Tutaka na Dina

Lotu ni iTabagone Qasecake e Vuravura Raraba

Peresitedi Dallin H. Oaks kei Sister Kristen M. Oaks

ena Mataveiliutaki Taumada

Sigatabu, 21 ni Me, 2023

Peresitedi Dallin H. Oaks: Vinaka vakalevu na sereivakatagi totoka oya. Vinaka vakalevu, Komisina Gilber, ena ivakamacala taumada talei oya.

Oi kemuni na itabagone qasecake lomani, vakakina vei kemuni na vakarau taurivola ena vuli torocake, keirau marau kei Sisita Oaks me vakaraitaka na neirau lomani kemuni ena lotu bibi oqo. Oqo e gauna dredre vei keda kece sara, ia na kosipeli i Jisu Karisito e solia vei keda e vica na vuna meda marau kina. Mai vua na Nona parofita, na Kalou e sa bolei keda meda gumatua ena gauna ni dredre, ka sa tuvani tu ena ivakavuvuli i Jisu Karisito na sala meda qaqa kina noda icavacava vakalou ni bula tawamudu.

I.

Nona vosa kina dua na ivavakoso vakataki kemuni, o Peresitedi Russel M. Nelson a solia kina na idusidusi bibi oqo: “Ni tubu tiko na vuravura me vakayago vakalevu cake ka lutu sobu na bula vakayalo, na nomu tubu e dodonu me vakayalo vakalevu cake ka lutu sobu na veika vakayago. Sasaga mo tutaka na ivakavuvuli ka sega ni irogorogo.”

Ka qai solia na bolebole oqo, ka da taura me iulutaga ni noda lotu: “Kila na dina ka tutaka, kevaka mada ga e sega ni donu ena rai vakapolitiki.”¹

Na noda inakinaki ena bula vakayago kei na sala e dodonu meda muria meda qaqa kina e tiko ena ituvatuva ni veivakabulai ka, wale ga oqo, ena “Na Matavuvale: Ai Vakaro iVuravura Raraba.” Vakasamataka mada na rai ena ivakaleka talei oqo mai vei Peresitedi Nelson:

“Na bula e sega ni dua ga na kena iwasewase. E tiko dina na gauna ni bula taumada. Ka tiko dina na bula ena taudaku ni mate. Na bula taumada kei na bula vakayago erau liu ka qai muri na bula ni oti na mate. Na kilai ni tolu na iwase ni bula vakalagilagi, me vaka a vakaraitaki vei ira na parofita, e solia vei keda e dua na rai vakatikina ni ka eda rawa ni rawata ni oti na bula vakayago. Na bula tawamudu e lagilagi ka veirauti vinaka kei na sau ni noda sasaga.”²

Nida Yalododonu Edaidai, eda sa vakalougatataki ena ivakatakila ni gauna oqo ka vakalevutaka na noda kila na inaki ni noda bula. Me vaka a tukuna o Peresitedi Nelson, eda sega ni raica na bula oqo me dua ga na kena iwase. Vei keda, e sega ni lailai mai na tolu na iwasewase ni noda ilakolako tawamudu. Wase e 1 oya na noda bula taumada. Na noda bula vakayago oqo e tarava, ka wase e 2. Na noda bula ni oti na mate sai koya na wase e 3. Na iotioti ni iwasewase e oka kina na Tucaketale vei ira kece era sa bula oti kei nai Otioti ni Veilewai ka na lesi kina vei keda e dua na matanitu lagilagi, ka vakatau mai na noda cakacaka, digidigi kei na gagadre.

Na kosipeli vakalesui mai i Jisu Karisito e vakarautaka na sala matalia kina dina me baleta na Nona ituvatuva ni veivakabulai na Tamada Vakalomalagi dauloloma vei ira na luvena.

Na inaki ni bula e vuravura, wase e 2, oya meda tubu kina noda icavacava ni bulatawamudu. Eda cakava oqo ena noda rawa na ka e vakatoka na iVola i Momani me veibasai ni ka kecega, ka oka kina e vuqa na veitemaki me voroki kina na ivakaro ni Kalou. Noda sotava ka rawa na veitemaki, ka toro voleka vua na Kalou ena digidigi dodonu ka veivutunitaka na kena e cala, e vukei keda meda rawata na tubu tawamudu ka inaki ni nodra bula vakayago na luve ni Kalou.

O keda e tiko vei keda na isolisoli ni Yalo Tabu kei na rarama ni ivakatakila ni gauna oqo eda sa vakalougatataki ena vuqa na raititobu. Me ivakaraitaki, na iVola i Momani e yalataka nio ira era vakasaqaravagumatua “ena kunea; ka na tevuki vua na veika vunini Kalou ena kaukauwa ni Yalo Tabu.”³ Noqu masu o ira kece au lomana—ka okati kina o ira kece na luve ni Kalou era rogoca na domoqu—mera cakacakataka na veisureti oya me vaqara ka kila na dina

II.

