O Se Lumanai e Faatumulia i le Faamoemoe

Faigalotu i le Lalolagi Atoa mo Talavou Matutua

Elder Jeffrey R. Holland o le Korama a Aposetolo e Toasefululua faatasi ai ma Sister Patricia T. Holland

Aso Sa, 08 Ianuari, 2023

Elder Jeffrey R. Holland: A ma uo pele i soo se mea! E maeu le faamanuiaina o Sister Holland ma a’u i le faatasi ai ma outou i lenei po. E ui lava o loo ma pa’i atu i le toatele o outou i le lalolagi atoa e ala i tekinolosi ofoofogia faaona po nei, ae ua ma fiafia lava i le i ai o se aofia patino iinei, i le iunivesite ma ona inisitituti o aoaoga faalelotu sa ma amata ai ma Pat a ma’ua a’oa’oga i kolisi, tafafao faamasani, ma faaipoipo ai.

O lea ua ou faatalitali nei se’i vaai pe i ai monea i le potu ina ua ou ta’u atu le upu faaipoipoga. Aua le popolevale. O le a ma le talanoa e uiga i le faaipoipoga i le po nei. O nisi o outou ua uma ona faaipoipo, ma te le mananao foi i le isi vaega e taufetuli ese mai le potu. Ae ua ou ta’ua o ma’ua a’a faatalavou matutua ma le amataga o le alofa uluitino ma le manatu afai na taia ai i ma’ua i se po faapenei, ia o ai na te iloa? E ono taia ai foi isi.

E moni, e toatele outou tuafafine na faamatala mai ia i ma’ua e i ai ni alii e manaomia ona taia, a le o le ‘aū a Kupita, ia atonu o se tama’i foe e ta ai le polo o le pickleball. Afai o i ai se tamaitai talavou iina i le po nei, o nofo faatasi ma se alii talavou e fetaui i ai le faamatalaga lea, ua tuu atu e Elder ma Sister Holland le faatagaga e ‘tulilima ai ona ivi ‘aso’aso i le taimi nei--faifai malie ia molimoli atu ai le alofa, ae ia lava le ma’ai e avatu ai le fe’au. O le a ma fiafia pe afai e aoga mo oe sea ‘eu’eu i le ala na aoga ai mo i ma’ua, ae vagana ai o ma’ua o lo’u tulilima a o ivi ‘aso’aso o Sister Holland.

O Iuni a sau nei o le a 60 ai tausaga talu ai ona ma faaipoipo ma Pat i le Malumalu o St. George, e na o le afa maila mai le lotoa o le iunivesite lenei. O le aofaiga o le onosefulu tausaga ua ma maua ai se avanoa talileleia e faatofa atu ai i se vaitau sa faigata mo le toatele ma matautia foi mo nisi. Ua tatou te’ate’a malie ese mai le faama’i oti o le KOVITI-19, ae o lenei mala ua toetoe lava pei o mala o ta’ua i le Tusi Paia, o loo avea pea ma to’atuga mao’i i le tele o vaega o le lalolagi, aua o loo i ai pea se averesi e silia ma le 1,700 o loo lipotia mai e maliliu mai lenei faama’i i aso taitasi.¹ Ua matuai tele se aafiaga o lenei mala, e le gata i le soifua manuia faaletino ae faapea i le faaagafesootai, faapolotiki, ma le ola faaletamaoaiga o le toetoe o tagata uma i le paneta, i itu uma.

O se isi ituaiga o mala o loo ua faaalia i Europa i sasae, lea e faitau miliona tagata, e aofia ai tagata o le Ekalesia, ua pagatia, ua leai ni mea e nonofo ai, pe ua ofo atu o latou ola i taua latou te le’i talosagaina pe na tatau ai mo i latou. Ua na o ni vaiaso talu ai a o i ai i se tofiga i Europa, sa matou fetaui ai ma Sister Holland ma nisi o le au sulufa’i Iukureini. Sa matou talie ma fetagisi ma i latou sa tuua mea uma ae sosola ma na o ni lavalava sa ufiufi ai o latou pa’u. Sa o ma lagonaina foi lea lava lagona ma le faanoanoa mo o tatou tagata faamaoni i Rusia o e e matua’i ta’umamaina ae ua aafia i lenei taua. E le gata i nei mala, ae i le tele o nofoaga i le lalolagi atoa, sa o ma vaaia ai ni taugafana matautia—e aofia ai se mala matautia i le vaiaso na te’a nei i saute o Iuta—o ‘anolasi lē mama i faafiafiaga, ma gaoioiga faapolotiki ua foliga ua faagaloina ai mataupu faavae autu e pei o le amiosa’o, agalelei, ma le faamaoni, pe foliga e le’i iloaina muamua.

