Tu Atu mo le Upumoni
Faigalotu i le Lalolagi Atoa mo Talavou Matutua
Aso Sa, 21 Me, 2023
Peresitene Dallin H. Oaks: Faafetai mo lena musika matagofie. Ma faafetai, Komesina Gilbert, mo lena faalauiloaga matagofie.
Talavou matutua pele, e aofia ai tamaiti a’oga e le o toe mamao ona faauu lea mai a’oga maualuluga, ua matua faagaeetia lava i ma’ua ma Sister Oaks e faailoa atu lo ma alolofa ia te outou ma lauga atu ia te outou i lenei faigalotu taua. O taimi faigata tele nei mo i tatou uma, ae ua lava mafuaaga ua aumaia e le talalelei a Iesu Keriso tatou te fiafia ai. E ala mai i Lana perofeta, ua tuuina mai ai e le Atua ia i tatou le lu’i ina ia faaauau pea ona ui atu i puapuaga, ma ua otooto mai i aoaoga a Iesu Keriso le ala e aga’i manumalo atu ai i lo tatou taunuuga paia o le ola e faavavau.
I.
O le lauga atu i se aofia e pei o outou, na tuuina mai ai e Peresitene Russell M. Nelson lenei faatonuga taua: “A o faatupula’ia le faalelalolagi o le lalolagi ae faaitiitia le faaleagaga, e ao ona atili faatupula’ia lo outou tuputupu a’e faaleagaga ae itiiti i le faalelalolagi. Taumafai malosi e tutu atu mo le mataupu faavae nai lo le lauiloa.”
Ona ia tuuina mai lea o le lu’i lenei, lea ua tatou faaaogaina e fai ma autu o la tatou faigalotu: “Ia iloa le upumoni ma tutu atu mo le upumoni, tusa lava pe le taulia i tulaga faaupufai.”1
O la tatou sini i o tatou olaga faitino ma le ala e tatau ona tatou mulimuli ai ina ia manumalo, o loo tuuina mai i le ata o le faaolataga ma, talu ai nei lava, i le “O Le Aiga: O Se Folafolaga i le Lalolagi.” Mafaufau i le tofamamao i lenei aotelega na saunoa i ai Peresitene Nelson:
“O le olaga e le o se tala e tasi sona vaega. E i ai moni lava le vaitau o le mua’i olaga. E i ai moni foi le olaga pe a mavae le oti. O vaega o le mua’i olaga ma le olaga nei o ni mua’i folasaga i lo tatou olaga pe a mavae le oti. O le malamalama i tikeri e tolu o le mamalu, e pei ona faaalia i perofeta, tatou te maua ai se vaaiga o lo tatou gafatia pe a mavae le oti. E mamalu le ola e faavavau ma e aoga lelei ai le tulimata’iga.”
I le avea ai ma Au Paia o Aso e Gata Ai, ua faamanuiaina i tatou i faaaliga i ona po nei lea e aumaia ai so tatou malamalama sili atu i le faamoemoega o lenei olaga faitino. E pei ona saunoa Peresitene Nelson, tatou te le vaai atu i lenei olaga faapei o se tala e tasi se vaega. Mo i tatou, e le itiiti ifo ma le tolu vaega i la tatou malaga e faavavau. O le vaega 1 o lo tatou muai olaga. E sosoo ai ma lo tatou olaga faitino i le taimi nei, e pei o le vaega 2. O lo tatou olaga pe a mavae le oti o le vaega 3. O lea vaega mulimuli e aofia ai le Toetutu moni mai o tagata uma na soifua ma se Faamasinoga Faaiu lea e tofia ai i tatou i se malo o le mamalu lea ua faaagavaaina ai i tatou ona o a tatou galuega, faaiuga, ma faanaunauga.
O le talalelei toefuataiina a Iesu Keriso e tuuina mai ai se avanoa tulaga ese i le upumoni e uiga i le ata o le faaolataga a lo tatou Tama Faalelagi alofa mo Ana fanau.
O le faamoemoega o lo tatou olaga i le lalolagi, vaega 2, o le tuputupua’e agai i lo tatou taunuuga o le ola e faavavau. Tatou te faia lenei mea e ala i le faatoilaloina o le mea ua faamatala mai e le Tusi a Mamona o le faafeagai o mea uma, e aofia ai le tele o faaosoosoga e soli poloaiga a le Atua. O le faafetaia’ia ma le faatoilaloina o tofotofoga, ma faalatalata atili atu i le Atua e ala i filifiliga tonu ma le salamo mai mea sese, e fesoaoani ai ia i tatou e maua le tuputupu a’e e faavavau, o le faamoemoega lea o le olaga faitino o fanau a le Atua.