Na imatai ni dina e baleta na vakawati. Na vakawati e iusutu ni inaki ni bula oqo kei na ka e tarava mai. Eda luvena e dua na Tamada Vakalomalagi dauloloma ka buli keda ka meda rawa ni muria na Nona ivakaro me vakaluveni ka vakatawai vuravura. Na kaukauwa ni veibuli oya e dua na isolisoli talei ena noda bula vakayago. Ia e uto ni isolisoli oya na lawa ni bula savasava, na ivakaro me vakayacori walega na kaukauwa ni noda vakatubu kawa ena loma ni vakawati ni dua na tagane kei na yalewa. Na ivakaro oya e uto ni kosipeli i Jisu Karisito. Na dina oya e vakamacalataka na vuna e duatani kina noda yavunibula ka tarovi keda mai na ivalavala eso ka matau tu vei ira era voliti keda tu.

Na noda rai me baleta na ibalebale ni vakawati kei na vakawati sara ga vakaikoya erau ivakaraitaki ni ka oya. O ira na iliuliu ni Lotu i Jisu Karisito era kauwai sara vakalevu ena veiveisau vou kei na veika e okati kina ena ituvaki ni vakawati e Amerika. Oqo e oka kina na tubu cake ni iwiliwili ni lewe ni vanua e Amerika, oka kina eso na cauravou kei na goneyalewa bula kilikili ni Yalododonu edaidai era lokuyarataka na vakawati. Me vakaraitaka na ka e yaco tiko oya, meda raica mada e rua na ilavelave baleta na vakawati. Na vei fika oqo e baleti Amerika, ia era ivakatakilakila ni leqa e vuravura raraba.

Na imatai ni lavelave e vakaraitakia tiko na lutu sobu levu ni pasede ni lewenivanua e Amerika ka ra se bera ni bau vakawati. Ena loma ni 30 na yabaki sa oti, na pasede oqo e lutu ena walu kina ciwa na pasede vei rau ruarua na tagane kei na yalewa. Na vakawati sa lutu sobu tiko ga e Amerika.

Na ikarua ni lavelave oqo e vakaraitaka e dua na tubu ka tautauvata kei na nodra yabaki ni vakawati na itabagone ni Yalododonu Edaidai. Oqo e vakaraitaka na ivakatautauvata ni nodra yabaki na tagane kei na yalewa ni Yalododonu Edaidai ena gauna era vakawati kina ena imatai ni gauna. E vakaraitaka na tubu ka rauta ni lima na yabaki vei rau ruarua na tagane kei na yalewa.⁴

Vakananuma mada na veika era na calata na itabagone qase cake ni Yalododonu Edaidai ni nakiti me lokuyarataki na nodra vakawati me dua na gauna balavu: vakayali na madigi ka vakaberai na veivakalougatataki. Oqo e kena ibalebale na vakaberai ni tubu bibi vakatamata yadua ka dau yaco ena nodrau veimaliwai na veiwatini, na tubu ena ivakarau me vaka na solibula kei yalomalumalumu. E kena ibalebale na lailai ni madigi me rau cakacaka vata me tarai cake na matanitu ni Kalou. Bibi duadua vei ira, oya ni kena ibalebale ni na lailai na gone era sucu mera tubu vata kei na veivakalougatataki ni kosipeli. Oni kila kece oqo, ka gadrevi moni kila ni ra kila na nomuni iliuliu ni vuqa vei ira na noda era sega ni vakawati era sega ni vakawati vakatotolo ena vuku ni veika era sega ni lewa rawa. Au na qai tukuna tale kina eso na ka vakamalua.

Kristen, yalovinaka tukuna mada eso nomu nanuma.

Sister Kristen M. Oaks: DONU. Na kena dina, na vakamau e isolisoli. Na vakawati e sega walega ni solia vei keda na madigi ni vakaluveni, ia e solia vei keda na madigi kei na gagadre me tekivuna e dua na ilakolako ni tubu vakai keda. Eda vulica meda solibula ka veiqaravi me vaka eda rawata ena so tale na sala.

Niu sebera ni vakawati, au dau vakasaqara vakawasoma na madigi meu veiqaravi. Ia oqo, e veibogi ena gauna ni vakayakavi, na noqu cakacaka ni veiqaravi keirau dabe veibasai toka. Au vulica na sala meu lomana ka vukea cake kina vakalevu na watiqu; E tiko e dua na noqu itokani me keirau dau dredre ka tagi vata. E tiko e dua na ivukevuke, qasenivuli, kei na dauveivakamarautaki ka dau vukei au. Na vakawati e tiko kina na madigi me vulici kina na veitaratara kei na itovo ni rai. Au via kila ni na vinaka cake na bula ni semati na noda vakawati ki na dua na ka e cecere cake mai vei keda ka voleka cake vua na iVakabula. Ka eda vinakata dina na veivakalougatataki oqori vei kemuni kece.

