Barogan ang Kamatuoran
Tibuok Kalibotan nga Debosyonal alang sa mga Young Adult
Dominggo, Mayo 21, 2023
Presidente Dallin H. Oaks: Salamat nianang matahom nga musika. Ug salamat, Komisyoner Gilbert, nianang matahom nga pasiuna.
Minahal nga mga young adult, lakip sa mga estudyanteng mogradwar na sa high school, si Sister Oaks ug ako malipay nga mopahayag sa among gugma kaninyo ug mamulong niining importante nga debosyonal. Makaluya kining mga panahona kanatong tanan, apan ang ebanghelyo ni Jesukristo naghatag kanato og igong rason nga magmaya. Pinaagi sa Iyang propeta, gihatagan kita sa Dios og hagit nga molahotay sa mga kalisdanan, ug ang mga pagtulon-an ni Jesukristo naglatid sa dalan padulong sa atong balaang destinasyon nga kinabuhing dayon.
I.
Sa pagpamulong ngadto sa mga nanambong nga sama kaninyo, si Presidente Russel M. Nelson mihatag niining importanteng tambag: “Samtang nagkasekyular ang kalibotan ug nagkaminos ang kaespirituhanon, kinahanglan nga magkadako ang inyong esprituhanong paglambo ug minosan ang pagkasekyular. Paningkamoti ang pagdepensa sa baroganan imbis sa popularidad.”
Dayon gihatag niya kini nga hagit, nga gisagop namo isip ngalan niining atong debosyonal: “Hibaloi ang kamatuoran ug barogi kini, bisan kon sa politika dili popular ang kamatuoran.”1
Ang atong tumong sa mortal nga kinabuhi ug ang dalan nga atong subayon nga ipatigbabaw anaa sa plano sa kaluwasan ug, bag-o lang gyod sa “Ang Pamilya: Usa ka Pamahayag sa Kalibotan.” Hunahunaa ang panglantaw nga ania niining bililhong minubo nga pagkasulti ni Presidente Nelson:
“Ang kinabuhi dili usa ka hugna nga drama. Sa tinuod adunay premortal nga panahon. Ug sa tinuod adunay kinabuhi human sa kamatayon. Ang premortal ug mga mortal nga porsiyon mga pasiuna sa atong sunod nga kinabuhi. Ang kahibalo bahin sa tulo ka ang-ang sa himaya, sigon sa gipadayag sa mga propeta, nagpakita og daklit nga panglantaw sa atong sunod nga kinabuhi. Ang kinabuhing dayon mahimayaon ug haom gayod sa atong paningkamot.”2
Isip mga Santos sa Ulahing mga Adlaw, gipanalanginan kita og modernong pagpadayag nga naghatag kanato og mas dakong panabot sa tuyo niining mortal nga kinabuhi. Sama sa gisulti ni Presidente Nelson, dili nato kini tan-awon isip usa ka hugna nga drama. Para nato, dunay labing minos tulo ka hugna sa mahangturon natong panaw. Ang hugna-1 mao ang atong premortal nga kinabuhi. Ang karon nga pagka-mortal maoy misunod, sama sa ika-2 nga hugna. Ang atong kinabuhi human mamatay maoy ika-3 nga hugna. Ang kataposang hugna maglakip sa literal nga Pagkabanhaw sa tanang nagpuyo dinhi ug ang Kataposang Paghukom motino kon asa nga gingharian sa himaya kita mosarang sigon sa atong mga binuhatan, mga desisyon, ug mga tinguha.
Ang gipahiuli nga ebanghelyo ni Jesukristo naghatag og talagsaon nga agianan paingon sa kamatuoran mahitungod sa plano sa mahigugmaong Langitnong Amahan sa kaluwasan alang sa Iyang mga anak.
Ang tuyo sa atong kinabuhi dinhi, ang ika-2 nga hugna, mao ang paglambo ngadto sa atong tumong nga kinabuhing dayon. Mahimo nato kini pinaagi sa pagbuntog sa unsay gihulagway sa Basahon ni Mormon nga katugbang sa tanan nga butang, lakip sa daghan nga tentasyon aron masupak ang mga sugo sa Dios. Ang pagsagubang ug pagbuntog sa tentasyon, ug pagpaduol sa Dios pinaagi sa hustong mga pagpili ug paghinulsol gikan sa mga sayop, makatabang nga makab-ot nato ang mahangturong paglambo nga maoy katuyoan sa mortal nga kinabuhi sa mga anak sa Dios.
Kita nga adunay gasa sa Espiritu Santo ug dan-ag sa modernong pagpadayag gipanalanginan og daghan nga panglantaw. Sama pananglit, ang Basahon ni Mormon nagsaad nga kadtong magkugi sa pagpangita “makakaplag; ug ang mga misteryo sa Dios ipadayag kanila, pinaagi sa gahom sa Espiritu Santo.”3 Manghinaot ko nga tanan nakong minahal—lakip ang tanan nga anak sa Dios kutob sa maabot sa akong tingog—mosanong sa imbitasyon sa pagkaplag ug pagkahibalo sa kamatuoran.