Ma, ioe, e tele foi isi aganuu ma faafitauli faaagafesootai na ma faaletonu ai. Ae ma te le’i o mai i le po nei e faapopolevale outou i faafitauli o le lalolagi. O le mea moni, ua na o se faafeagai ua ma o mai ai! Ua ma iloa le lagona le mautonu e malamalama i ai, o loo tāūpe ane i luga o la outou tupulaga. Ma te faamalulu atu foi ona e le’i foiaina e la matou tupulaga nisi o nei faafitauli ua outou feagai nei. Ae matou te valaau atu ia te outou ma isi talavou uma o le Au Paia o Aso e Gata Ai, ina ia saoaluma ma i latou o taumafai e foia nei faafitauli, lea e mafai ai ona toe faamaui le tai fana’e o le fefe, le mautonu, ma le atuatuvale o loo siomia ai i tatou. E matua taua tele lo outou tatalo e le gata ia manumalo le Alii i o outou olaga,² e pei ona sa talosagaina ai e Peresitene Russell M. Nelson, ae ia tatalo foi ia manumalo le taua o outou olaga faatasi ai ma isi e le’i mautinoa lava. Afai i le avea ai ma soo taitoatasi o le Alii o Iesu Keriso, e sili ona tatou alolofa ma toafilemu ma agalelei uma, afai tatou te taumafai uma e tausi ia poloaiga a le Atua i le mea sili tatou te mafaia, ona tatou maua lea o mafuaaga uma e lagona ai le mautinoa e uiga i le tulaga o le lalolagi ma a tatou lava. O le savali atu i le lumanai i le ala lea, e tumu i folafolaga filemu ma faaleatua, e mafai ona tatou maua se aafiaga maoae i le lalolagi. Na saunoa Aperaamo Linikone i se tasi taimi e faapea sa ia taumafai e vele ese se vao ae toto ai se fugalaau e sui ai i avanoa uma sa ia maua. Afai tatou te faia uma lena mea, o le a le pine ae avea o tatou toafa lelei ma faaleagaga o ni togalaau mao’i.³

O outou na e i Siamani i le po nei—i le mea ua faaalia ai le agalelei faaKerisiano tele i le au sulufa’i Iukureini na matou faatoa feiloai i ai—o le a outou iloa le faaupuga e faasino ia Johann Goethe e faapea “Afai e salu e tagata uma luma o lona lava faasitepu, o le a le pine ae mama le lalolagi atoa.”

O le mea lea, o le iloaina o luitau ma mananao e ofo atu se ala e talanoaina ai, ua ma o mai ai ma Sister Holland i le po nei e pei ona fai mai le Aposetolo o Peteru e tatau ona ma faia: “ia saunia pea lava … e tali atu [mo le] mafuaaga [mo le] faamoemoe o loo ia te i [ma’ua].”⁴ O le a ma talanoa atu e uiga i le faamoemoe, faatasi ma le tautinoga e le tatau lava ona ma lafoa’ia po o lona tuafafine taua: o faatuatua ma alofa mama. Ua ma iloaina le tele o ala e faauigaina ai nei mataupu faavae vavalalata soofaatasi, ma o le a outou faafofoga o ma ofoina atu ni nai a ma’ua faauigaga i le po nei. O le a outou faafofoga foi o ma tautino atu faatasi ma Moronae e faapea e tatau ona i ai le faamoemoe, e “maua ai [le] tofi ua saunia e le [Atua] [mo i tatou].” ⁵ Ma te mananao ia te outou ia mauaina lena tofi o ni atalii ma afafine o se tupu. Ina ia faia lena mea, e tatau ona tatou iloa o le faamoemoe ua le na o le fe’au ma le tulaga o le faamoemoe masani; o le faamanuiaga o tagata uma o e talitonu.⁶ I le avea ai o se tagata talitonu ua matua’i tumu i le faamoemoe (ma le faatuatua ma le alofa mama), ua malosi lava le lagona o Sister Holland i le taua o lenei tauaofiaga i le lalolagi atoa i le po nei ma la outou matafaioi i aso o i luma. Ua ia iloa o outou o le vaega tatou te pasi atu i ai le fu’a ma ua lagona ai e taua lo outou la’a i luga ma opomau i lo outou taunuuga. Sister Holland.

Sister Patricia T. Holland: E matuai malosi lava ou lagona e uiga ia te outou. O outou o le tupulaga aupito sili ona malolosi o talavou matutua ua iloa e le lalolagi. Ou te alofa ia te outou ona o lena mea. Ma te matuai faafetai ma Elder Holland ona o loo outou tausia a outou feagaiga ma o loo outou taumafai e fai le mea sa’o. Ma ona o le toatele naua o outou, o le a outou maua lena mana lea na talanoa i ai Elder Holland. Ua ou vaaia lo outou susulu i lenei potu. E matuai malamalama lava. Ua afua ai ona ou mafaufau i le taimi na faaali atu ai le Faaola i tagata sa Nifae. Sa Ia fetalai mai, “Ia tuu i luga lo outou malamalama ina ia susulu atu i le lalolagi. Faauta o au o le malamalama lea e tatau ona outou tuu i luga.”⁷ Faapei o outou, sa ma laiti foi, ae o lea ua ma matutua. Pe a ou toe tepa i tua i lo’u olaga, ma afai e mafai ona i ai soo se vaega ou te toe ola ai, e tasi lava le mea o le a ese lo’u faia—e matuai ese lava: faafaigofie! E foliga mai ia te au e sili atu ona lelei mea uma pe a faafaigofie: o tatou meaai, o lavalava, o meaafale, ma faatulagaga o mea e fai. O le mea e sili ona ou faanoanoa ai i lo’u talavou o lo’u le’i vaaia lea o le faigofie o le matagofie o le talaelei; sa ou faia foi ia faigata tele le talalelei. Sa ou lagonaina ua matuai lofituina tele, faigata tele, ma o nisi taimi e ese a. Sa foliga mai ia te au na oo lava i le avea ai ma se talavou matua sa tatau ona ou a’ea se mauga o le amiotonu, ui atu i se afi mumu o le faamamaaga, ma tau autala feeseeseaiga faaleaoaoga faavae uma na iloa e tagata pe afai e tatau ona taliaina au i luma o le Atua.