Na vakatasuasua ni Les Misérables e tiko kina e dua na malanivosa, “Mo lomana e dua tale na tamata e vaka nio raica tiko na mata ni Kalou.”⁵ E sega ni dua tale na vanua vinaka e yaco kina oqori ena vakawati ga.

President Oaks: Ena rai vakayago, na lokurarataki ni vakaluveni—vakakina na kena sega ni vakabibitaki—e kunei votu ena veika e yaco tiko ka ripotetaki ena dua na vakadidike raraba ka vakaraitaki kina na bibi ni nodra vakaluveni na uabula ni lutu mai na 66% kina 33% ena loma ni 25 na yabaki sa oti.⁶

Keirau nanuma kei Kristen na kena bibi kina Lotu vakalesui mai na vakawaletaki raraba ni nodra bibi na gone ena gauna a tukuna kina o taci Kristen yalewa e dua na vosa a cavuta o makubuna tagane gone. Ni rau wilika vata na iTokani ka sarava na itaba kei Jisu, a sega ni matata vei tinana na nona kacivi ira tiko na gone na iVakabula mera lako Vua. O Anders, yabaki va, a sauma ena ivakamacala veivakauqeti oqo: “O taura rawa? O Jisu e lomani ira na gone.”

Mo dau nanuma, e dua na Tamada Vakalomalagi dauloloma e tiko na Nona ituvatuva vei ira Nona itabagone qasecake, ka tiki ni ituvatuva oya na vakawati kei na vakaluveni.

Oqo, me ka ni lasa, keirau via wasea e dua na ka keirau a vakavulica baleta na veigadivi kei na gade vata. Oqo edua na vidio ni ka au a kaya ena 2005, ena gauna a se qai yabaki 12 kina na itabagone qasecake qase duadua ka tiko nikua, kei na kena vo vei kemuni oni a se gonelalai se bera nio ni sucu.

Ena vuqa vata na yabaki, sa dau vakasalataki ira na noda itabagone na Lotu mera kua ni veigadivi ni bera na yabaki 16. Eso beka na itabagone qasecake, vakauasivi na tagane, era taura sara vakabibi na ivakasala vuku oya ka digitaka me kua ni veigadivi ni bera na yabaki 26 se mani 36 sara. Au sureti iko oqo mo lesu tale kei au ka sarava na vidio oqo mai na yabaki 2005.

President Oaks [vidio]: “Tagane, ke o sa lesu mai na nomu kaulotu ka o se muria tikoga na ivakarau ni veimaliwai oni a vakasalataki kina nio ni se yabaki 15, sa kena gauna oqo mo ni tubu cake. Mo yalodoudou ka vaqara e dua mo drau sema vata. Tekivu ena vica na veigadivi duidui kei na vica vata na goneyalewa, ka kevaka e basika e dua ka vinaka, vakarau sara yani ki na vakawati. Sa gauna ni vakawati. Oqori na ka e vinakata na Turaga vei ira na Nona cauravou kei na goneyalewa. Na tagane me na vosa iliu, ka sa dodonu moni yavala sara. Ke o sega ni kila se cava na veigadivi, ena rairai veivuke beka na ivakamacala oqo. Au a rogoca mai vua na makubuqu yalewa yabaki 18. Na veigadivi e dodonu me pasi ena tolu na ka1) lalawataki, (2) saumi rawa, ka (3) veisa sara. …

“Kemuni noqu itokani gone tu duadua, keirau vakasalataki kemuni moni vakatetea nomuni ivakarau ni veigadivi kina ito kadua ka na rawa ni vakavurea na vakawati, sega ni veigadivi walega ka dau basika ga kina na qito vakatimi me vaka na veitara. Na vakawati e sega ni itaviqaravi vakailawalawa—me yacova ni ra sa basika mai vakalewelevu na gone.”⁷

[cava na vidio]

Sisita, e rairai oni a marautaka na idusidusi oya vei ira cauravou sega ni vakawati. E tiko oqo vei Kristen e vica na vosa vei ira na goneyalewa sega ni vakawati.

Sisita Oaks: Peresitedi Oaks, na vidio oya me baleta na veigadivi sa makawa dina, ia na ivakavuvuli e sega ni veisau—ena liu na veigadivi qai tarava yani na Vakawati.

Baleta niu a vakawati niu sa yabaki 53, au kila na cava na vakilai ni nona waraki e dua na itokani kilikili, kei na gagadre kei na mosi ni yalo kei na wainimata ena ilokoloko ka salavata kaya. Ia, au rawa ni vakadinadinataka na loloma ni Turaga vei ira na sisita yaloqaqa ka ra wawa tiko, baleta niu sa vakila oti. Ka gole talega na yaloqu vei ira na baraca yalodina ka ra gadreva talega na ka oqo. E ka dina na bolebole oqo. Na veigadivi kei na sega ni veigadivi e rawa me rau kauta mai na loma rarawa.