O i tatou o e ua i ai le meaalofa o le Agaga Paia ma le malamalama o faaaliga i ona po nei ua faamanuiaina i le tele o malamalamaaga. Mo se faataitaiga, ua folafola mai e le Tusi a Mamona o i latou e saili ma le filiga “o le a maua e ia; ma o le a faaali ia te i latou mea lilo a le Atua, e ala i le mana o le Agaga Paia.”3 Ou te tatalo o i latou uma ou te alofa i ai—ma e aofia ai fanau uma a le Atua o oo atu i ai lo’u leo—o le a galulue i lena valaaulia e su’e ma iloa le upumoni.
II.
O le upumoni muamua e faatatau i faaipoipoga. O le faaipoipoga e totonugalemu i le faamoemoega o le olaga faitino ma mea e mulimuli mai ai. O i tatou o fanau a se Tama Faalelagi agaalofa o lē na foafoaina i tatou ma se mana e mulimuli ai i Lana uluai poloaiga ia fanafanau ma uluuluola ia tumu ai le lalolagi. O lena mana o le foafoaga o se tasi o meaalofa aupito faapelepele ua tatou maua i le olaga faitino. Ae totonugalemu i lena meaalofa o le tulafono o le ola mama, o le poloaiga ia faaaoga o tatou mana o le foafoaga na o totonu lava o le faaipoipoga i le va o se alii ma se tamaitai. O lena poloaiga e totonugalemu i le talalelei a Iesu Keriso. Ua faamatala e lena mea moni le mafuaaga e eseese ai mea tatou te faatauaina ma taumamao ai mai amioga patino ia e foliga mai ua masani ai le toatele o siomia ai i tatou.
O lo tatou uiga faaalia i le faauigaga o le faaipoipoga ma i le faaipoipoga lava ia, o faataitaiga ia o lena mea. Ua matua’i popole lava taitai o le Ekalesia a Iesu Keriso i suiga talu ai nei i le natura ma le tulaga ua oo i ai faaipoipoga i le Iunaite Setete. Ua aofia ai i lea mea le lilifa faateleina o tagatanuu o le IS, e aofia ai ma nisi alii ma tamaitai agavaa talavou o le Au Paia o Aso e Gata Ai, e tolopo faaipoipoga. Ina ia faapupula lena lilifa, se’i o tatou tilotilo lava i siata e lua e uiga i faaipoipoga. E ui o nei fuainumera e mo le Iunaite Setete, ae ua faatatau foi i se faafitauli i le lalolagi atoa.
O le siata muamua lea o loo faaali mai ai le faaitiitiga tele i pasene o tagatanuu i le Iunaite Setete o e ua faaipoipo. I le 30 tausaga ua mavae, ua pa’ū ai lea pasene i le valu i le iva pasene mo alii ma tamaitai. Ua manino lava le pa’ū o faaipoipoga i le Iunaite Setete.
O le siata lona lua lea o loo faaalia ai se siitaga fesootai i tausaga e faaipoipo ai talavou o le Au Paia o Aso e Gata Ai. Ua atagia mai ai ii le averesi o tausaga o alii ma tamaitai o le Au Paia o Aso e Gata Ai i le taimi o a latou uluai faaipoipoga. Ua faaalia mai ai se faatelega o le tusa ma le lima tausaga mo alii ma tamaitai.4
Mafaufau po o le a le mea e misi e talavou matutua o le Au Paia o Aso e Gata Ai pe a faatuatuai ma le loto i ai a latou faaipoipoga mo se taimi umi: e le toe maua avanoa ma tolopo faamanuiaga. O lona uiga o le faatuatuai i le tuputupu a’e taua faaletagata lava ia lea e tula’i mai i sootaga i le va o se tane ma se ava, tuputupu a’e i na ituaiga o uiga auaumama o se osigataulaga ma le lotomaualalo. O lona uiga o avanoa faaitiitia e galulue faatasi ai e fausia le malo o le Atua. Ma o le mea sili ona taua, o lona uiga ua laiti tamaiti e fananau mai e tuputupu ae ma faamanuiaga o le talalelei. Ua outou iloa nei mea uma, ma e manaomia ona outou iloaina ua silafia e outou taitai ua toatele a tatou ‘au nofofua ua tuai ona faaipoipo ona o mafuaaga e le oo i ai lo latou malosi. O le a ou talanoa atili atu i le mea lena i se taimi.
Kristen, faamolemole faaopoopo mai ou mafaufauga i le mea lenei.
Sister Kristen M. Oaks: Ua lelei. O le mea moni, o le faaipoipoga o se meaalofa. E le gata e aumaia ia i tatou e le faaipoipoga le avanoa mo ni fanau, ae tatou te maua ai foi le avanoa ma le naunau e amata se faigamalaga o le tuputupu a’e faatasi ma le tasi ma le isi. E mafai ona tatou aoao e ositaulaga ma auauna atu i le mea tatou te mafaia i nai isi auala.
