago mo vaega uma e lua a Kroger a Smith ma Fry, o vaega e lua a Kroger i Iuta ma Arizona, ISA mai le 2000 e oo i le 2017.

Sa avea muamua Elder McKay o se epikopo, fautua maualuga, peresitene o le siteki, ma le Fitugafulu Eria.