Ni vaka me vakatovolei na noqu vakabauta—niu lomatarotarotaka na dredre ni bula dina ga niu a solia tiko na noqui gu meu bulataka na kosipeli—so na gauna au vakila ni vaka meu cakava tiko e dua na ka cala. Au a sega ni cakava tiko e dua na ka cala.

Me vaka sa tukuna oti o Sisita Michelle D. Craig, “Na veivakatovolei e sega ni kena ibalebale ni cala tiko na ituvatuva.” Na ituvatuva e tiko kina na tubu ka kena inaki me vukei keda meda vakasaqara na Kalou. A kuria o Sisita Craig, “Na Tamada Vakalomalagi e kauwaitaka vakalevu cake na [nomu] tubu me vaka e dua na tisaipeli i Jisu Karisito mai na Nona kauwaitaka [na nomu] logaloga vinaka⁸

Ke o kunei iko nio vakawaletaka na nomu waraka e dua mo vakamautaka, kua ni wawa ka tekivu vakavakarau. Vakarautaki iko ki na bula—ena vuli, cakacaka, kei na lalawa. Kua ni waraka me suguraki mai vei iko na bula marau. Vaqara yani na madigi ni veiqaravi kei na vuli. Vakabibi, vakararavi vua na Turaga, “ka dau kaciva na yaca ni Turaga e veisiga, ka mo ni tudei tu ena vakabauta na veika ena yaco mai.”⁹ Au yalataka ni kevaka oni cakava, ena yaco mai vei kemuni na marau.

Peresitedi Oaks: O Kristen sa solia vei kemuni na sisita eso na ivakasala yaga. E sega ni makawa na nona ivakasala. Na noqui vakasala vei ira na tagane sega ni vakawati e sega talega ni makawa. O ira na iliuliu ni Lotu i Jisu Karisito era kauwai talega ki na bula vakawati me vaka kina vei keirau ena 20 na yabaki sa oti. Na neirau kauwai e okati kina na vuna, me vaka na lailai ni vale ka rawa mera volia na vakawati gone kei na tubu cake ni dinau ni gonevuli.

Me vaka oni kila vinaka na itabagone qasecake, oni sega ni vakavuna na veituvaki oqori, ia ko ni coko kina. Na cava me caka? Toso iliu ena vakabauta, ka cakava na kena vinaka duadua me baleta na dredre ni veivakavaletaki ka keimami a sega ni sotava kei ira na tubumuni ni keimami a se gone. Ka, vakauasivi, cakacaka me vakalailaitaki na dinau ni gonevuli.

Ena ituvatuva ni Kalou e rawa meda taukena kece, ia ka sega ena ituvatuva ka vaka me lewa ko vuravura. Keirau via vakananumi kemuni ena ituvatuva ni Kalou kei na nodra ivakaraitaki yaga na sa liu vei keda. O ira na noda painia taumada era a biuta na nodra vale kei na iyau me kauti ira nodra matavuvale kina veitaqomaki vakayalo kina Ulunivanua ena Ra. Ni kua, keirau uqeti kemuni mo ni kakua ni biuta na veitaqomaki vakayalo kei na matavuvale moni rawa iyau kina vakayago.

III.

Ena gauna oqo au na via vosa ena so na leqa ka ra kauwai talega kina na gonevuli lomani ena vuli torocake ena keda maliwa.

Ena noda matanitu, o ira nomuni caba era vakaleqai ena nuiqawaqawa, ena waigaga, vakatotogani ena sala ni vakau itukutuku raraba, ka toso cake na kedra iwiliwili era vaqara ivakasala. Ko ni vakaleqai ena veivakayarayarataki oqo, ia vei kemuni na itukutuku vinaka e ulabaleta na veika kece oqori.

O ni kila nio luve ni Kalou, e dua na ivotavota matalia vakalou. E lomani iko na Kalou. O koya e dauniveituberi kaukauwa, ka sa yalataka me na vukei iko kevaka walega o vakasaqarai Koya ena sala sa vakavulica oti. Vakadeitaka ena nomu vakasama kei na nomu ituvatuva vakai iko na dina mana nio dua na luvena lomani na Kalou. Na Nona loloma e solia vei iko na dokai-iko vakai iko, na igu, kei na gagadre mo saqata na bolebole cava ga o sotava ena nomu bula. Ka kakua ni guilecava ni ra lomani kemuni o ira na Nona italai. Keirau lomani kemuni.