A o ou nofofua, sa ou vaavaai pea mo ni avanoa e auauna atu ai. Ia, o po uma i taligasua o le afiafi, e saofai faasaga lelei mai ai lava ia te a’u la’u galuega faatino mo auaunaga. Ua ou aoao e alofa sili atu ma fesoasoani i lo’u toalua; ua i ai sa’u uo ma te talie ma fetagisi faatasi. Ua i ai so’u fautua ma se faiaoga ma se e faamalosiau ma fesoasoani foi ia te a’u. O le faaipoipoga o se avanoa ua i ai lava e aoao ai fesootaiga ma manatu. Ou te mana’o ia outou iloa e sili atu le lelei o le olaga pe a fesootai a tatou faaipoipoga i se mea e sili atu nai lo i tatou lava ma latalata atili i lo tatou Faaola. Ma e ma te mananao i lena mea mo outou uma.
I le tala o le Les Misérables e i ai se laina faapea, “O le alofa i se isi tagata, o le vaai lea i fofoga o le Atua.”5 E leai se isi mea e sili ona tupu ai lena mea nai lo le faaipoipoga.
President Oaks: I faaupuga faasalemausau, o le tolopo o le faia o ni fanau--e oo lava i le le faatauaina tele—ua iloagofie i le lilifa lea sa faatoa lipotia mai i se tusigaigoa faalemalo lea ua faaalia ai faapea, o le taua i tagata matutua o le faia o ni fanau ua pa’ū i le 25 tausaga talu ai mai le 66 pasene i le 33 pasene.6
Sa ma mafaufau ma Kristen i le taua i le Ekalesia toefuatai o le tuumaualaloina faalemalo o le taua o fanau ina ua faamatala mai e le uso o Kristen se manatu faaalia a lana tama tama laitiiti. A o la faitauina faatasi le Uo ma tilotilo i se ata o Iesu, sa ia le malamalama i le talotalo atu o Iesu i tamaiti e o atu ia te Ia. Sa tali mai Anders, e fa tausaga, ma le faamalamalamaga musuia lenei: “E te le o maua? E alofa Iesu i tamaiti.”
Tau ina manatua, o loo i ai se fuafuaga a se Tama Faalelagi alofa mo Ana talavou matutua, ma o se vaega o lena fuafuaga o le faaipoipoga ma fanau.
Ia, na o se mea malie, ma te mananao e faasoa atu le mea sa aoao ai i matou e uiga i tafaoga faamasani ma le tafafaovale. O se vitio lenei o le mea na ou ta’ua i le 2005, ina ua pe na o le ta’i 12 tausaga o talavou aupito matutua ua tatou faatasi i le aso, a o outou uma sa na o ni tamaiti laiti pe le’i fananau mai foi.
I le tele o tausaga, sa fautuaina ai e le Ekalesia o tatou talavou ia le tafafao lava faamasani a o lei aulia le 16 tausaga. Atonu o nisi o talavou matutua, aemaise o alii, ua sili mamao atu le tauaveina o lena fautuaga poto ma ua filima’oti ai e le tafao faamasani lava a o lei atoa lona 26 pe o le 36 foi. Ou te valaaulia nei outou tatou te toe foi i tua e matamata le vitio lea mai le tausaga e 2005.
President Oaks [video]: “Alii, afai ua outou taliu mai misiona ma o loo outou mulimulita’ia pea mamanu o le tama-teine sa fautuaina outou e mulimuli ai ina ua outou ta’i 15, ua oo i le taimi e te faatagata matua ai. Faaputuputu lou lototoa ma vaavaai mo se tasi lua te faipaaga. Amata i ni tafaoga faamasani eseese ma ni tamaitai talavou eseese, ma a oo ina foliga mai ua lelei lena vaega, faaauau i le faamalamalama. Ua oo i le taimi o le faaipoipoga. O le mea lena ua faamoemoe i ai le Alii mo Ona atalii ma afafine talavou matutua. O alii o loo i ai le taulamua, ma ua tatau ona outou galulue i ai alii. Afai e te le iloaina le uiga o le tafao faamasani atonu e fesoasoani le faauigaga lenei. Sa ou faalogo ai mai le afafine o la’u tama e 18 tausaga. O se tasi e ‘tafao faamasanai i ai e tatau ona pasia le suega o f e tolu: (1) fuafua mamao, (2) faatupe mo, ma le (3) fai paaga. …
“A’u uo nofofua, ma te fautuaina outou e fuafua a outou mafutaga ma le itupa faafeagai i mamanu faatafaoga masani ia e ono taunuu ina matua ma faaipoipo ai, ae le o mamanu tafafaovale ia e na o na matua ai i taaloga fai ‘au e pei o le lakapi pa’i. O le faaipoipoga e le o se gaoioiga faifaavaega—ia vagana ua oo i le taimi e soloa’i mai ai le fanau toatele.”7
[End video]
Tuafafine, e foliga mai sa outou fiafia i na taitaiga mo alii nofofua. O loo i ai ni nai upu a Kristen mo tamaitai nofofua.