II.
Ang unang kamatuoran naghisgot sa kaminyoon. Ang pagminyo mahinungdanon sa katuyoan sa kinabuhing mortal ug kon unsay nagsunod. Mga anak kita sa mapinanggaong Langitnong Amahan nga naglalang kanato uban sa kapasidad nga makasunod sa Iyang sugo sa pagsanay ug pagpuno sa yuta. Kana nga gahom sa paglalang usa sa labing bililhong mga gasa kanato dinhi sa mortal nga kinabuhi. Apan ang mahinungdanon niana nga gasa mao ang balaod sa kaputli, ang sugo nga ang atong mga gahom sa paglalang ikapahayag lamang sulod sa kaminyoon tali sa lalaki ug sa babaye. Kana nga sugo mahinungdanon sa ebanghelyo ni Jesukristo. Kana nga reyalidad nagpasabot nganong lahi kita og mga hiyas ug mopugong sa mga kinaiya nga daw komon sa daghan diha sa atong palibot.
Ang atong kinaiya sa unsay ipasabot sa kaminyoon ug unsa gayod ang kaminyoon maoy mga ehemplo niana. Ang mga lider sa Simbahan ni Jesukristo nabalaka kaayo sa bag-ong kausaban sa matang ug kaimportante sa kaminyoon dinhi sa Estados Unidos. Naglakip kini sa kalagmitang pagdaghan sa taga Estados Unidos, lakip sa pipila ka takos nga batan-ong Santos sa Ulahing mga adlaw nga mga lalaki ug mga babaye, nga ilangay ang pagminyo. Sa paghulagway niana nga kalagmitan, tan-awon nato ang duha ka tsart sa kaminyoon. Samtang para sa Estados Unidos kini nga mga numero, nagrepresentar kini sa tibuok kalibotan nga problema.
Kining una nga tsart nagpakita sa dakong pagkunhod sa porsyento sa mga lumulupyo sa Estados Unidos nga nagminyo. Sa milabayng 30 ka tuig, mius-os kini og nuwebe ngadto sa otso porsyento para sa mga lalaki ug mga babaye. Ang pagminyo tataw kaayong nagkaubos sa Estados Unidos.
Kining ikaduhang tsart nagpakita sa susamang pagtaas sa edad nga pagminyo sa batan-ong mga Santos sa Ulahing mga Adlaw. Naghulagway kini sa kasagarang edad sa Santos sa Ulahing Adlaw nga mga lalaki ug mga babaye sa panahon sa ilang unang kaminyoon. Kini nagpakita nga midugang og hapit lima ka tuig para sa mga lalaki ug mga babaye nga nagbayente kapin ang pangidaron.4
Hunahunaa kon unsay mawala sa young adult nga mga Santos sa Ulahing Adlaw kon ituyo nila nga ilangay ang ilang pagminyo sa igong gidugayon: mawala ug malangay ang mga panalangin. Nagpasabot kini sa pagkalangay sa importanting personal nga mga kalamboan nga manghitabo sa relasyon tali sa bana ug asawa, sa paglambo sama sa ingon niana nga mga kalidad sa pagsakripisyo ug pagpaubos. Nagpasabot kini nga mius-os ang mga oportunidad nga magkatinabangay sa pagtukod sa gingharian sa Dios. Labing importante, nagpasabot kini nga mas modiyotay ang mga anak nga matawo nga adunay mga panalangin sa ebanghelyo. Nasayod kamo niini, ug kinahanglan ninyong masayran nga ang inyong mga lider nasayod nga daghan sa atong mga single dili dayon magminyo tungod sa mga rason nga dili nila makontrolar. Dugangan pa nako na unya.
Kristen, palihog dugangi kini sa imong mga hunahuna.
Sister Kristen M. Oaks: OK. Sa tinuod, ang kaminyoon usa ka gasa. Dili lang kay ang kaminyoon maghatag kanato sa higayon para makaanak, apan maghatag kini kanato og higayon ug kadasig sa pagsugod sa panaw sa usag usa nga paglambo. Makakat-on kita sa pagsakripisyo ug pagserbisyo sa ubang paagi.
Sa wala pa ko maminyo, mangita ko kanunay og mga oportunidad nga makaserbisyo. Karon, matag gabii sa panihapon, ang akong service project naa ra gayod naglingkod sa akong atubangan. Nakakat-on ko unsaon nga mas mahigugma ug mas matabangan nako ang akong bana; sa pagkaadunay higala nga ikauban sa pagkatawa ug paghilak. Duna koy tiglaban ug tigtudlo ug tigdasig kinsa motabang usab kanako. Ang kaminyoon usa ka naa na daan nga oportunidad nga pagkat-on sa pagpakigsulti ug panglantaw. Gusto ko nga mahibalo kamo nga ang kinabuhi mas momaayo kon makonektar ang atong kaminyoon sa mas labaw kay kanato ug mas duol sa atong Manluluwas. Ug gusto gayod kami niana alang kaninyong tanan.