Au se qai ciqoma walega e dua na ivola talei mai vua e dua na goneyalewa yabaki 16 ka tiko ena dua na yasana ka lewe lailai tiko kina na lewenilotu. Au na vakatokai koya o Amy. E bibi na nona ivola baleta ni vakaraitaka kina na veika e vakila ka dau tiko raraba vei ira na itabagone ena Lotu. Na ivola balavu nei Amy e okati kina na veitikina oqo. Au na kerea e dua na nomuni icaba me na wilika na nona vosa.

Amy: “Au vakila ena so na gauna niu ciqoma eso na itukutuku sega ni dei ka veilecayaki mai na Lotu. Ena noqu bula ni veisiga, au raici ira na lewe Ni Lotu i Jisu Karisito ni Yalododonu Edaidai ena sala ni vakau itukutuku raraba era ivalavala me vaka era sega ni tiki ni kosipeli oqo. … Au vakila ni o au duadua ga na goneyalewa ena noqu tabanalevu ka raica ni cala na ka au raica me baleta na vuravura. … E sega ni matata vakaidina vei au na vuna e vuqa na itabagone ena noda lotu era sega ni kauwai ki na nodra veisautaka na tamata e veisiga na nodra ivakatakilakila, veigadivi vaka tagane se yalewa vata se era okati ira mera sega ni tagane se yalewa. …

“Ena itaviqaravi ni itabagone ena tabanalevu se iteki, au dau tarogi ena cava meu kacivi kina, se e koronivuli e dau kerei meu danisi kei na dua na goneyalewa ka vivia me tagane. Au kila ni dodonu meda lomani ira na tamata kecega ka rokovi ira, kau dau cakava vaka kina. Au [dau] vakila ni sa takosovi e dua na laini. … Au diva meda rogoca e levu cake na vosa mai vei ira na iliuiliu ni Lotu me baleta na leqa oqo.”¹⁰

Peresitedi Oaks: Oqo e dua na ivola ni kere veivuke mai vua edua na goneyalewa ka tautauvata na nona yabaki kei ira gonevuli matua ena vulitorocake ena keda maliwa. Na cava na vuna e lauti au kina vakalevu na nona ivola? E vinakata me cakava na ka dodonu, ia e voliti ena vei yavunibula kei na ivakarau e vakila ni cala, ka sega ni kila o koya na cava me cakava kina. O koya e via tutaka na dina ia e sega ni kila me cakava vakacava ena yalo ni loloma. Ena dua na lotu kaburaki vei ira na itabagone qasecake e Ensign College, keirau a vakamacalataka kina kei Elder Clark G. Gilbert na bolebole oqo ni tudei ena loloma ni o tukuna tiko na dina. Eda se rawa ni lomani ira tiko na tani ka raica e dua na ka eda duavata kina ka sega ni tabaki sobu kina na dina eda kila.¹¹

Ena ivola nei Amy e vola kina o koya baleti ira na itokani ena Lotu era sega ni kila se ra tagane se yalewa, e dua na ituvaki ka vakatokai na lomaleqataki ni yago era a sucu vata kaya mai. Na veilecayaki oqo e rawa ni vuqa na kena waqawaqa ena veigauna duidui ena bula ni dua na tamata. O ira na vakaleqai kina kei ira na lewe ni matavuvale e dodonu mera taura na rai yawa ka vaqara me vakararavi ka cakacakataka na veivakavuvuli tawamudu. Au dau vakasamataka na veiulutaga oqo ena dua na gauna. Oqo, ena loloma au vakila vei ira era kauwai ki na veiulutaga oqo, sa vakauqeti au na Yalo meu vakayagataka na gauna oqo meu vakabibitaka kina eso na dina talei e vakatakila na kosipeli i Jisu Karisito me vukei keda ena veilecayaki oqo.

Cauravou kei na goneyalewa, o ira na nomuni iliuliu ni Lotu kei na semineri kei na inisitute kei na qasenivuli kei ira nomuni itubutubu e nodra itavi mera veivakayarayarataki ka vakavulica na dina vakalesui mai ni kosipeli i Jisu Karisito. E tiko vei iko na ivolalailai yaga na Me iSakisaki ni iTabagone, ka tara cake na ivakavuvuli ni yavu ni veivakabulai nei Tamada Vakalomalagi, na Veisorovaki i Jisu Karisito, kei na veiyalayalati eda a cakava ni da papitaiso ka da vakavouya ena vei Siga ni Vakacecegu ena noda vakaivotavota ena sakaramede. Na vei drauna eliu e tiko kina na yalayala oqo: “Ni sa nomu idusidusi na dina oqo, sa rawa ni o vakayacora na digidigi e so e veivakauqeti ka na vakalougatataki iko ena veigauna tawamudu.”¹²