Sister Oaks: Peresitene Oaks, o le vitio lena e uiga i tafaoga faamasani ua pasiā moni, ae e tumau lava le mataupu faavae--e muamua lava ona tafafao faamasani faatoa faaipoipo ai.
Ona sa ou faaipoipo i le 53 tausaga, ou te iloa lagona o le faatalitali mo se soa agavaa ma naunauga ma le lototiga ma loimata i luga o lo’u aluga sa tele ina i ai. Ae e mafai ona ou molimau atu i le alofa o le Alii mo tuafafine totoa o loo faatalitali lava i latou, aua sa ou lagonaina foi. Ma e momomo lo’u loto mo tuagane faamaoni o e o loo mananao foi i lenei mea. E moni le tauiviga. O le tafao faamasani po o le le tafao faamasani e mafai ona atuatuvale.
Ina ua foliga mai ua tofotofoina lo’u faatuatua ma lo’u lumanai—ina ua ou mafaufau pe aisea na foliga faigata ai le olaga ae o loo ou faia le mea sili ou te mafaia e ola ai i le talalelei—o nisi taimi sa ou lagonaina ai atonu sa ou sese. Ou te le’i faia se mea sese.
E pei ona saunoa Sister Michelle D. Craig, “O tofotofoga e le faapea ai ua le manuia le fuafuaga. O le fuafuaga e aofia ai le tuputupu a’e ma e fesoasoani ia i tatou e saili le Atua. Sa faaopoopo mai Sister Craig, “E sili ona naunau le Tama Faalelagi i [lou] tuputupu a’e o se soo o Iesu Keriso nai Lona naunau i [lou] ola to’afimalie.”8
“Afai ua na o lou makaina o le taimi ma faatalitali mo se faaipoipoga faamoemoeina, aua le toe faatali ae amata tapenapena. Tapena oe lava ia mo le olaga—e ala i le aoga, poto masani, ma le fuafuaina. Aua le faatali mo le fiafia e na ona togi mai ia te oe. Saili avanoa mo le auauna atu ma le aoao mai. Ma o le mea e sili ona taua, faalagolago i le Alii, “ole atu i le suafa o le Alii i aso taitasi, ma tu mausali i le faatuatua i le mea o le a oo mai.”9 Ma ou te folafola atu a outou faia lena mea, o le a oo mai le fiafia ia te outou.
President Oaks: Ua tuuina atu e Kristen ia te outou tuafafine ni nai fautuaga taua. O ana fautuaga e le’i pasiā. O le mea moni, o a’u fautuaga i alii nofofua e le’i pasiā foi. E tutusa lava le popole o taitai o le Ekalesia a Iesu Keriso e uiga i faaipoipoga e pei foi ona i ai i matou i le 20 tausaga talu ai. O lo matou popolega e aofia ai mafuaaga, e pei o le le lava o fale e gafatia e le ‘au faaipoipo laiti ona faatau ma le aofaiga faatupula’ia o aitalafu a tamaiti a’oga.
E pei lava ona iloa lelei e outou talavou matutua, e le o outou le pogai o na tulaga, ae ua outou afaina fua. O le a le mea a fai? Fetuleni i luma ma le faatuatua, ma fai le mea sili tou te mafaia i tulaga o maketi mo fale e le tusa ma le mea na matou feagai ai ma o outou matua matutua i o matou taimi. Aemaise lava, galulue ina ia tuuitiitia aitalafu a le tamaitiiti a’oga.
I le fuafuaga a le Atua e mafai ona tatou maua mea uma, ae e le o le faiga e foliga mai e pulea mai e le lalolagi. Matou te fia fesoasoani e ala i le faamanatu atu ia te outou o le fuafuaga a le Atua ma faataitaiga lelei a o tatou tuaa. Sa tuua e o tatou uluai paionia o latou fale ma meatotino ina ia aumaia o latou aiga i le saogalemu faaleagaga i Atumauga i Sisifo. O le asō, matou te uunaia outou ia aua ne’i tuua le saogalemu faaleagaga ma le aiga ina ia maua ‘oa faalelalolagi.
III.
O lea ua ou talanoa atu i nisi o mataupu o loo popole ai foi tamaiti aoga maualuga alofaina i la tatou aofia.
I le lalolagi atoa, o loo mafatia a outou tupulaga i le atuatuvale, ua afaina gofie i fualaau faasaina, ua fai ma vaisu fesootaiga faaagafesootai, ma ua to’atele na’ua ua sailia fautuaga. Ua aafia outou i nei tosinaga, ae mo outou e tele atu tala fiafia nai lo na mea.
