Faamamafa i Auaunaga

O le a faamutaina faiaoga o aiga ma faiaoga asiasi, na fofoga mai ai e Peresitene Russell M. Nelson i le taimi o le sauniga i le aoauli o le Aso Sa i le konafesi aoao. “O galuega auauna atu,” o se “faiga fou e paia atu” mo le tausiga faaKeriso o isi, o le a saunia ai se taumafaiga tuufaatasi e fesoasoani ai e faafetaia’ia manaoga faaleagaga ma faaletino o tagata o le ekalesia.

Sa saunoa Sister Jean B. Bingham, Peresitene Aoao o le Aualofa, ma Elder Jeffrey R. Holland o le Korama a Aposetolo e Toasefululua e uiga i le ala o le a taulai atili atu ai i le faiga fou lea ia taumafaiga a korama o le Perisitua Mekisateko ma Aualofa i auaunaga e faapei ona sa faia ai e le Faaola (tagai itulau 101 ma le 104).

Ua mafai nei ona avea tamaitai o le Lora ma le Maea Meite ma soa galulue a tuafafine o le Aualofa. I se faatalanoaga faalekuata, o uso ma tuafafine galulue auauna atu o le a fefautuaai ma taitai e uiga i manaoga ma malosiaga o i latou sa totofi latou i ai. O le aofai o faatalanoaga sa faia e taitai i le taimi o se kuata, o le a na o le pau lena o le lipoti aloaia e fai. E taua asiasiga pe a mafai, ae o le auauna atu e le aofia ai se auala faatonuina e faafesootai ai i masina taitasi.

“E mafai e le autalavou ona fefaasoaai a latou meaalofa tulagaese ma tuputupu a’e faaleagaga ai a o latou auauna atu faatasi ma tagata matutua i le galuega o le faaolataga,” na saunoa ai Sister Bingham. O le faaaofia ai o le autalavou e faateleina ai le aofaiga o tagata o le au paia e manatu ma tausia isi ma fesoasoani ai i le autalavou “e saunia lelei ai e faataunuu a latou matafaioi o ni taitai i le Ekalesia ma nuu ma ni soa e saofaga i o latou aiga.”

“O i Matou i le laumua o le Ekalesia e le manaomia le iloa pe faapefea po o fea po o anafea foi tou te fesootai ai ma o outou tagata,” na saunoa ai Elder Holland; “na ona matou manaomia lava ona iloa ma manatu ua outou faia ma ua outou faamanuiaina i latou i ala uma tou te mafaia.”

E tusa ai ma se tusi mai le Au Peresitene Sili, o fetuunaiga o auaunaga e ono alu ai se taimi ae e tatau ona faia i le vave e mafai ai. Ministering.lds.org o loo maua ai auiliiliga faaopoopo, e aofia ai ma tali i fesili e fesiligia soo. O vitio faaleaoaoga ma isi punaoa o le a faaopoopo atu i lena saite i vaiaso o lumanai nei.

E amata atu ia Iuni, o le Liahona o le a aofia atu ai se tusiga e faaigoa o “Mataupu Faavae o Galuega Auauna Atu” e fesoasoani ai i tagata o le ekalesia ia malamalama pe faapefea ona faapei atili o Keriso a o latou auauna atu i le tasi ma le isi.