Ni tarogi o Jisu se cava na ivakaro levu duadua, a solia o Koya e rua. iMatai oya mo lomana na Kalou, ka da vakaraitaka ena maroroi ni Nona ivakaro. iKarua oya meda lomana na kai noda.¹³ E dodonu meda cakava ruarua, ka sega ni ka rawarawa oya. E vuqa vei keda e vaka me sega soti ni dau kauwaitaka na lomani ira na kai noda ka vakabibitaka sara vakalevu na maroroi ni lawa (ivakaro). Oya e dau noqu ivakarau baleta na noqu vuli ena veika vakalawa. Me i lutua, na lomana na Kalou kei na noda vakaraitaka na loloma vua na Kalou ena noda maroroya na Nona ivakaro e sai koya na imatai ni ivakaro levu duadua. Ka vakakina, e rawarawa meda lewai keda vakaikeda kei ira na tani se da talairawarawa tiko ki na lawa se sega. Ia e bibi talega vei keda yadua meda maroroya na ikarua ni ivakaro, ka “tautauvata na kena ikarua,”¹⁴ meda lomani ira na kai noda me vaka na nona lomani keda o Jisu.¹⁵

Noqu ivakaraitaki talei vakalou ena cokoti vata kei na maroroi ni rua na ivakaro cecere oqo sai koya na ka a cakava na iVakabula ni a sotava na leqa oqo. Nai ka walu ni wase ni vola i Joni e tukuni kina na nodra kauta mai vei Jisu e dua na ilawalawa vunivola kei na Farisi e dua na yalewa me lewai. A nodra inaki me veretaka na iVakabula me digitaka me saqata na lawa i Mosese se na lawa vaka Roma, ka sega ni vakatara na itotogi mate ka tukuni ena lawa i Mosese ena ituvaki vakaoqo. Ia na yaga ni ivakaraitaki oqo vei keda ni kua sai koya na nona a levea o Jisu na vere ka vakavulica e dua na lesoni mana ena kena vakayagataki na ivakaro cecere e rua oqo.

iMatai, na iVakabula a vakamalumalumutaki ira era a via vakatauca na itotogi ni lawa. A vakayacora oqo ena nona tukuna mera dikevi ira vakai ira. “O koya vei kemudou sa sega ni valavala ca, “ A kaya, “me viriki koya mada e liu ena vatu.”¹⁶ Ni ra sa gole na ilawalawa ni ra sa vakamaduataki oti, sa qai vakayagataka na iVakabula na kaukauwa ni loloma. Ena yalo ni veivosoti e a sega ni via cudruva na yalewa, kei na cakacaka loloma oya e a laveti koya ki na dua na bula vou. Na vakayagataki ni lawa ena qai yaco e muri, ena gauna ena lewai taucoko kina na nona bula (oka kina na veivutuni). Ia ena gauna taumada oya a vakatetea na iVakabula na loloma kei na veivosoti ena nona sega ni veibeitaki ka qai vakadeitaka na lawa ena Nona kaya, “Mo lako, ka mo kakua ni valavala ca tale.”¹⁷

Na gadrevi ni kena cokoti ka vakayagataki vata na lawa kei na loloma, ena veivakauqeti ena gauna donu, e dau gadrevi tu ga. E vakananumi keda o Elder Christofferson ni noda “vakaliuca tiko na imatai ni vunau e sega ni kena ibalebale ni yalana se vakalailaitaka na noda rawa ni muria na ikarua ni ivunau. E kena veibasai, e vakalevutaka ka vaqaqacotaka. … Na noda lomana na Kalou ena laveta cake na noda rawata meda lomani ira vakataucoko ka vakavinaka cake na tani baleta ni da sa veitokani vakaidina kei na Kalou ena nodra qaravi na Luvena.”¹⁸

Vakasamataka mada na rua na malanivosa oqo, mai vua edua se qai vosa oti ga qo e BYU kei nai karua e dua na vosa eliu mai na dua na Vakailesilesi Raraba.

“Na inaki taucoko ni yavu ni veivakabulai, ka kena i lutua na veisorovaki cecere ni Turaga ko Jisu Karisito, sai koya me rawa kina vei keda meda yaco meda ka bula dauloloma ena ituvaki ni veisemati e titobu sara kei ira na tani. …

“Oqo e vakavulica vei keda ni vei ivakaro kei na veidusimaki kece vaka parofita—okati kina na veidina talei ena ivakaro ni matavuvale—era dusimaki keda ena sala ni Kalou me rawa ni da yaco meda ka bula dauloloma.”¹⁹

Na ikarua ni vosa:

“Na tovolei ni vakalomavinakataki ira na tani ka qai muri na Kalou e veisautaki kina na imatai kei na ikarua ni ivunau cecere. Sa guileca na vanua eda qara tu kina. Ia, eda sa vakayacora kece na cala oya baleta ni rerevaki na tamata. …