Ua outou iloa o outou o fanau a le Atua, o se tofi malualii faalelagi. E alofa le Atua ia te outou. O Ia o se faiaoga faufautua mamana, ma ua uma ona Ia folafola mai e fesoasoani ia te outou pe afai tou te saili ia te Ia i le ala sa Ia aoao mai. Faatu i lou mafaufau ma au faamuamua patino le upumoni mamana o oe o se atalii/afafine faapelepele o le Atua. O Lona alofa ua faaeeina ai oe i le faaaloalo, o le malosi, ma le faaosofia e faasagatau ai i soo se faafitauli e te lua fetaiai i lou olaga. Ma aua lava nei galo e alolofa Ana auauna ia te oe. Matou te alolofa ia te outou.
Faatoa ou mauaina se tusi taua mai se teineitiiti e 16 tausaga e nofo i se setete e i ai ni nai tagata o le ekalesia. O le a ou faaigoa o ia ia Amy. E taua lana tusi ona o loo ia faaalia mai ai ona lagona e tutusa lava ma tagata talavou i le salafa o le Ekalesia. O le tusi umi a Amy e aofia ai vaega nei. Sa ou talosagaina se tasi o la outou tupulaga e faitauina ana upu.
Amy: “Ou te lagona e pei o nisi taimi ou te maua ai ni savali le fetaui ma le fenumiai mai le Ekalesia. I lo’u olaga i aso taitasi, ou te vaai ai i tagata o Le Ekalesia a Iesu Keriso o le Au Paia o Aso e Gata Ai, i luga o upega tafa’ilagi o aga e faapei e le o i latou o se vaega o lenei talalelei. … Ou te lagonaina e pei na o a’u le tamaitai talavou i la’u uarota o loo vaai i mea ia ou te vaai i ai e sese i le lalolagi. … Ou te matua’i le malamalama lava pe aisea ua matua toatele ai talavou i la tatou ekalesia e le o vaai lava i se faafitauli i tagata ua suia o latou itupa toetoe o aso uma, e tafafao faamasani ma tagata o la latou lava itupa pe ua faailoa e leai se itupa. …
“I gaoioiga a le uarota po o le siteki, e fesiligia lo’u soānauna, pe i le a’oga e fai mai ma te sisiva ma se teine ua manatu o ia o se tama. Ou te iloa e tatau ona tatou alolofa i tagata uma ma faaali i ai le faaaloalo, ma ou te faia lava e le aunoa. Ua [na ona] ou lagonaina lava ua i ai se laina tuaoi ua sopoia. … Maimau pe ana tatou faalogo i ni lauga se tele mai taitai o le Ekalesia e uiga i lenei faafitauli.”10
President Oaks: O se tusi lea mai se tamaitai talavou pe tusa o le matua o le ‘au faai’uaso o a’oga maualuluga o loo i ai i lenei aofia. Aisea ua matua taia ai a’u i lana tusi? E manao o ia e fai le mea tonu, ae ua ia lagona o loo siosiomia o ia e amioga ma mea ua faatauaina ia e manatu o ia e sese, ma ua na le iloa le mea e fai i ai. E manao o ia e tu atu mo le upumoni ae le iloa pe faapefea ona faia ma le alofa. I se faigalotu i talavou matutua i le Kolisi o Ensign, sa ma faamalamalamaina ai ma Elder Clark G. Gilbert lenei lu’itau o le tutu atu ma le mausali ma le alofa, a o folafola atu le upumoni. E mafai lava ona tatou alolofa i isi ma su’e se mea e tutusa ai e aunoa ma le taufetu’una’ia o upumoni ua tatou iloa.11
I le tusi a Amy o loo ia tusi mai ai e uiga i uo i le Ekalesia ua fenumia’i i o latou itupa, o se tulaga ua ta’ua o le itupa lē faamalieina. O lenei fenumia’i e mafai ona eseese ituaiga e alia’e mai ai i taimi eseese i le olaga o se tagata. O le mea lea, e tatau i tagata e aafia ai ma tagata o aiga ona vaai mamao ma saili e faalagolago ma galue i mataupu faavae e faavavau. Sa ou manatunatu loloto i lenei mataupu mo sina taimi. O le taimi nei, i le alofa ua ou lagonaina mo i latou o popole i ia mataupu, ua uuna’ia a’u e le Agaga e faaaoga lenei avanoa e faamamafa atu ai nisi o upumoni taua ua faaalia mai e le talalelei a Iesu Keriso e fesoasoani ai i ia ituaiga o fenumia’iga.