Ma e le tau fai atu, o o’u mafaufauga i lena taimi na sili atu nai lo se mea na manatu ai se teineitiiti mai Iuta i saute e mafai ona ia taulimaina. Na pei ona fai mai se tasi: “O le mafuaaga e le aufaatasi atu ai tagata ma outou na Kerisiano, ona tou te paleina lo outou lotu e faapei o se ulu tiga, faapei o se pale o laau tuitui.” E na o le toatasi le tagata na paleina se pale o laau tuitui, ma sa Ia faia ina ia mafai ai ona tatou ola fiafia, ma fua tele mai ma le filemu—ae le ma le matafaasiasia. E le’i faia lava ia avea le talalelei ma se mauga e mafai ona a’ea e lena teineitiiti. Na finagalo o Ia—ia faatumulia [lena teineitiiti] ma isi tagata uma i le lalolagi—ia tumu pea lava pea i le faamoemoe. E finagalo o Ia ia tatou iloa o le talalelei e matagofie le faigofie ma faigofie lona matagofie.

Ae faamolemole aua ne’i faaseseina ai outou. I le talanoa e uiga i le faamoemoe, e le faapea ua ou fai atu e tatau ia Keriso ona tuu mai ia i tatou mea uma tatou te mananao ai ma ia tauina a tatou taua. E tatau ona tele atu lo tatou faamoemoe nai lo Pinocchio “e na ona tilotilo i se fetu ma momoo i ai”⁸ e tatau o se faamoemoe na aoao mai e le Faaola. O’u uso e ma tuagane talavou, o se meaalofa, o Lana meaalofa ia i tatou ma i le aiga tagata atoa o tagata. Ma e tatau ona tatou iloaina, o se malamalama o loo susulu i se lalolagi pogisa tele. E pei ona fai mai se tasi tusitala, “E leai se tasi e atoatoa le faanoanoa [vagana] i latou o loo soifua e aunoa ma se faamoemoe.”⁹

O le manaia o le faigofie e aofia ai le mauaina o lenei meaalofa o le faamoemoe e tou te le tau saili i ai; tou te le tau taufetuli solo e tuli; tou te le mafai ona tou gaosia. E faapei o le tele o isi mea i le siomaga o le alofa tunoa, tou te le mauaina i le faalagolago i lou lava malosi po o le malosi o se isi tagata. E leai ni fua faalilolilo po o se mea faamaneta e aofia ai. E le maua mai faamalositino o le mānava tele i totonu (po o le a lava le taua) po o le faitauina o se isi tusi e uiga i le auala e maua ai le fiafia.

O le mea moni, e taua la tatou pitolaau ae e matuai laitiiti lava, o i le Atua le vaega e tele atu o le galuega. O la tatou vaega o le o mai ia te Ia i le lotomaualalo ma le faigofie, ona aua lea nei o tatou popole ma fefefe.¹⁰ Aisea ua matua faigofie ai? Ona o tua atu o mea uma sa aoao mai e Keriso—i tusitusiga paia uma, tala, ma talafaataoto—o loo i ai le folafolaga faapea a i ai le Atua, “e mafaia mea uma,”¹¹ o le folafolaga e mafai e le mana o le Atua ona soloiaese uma loimata.¹² E tatau ona tatou lafoa’i atuatuvalega faaletagata, ae saili le mapusaga i le Alii.¹³ O lea la tatou te o atu i Ona luma ma le agamalu ma le lotomaualalo¹⁴ ina ia maua faamanuiaga e oo mai ma Lona alofa e le muta. O loo tatou faatuatuaga ia pei o se tamaitiiti, po o se tama’i mamoe, lea o loo tatou i ai moni lava i Lana lafu mamoe tele.

O le a le malolo lava o tatou loto seiiloga ua latou malolo i le Atua.

O lenei valaau ia agamalu ma lotomaualalo—o le tasi lea o nai faamalamalamaga na tuuina mai e le Alii e uiga ia te Ia Lava—o Ia na agamalu ma lotomaualalo—o se valaau lea mo i tatou uma o ni Ona soo. Afai e mafai ona tatou ola faapenei, ua Ia fetalai, o le a tatou maua le malologa i o tatou agaga, ma o le a tatou iloa ai e māmā Lana amo, e māmā foi Lana avega.¹⁵ Ua ou vaai faafia i lenei valaau ia agamalu ma lotomaualalo a o ou faitauina tusitusiga paia. Masalo ona ou te manaomia pea lava pea.

Ou te mautinoa e leai se mea e tele naua sona taunuuga faaleagaga ua faia e se tasi e le’i tumu i le faamoemoe ma le lotomaualalo. O lenei ituaiga o mafaufauga o lo ma faamoemoe lea mo outou i lenei po—ina ia outou aoaoina lenei mea a o tou talavou pea. Ma te mananao ia outou iloa ma o ma’ua loto atoa o le Atua o lo outou Tama, na Ia “tauaveina [oe] mai le manava,”¹⁶ e i ai Ana fuafuaga mo oe, o fuafuaga mo se “lumanai ma le faamoemoe.”¹⁷

Sei ou faasoa atu ia te outou ni mau se lua ou te fiafia i ai mai le Feagaiga Tuai o loo faaaogaina lena lava gagana. Fai mai Isaia:

“Faalogo mai ia ia te a’u, outou le aiga o Iakopo, ma outou uma … o le aiga o Isaraelu, o e ua tauavea a’u talu ina fanau mai, i le manava;

“… E oo ina e toeaina, … e oo foi [pe a e ulusina] o au lava ou te tauave ia te oe: o a’u na ou faia, ou te siitia foi; … ou te tauave, ma ou laveaiina oe.”¹⁸

Ma ua tusia foi e Ieremia:

“Aua o a’u nei ua ou iloa manatu na ou [faia] ia te outou, o loo fetalai mai ai Ieova, o manatu i le manuia, ae le mo le malaia, e foaiina atu ia te outou le iuga e i ai le faamoemoe.