“Na iVakabula, na noda ivakaraitaki cecere, e dau qara tu ga Vua na Tamana. E lomani ira ka qaravi ira na kai nona ia e kaya, ‘Era sa sega ni vakarokorokotaki au ko ira na tamata’ (Joni 5:41). E vinakata vei ira a vakavulici ira me ra muri Koya, ia e sega ni duguca na nodra veitovaki.”²⁰

Na veivakamacala oqo ni loloma kei na lawa erau idusidusi dina ni ka e vakarota vei keda na Kalou meda cakava. Au sa vakacacavu oti mai liu ena noda “[tovolea] tikoga meda veidutaitaka vinaka na ivakaro e rua ni loloma kei na lawa,”²¹ ia au vakabauta oqo ni inaki oya ena vakaraitaki vakavinaka cake ena kena tovolei me bulataki na ivakaro e rua oqo ena sala e taucoko cake Ke dua e sega ni ivalavala vinaka vei ira era sotava tiko na bolebole ni nodra kila nodra yago ni sucu ena loloma kei na vakarokoroko, e sega ni duavata tiko kei na ivakavuvuli ni imatai ni ivakaro. Koya gona, ena ulutaga ni lawa ni Kalou, e gadrevi meda nanuma ni Kalou sa dau vakatakila vakavuqa nio Koya a buli rau na tagane kei na yalewa.²² Ena ulutaga ni noda itavi meda lomana na kai noda, e gadrevi meda nanuma ni Kalou sa vakaroti keda meda lomani ira sara mada ga era sega ni maroroya na ivakaro taucoko.

Kevaka o iko, dua na lewe ni nomu matavuvale, se itokani e sotava tiko na leqa ni lecavi ni nona ivakatakilakila, au uqeti iko mo vakayagataka ruarua na lawa ni kosipeli kei na loloma kei na veivosoti ni noda iVakabula ka Dauniveivueti, ka na vukei iko ka dusimaki iko ke o vosota tiko na lako ena Nona salatu. O Jisu Karisito, ka kaya nio Koya na “rarama kei vuravura,”²³ e vakavulica vei keda na sala meda muria me rawati kina na veivakalougatataki talei duadua nei Tamada Vakalomalagi. E vakavulica vei keda mai na ivolanikalou, mai vei ira Nona parofita, ka vakakina mai na ivakatakila yadua. E lomani keda ka na dusimaki keda nida qara meda muria na vanua e tuberi keda kina o Koya.

IV.

E dua na leqa kilai oya na dodomo e vakavolekata na tamata vei dua erau tagane se yalewa vata. E dina sara, kevaka e sega ni vakayacori kina e dua na ka, na veika oqori e sega ni valavala ca. Ia, eda walia vakacava na veimataqali gagano vakaoqori, eda vakila se era vakila na tani?

Na imatai ni noqu ivakasala oya me nanumi tiko se mani vakacava na keda duidui ena duidui ni veika e bulia na Tamada Vakalomalagi, e lomani keda kece o Koya, ka tiko na noda ivotavota yadua ena Nona ituvatuva uasivi ni marau. Eda vakaraitaka noda loloma Vua ena noda muria Nona ivakaro, oka kina noda lomani ira na Luvena.

Ni ra sotava na tamata kei na lewe ni matavuvale na veigagano vakaoqori, e dodonu mera qarauna na veivakatakilakila. E a vosa kina o Peresitedi Russell M. Nelson ena lotu kaburaki ni vuravura raraba ena yabaki sa oti. A vakavulica ni veivakatakilakilataki e veiyalani baleta e veitawasei ka yalana na sala era kilai ira kina vakai ira na tamata ka vakakina o ira na tani. O koya gona, a vakavulica o koya, “Me kakua ni dua na ivakatakilakila me biuta tani, sosomitaka se vakabibitaki cake mai na tolu na icavuti tudei oqo: ‘luve ni Kalou,’ ‘luve ni veiyalayalati,’ ka ‘tisaipeli i Jisu Karisito.’” Qai vakasalataka o koya:

Ke dua na ivakatakilakila ka sega ni veiwekani kei na tolu na vakacacavu oqo ena vuni lomabibi vei iko. Eso na ivolakabi ena vakatuburarawa vagauna vei iko baleta ni sega vei ira na kaukauwa me muataki iko ki na bula tawamudu ena vuravura vakasiletieli ni Kalou.”²⁴

Na veiyalayalati cava eda vakayacora e tiko kina na kaukauwa me tuberi keda kina bula tawamudu kei na matanitu vakasilesitieli. A vakavulici keda tale ena yabaki sa oti o Peresitedi Nelson:

“Ni daru sa cakava e dua na veiyalayalati kei na Kalou, na nodaru veiwekani kei Koya sa yaco me voleka cake ni bera na veiyalayalati. Ia oqo eda sa vauci vata. Ena vuku ni noda veiyalayalati kei na Kalou, ena sega vakadua ni oca ena Nona sasaga me vukei keda, ka sega vakadua ni da na vakaotia rawa na Nona dauvosoti keda ena yalololoma. Oi keda yadua sa tiko na noda vanua digitaki ena uto ni Kalou.”²⁵

Qai, ena vica wale na vula sa oti, a vakananumi keda tale o Peresitedi Nelson ni “maroroi veiyalayalati e vakarawarawataka cake na bula! Na tamata yadua e caka veiyalayalati … e vakalevutaka na nona rawa ni rawata mai na kaukauwa i Jisu Karisito.”²⁶

Na ikuri ni kaukauwa yadua ka yaco mai ena maroroi veiyalayalati sai koya na ivakavuvuli totoka ni Noda iVakabula ni ena loma ni bolebole ni bula vakayago, e dodonu “meda marau.”²⁷

Ena dua na vosa ni vuravura raraba ena vica na vula sa oti, a vakananumi keda o Elder Jefferey R. Holland ni a solia o Jisu na ivakavuvuli oya ena yakavi ni bera Nona Lauvako. A rawa vakacava Vua me tukuna na marau ena loma ni yaluma kece a sotava voli o Koya? A vakamacalataka o Elder Holland:

“Ena ituvaki ca mada ga a rairai yaco ena iOtioti ni Kana Vata, [a] se vakananuma tikoga vei ira na Nona tisaipeli na Karisito na inaki [ni], kei na nodratou itavi, mo ‘dou vakacegu’ (Joni 16:33). …

E dina, na ivakaraitaki oqo ni Nonavakabauta, ni Nona inuinui kei na loloma uasivi, e yaco mai baleta e kila o Koya na itinitini ni italanoa. E kila o Koya ni na qaqa na buladodonu ni sa cava na ka taucoko. E kila o Koya ni rarama ena dau vakadruka e veigauna kece na butobuto me tawamudu, ka tawamudu ka tawamudu.”²⁸

Kristen, o vinakata mo cavuta eso na iotioti ni vosa ki na ilawalawa lomani oqo?

Sisita Oaks: Na veika kece keirau sa tukuna eke ena rawa ni kauta mai na veivakalougatataki ki na noda bula. Eda kila kece nai talanoa ni nodra laukata na luve i Isireli mai na gata batigaga ena loma ni lekutu. Ia, ena bogi nikua sai nomu italanoa talega. Me vaka na ivakaro ni Kalou, a cakava o Mosese e dua na ititoko ka a vakatakarakarataka na iVakabula, o Jisu Karisito. Oti, sa qai kacivi ira kecega mera tacake ka ra na vakabulai mai na nodra mavoa.

Ena bogi oqo, me vakataki ira na Isireli, eda sa valuti tiko ena vuku ni veimataqali vakabauta tabu eda vakamareqeta. Au kerei iko, talega, mo rai yani Vua na Kalou mo bula kina. Rai yani ki na vosa sa talaucaki ena bogi ni kua, na nona vosa na noda parofita, na ivolanikalou, na yavu ni veivakabulai, kei na nomu veivakalougatataki vakapeteriaki. Masu ka na tiko vata kei iko na Turaga. E sega ni kena ibalebale oya ni na sega ni dua vei keda ena vakamavoataki, ia e kena ibalebale nida na sega ni tiko duadua, ka da na toso i liu nida dusimaki ka taqomaki mai na ca e voliti keda tu. E kena ibalebale ni da na kila na dina ka marau tiko ena Yalo. Au sureti iko mo rai yani vua na Kalou mo bula.

V.

Peresitedi Oaks: Keirau sa vosa oti me baleta na yavu ni veivakabulai—ka sa cereki oti na iwasewase e tolu, vakabibi na inaki ni bula vakayago oqo.

Keirau sa vosa oti me baleta na itavi kei na gauna ni vakawati kei ira na vakaluveni.

Keirau sa vakavulica oti ni dodonu meda vakasaqara vagumatua meda kilai Jisu Karisito, ka vakila na Nona loloma, ka vakabauti Koya kei na Nona veidusimaki loloma ena salatu ni veiyalayalati ki na noda icavacava tawamudu.

Keirau sa vosa oti ena rua na ivakaro cecere—lomana na Kalou ka lomani ira na kai noda—ka vakatavulica me rau muri ruarua.

Ena noda veikauwai kece, ni da lako curuma na noda veibolebole kece, keirau vakauqeta meda marau tiko, baleta nio Koya sa vakamalumalumutaki vuravura oti. Eda rawata talega. Nanuma, na ituvatuva nei Tamada e ituvatuva ni marau.

Au vakadinadinataki Jisu Karisito ni sai koya na sala, na dina, kei na bula. Ena Yacana tabu, na yaca i Jisu Karisito, emeni.