Alii ma tamaitai talavou, o outou taitai seminare ma inisitituti ma faiaoga ma o outou matua, ua i ai le tiutetauave ma musumusuga e aoao outou i upumoni o le talalelei toefuatai a Iesu Keriso. Ua ia te outou le tamaitusi taua o le Mo Le Malosi o le Autalavou, lea o loo fausia i luga o mataupu faavae o le ata o le faaolataga a lo tatou Tama Faalelagi, o le Togiola a Iesu Keriso, ma feagaiga na tatou osia ina ua tatou papatiso ma lea tatou te faafouina i Sapati taitasi e ala i le aai ma feinu i le faamanatuga. O ona ulua’i lautusi o loo i ai le folafolaga lenei: “Faatasi ai ma nei upumoni e fai ma ou taiala, e mafai ona e faia ni filifiliga musuia o le a faamanuiaina ai oe i le taimi nei ma le faavavau atoa.”12
Ina ua fesiligia Iesu, pe o le fea poloaiga ua sili, na Ia tuuina mai le lua. Muamua o le alofa i le Atua, lea tatou te faaalia i le tausiga o Ana poloaiga. Lona lua o le alofa i o tatou tuaoi.13 E tatau ona tatou faia mea uma e lua, ma e le faigofie. O le toatele o i tatou e tau lilifa e faalēano i le alolofa i o tatou tuaoi ae ova faamamafa le tausiga o le tulafono (poloaiga). O le mea moni foi lena ou te lilifa i ai ona o lo’u aoaoina faaletulafono. Ae po o le a lava, o le alofa i le Atua ma le faaalia o lo tatou alolofa mo le Atua e ala i le tausiga o Ana poloaiga o le poloaiga muamua lea ma le sili. Ma o le mea moni foi, e faigofie atu mo i tatou ona faamasinoina i tatou lava ma isi pe o tatou usita’ia le tulafono. Ae peitai, e taua foi mo i tatou taitoatasi ona tausia o le poloaiga lona lua, lea e “faapei o lea,”14 ia alolofa i o tatou tuaoi e faapei ona alofa mai o Iesu ia i tatou.15
O la’u faataitaiga paia ou te fiafia i ai i le tuufaatasia ma le tausia o nei poloaiga sili uma e lua, o le mea lea na fai e le Faaola ina ua fetaia’i ma lenei mataupu. Mataupu e valu o le tusi a Ioane o loo lipotia mai ai le ala na aumaia ai e se vaega o tusiupu ma Faresaio se fafine ina ia faamasinoina e Iesu. O lo latou faamoemoega o le maileia lea o le Faaola ia filifili e faafeteena’i a le o le tulafono a Mose, po o le tulafono a Roma, lea sa le’i faatagaina ai le faasalaga autu na faatonuina i le tulafono a Mose i se tulaga faapea. Ae o le taua o le faataitaiga mo i tatou i le taimi nei o le ala na ‘alofia ai e Iesu le mailei ae aoao atu se lesona mamana i le ala e faaaoga ai poloaiga sili uma e lua.
Muamua, sa faaleaogaina lelei e le Faaola le malosiaga o i latou sa sailia se faatatauga vave o le tulafono. Na Ia faia lenei mea i le faamalosia o i latou e suesue ifo ia i latou lava. “O so outou e leai sana agasala,” na Ia fetalai ai, “ia lua’i togi se maa ia te ia.”16 Ina ua tuumuli ese le vaega ua maasiasi, sa faaaoga e le Faaola le mana o le alofa. Sa Ia teena foi ma le alofa mutimutivale ona faasala le fafine, ma o lena faatinoga alofa na siitia ai o ia i se olaga fou. O le a oo mai le faatatauga o le tulafono i se taimi mulimuli ane, pe a faamasinoina o ia i le atoaga o lona olaga, e aofia ai ma le salamo. Ae i lena mea na tupu na faaalia ai e le Faaola le alofa ma le alofa mutimutivale e ala i le aloese mai le faasalaina ona faamautu ai lea o le tulafono i le fetalai atu, “Alu ia, ma aua e te toe agasala.”17
O le manaomia ona tuufaatasi ma faaaoga uma le tulafono ma le alofa, faatasi ai ma le taimi musuia, o loo i ai pea lava. Sa faamanatu mai ia i tatou e Elder Christofferson e faapea “o le faamuamua o le poloaiga muamua e lē faaitiitia ai pe faatapulaaina ai lo tatou gafatia e tausia le poloaiga lona lua. I se isi itu, e faateleina ai ma faamalosia ai. … O lo tatou alofa i le Atua e siitia ai lo tatou tomai e alolofa atoatoa ai i isi ma le atoatoa ona ua tatou faipaaga i le ute ma le Atua i le tausiga o Ana fanau.”18
Mafaufau i faamatalaga nei e lua, o le tasi o se failauga talu ai nei i le BYU a o le isi i se lauga talu ai a se Pulega Aoao.
