Hugot nga Pagtuo sa Umaabot
Tibuok Kalibotan nga Debosyonal alang sa mga Young Adult
Mayo 5, 2024
Salamat kaayo, Elder ug Sister Gilbert, sa inyong nindot kaayo nga tambag. Ug ako nakahinumdom niana nga kasinatian sa Peru ug sa imong mga pagtulun-an ug kon unsa kabulahan kami ug sila tungod sa imong mga pagtulun-an niadtong mga panahona.
Gusto nakong taposon ang akong mga komentaryo gamit sa usa ka pulong: paglaom.
Ako nagtuo nga mas sayon lang para kanamong mga mas hamtong sa pag-ila sa impluwensiya sa Ginoo diha sa among mga kinabuhi kay sa mga mas batan-ong katawhan. Tungod kay kami nabuhi og mas daghang katuigan ug nakabaton og mas daghang kasinatian sa among mga kagahapon, kami makahimo sa pagtan-aw sa nanglabay na ug makita ang impluwensya sa usa ka mahigugmaong Langitnong Amahan nga naggiya kanamo ug nanalipod kanamo sa tibuok namong kinabuhi.
Sa paghandom og balik karon, ako moangkon nga daghang mga higayon nga nagtuo ko nga ako nag-inusara, dili diay. Akong nakita karon nga kon ang ubang mga kahigayonan mosira ug ako naghunahuna kon ngano ug nagreklamo kabahin niini, sa dihang nagtuo ko nga ang akong mga pag-ampo wala gitubag, sa pagkatinuod, laing kahigayonan, sa laing higayon, o sa laing dapit giablihan ngadto sa usa ka mas maayo nga dalan. Apan wala nako kadto masabti niadtong mga panahona. Apan makita nako kini karon, sa pagbalik og tan-aw.
Sa daghang higayon, nagtuo ko nga ako ang nakahimo og usa ka maalamon nga mga desisyon pinaagi sa akong kaugalingon o uban ni Mônica, nagtuo nga ako ang maalam sa pagpalig-on sa akong hayag nga kaugmaon. Akong makita karon ang usa ka dili makita nga impluwensya nga nagpaluyo nga naggiya kanako ug nanalipod kanako gikan sa posibling kasaypanan. Akong makita nga Siya kanunayng anaa alang kanako.
Mao kana kon nganong ako makapamatuod nga kita adunay Amahan sa Langit kinsa nakaila kanato ug nagpakabana kanato. Ako makapamatuod nga kita adunay usa ka Manluluwas kinsa nahigugma kanato ug andam sa pagtabang kanato sa bisan unsa nga kahimtang sa atong mga kinabuhi.
Usahay, ang pipila kaninyo mahimong maghunahuna nga walay nasayod kon unsa ang inyong gisagubang sa inyong kinabuhi, ug tingali sakto kamo; wala kami masayod. Apan ang Manluluwas nasayod. Si Elder Bednar nagtudlo kanato:
“Walay pisikal nga kasakit, walay tumang kaguol sa kalag, walay pag-antos sa espiritu, walay sakit o kahuyang nga inyo ug akong masinati panahon sa atong mortal nga panaw nga wala masinati og una sa Manluluwas. Kamo ug ako sa panahon sa kahuyang makatuaw, ‘Walay nakasabot. Walay nakahibalo.’ Walay tawo, tingali, ang nakahibalo. Apan ang Anak sa Dios hingpit nga nahibalo ug nakasabot, kay Siya mibati ug mipas-an sa atong mga palas-anon una pa kay kanato. Ug tungod kay Iyang gibayaran ang hingpit nga bugti ug mipas-an sa palas-anon, Siya makasabot kanato sa hingpit ug ikatunol ngari kanato ang Iyang mga bukton sa kaluoy sa daghang yugto sa atong [mga] kinabuhi.”
Sa Alma 7 nakakat-on kita kon unsaon ug nganong ang Manluluwas makahatag niining matang sa tabang.
“Ug siya magpadayon, mag-antos sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.”
Busa, ang Manluluwas nag-antos dili lamang alang sa atong mga pagkadaotan, apan usab sa walay kaangayan, sa kasakit, sa tumang kaguol, ug sa tanang emosyonal nga kasub-anan nga mahimo natong sagubangon sa tibuok natong kinabuhi.
Ug dayon si Alma mitapos:
“Ug siya modala diha kaniya sa kamatayon, nga siya mahimo nga mobadbad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kaluoy, sumala sa unod, nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang.”
Ako adunay personal nga pagpamatuod niining langitnong tabang. Ako kining nasinati sa akong pagkabatan-on, sa akong kaminyoon, sa akong pagkaginikanan, ug sa akong kinabuhi sa pagpangulo. Ako nasayod nga ang akong Manluluwas buhi ug pinaagi sa Iyang grasya ug sa mga panalangin sa Iyang Pag-ula, kita makabaton og paglaom ug hingpit nga kalipay niining kinabuhi ug usa ka mahangtoron nga pamilya sa sunod.
Ako mopamatuod niini, sa tibuok kong gugma, sa ngalan ni Jesukristo, amen.