“Ona outou valaau ai lea ia te au ma, … tatalo ia te au, ou te faalogo foi ia te outou.”¹⁹

Ou te molimau atu ia te outou, o’u uso e ma tuagane talavou e, o le upumoni lenei e tupu mai i aafiaga patino e faapea, o le a faia e lo tatou Tama Faalelagi Lana vaega i le faataunuuina o nei folafolaga. Ua ia i tatou le faigofie ona talitonu, ia talitonu faigofie, ia atili faapei o se tamaitiiti i lo tatou agamalu ma e aemaise i lo tatou lotofaafetai a o tatou mauaina Ana meaalofa. Pe e te manao i se tausaga sili ona matagofie i lenei tausaga? Pe e te manao i se lumanai e tumu i le faamoemoe? Pe e te talitonu o loo i ai faamanuiaga o loo teuina mo oe? Pe o lava le agalelei o le Atua o e vaaia e te faamoemoe ai ma aapa atu i ai? O le uiga le moni e faapea e faia lenei mea e ala i le tootuli i lalo, punou ma ifo, pe atonu foi lava e faapa’ū faō, i aao o le Atua. Talisapaia lo latou faigofie! O le tootuli, punou ma ifo, faapaū i le “nofoalii o le alofa tunoa.”²⁰

Na ta’ua e Elder Holland e faapea o le a outou mauaina lenei meaalofa taua o le faamoemoe e fesootai i isi meaalofa a le Atua—o le faatuatua ma le alofa mama. Faamolemole aua le faia pei ona ou faia ina o o’u talavou, le soona faia faatetelē ma lavelave o nei amiomama ma oo ai ina matou le fiafia ao taumafai ia malamalama ai. Talisapaia lo latou faigofie.

Ou te ofoina atu ia te outou si tama’i fausaga faigofie lenei e tasi. Faatuatua o le talitonuga lea e i ai se Atua, faamoemoe o le faatuatuaina lea o le a Ia fesoasoani mai ia i tatou, ma le alofa mama o Lona alofa lea ma le mana e galue ai e ala mai ia i tatou e faamanuia ai isi.

Ua ou aoaoina e faatatau i le alofa mama e faapea, e leai lava se tasi o i tatou e i ai le malosiaga, taimi, punaoa, po o le malosi e faia ai mea uma e mananao o tatou loto e fai. E le mafai ona tatou faia uma; e ova atu ai o tatou loto nai lo lo tatou gafatia. E maeu le matagofie o le mana o le Atua e ala mai ia i tatou e mafai ona faalautele ai lo tatou aafiaga tauagafau, e mafai ona faateleina ai a tatou taumafaiga utiuti ma faia mo isi mea e le mafai lava ona tatou faia na o i tatou.

O lea faiga faigofie o nei mataupu tetele faaleaoaoga faavae, ua faamanuiaina ai lo’u olaga. Maimau e pe ana vave ona ou vaaia na mea i lenei ala e lē taufaafefe. Ua mautu lo’u talitonuga sa faamoemoeina e le Atua na upumoni, ia lava le manino e oo lava i se tamaitiiti ia malamalama ai. Sei ou toe faaleo atua? O le faatuatua o le talitonuga o loo i ai se Atua. Faamoemoe o le talitonu lea o le a Ia fesoasoani mai ia i tatou. Ma o le alofa mama o Lona alofa lea o loo galue e ala atu ia i tatou.

A’o ou talanoa atu e uiga i meaalofa mai le Atua, se’i ou toe faaopoopo atu lava se meaalofa e tasi i lo tatou faamoemoe i lenei tausaga fou. O le faasusulu atu o le faatuatua, faamoemoe, ma le alofa mama o le meaalofa e le mafaamatalaina le matagofie—ma e le mafaamatalaina le faigofie—o le Malamalama o Keriso. O lenei malamalama, lea e fesootai vavalalata tele i le faamoemoe, o se meaalofa ua tuuina mai i alii ma tamaitai uma, ma se tamaitiiti ua fanau mai pe o le a fanau mai i le olaga nei. E totoina i o tatou natura. O se vaega o o tatou tagata i totonu.