“O le galuega atoa o le ata o le faaolataga, e taualuga i le taulaga sili togiola a le Alii o Iesu Keriso, o le faia lea ia tatou mafaia ona avea ma tagata o le alofa i le ituaiga aupito loloto o le sootaga ma isi. …
“Ua aoao mai ai i tatou e faapea o poloaiga ma [taitaiga uma faaperofeta]—e aofia ai upumoni taua i le folafolaga i aiga—e taita’ia ai i tatou i auala o le Atua e mafai ai ona tatou avea ma tagata o le alofa.”19
Ia o le isi lauga:
“O le taumafai e faamalie isi a o le’i faamalieina le Atua o le fesuiaia lea o poloaiga sili muamua ma le lua. O le faagaloina lea o le itu e ao ona tatou faasaga i ai. Ae peitai, ua tatou faia uma lena mea sese ona o le fefe i tagata. …
O le Faaola, lo tatou Faataitaiga sili, na faasaga atu i Lona Tama i taimi uma. Na Ia alofa ma auauna atu i Ona uso a tagata ae na fetalai mai, ‘Ou te le manao i le viiga mai tagata’ (Ioane 5:41). Na Ia finagalo ia i latou na Ia aoaoina e mulimuli ia te Ia, ae Na te le’i saili mo lo latou agalelei.”20
O nei faamatalaga o le alofa ma le tulafono o ni taiala moni uma o mea ua poloaiina ai i tatou e le Atua e fai. Sa ou ta’ua talu ai lo tatou “faaauau pea ona [taumafai] e faapaleni ia poloaiga valalua o le alofa ma le tulafono,”21 ae o lea ua ou talitonu nei o lena sini e sili ona faaupu faapea ia taumafai e ola i nei poloaiga uma e lua i se ala e sili ona atoatoa. Soo se tasi e le taulimaina tagata o e feagai ma lu’itau o le faasinomaga tau itupa ma le alofa ma le faaaloalo, e le o ogatusa ma aoaoga o le poloaiga sili muamua ma le lua. O lea, e faatatau i le mataupu o le tulafono a le Atua, e manaomia ona tatou manatua ua faafia ona faaali mai e le Atua na Ia foafoaina le tane ma le fafine.22 Ma e faatatau i le mataupu i lo tatou tiute e alolofa i o tatou tuaoi, e ao ona tatou manatua ua poloaiina i tatou e le Atua e alolofa atu e oo lava ia i latou e le tausia poloaiga uma.
Afai o oe, se tasi o lou aiga, po o se uo o loo tauivi ma nei faafitauli o le fenumia’i i le faasinomaga, ou te uuna’ia oe e faaaoga tulafono uma ia e lua o le talalelei ma le alofa ma le alofa mutimutivale o lo tatou Faaola ma le Togiola, lea o le a fesoasoani ma taiala oe pe afai e te savali ma le onosai i Ona ala. Ua aoao mai e Iesu Keriso, o le na fetalai o Ia “o le malamalama o le lalolagi,”23 o le ala e manaomia ona tatou mulimuli ai ia iloa ai faamanuiaga silisili a lo tatou Tama Faalelagi. Na te aoao mai i tatou e ala mai i tusitusiga paia, e ala mai i Ana perofeta, e ala mai i faaaliga i le tagata lava ia. E alofa o Ia ia i tatou ma o le a taialaina i tatou a o tatou saili e mulimuli i le mea Na Te taitai tatou i ai.
IV.
O se faafitauli e fesootai ma sili ona masani ai o le lagonaina lea o le tosina faavalea i tagata o le itupa tutusa. Ioe, afai e le faatinoina, o na faatosinaga e le o ni agasala. Ae e faapefea ona tatou taulimaina ia ituaiga lagona, i totonu o i tatou po o isi?
O la’u fautuaga muamua o le manatua po o a lava o tatou lava tulaga i eseesega o foafoaga a lo tatou Tama o i le Lagi, e alofa lava o Ia ia i tatou uma, ma o loo i ai se nofoaga o Lana fuafuaga atoatoa o le fiafia mo tagata uma. Tatou te faaalia lo tatou alofa mo Ia e ala i le tausia o Ana poloaiga, e aofia ai ma le alolofa mo Ana fanau.