Sa dula sa teatro nga Les Misérables dunay linya nga, “Ang paghigugma og laing tawo mao ang pagkakita sa nawong sa Dios.”5 Walay maayong dapit nga mahitabo kana gawas sa kaminyoon.
Presidente Oaks: Sa sekyular nga pagkasulti, ang paglangay nga makaanak—gani ang dakong pagkunhod sa bili niini—makita sa dagan sa bag-o lang gireport sa gitahod nga nasyonal nga pagsuhid nga nagpakita nga ang importansya sa pagpanganak alang sa mga hingkod miubos sulod sa milabayng 25 ka tuig gikan sa 66 porsyento ngadto sa 33 porsyento.6
Si Kristen ug ako naghunahuna sa kaimportante sa gipahiuli nga Simbahan niining nasyonal nga pagkunhod sa bili sa kaimportante sa mga anak dihang ang igsoon ni Kristen mipakigbahin sa komentaryo sa iyang batan-ong apo. Dihang gibasa nila ang Higala ug gitan-aw ang litrato ni Jesus, gihunahuna niya ang Manluluwas nga mikamay sa mga bata sa pagduol Kaniya. Si Anders, kwatro anyos, mitubag niining dinasig nga pagpasabot: “Nasabtan ba nimo ni? Gipangga ni Jesus ang mga bata.”
Hinumdomi lamang, nga ang mapinanggaong Langitnong Amahan dunay plano alang sa Iyang mga young adult, ug kabahin niana nga plano mao ang pagminyo ug ang mga anak.
Karon, lingawlingaw lang, gusto kaming mopakigbahin sa among natudlo bahin sa pag-date ug sa laag-laag. Niay bidyo sa akong gisulti niadtong 2005, dihang ang kinamagulangan nga mga young adult nga ania kauban nato karon kaniadto 12 anyos pa, ug kamong nahabilin mga gagmay pa o wala pa matawo.
Sa daghang katuigan, nagtambag ang Simbahan sa atong kabatan-onan nga dili makig-date kon dili pa mag-16. Tingali ang ubang young adult, labi na mga lalaki, gipasobrahan pagtuman kining maalamong tambag ug gisiguro nga dili makig-date sa dili pa mag-26 o tingali mag-36. Karon dapiton ko kamo nga ubanan ko ninyo ug tan-awon kining tuig 2005 nga bidyo.
Presidente Oaks [bidyo]: “Mga lalaki, kon nahuman na mo sa misyon ug gisunod gihapon ninyo ang pangbinata nga sundanan nga gitambag kaninyo sa nag-edad pa kamo og 15, oras na karon sa pagtubo. Tigoma ang inyong kaisog ug pangita og inyong ikapares. Sugdi sa pakig-date og lainlaing batan-on nga babaye, ug kon makakita na kamo og maayo nga prospect, sugdi ang pagpangulitawo. Oras na para magminyo. Mao kana ang tuyo sa Ginoo sa Iyang mga anak nga young adult nga mga lalaki ug mga babaye. Dunay inisyatibo ang mga lalaki, ug angay ninyo kining gamiton. Kon wala pa mo kahibalo unsay date, basin makatabang kini nga depinisyon. Nadungog nako kini gikan sa 18-anyos nakong apo. Ang ‘pakig-date’ angay moagi sa tulo ka g: (1) gi-planohan, (2) gi-gastohan, ug (3) gi-pares-pares. …
“Mga dili minyo ko nga mga higala, motambag kami nga itumong ninyo ang pakig-uban sa lahi nga sekso ngadto sa pakig-date nga may kalagmitang mosangpot sa kaminyoon, dili sa walay kasiguroang sangpotanan nga adunay posibilidad lamang nga mahimong pang-team nga sports sama sa touch football. Ang pagkaminyo dili grupo nga kalihokan—gawas lang kon may mga anak na nga igo ang gidaghanon.”7
[end video]
Mga sister, ingon og nalingaw mo sa mga gisaysay para sa mga lalaking dili minyo. Karon si Kristen dunay pipila ka pulong sa mga babaye nga dili minyo.
Sister Oaks: Presidente Oaks, kana nga bidyo bahin sa pag-date karaan na, apan parehas gihapon ang baroganan—nga ang pakig-date mag-una sa kaminyoon.