O se tasi o fuaitau o mau ou te fiafia lava i ai e aofia ai le laina lenei: “Ma o le Agaga na te tuuina mai le malamalama i tagata taitoatasi e sau i le lalolagi; ma o le Agaga e faamalamalamaina tagata taitoatasi i le lalolagi atoa.”²¹

O lena lava malamalama, o se tasi o mafuaaga autu mo le faamoemoe i o tatou olaga. E ese le faamalosiau, o se mea fiafia tele, ma na o le matua’i faamoemoe o loo i ai se mea i totonu o i tatou, lea e le gata ina ta’u maia o loo i ai se ala sa’o e faatoilalo ai le lavelave o le olaga, ae o loo ta’u mai ai foi ia i tatou e faapea o le a tatou maua lena ala sa’o pe afai tatou te “agamalu ma lotomaualalo.”²² E pei ona saunoa Peresitene Nelson i le Ekalesia atoa i le vaiaso ua tuanai, “E manaomia e le lalolagi le malamalama o Iesu Keriso. Ma e manaomia [tele] e le lalolagi lou malamalama matagofie.”²³

A’u uo talavou e matagofie, o la’u tatalo faatauanau i le po nei—o lo’u faamoemoe—ia maua e outou talavou matutua uma i le lalolagi atoa lenei valaauga e fai ma a outou auaunaga patino, ia outou aveina le faamoemoe lea na fetalai mai ai le Faaola ma tauaveina e faapei o se sulu ia i latou o e ua manatu o le lalolagi o se nofoaga pogisa ma faigata tele. Pe i ai se auala e mafai ona ou fautuaina ai outou ia vaai i le tauaveina o lenei malamalama o sa outou auaunaga o aso e gata ai lea? Faamolemole, faamolemole ia malamalama o se mea e sili ona tāua lea ua ou lagona e tatau ona ou ta’u atu ia te outou i le po nei. Ma o lo’u popolega sili o le le lelei tele o lo’u faamatalaina atu mo outou ia talitonu moni ai ia te a’u. E tatau ona outou tauaveina lenei malamalama i se ala e le mafai e le pogisa uma i le lalolagi ona faaumatia.

O lenei auala faigofie ae mamana i mataupu tetele ma faigata o le a suia ai le ala o se lalolagi pa’ū ma pogisa. Faamolemole ia i ai le faatuatua i le Atua, faamoemoe o le a Ia fesoasoani ia te outou, ma maua le alofa mama lea e mafai ai e Ia ona galue ia te outou e ausia ai mea e na o outou e mafai ona faia.

A o outou taliaina lenei luitau ma amataina lenei tausaga fou, a maea ona outou vaavaai i totonu, ou te aioi atu ia te outou ia vaavaai i luga. O fofoga e silasila ifo i o outou mata, o fofoga ia o lo outou Tama oi le Lagi alofa o le e mafai, ma o le a, liligi ifo i o outou luga na mea uma tou te faamoemoe i ai i le amiotonu. E le mafai ona outou maua na faamanuiaga i lo outou tulitulia. Faamolemole soia le soona taufetuli ne’i outou vaivai. Ia filemu; soia. Faafaigofie. Ia agamalu ma lotomaualalo, ma tatalo. Ou te molimau atu ia te outou o le a oo mai vavega pe a tatou faateletelegese, pe a tatou to’a, ma pe a tatou tootutuli i lalo. O mea uma ua i le Tama, e mafai ona avea ma a outou i se aso.²⁴ Se ala moni ina a tumu i le faamoemoe e faafetaia’ia ai lo outou lumanai. Ou te alofa tele ia te outou, ma ou te faamemelo ia te outou, ma o le a ou tatalo e le aunoa mo outou. I le suafa o Iesu Keriso, amene.

Elder Holland: Faafetai, Sister Holland, e le gata i le aoao atu o le talalelei ae mo lou soifua ai ma mo le faatumuina i le faamoemoe o Keriso o loo ia te oe. I o tatou aso aupito faigata—ma i le onosefulu tausaga o le faaipoipoga, e mafai ona i ai ni nai ou aso faigata—na soifua Sister Holland e pei ona sa ia aoao atu. O ia lava o se tagata talitonu e le aunoa. E talitonuina lava e ia e le aunoa le malamalama faavavau i lona loto. Sa soifua lava o ia ma le mautinoa o le a faafofoga mai le Atua i a matou tatalo ma faaali mai ia i matou le ala tusa lava pe na foliga mai e pogisa le po. I se lalolagi e foliga mai i nisi taimi e lofituina i se ulugalii talavou, o mea moni ma folafolaga o le talalelei sa tele ina na o le pau ia o mea sa o matou taofimau i ai, peitai sa lava lena aua o i ma’ua ia i le po nei, ua mauaina le mau faamanuiaga i le toetoe atoa le 60 tausaga o la ma faaipoipoga nai lo le mea sa mafai ona ma moemiti e mafai. O lea e pei ona fai atu lenei tamaitai lalelei ma sa faia, faamolemole ia faamoemoe pea, tatalo e le aunoa, ma ia talitonu.

Ou te faaopoopo atu i le fautuaga i le faamalosiauga faaletusitusiga paia a Sister Holland ina ia sagai atu i le lumanai ma le lotofiafia e mafai ai. Na tusia e se tasi i se tasi taimi faapea, o faamalosiauga uma na tuuina mai e Keriso ia i tatou i tusitusiga paia, o faamoemoe uma na Ia ofoina soo mai ia i tatou, lea tatou te le taliaina pea lava pea o le faamalosiauga ina “ia olioli.”²⁵ Pe mafai ea faamolemole ona tatou talia Keriso i Lana afioga? Pe mafai ona tau ina tatou taumafaia? Tau ina ia tatou taliaina lena valaaulia fiafia e tumu i le faamoemoe i le po nei a o tatou toe pu’eina mai se isi avanoa e amata ai se tausaga fou ma faia ai le olaga i le mea tonu tatou te mananao ia avea ai.