A o taulima e tagata ma tauaiga na ituaiga o lagona, e ao ona latou faaeteete i le faapipii o igoa valaau. Na saunoa Peresitene Russell M. Nelson e uiga i lenei mea i le faigalotu mo le lalolagi atoa i le tausaga na te’a nei. Sa ia aoao mai e faapea e matua’i tapuia lava le faapipii o igoa valaau ona e vaeluaina ai i tatou ma tapulaa ai le ala e mafaufau ai tagata e uiga ia i tatou lava ia ma i le tasi ma le isi. E faapena foi, sa ia aoao mai, “E le tatau i se faailo ona aveesea, suitulaga, pe faamuamua foi i lo nei faailoga tumau e tolu: ‘atalii/afafine o le Atua,’ ‘tama o le feagaiga,’ ma le ‘soo o Iesu Keriso.’ Ona ia lapata’i mai lea:
“Soo se igoa e iloa ai outou e le ogatusa ma nei faailoga autu e tolu o le a iu lava ina latou faatoilaloina outou. O isi igoa valaau o le a tou le fiafia ai i se taimi ona e le o ia i latou le mana e taitai atu ai outou e agai atu i le ola e faavavau i le malo selesitila o le Atua.”24
O le mea e i ai le mana e taitai atu ai i tatou i le ola e faavavau ma le malo selesitila o feagaiga tatou te osia. Na toe aoao mai foi i tatou e Peresitene Nelson i le tausaga na te’a nei:
“O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē pa’u ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou. Ua tofu i tatou ma se nofoaga faapitoa i le finagalo o le Atua.”25
Ona, oo lea i ni nai masina talu ai, sa toe faamanatu mai ai foi e Peresitene Nelson ia i tatou e faapea “o le tausia o feagaiga e faafaigofie moni ai lava le olaga! O tagata taitoatasi e osia feagaiga … ua ia faateleina le avanoa e maua ai le mana o Iesu Keriso.”26
E faaopoopo i le mana faaletagata lava ia lea e sau mai le tausiga o feagaiga, o le aoaoga matagofie a lo tatou Faaola e faapea, i le lotolotoi o luitau o le olaga faitino, e ao ona tatou “lototetele.”27
I se saunoaga i le lalolagi atoa i ni nai masina talu ai, sa faamanatu mai ai ia i tatou e Elder Jeffrey R. Holland e faapea, na tuuina mai e Iesu lena aoaoga i le po o Lona Faasatauroga. E mafai faapefea ona Ia talanoa e uiga i le lototele i le lotolotoi o mafatiaga uma sa feagai ma Ia? Sa faamatala e Elder Holland:
“E oo lava foi i le “siomaga matautia sa laualuga i le Tausamaaga Mulimuli, i le totonugalemu o le Vaiaso o le Paseka, ae o loo faamanatu atu pea e Keriso i Ona soo le mafuaaga ma lo latou tiute ‘ia lototetele’ [Ioane 16:33]. …
O le mea moni, o lenei faaaliga o Lona faatuatua, o Lona faamoemoe ma le alofa moni, e sau ona ua Ia silafia le faaiuga o le tala. Na te silafia e manumalo le amiotonu pe a mae’a tusi faai’u. Na te silafia o le malamalama e faatoilaloina e le aunoa le pouliuli e faavavau ma faavavau ma faavavau lava.”28
Kristen, e te manao e fai atu ni nai upu faai’u i lenei vaega faapelepele?
Sister Oaks: O mea uma sa ma fai atu ai iinei e mafai ona aumaia ai faamanuiaga i o tatou olaga. Ua tatou iloa uma le tala e uiga i le fanauga a Isaraelu ina ua osofa’ia e gata uogo i le vao. Ae i le po nei o lau tala foi lenei. E pei ona sa faatonuina ai e le Atua, sa faia e Mose se tootoo e faatusa i lo tatou Faaola, o Iesu Keriso. Ona valaau atu lea o Mose i tagata uma e vaai i luga ona faamaloloina ai lea o i latou mai o latou manu’aga.
O le po nei, e faapei foi o Isaraelu, ua osofa’ia i tatou ona o o tatou talitonuga eseese tatou te faapaiaina. Ou te ole atu foi ia te outou, e vaai i le Atua ma ola ai. Vaai i upu na laugaina i le po nei, o upu a lo tatou perofeta, o tusitusiga paia, o le ata o le faaolataga, ma o outou faamanuiaga faapeteriaka. Tatalo ona faatasi lea o le Alii ma outou. E le faapea la soo se tasi o i tatou o le a aunoa ma se tiga, ae o lona uiga o le a le tuulafoaiina lava i tatou, ma o le a tatou agai i luma o taialaina ma puipuia mai mea leaga e siomia ai i tatou. O lona uiga o le a tatou iloa le upumoni ma talisapaia le Agaga. Ou te valaaulia outou e vaai i le Atua ma ola ai.
V.
President Oaks: Ua ma talanoa atu e uiga i le ata o le faaolataga---o vaega uma e tolu ua faaalia mai, aemaise o le faamoemoega o lenei olaga faitino.
Ua ma talanoa atu e uiga i le matafaioi ma le taimi o faaipoipoga ma fanau.
Ua ma aoao atu e tatau ona tatou maelega e saili ia iloa Iesu Keriso, ia lagonaina Lona alofa, ma ia faatuatua ia te Ia ma Lana taitaiga alofa i luga o le ala o feagaiga i lo tatou taunuuga e faavavau.
Ua ma talanoa atu e uiga i poloaiga sili e lua--alofa i le Atua ma alofa i o tatou tuaoi--ma sa aoao atu e ao ona mataituina uma le lua.
I o outou atugaluga uma, a o outou galulue i o outou luitau uma, matou te uunaia outou ia lototetele, aua ua uma ona Ia manumalo i le lalolagi. Tatou te mafaia foi. Manatua, o le fuafuaga a lo tatou Tama o se fuafuaga o le fiafia.
Ou te molimau atu o lo tatou Faaola o Iesu Keriso, o le ala, le upumoni, ma le ola. I Lona suafa paia, le suafa o Iesu Keriso, amene.