Kay nagminyo ko sa edad nga 53, kasabot ko unsay bation sa paghulat og takos nga kapares, ug sa paghandom ug sa kasakit inubanan sa mga luha nga miumog sa akong unlan. Apan makapamatuod ko sa gugma sa Ginoo sa maisogong mga sister nga nanaghulat, kay ako mibati niini. Ug mibati usab ako sa matinud-anong mga brother nga nagtinguha usab niini. Ang panlimbasog tinuod. Ang pakig-date ug gani ang dili pag-date makaluya.
Kon ang akong hugot nga pagtuo ingon og gisulayan—dihang naglibog ko nganong ang kinabuhi ingon og lisod kaayo nga gihimo man unta nako ang tanan sa pagsunod sa ebanghelyo—usahay mobati ko nga basin duna koy gipangbuhat nga sayop. Wala man unta koy gihimong bisan unsa nga sayop.
Sigon sa giingon ni Sister Michelle D. Craig, “Ang mga pagsulay wala magpasabot nga ang plano nagkapakyas.” Ang plano naglakip sa paglambo ug gituyo aron matabangan kita sa pagpangita sa Dios. Midugang si Sister Craig, “Ang Langitnong Amahan mas interesado sa [imong] paglambo isip disipulo ni Jesukristo kay sa [imong] kaharuhay.”8
Kon nakita ninyo ang inyong kaugalingon nga nagmarka og panahon sa paghulat og tawo nga kaminyoan, hunonga ang paghulat ug sugdi ang pag-andam. Andama ang inyong kaugalingon alang sa kinabuhi—sa edukasyon, kasinatian, ug pagplano. Ayaw paghulat sa kalipay nga ihukyad diha kaninyo. Pangita og mga oportunidad para makaserbisyo ug makakat-on. Ug labaw sa tanan, salig sa Ginoo, “magtawag sa ngalan sa Ginoo matag adlaw, ug magbarog nga makanunayon sa hugot nga pagtuo niana nga moabot.”9 Ug mosaad ko nga kon buhaton ninyo kini, ang kalipay moabot kaninyo.
Presidente Oaks: Si Kristen mihatag kaninyong mga sister og bililhon nga tambag. Ang iyang tambag dili kinaraan. Sa tinuod, ang akong tambag sa mga lalaking dili minyo dili pod kinaraan. Ang mga lider sa Simbahan ni Jesukristo mahunahunaon lang gayod mahitungod sa pagminyo sama nga kami 20 ka tuig na ang milabay. Ang among kabalaka naglakip sa mga hinungdan, sama sa kakulang sa mga balay nga kaya ra nga paliton sa bag-ong minyo ug sa nagtubo nga utang sa estudyante.
Sama sa nahibaloan na kaayo ninyo mga young adult, dili kamo ang hinungdan niana nga mga kahimtang apan mga biktima niini. Unsay buhaton? Padayon uban sa hugot nga pagtuo, ug buhata ang tanan ninyong mahimo sa pag-angkon og balay, sa mga kahimtang nga wala kaayo nako ug sa inyong mga apohan masinati sa una namong katuigan. Ug, labi pa, motrabaho aron gamay ra ang mautang sa pag-eskwela.
Sa plano sa Dios makaangkon kita niining tanan, apan dili sa han-ay nga gusto sa kalibotan. Gusto kami nga motabang pinaagi sa pagpahinumdom sa plano sa Dios ug sa takos nga mga ehemplo sa mga nag-una kanato. Ang atong nag-unang mga pioneer mibiya sa ilang mga balay ug kabtangan aron dalhon ang ilang mga pamilya sa espirituhanong kasiguroan ngadto sa Bukid sa Kasadpan. Karon, moawhag kami sa dili pagbiya sa espirituhanong kasiguroan ug pamilya aron sa pag-angkon og materyal nga mga butang.
III.
Karon akong hisgotan ang pipila ka butang nga gikabalak-an usab sa mga pinalangga nga estudyante sa high school nga nitambong karon.
Sa tibuok nasod, daghan kaayo sa inyong mga higala ang nakasinati sa kahingawa, mga pagtental sa druga, pagkaadik sa social media, ug pagpangita og tambag. Apektado kamo niining mga impluwensya apan kaninyo mas daghan ang maayong balita kaysa niana.
Sayod kamo nga kamo mga anak sa Dios, usa ka lahi nga balaang panulondon. Gihigugma kamo sa Dios. Siya gamhanan nga tiggiya, ug misaad Siya nga motabang kon kamo mangita Kaniya sigon sa Iyang gitudlo. Isilsil sa inyong hunahuna ug sa inyong personal nga mga prayoridad ang puno sa gahom nga kamatuoran nga kamo hinigugmang anak sa Dios. Ang Iyang gugma naghatag kaninyo sa kaugalingong pagtahod, kusog ug kadasig nga mobatok sa bisan unsang suliran nga inyong atubangon sa inyong kinabuhi. Ug ayaw gayod kalimot nga ang Iyang mga sulugoon nahigugma kaninyo. Kami nahigugma kaninyo.