E faapei o Ana valaaulia uma ia i tatou, sa soifua ai Keriso e pei ona sa Ia aoao mai. E ui i avega mamafa sa Ia tauaveina, sa olioli o Ia ma silasila i le itu lelei, ma sa fesoasoani o Ia i isi e faia foi faapea, e aofia ai, e mafai ona ou faaopoopo i ai, perofeta a le Atua. Mai o’oo’oga o le Falepuipui o Liperate ma o’oo’oga o le lotovaivai na ia o’o i ai iina, na laualuga le fautua atu o le Perofeta o Iosefa Samita i le au paia, o e sa tatalo ia tatala mai o ia, “ia tatou faia ma le “fiafia ia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai.”²⁶ Ma e leai se isi e sili ona silasila i le itu lelei, sili ona i ai le faamoemoe, sili ona faatumulia i le faamoemoe nai lo Russell Marion Nelson, lo tatou perofeta soifua o le na toe faaleoina le fautuaga a Iosefa ina ua ia saunoa mai ia i tatou talu ai nei: “O le a lē taofia lava se faamanuiaga faaleagaga mai ē amiotonu. … E finagalo le Alii tatou te vaavaai atu … i le lumanai ‘ma le naunautaiga fiafia’ [Aoaoga a Peresitene o le Ekalesia: Iosefa Samita (2007), 513].”²⁷ E fiafia perofeta aua o i latou o soo moni o Iesu Keriso, ma o le faapogai autu lea o le faamoemoega uma. E olioli perofeta aua ua latou silafia le fuafuaga; ua latou silafia lē e manumalo i le iuga.

E pei ona matagofie le ta’ua ai e Sister Holland, o le mafai ona vaai atu i le itu lelei o le lalolagi o se isi lea meaalofa mai le Atua. Ua i ai— “alii” ma e mafai ona ou faaopoopo i ai ma tamaitai ma tamaiti—“ina ia latou maua le olioli,”²⁸ o le tala mai lea a tusitusiga paia ia i tatou. O le mafuaaga lea ua avea ai o se “fuafuaga o le fiafia.”²⁹ O se taunuuga o lena fuafuaga ma le Togiola a Keriso o i le fatu, e mafai ai ona tatou maua le faamoemoe tusa lava po o le a le pogisa e ono i ai nisi o aso.

O le maoae o le faataitaiga a le Faaola i lenei mataupu, ua tatau ai lo tatou migao a o tatou sagai atu i se tausaga fou, o se tausaga atonu o i ai ni nai luitau mo i tatou. Mafaufau i ai. E mafai faapefea ona talanoa Iesu ia olioli i le lotolotoi o mafatiaga uma sa Ia feagai ai a o agai atu i le Faasatauroga? E oo lava foi i le “siomaga matautia sa laualuga i le Tausamaaga Mulimuli, i le totonugalemu o le Vaiaso o le Paseka, ae o loo faamanatu atu pea e Keriso i Ona soo le mafuaaga ma lo latou tiute “ia olioli.”³⁰ Sa ou taumanatunatu, i le i ai o tiga sa i Ona luma, pe na mafai faapefea ona Ia talanoa atu ma le matuai silasila i le itu lelei ma faamoemoe i Ona soo ia vaavaai atu i nei mea uma ma le olioli. O le mea moni, o lenei faaaliga o Lona faatuatua, o Lona faamoemoe ma le alofa moni, e sau ona ua Ia silafia le faaiuga o le tala. Na te silafia e manumalo le amiotonu pe a mae’a tusi faai’u. Na te silafia o le malamalama e faatoilaloina e le aunoa le pouliuli e faavavau ma faavavau ma faavavau lava. Na te silafia e le tuuina mai lava e Lona Tama o i le Lagi se poloaiga e aunoa ma le saunia o le ala e faataunuuina ai.³¹ O se manumalo e fiafia ai tagata uma, ma o Keriso o le siamupini i le fetauiga tele ma le oti ma seoli. Ia, o se mataupu silisili mamafa lena i le po nei, ae o le mea lena e tatau ai ona latou olioli. O le manumalo o Keriso o le faapogai lena o lo tatou faamoemoe i lenei tausaga fou--e faavavau.

E tusa ai ma faalavefau o le olaga ma faaosoosoga a Lusifelo, o le tumau i le faamoemoe ma le olioli a taeao po o le isi masina po o le isi tausaga e ono faigata. Ae ui o lea, o le mea tonu lena na ala ai ona talosagaina e Sister Holland le faafaigofie ma se taula’iga mausali i mea faavae o le olaga o se Au Paia o Aso e Gata Ai. O nisi taimi tatou te taula’i ai i na faalavefau i lo tatou lava faitalia, a o nisi taimi e fai e le olaga mo i tatou, ae po o le a lava, afai na tatou fausia a tatou molimau i luga o uluai faavae o le talalelei, e mafai ona tele mea tatou te maua mai o tatou aafiaga faigata e pei ona mauaina i le taimi nei e sa’u uo mamae. O ia, o lana ava, ma lona afafine—ma ou te talitonu o loo faalogologo mai i latou i le po nei—o loo feagai ma ni luitau eseese o le soifua maloloina i le taimi lava lenei—o lu’itau matuia tele, ou te fia faaopoopo atu ai. Ua ia i latou mafuaaga uma latou te sisi’i ai o latou lima ma tomanatu pe o le a se lelei ua faia e lo latou faamoemoe po o le faatuatua po o le alofa mama mo i latou. Ae ona o le avea ai ma so’o naunautai i taimi o le olioli po o le faanoanoa, ua latou manumalo ai.

