Mga Komentaryo ni Elder ug Sister Gilbert

Tibuok Kalibotan nga Debosyonal alang sa mga Young Adult

Elder Clark G. Gilbert ug Sister Christine Gilbert

Dominggo, Mayo 5, 2024

Elder Clark G. Gilbert: Salamat, Elder ug Sister Godoy. Sayo niining semanaha giingnan nako ang akong asawa nga tawgon mi sa mga Godoy aron mopakigpulong og makadiyot. Ug miingon siya, “Sige, pila ka tawo ang naa didto?” Ug miingon ko, “Ah, pipila ka libo ka tawo sa Tabernakulo, unya gatosan ka libo sa tibuok kalibotan. Ayaw kabalaka.”

Natudloan kamo karong gabhiona sa gamhanan kaayo nga paagi. Elder ug Sister Godoy, salamat sa maayo kaayong pagtudlo sa mga young adult. Malipayon kami sa daghang mga oportunidad nga naangkon nako ug ni Christine aron makakat-on ug makighimamat sa mga young adult sa tibuok Simbahan. Maanindot kaayo ang pagpaminaw sa mga Godoy karong gabhiona. Kon modagko na mi, gusto namong mahisama sa mga Godoy. Klaro nga gibati nila ang mga panginahanglan ug mga kabalaka sa mga young adult ug nahigugma kaayo sila kaninyo.

Ang talagsaon alang kanako mao nga ang ilang mga mensahe nakasentro kaayo kang Kristo ug gibase sa propetikanhong mga pagtulun-an. Samtang naminaw ko nilang duha karong gabhiona, murag sama kini sa propetikanhong pagpalanog sa mga mensahe nga bag-o lang gihatag sa ubang tibuok kalibotan nga mga debosyonal sa young adult gikan nila ni Presidente Nelson, Presidente Oaks, ug ubang apostolikanhong mga lider. Mohunong kita sa makadiyot ug mamalandong sa mga tema nga gipaila sa mga Godoy kaninyo karong gabhiona:

1. Pagkahimong sakop ni Kristo ug ang atong mga Pakigsaad

2. Pagpakig-date

3. Pagdawat og Personal nga Pagpadayag

4. Mga Sundanan sa Pagserbisyo

   • Ang Templo

   • Mga Misyon

5. Pagkahigugma ug Kaminyoon

6. Ang Importansiya sa Pagtambong sa Institute

Dili lang nga gipakigbahin sa mga Godoy kaninyo ang ilang panaw, gihimo usab nila kini sa personal ug sa mabinationg paagi. Nanghinaot ko nga inyo kanang makita isip usa ka pagpahayag sa ilang gugma ug kamanggihunahunaon alang kaninyo. Gipakigbahin usab nila ang ilang mensahe sa mga paagi nga nakapalanog sa propetikanhong tambag ug nagpahinumdom nga gibuhat nato kining tanan diha ug pinaagi sa atong Manluluwas nga si Jesukristo.

Sister Christine Gilbert: Usa sa akong paborito nga mga imahe gikan niining gabhiona mao ang hulagway sa mga Godoy isip batan-ong magtiayon. Si Mônica madasigon kaayo og panagway, samtang si Carlos medyo gikulbaan!

Karon itandi kana sa hulagway sa tibuok nga nagkadaghan og sanga nga pamilya sa mga Godoy.

Naghunahuna ko kon ang batan-ong Carlos ug Mônica nakahanduraw ba nianang umaabot nga mga anak, bag-ong mga umagad, ug mga apo sa tanang milabay nga mga tuig. Nahanduraw ba kaha nila ang graduate school, karera, pagsugod ug pagpadako og pamilya, pagserbisyo sa Simbahan, pagpuyo tabok sa kalibotan, ug karon ang ilang calling isip dayag nga mga lider sa Simbahan? Gihigugma namo sila si Elder ug Sister Godoy. Gitan-aw namo sila isip mga higala ug mga ehemplo sa unsay inyong mabuhat kon kamo motuman sa mga pakigsaad, mosunod sa ebanghelyo, ug mopaapil sa Ginoo sa inyong panaw. Mobarog ko isip usa ka saksi nga kon atong paapilon ang Ginoo, Iyang giyahan ang atong mga tinguha ug palamboon ang atong labing maayong paningkamot.

Elder Gilbert: Ang pagpamalandong sa panaw sa mga Godoy ug sa ilang sumbanan sa pagpaapil sa Ginoo nakapahinumdom nako sa personal kaayo nakong kasinatian kauban ni Elder Godoy unom ka tuig na ang milabay.

Nagserbisyo ko niadto isip Presidente sa BYU–Pathway Worldwide, ug si Elder Godoy mao ang Pangulo sa Area sa South America Northwest Area, nga adunay punoang buhatan sa Lima, Peru.

Ang Peru usa ka talagsaon nga dapit sa Simbahan nga adunay kapin sa 40 ka stake ug karon adunay duha ka templo. Aduna kitay liboan ka estudyante sa BYU–Pathway sa Peru. Nianang gabhiona, sama niining gabhiona, among gihangyo si Elder Godoy sa pagpakigpulong sa mga young adult mahitungod sa ilang panaw sa edukasyon.

Si Elder Godoy nag-andam og pakigpulong, apan samtang nag-uban mi sa paglingkod sa pulpito nga nagtan-aw sa tanang mga estudyante, nabug-atan siya sa unsay among gihangyo kanila nga ilang buhaton. Natandog ang iyang pagbati samtang naghunahuna siya niining mga young adult nga nagkat-on og Iningles, nagkuha og mga kurso sa kolehiyo, kanang tanan samtang nagtrabaho og full-time ug nagtuon sa ikaduhang pinulongan. Nabuntog sa emosyon, si Elder Godoy mibaliwala sa iyang giandam nga mga pamahayag, mibarog, ug mipahayag uban sa kaisog: “Ang among gihangyo kaninyo nga buhaton lisod—ilabi na kon maningkamot kamo sa pagbuhat niini nga kamo ra. Ang bugtong paagi nga inyo kining mahimo mao ang pagpaapil sa Ginoo sa inyong pagkat-on. Himoa ang Ginoo nga inyong kauban, ug ang tanang maayong butang moabot kaninyo sa tukmang panahon.”

Si Elder Godoy nahibalo niadtong tungora kon unsa tingali ang wala pa niya hingpit masabti sa tanang katuigan nga milabay sa dihang siya usa pa ka young adult sa Brazil nga nagsul-ob og bell-bottom nga karsones: ang bugtong paagi nga kamo mahimong matang sa tawo nga kamo kinahanglan nga mamahimo sa umaabot ug makakaplag og kalipay sa panaw mao ang pagpaapil sa Ginoo. Karong gabhiona, nakakita kita og pagpamatuod niana nga baroganan. Sila si Carlos ug Mônica Godoy maoy buhi nga mga panig-ingnan kon unsa ang atong mahimo kon atong ibutang ang atong pagsalig sa Ginoo ug himoon siya nga atong kauban.

Gimahal namo kini nga magtiayon, ug among gidayeg ang ilang mensahe alang kaninyo. Si Christine ug ako mopakigbahin sa among pagsaksi nga kon inyong paapilon ang Ginoo sa inyong mga paningkamot, mohimo Siya og mga milagro sa inyong kinabuhi. Amo kining gisulti sa ngalan ni Jesukristo, amen.