Nakadawat ko bag-o lang og bililhong sulat gikan sa 16-anyos nga babaye nga nagpuyo sa estado diin diyotay ra ang miyembro. Tawagon nako siya og Amy. Ang iyang sulat importante kay gipahayag niya ang iyang mga pagbati nga komon sa mga batan-on sa tibuok Simbahan. Ang taas nga sulat ni Amy naglakip niini. Mihangyo ko og usa nga inyong kauban nga mobasa sa iyang mga pulong.
Amy: “Akong nabantayan nga usahay makadawat ko og lahilahi ug makalibog nga mga mensahe gikan sa Simbahan. Sa matag adlaw nakong pagpakabuhi, makakita ko og mga miyembro sa Ang Simbahan ni Jesukristo sa mga Santos sa Ulahing mga Adlaw sa social media nga ang gihimo ingon og dili sila sakop niini nga ebanghelyo. … Mibati ko nga ako ra ang batan-ong babaye sa akong ward ang nakakita og sayop sa kalibotan. … Wala gyod ko makasabot nganong daghan kaayong batan-on sa simbahan wala makakita sa problema sa mga tawong nagpausab sa ilang sekso sa matag karon og unya, nakig-date sa sama og sekso o sa dili mahibaloan nga sekso. …
“Sa mga kalihokan sa kabatan-onan sa ward o stake, pangutan-on ko nila unsa ako, o sa eskwelahan hangyoon ako nga makigsayaw sa babaye nga nagtuo nga siya lalaki. Nasayod ko nga angay kitang mohigugma sa tanan ug respetohan sila, nga maoy kanunay nakong gihimo. Mibati [lang] ko nga duna koy nalapas. … Hinaot nga makadungog pa kita og mga pakigpulong gikan sa mga lider mahitungod niini nga problema.”10
Presidente Oaks: Sulat kini gikan sa desperado nga batan-ong babaye nga ang edad halos parehas sa senior high school nga nia dinhi karon. Nganong ang iyang sulat nakapahinuklog kaayo kanako? Gusto siyang mohimo sa husto, apan gibati niyang gilibotan sa mga hiyas ug batasan nga gibati niyang sayop, ug wala siya kahibalo unsay buhaton bahin niini. Gusto niyang barogan ang kamatuoran apan wala masayod unsaon sa paghimo niini uban sa gugma. Sa debosyonal sa mga young adult sa Ensign College, si Elder Clark G. Gilbert ug ako mihulagway niining hagit sa pagbarog nga lig-on uban sa gugma samtang nagsangyaw sa kamatuoran. Makahigugma gihapon kita sa uban ug makapangita og kaparehas nga butang nga walay pagkompromiso sa mga kamatuoran nga atong nahibaloan.11
Sa sulat ni Amy gisulat niya ang mahitungod sa mga higala sa Simbahan nga naglibog mahitungod sa ilang sekso, usa ka kondisyon nga gitawag og dili maila nga sekso [gender dysphoria]. Kini nga kalibog pweding mosangpot sa lainlaing matang sa lainlaing panahon sa kinabuhi sa tawo. Ang mga tawo nga apektado ug ang mga sakop sa pamilya angay nga magbaton og taas nga panglantaw ug mosalig ug molihok basi sa mahangturong mga baroganan. Napamalandongan ko kini nga hilisgotan taod-taod na. Karon, tungod sa gugma nga akong gibati niadtong aduna niining mga gihisgotan, gidasig ako sa Espiritu nga gamiton kining higayon sa pagpasabot sa pipila ka bililhong mga kamatuoran nga gipadayag sa ebanghelyo ni Jesukristo nga makatabang niadtong aduna niini nga mga kalibog.