I se imeli talu ai nei (lea ou te faasoa atu i lana faatagaga), na tusia ai e la’u uo:

“I nai masina talu ai, na matua’i laitiitī ai lo’u lalolagi: [le tetelē o [moega] o le falema’i ma potu o ma’i. Na faamaonia le faigata o le toe malosi o lo’u toalua ina ua mavae le suiga o ona fatuga’o, ma sa ia faaaluina le masina ua te’a … i le alu ma sau alu ma sau i le falemai. O le taunuuga na ou ‘motusia’ ese mai ai a’u mai le tele o le lalolagi [na siomia ai au].” Mafaufau i le upu faafaigofie.

Na ia faaauau: “Ou te le’i fiafia lava i le manatu faapea e tuuina mai e le Alii ia i tatou ia tofotofoga, ae ou te talitonu e mafai e Ia ona faaaoga na mea mo Ona faamoemoega. O le mea e tasi na foliga taua ia te ia i nai vaiaso ua mavae atu o le … taua ma le moni o le fatu o le talalelei [pe a faatusa i le tele naua o mea e mafai ona le manaomia]. O le aafiaga o le alofa mo isi; le aafiaga o le alofagia ma auauna mai i ai isi; o le i ai filemu o le siufofoga o le Atua a’o e saofai ma le lelavā [i autafa] o le [moega] o se tamaitiiti ma’i po o [totonu o se] potu o se toalua ua matua ma’i tigaina lava i le leva o le po [ma faalogo atu i le fasifuaitau faalelagi], ‘Ia i ai le filemu i lou loto, lo’u atalii e.’

“Ua ou faitauina le Tusi a Mamona ma Evagelia ma [sa ou] lagonaina le alofa o le Atua. I talaatu o fesoasoani a le Ekalesia ma mataupu silisili [faalemanatu faavae, [o mea] ia e mafai ona fesoasoani ia i tatou e fetolofi agai atu ai i le malamalama … o mea moni ia o le faatuatua, … molimau, [faamoemoe, ma le alofa].”

Na ia faaiu, “Na le toe mafai ona ou auai i sauniga faamanatuga mo le tele o vaiaso, ae ua ou vaaia le toatele naua o tagata lelei ua faamaoni ia latou … feagaiga o auauna mai i lo’u aiga. … “Ua matuai faamanuiaina lava a’u, ma ou te alofa i le Alii, [Ou te alofa] i le talalelei, [Ou te alofa] i le Toefuataiga, ma le Ekalesia.”³²

O lena molimau maoae o le faamoemoe ma le faapalepale na faaalia i le totonugalemu o se taimi sili ona faigata, o se faamomoiloto ia te a’u. Ma e manaomia ona tatou iloa i se taimi, o tatou faamoemoega ma o tatou talitonuga maumaututu o le a le masalomia le tofotofoina foi ma faaatoatoa i se ipuōmea o mafatiaga patino. A’u uo talavou aulelei e, o le faatuatua e le tofotofoina e le o se faatuatua ‘anoa. Ua tatou fai mai ua fausia i tatou i luga o le papa o Keriso. Ia, ua tatau ona tatou faia, aua o le olaga e i ai ona matagi ma afā, ma se faavae oneone o le a le taofia ai matagi pe a agi mai ma to mai foi timuga ma oo mai ai lologa.³³

Toe tasi se manatu a o tatou agai atu i le faaiuga o lenei faasalalauga i le lalolagi atoa i se tausaga fou matagofie, e aofia ai ma se tausaga fou o le inisitituti. Atonu o i ai nisi o outou iina o popole e uiga i mea e sili atu ona matuia, nai lo le kosi e tatau ona ave i le a’oga, po o le a foi le matata faapolofesa e tatau ona e tulimata’ia. Atonu o i ai nisi o outou o tauivi ma le avega o le ta’usalaina—ma e leai se mea e sili ona faatauma’oia ma faamaui ai lo tatou faamoemoe ma aumaia ai se faaesea tele mai le Atua nai lo le mea e aumaia e le solitulafono. Sa ma filifilia ma le faaeteete ma Sister Holland e aua ne’i o ma filifili e fai lenei lauga e uiga i le agasala po o le solitulafono, ae o le a ma le faatalale ai i le le pa’i atu i le mea sa fetalai mai ai le Alii o la ma’ua matafaioi e aoao atu.

O loo i ai pea lava se tulaga manaomia masani mo le mataupu faavae o le faatumulia-i-le-faamoemoe ma le faiga o le salamo. Pe a tatou solitulafono, tatou te iloa lelei lava le mafuaaga e ma’alo ai aloiafi o lo tatou faamoemoe ma le mafuaaga e mou atu ai i nisi taimi. I lena tulaga, e tatau ai ona tatou suia, pe o le a i’uvale lo tatou lumanai fiafia. E pe tumau ai lena lamepa. O le ala lea e tatau ai ia i tatou uma ona salamo. O i tatou uma lava! O aso uma, na saunoa ai Peresitene Nelson.³⁴

O lea ou te talosaga atu ai ia te outou ia taulima nei loa soo se avega o le solitulafono, amata atu i le taimi lava lenei, o le agasala o le fili aupito sili lea o le faamoemoe ua ou iloa i le lalolagi uma. Alu i luma o le Alii e ta’uta’u atu, ma alu i luma o le epikopo pe afai e manaomia ai e lau agasala. Ae ia suia po o le a lava se mea o sese, pe tele pe itiiti. O le salamo o le ala lea tatou te maua ai se amataga fou; o le auala lea tatou te maua ai se lumanai siitia. Ua lava le faigata o le olaga e aunoa ma le amoina o se taga o mea sese i lou papatua—i le aso atoa, aso uma, le po atoa, po uma. Sasaa lena amoga. Ia suia le atuatuvale i le filemu. Ia suia le faanoanoa i le fiafia. Na ofoina mai e Keriso Lona lava soifua ina ia mafai ai ona e saoloto e fai lena mea.