Mga kabatan-onan, ang inyong mga lider sa seminary ug institute sa Simbahan ug mga magtutudlo ug mga ginikanan may responsibilidad ug inspirasyon sa pagtudlo kaninyo sa mga kamatuoran sa gipahiuling ebanghelyo ni Jesukristo. Kamo adunay bililhon nga booklet nga Alang sa Kalig-on sa Kabatan-onan, nga gihimo subay sa mga baroganan sa plano sa Langitnong Amahan sa kaluwasan, sa Pag-ula ni Jesukristo, ug sa mga pakigsaad nga atong gihimo sa atong bunyag nga atong gibag-o matag Igpapahulay pinaagi sa pag-ambit sa sakramento. Ang unang mga pahina naglangkob niini nga saad: “Gamit kining mga kamatuoran isip inyong giya, kamo makahimo og mga dinasig nga pagpili nga mopanalangin kaninyo … karon ug sa tibuok kahangtoran.”12
Dihang gipangutana si Jesus unsa ang labing dakong sugo sa balaod, mihatag Siya og duha. Una mao ang paghigugma sa Dios, nga ipakita nato pinaagi sa pagtuman sa Iyang mga sugo. Ikaduha mao ang paghigugma sa atong isigkatawo.13 Buhaton gayod nato ang duha, ug kana dili sayon. Daghan kanato may kalagmitang dili kaayo magtagad sa paghigugma sa atong isigkatawo ug mapasobrahan ang pagtuman sa balaod (mga sugo). Siguradong malagmit kana kanako tungod sa akong legal nga pagbansay. Apan niining tanan, ang paghigugma sa Dios ug pagpakita sa atong gugma sa Dios pinaagi sa pagtuman sa mga sugo maoy unang dako nga sugo. Ug siyempre, mas sayon kanato ang paghukom sa atong kaugalingon ug sa uban kon nagsunod ba kita sa balaod o wala. Apan, importante usab nga tanan kita motuman sa ikaduhang sugo, nga “sama niini,”14 sa paghigugma sa atong isigkatawo sama sa paghigugma ni Jesus kanato.15
Ang paborito nakong balaan nga ehemplo sa pagtipon niining duha ug pagtuman niining duha ka dagkong sugo mao ang kon unsay gihimo sa Manluluwas dihang nag-atubang niini nga isyu. Ang kapitulo otso sa basahon ni Juan nagsulti kon giunsa sa pundok sa mga eskriba ug mga Pariseo pagdala ang babaye aron hukman ni Jesus. Tuyo nila ang pagbitik sa Manluluwas sa pagpili aron masupak ang balaod ni Moises o ang balaod sa Roma, nga wala magtugot sa kinatas-ang silot sigon sa balaod ni Moises niana nga mga kahimtang. Apan ang bili sa ehemplo alang nato karon mao kon giunsa ni Jesus nga nakalusot sa lit-ag ug mitudlo sa puno sa gahom nga leksiyon kon unsaon sa paggamit kining duha ka dagkong sugo.
Una, sa epektibong paagi nadis-armahan sa Manluluwas kadtong nagdali sa paggamit sa balaod. Gihimo Niya kini pinaagi sa paghangyo nga susihon nila ang ilang kaugalingon. “Kinsa kaninyo ang walay sala,” miingon Siya, “maoy paunahag labay kaniyag bato.”16 Dihang ang nangaulaw nga katawhan mibiya, ang Manluluwas migamit sa gahom sa gugma. Sa manggiloy-ong paagi wala niya hukmi ang babaye, ug kadto nga mahigugmaong buhat mihaw-as kaniya ngadto sa bag-ong kinabuhi. Ang paggamit sa balaod miabot pagkahuman, kon siya hukman sa tibuok unya niyang kinabuhi lakip ang paghinulsol. Apan nianang nag-una nga hitabo, ang Manluluwas mipakita sa gugma ug kalooy pinaagi sa wala paghukom, ug dayon gipamatud-an ang balaod sa pag-ingon, “Lumakaw ka, ug ayaw na pagpakasala.”17
Ang panginahanglan sa pagtipon ug paggamit sa balaod ug gugma, gamit ang dinasig nga tayming, kanunayng anaa. Si Elder Christofferson mipahinumdon kanato nga “ang pag-una sa unang sugo dili makapakunhod o makapugong sa atong abilidad sa pagtuman sa ikaduha nga sugo. Sa sukwahi, kini nagpadako ug nagpalig-on niini. … Ang atong gugma sa Dios makadugang sa atong abilidad sa paghigugma sa uban sa mas tukma ug mas hingpit nga paagi tungod kay kita sa labing tinuod nakig-uban sa Dios sa pag-amuma sa Iyang mga anak.”18
Ikonsiderar kining duha ka pamahayag, sa usa nga bag-o lang nga mamumulong sa BYU ug sa bag-o lang nga pakigpulong sa General Authority.
“Ang kinatibuk-ang buhat sa plano sa kaluwasan, nga natapos atol sa talagsaong maulaon nga sakripisyo ni Ginoong Jesukristo, mao ang pagkahimo natong mga binuhat sa gugma gamit ang kinahiladmang matang sa koneksyon ngadto sa uban. …
“Kini nagtudlo kanato nga ang mga sugo ug tanan nga propetikanhong giya—lakip ang bililhong mga kamatuoran diha sa pamahayag sa pamilya—mogiya kanato sa pamaagi sa Dios aron kita mahimong mga binuhat sa gugma.”19
Karon, ang lahi nga pakigpulong:
“Ang pagpahimuot og una sa uban kay sa pagpahimuot sa Dios nagbali sa una ug ikaduhang dako nga mga sugo. Usa kini ka paghikalimot kon asa kita moatubang. Ug bisan pa, kitang tanan nakabuhat niana nga sayop tungod sa kahadlok sa tawo. …
“Ang Manluluwas, nga atong labing maayo nga ehemplo, kanunay nga moatubang sa Iyang Amahan. Siya nahigugma ug nagserbisyo sa Iyang isigkatawo apan miingon, ‘Wala ako magkinahanglan nga daygon sa mga tawo’ (Juan 5:41). Gusto Niya nga kadtong Iyang gitudloan mosunod Kaniya, apan Siya wala mamugos kanila.”20
Kini nga paghulagway sa gugma ug balaod tinuod nga mga giya sa unsay gisugo sa Dios nga atong buhaton. Gihisgotan na nako sa una ang atong “padayon nga [pagpaningkamot] sa pagbalanse sa duha ka sugo sa gugma ug balaod,”21 apan nagtuo ko karon nga mapahayag kini isip paningkamot sa pagsunod niining duha ka sugo sa mas hingpit nga paagi. Si bisan kinsa nga dili motratar niining mga indibidwal nga nagsagobang sa mga hagit sa pag-ila sa sekso uban sa gugma ug dignidad wala masubay sa mga pagtulon-an sa una ug ikaduhang dako nga sugo. Sa ingon niana, mahitungod sa balaod sa Dios, kinahanglan kitang mohinumdom nga ang Dios balikbalik nga mipadayag nga siya milalang og lalaki ug babaye.22 Ug mahitungod sa atong katungdanan sa paghigugma sa atong isigkatawo, angay natong hinumdoman nga gisugo kita sa Dios sa paghigugma bisan niadtong wala magtuman sa mga sugo.
Kon kamo, usa ka sakop sa pamilya, o usa ka higala nagsagobang niini nga mga isyu sa kalibog sa pagkatawo [identity], moawhag ko ninyo sa paggamit sa balaod sa ebanghelyo ug sa gugma ug kalooy sa atong Manluluwas ug Manunubos, kinsa motabang ug mogiya kaninyo kon mapailobon kamong mosubay sa Iyang mga dalan. Si Jesukristo, kinsa nag-ingon nga Siya ang “kahayag sa kalibotan,”23 nagtudlo kanato sa dalan nga angay natong subayon aron makab-ot ang labing pinili nga mga panalangin sa atong Langitnong Amahan. Iya kitang gitudloan pinaagi sa mga kasulatan, pinaagi sa Iyang mga propeta, ug personal nga pagpadayag. Iya kitang gihigugma ug mogiya kanato kon tinguha nato ang pagsunod kon asa Niya kita paadtoon.
IV.
Ang may kalabotan ug mas pamilyar nga isyu mao ang pagbati sa romantiko nga kaibog ngadto sa mga tawo nga sama og sekso. Siyempre, kon wala buhata, kana nga pagkaibog dili mga sala. Apan unsaon man nato pagdala kana nga pagbati, ngari kanato o sa uban?
Ang una nakong tambag mao ang paghinumdom nga bisan unsay atong mga kalahian sa mga nilalang sa atong Langitnong Amahan, Siya nahigugma kanatong tanan, ug ang Iyang hingpit nga plano sa kalipay adunay dapit para sa tanan. Atong mapakita ang atong gugma Kaniya pinaagi sa pagtuman sa Iyang mga sugo, lakip ang paghigugma sa Iyang mga anak.
Samtang ang mga tawo ug mga sakop sa pamilya mosinati niana nga mga pagbati, matngonan gayod nila ang pagtawag kanila og lain nga ngalan. Si Presidente Russell M. Nelson namulong bahin niini atol sa tibuok kalibotan nga debosyonal sa milabayng tuig. Mitudlo siya nga ang paghimo og laing ngalan maglimitar sa tanan kay mobahin kini og mopugong sa panghunahuna sa tawo mahitungod sa ilang kaugalingon ug sa usag usa. Isip sangpotanan, mitudlo siya, “Walay timailhan ang angay nga motangtang, mohulip, o himoong prayoridad niining tulo ka malahutayon nga mga titulo nga: ‘anak sa Dios,’ ‘anak sa pakigsaad,’ ug ‘disipulo ni Jesukristo.’” Dayon mipasidaan siya:
“Ang bisan unsang timailhan nga dili mobagay niining tulo ka sukaranan nga mga titulo mopasagmuyo kaninyo sa kataposan. Ang ubang mga ngalan mopasagmuyo kaninyo paglabay sa panahon tungod kay kini walay gahom sa paggiya kaninyo paingon sa kinabuhing dayon sa celestial nga gingharian sa Dios.”24