Ona mafai ai lea ona e faia e pei ona poloai mai Nifae ia i tatou uma e fai. I lana savali onomea faaāo a o le’i pine lona maliu, fai mai lenei atalii o lē sa tele taua ma feitaga’i na ia vaaia, i le mea na ma mananao ai ma Sister Holland ma taumafai ai e fai atu i lenei po.

“Fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma.”³⁵

“O se susulu atoatoa o le faamoemoe,” e afua mai i le alofa o le Atua ma tagata uma—o le mea lena ma te mananao ai mo outou i le tausaga fou. E o faatasi ma lena faamoemoe susulu, o le musumusuga e le mafaafitia faapea e alofa le Atua ia te outou, o Keriso o lo outou Puluvaga, ma e moni le talalelei. O lona susulu o le a faamanatu atu ai ia te oe e faapea, o le talalelei e i ai pea lava pea—aso uma, itula uma—se avanoa fou, se ola fou, ma se tausaga fou. Oka se vavega! Oka se meaalofa! Ona o le meaalofa a Keriso, o mea aupito silisili i le olaga, o a tatou ia pe afai tatou te tausisia ma tumau i le talitonu ma taumafai pea ma faamoemoe pea.

Tou te manatua na tulaga i le lalolagi atoa na ou talanoa atu ai ina ua tatou amata? Ia, sagai atu i ai ma faafetaia’i ou lava luitau ma le iloa o le i ai o le faatuatua, o le a sologa lelei ai mea i le iuga. Ia teena le taliaina o le lalolagi i le tulaga o foliga mai ai. Faasusulu atu i ai le malamalama o lou faamoemoe, ma ia fai le lalolagi i le mea e tatau ona i ai. Ia avea ma lena malamalama na talosaga atu ai Sister Holland ia avea ai oe, ia aua lava ne’i faaumatia, le malamalama o le Faaola o le Lalolagi.

Ou te tuua se faamanuiaga faaaposetolo i o outou luga taitoatasi i le po nei e faatatau i mea ua ou iloa ma le mautinoa ma mea o le a outou moomia e le aunoa. Ou te faia ona o lo’u alofa ia te outou, le alofa o le Alii mo outou, le alofa o le Au Peresitene Sili ma le Korama a le Toasefululua mo outou. O le alofa o tagata uma! Ma o outou auai iinei i le po nei. Ou te faamanuia ia te outou, ia iloagofie ma aoga le mana o i ai i mataupu faavae o le faaolataga, e pei o le faatuatua ma le faamoemoe, ma le alofa mama, ia i ai pea e le aunoa i lou olaga. Ou te faamanuia ia te oe ia iloa, e pei ona ou mautinoa, o le talalelei a Iesu Keriso e patino lona taua, e tumu i le faamoemoe e faavavau, e faavavau lona moni. Ou te molimau atu ma le pule faaaposetolo, e moni lena mea, ma o lena foi mea ua na o le pau lea o le tali e le maalofia i luitau e tele o le olaga, o lau tali ma o la’u foi tali, ma na pau lea o le ala e faaeaina ai i le mamalu o le faavavau.

Ou te faamanuia atu i soo se tasi o outou atonu o ta’ua nei aso o se “lu’itau o le faatuatua.” O le faatuatua moni, faatuatua e suia ai le olaga, faatuatua faaAperaamo, e lu’itauina pea lava. O le ala lena e te iloa ai pe o se faatuatua moni. Ou te folafola atu o le tele o le faatuatua o le a faaitiitia ai lu’itau, seia iu ina fetalai mai le Atua, “Le auauna lelei e, ma le faamaoni.”³⁶

Ou te faamanuia atu outou uma ia iloa O Le Ekalesia a Iesu Keriso o le Au Paia o Aso e Gata Ai o le mea tonu lava lena: o le Ekalesia a Iesu Keriso. Ma ua na o sauniga ma avanoa na te aumaia e mafai ona aumaia atoatoa se tasi “i le fua o le tumu o Keriso.”³⁷ Ou te faamanuia taitoatasi atu ia te outou, le tagata i lona igoa, i meaalofa uma e te manaomia mo lenei taumafaiga, ma ou te faamanuia oe, aioi atu ia te oe, ia faapalepale ma le onosai a o sue e lou Tama i le Lagi, i Lona poto, le ala aupito sili e avatu ai ia te oe e le aunoa mea e te ole atu ai ae e le maalofia lava le tuuina atu ia te oe o mea e te manaomia. O le alofa paia o le Atua, o le puluvagaina e faavavau a le Faaola mo i tatou, ma le faamafanafanaga faifai pea a le Agaga Paia, o le mana o le perisitua paia, ma aga masani faaperofeta ua faaalia e Peresitene Russell M. Nelson, o le paia o le Tusi a Mamona, ma le “susulu atoatoa o le faamoemoe” e aumaia e lenei talalelei, ou te tuu atu ai le molimau mamalu ma le paia ma le patino i lo’u olaga. Ou te faia ai i le suafa o Ia o le faapogai o lo’u faamoemoe uma, le suafa o le Alii o Iesu Keriso, amene.