Ang adunay gahom sa pagdala kanato ngadto sa kinabuhing dayon ug sa celestial nga gingharian mao ang mga pakigsaad nga atong himoon. Usab, si Presidente Nelson mitudlo kanato sa miaging tuig:
“Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong ingon ka suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad uban sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maloloy-on nga pailob ngari kanato. Matag usa kanato adunay espesyal nga dapit sa kasingkasing sa Dios.”25
Unya, pipila lang ka bulan ang milabay, si Presidente Nelson mipahinumdom na usab kanato nga “ang pagtuman sa mga pakigsaad sa tinuod maghimo sa kinabuhi nga mas sayon! Ang matag tawo nga mohimo og mga pakigsaad … adunay dugang nga agianan ngadto sa gahom ni Jesukristo.”26
Ang pagdugang og personal nga gahom gumikan sa pagtuman sa mga pakigsaad maoy talagsaong pagtulon-an sa Manluluwas nga taliwala sa mga hagit sa mortal nga kinabuhi, kita kinahanglan “magmadasigon.”27
Sa tibuok kalibotan nga pakigpulong pipila ka bulan ang milabay, si Elder Jeffrey R. Holland mipahinumdom kanato nga gihatag ni Jesus kana nga pagtulon-an sa gabii sa Paglansang Kaniya sa Krus. Unsaon man Niya sa pagpamulong mahitungod sa kamadasigon taliwala sa tanang kasakit nga Iyang giatubang? Si Elder Holland mipasabot:
“Bisan pa sa masulub-on nga kahimtang nga tingali nagpatigbabaw sa Kataposang Panihapon, si Kristo nagpahinumdom gihapon sa Iyang mga disipulo sa hinungdan, ug sa ilang katungdanan, nga ‘magmadasigon’ (Juan 16:33). …
“… Segurado, nga kini nga pagpakita sa Iyang hugot nga pagtuo, sa Iyang paglaom ug gugma nga putli, miabot tungod kay Siya nasayod sa kataposan sa istorya. Nasayod Siya nga ang pagkamatarong magpatigbabaw sa kon makompleto na ang kataposan nga mga asoy. Nasayod Siya nga ang kahayag kanunay nga mobuntog sa kangitngit sa kahangtoran ug sa kahangtoran ug sa kahangtoran.28
Kristen, gusto ka bang mosulti og pipila ka panapos nga pulong niining pinalangga nga pundok?
Sister Oaks: Ang tanan nga gisulti namo dinhi makadala og mga panalangin sa atong kinabuhi. Nasayod kita sa istorya bahin sa mga anak sa Israel nga giatake sa malala nga mga bitin sa kamingawan. Apan karon inyo usab kini nga istorya. Sigon sa gimando sa Dios, mipabarog si Moises og tukon nga nagsimbolo sa atong Manluluwas, nga si Jesukristo. Dayon gitawag ni Moises ang tanan sa pagtan-aw ug mamaayo sila sa ilang mga samad.
Karon, sama sa mga Israelita, giatake kita sa lainlain natong gituohan nga gihuptan natong sagrado. Mohangyo usab ako kaninyo, sa pagtan-aw ug mabuhi. Tan-awa ang mga pulong nga gipamulong karon, ang mga pulong sa atong propeta, ang mga kasulatan, ang plano sa kaluwasan, ug ang inyong mga patriyarkal nga panalangin. Pag-ampo ug ang Ginoo mag-uban kaninyo. Wala kana magpasabot nga bisan kinsa kanato dili matatsahan, apan nagpasabot kana nga dili kita mag-inusara, ug magpadayon kitang magiyahan ug mapanalipdan gikan sa mga daotan sa atong palibot. Nagpasabot kana nga kita masayod sa kamatuoran ug makatagamtam sa Espiritu. Dapiton ko kamo sa pagtan-aw sa Dios ug mabuhi.
V.
Presidente Oaks: Nasulti na namo ang mahitungod sa plano sa kaluwasan—ang tanang tulo ka buhat nga gipadayag na, labi na ang katuyoan niining mortal nga kinabuhi.
Nasulti na namo ang mahitungod sa tahas ug tayming sa kaminyoon ug mga anak.
Natudlo na namo nga kinahanglan magkugi kita aron makaila ni Jesukristo, nga mobati sa Iyang gugma, ug magbaton og pagtuo Kaniya ug sa Iyang mahigugmaong giya subay sa dalan sa pakigsaad ngadto sa atong mahangturon nga padulngan.
Nasulti na namo ang duha ka dagkong sugo—mohigugma sa Dios ug mohigugma sa atong isigkatawo—ug mitudlo nga kini kinahanglan nga sundon.
Sa atong tanan nga kabalaka, samtang maningkamot kita sa atong tanan nga hagit, awhagon ko kamo nga magmadasigon, kay Iyang gibuntog ang kalibotan. Mao usab kita. Hinumdomi, ang plano sa Langitnong Amahan usa ka plano sa kalipay.
Mopamatuod ko mahitungod sa atong Manluluwas nga si Jesukristo, kinsa mao ang dalan, ang kamatuoran, ug ang kinabuhi. Sa Iyang sagrado nga ngalan, sa ngalan ni Jesukristo, amen.