7:42

iTukutuku Me Nodra Na iTabagone Qase Cake

Lotu ni iTabagone Qasecake e Vuravura Raraba

Sister Susan K. Bednar

Sigatabu, 3 ni Noveba, 2024

Sa ka marautaki dina na nei rau tiko tale e Byu–Idaho, na vanua keirau kila vinaka ka taleitaka vakalevu sara. Nia veiqaravi tiko o Eldar Bednar vaka peresitedi ni BYU–Idaho, o iratou na luvei keirau era a se itabagone qase cake tiko kina. Ena bogi ni kua, keirau tiko eke vata kei iratou na makubui keirau itabagone qase cake! Au masuta me na tiko vata kei keda na Yalo Tabu niu wasea eso na vakasama kei na veika e tiko ena noqu vakanananu kei na yaloqu.

Ena vica na yabaki sa oti, keirau a tiko kei Elder Bednar ena dua na lotu ni taro-kei-na-saumi taro vata kei na dua na ilawalawa levu ni itabagone qase cake. Au a raica lesu wale tiko ga oqo na vei drau na taro era a vakau mai kau luvuci ena levu ni taro me baleta na rere, na lailai ni veinuitaki kei na veivakabauti, kei na vakatitiqa vakai koya. Kau nanuma me vakanamata na noqu vosa nikua ena so na veitaro oqo, ka wasea vei kemuni eso na rai vakaivolanikalou kei na veika sotavi yadua kau nuitaka ni na veivuke ena nomuni bula—nikua kei na veisiga ni mataka.

E rairai rawa nio vakila talega na veika oqori nio rogoca na veitaro oqo:

Eda na sosomitaka vakacava na rere ena loloma Va Karisito kei na vakabauta?
Meu na tudei tiko vakacava ena gauna au vakila kina niu malumalumu?
Meu na vulica beka vakacava meu vakararavi vua na Kalou?

Au kila nida sa na sotava oti na kauwai vakaoqo.

Na ivolanikalou kau vinakata meu vakayagataka me yavu ni noqu vosa ena bogi nikua e kunei ena Aisea 41:10:

“Kakua ni ko rere; niu sa tiko vata kei iko: kakua ni ko taqaya niu sa nomu Kalou: kau na vakaukauwataki iko; io, kau na vukei iko; io kau na tokoni iko ena ligaqu imatau sa dau dina.”

Au nuitaka, ni noda vulica vata na ivolanikalou oqo me vica na miniti, ona ciqoma kina eso na veiuqeti ka na vukei iko mo sosomitaka na nomu rere ena loloma Va Karisito kei na vakabauta, ka kunei edua na veivakadeitaki titobu nio rawa ni tudei tiko nio vakila na malumalumu, ka nuidei vakai iko nio vulica mo vakararavi vua na Kalou.

“Meda tekivu, meda vakananuma mada na imatai ni tiki ni Aisea 41:10:

“Kakua ni rere; niu sa tiko vata kei iko: kakua niko taqaya.”

Nanuma lesu mada na italanoa ena Luke 24 ena siga ni tucaketale i Jisu, nirau a taubale tiko erua vei ira na daumuri Koya mai Jerusalemi ki Emeo.

Ea tomani rau e dua na vulagi ena sala ka taroga se cava na vuni nodrau rarawa. E rau a kidroaka ni sega ni kila na tamata oqo na ka a yaco e Jerusalemi, ka rau tukuna Vua na veika a yaco ena tolu na siga sa oti. E rau a wasea na nona a beitaki vakailasu o Jisu ka totogitaki me mate, vakoti ki na kauveilatai, ka qai tucaketale ena cakacaka mana levu. E rau a sega ni kila na lewe rua oqo me yacova ni sa lai cava na ilakolako vitu-na maile oqo, niratou a taubale vata tiko kei na Turaga Vakaikoya ka sa tucake tale mai na mate.

Na cava e rui bibi kina na italanoa oqo? Baleta niu vakabauta nio Jisu e salavata tiko kei kedaru ena nodaru ilakolako ena bula oqo ka da sega tu ni kila ena levu na gauna. E tiko vata kei keda o Koya. Eda na sosomitaka vakacava na rere ena loloma Va Karisito kei na vakabauta? Nanuma na malanivosa oqo mai vei Aisea:

“Kakua ni rere; niu sa tiko vata kei iko: kakua niko taqaya.”

Meda railesuva mada oqo na ikarua ni tiki ni ivolanikalou oqo:

“Niu sa nomu Kalou: Kau na vakaukauwataki iko; io Au na vukei iko.”

Ena gauna keitou a tiko kina eke e Rexburg ena vica na yabaki sa oti, au a draiva sobu ki Salt Lake vei tavalequ ena siga ka sele kina o watina tagane. Ea dua dina na gauna veilecayaki, ka oti na noqu raici watina au a kila na vuni nona lomaleqa. Ea sega ni vinaka na nona bula cake mai, ka ratou nanuma kina na nona vuniwai me soli vua na dra.

Au se bera vakadua ni raica e dua na soli dra kau kidroataka na kena drodro vakamalua sobu na dra ena tiubu ki na nona sala ni dra. Niu sarava toka, au a nanuma sara na noda iVakabula kei na levu ni dra a vakadavea o Koya ena vukuqu. Ena loma ga ni vica na aua, au a raica kina na bula vou, na igu kei na kaukauwa a yaco ena soli ni dra.

Ia ena dua na sala ka sega ni matata seu kila rawa, na veisorovaki i Jisu Karisito e solia vei keda na kaukauwa kei na veivuke meda cakava kina na veika dredre. Eda vakalougatataki meda cakava na veika eda sega ni nanuma nida rawa ni cakava. Meda na tudei tiko vakacava nida vakila nida malumalumu? Nanuma na malanivosa oqo mai vei Aisea:

“Niu sa nomu Kalou: Au na vakaukauwataki iko; io, Au na vukei iko.”

“Meu wasea mada eso na vakasama me baleta na iotioti ni malanivosa ni Aisea 41:10:

“Kau na tokoni iko ena ligaqu imatau sa dau dina.”

Na liga imatau e kilai tu me liga ni veiyalayalati. Ena vuku ni noda isema ni veiyalayalati vata kei Karisito, eda na rawa ni nuidei ni noda iVakabula ena laveti, maroroi, ka tokoni keda.

Oqo e vakananumi au ena italanoa ena Maciu 14 ena nodratou tiko na tisaipeli i Jisu ena dua na waqa e loma ni wasawasa ka suaigelegele tiko ena cagi leca kei na ua. A raici Jisu o Pita ni taubale tiko e dela ni wai ka kerei Jisu me kacivi koya me lako yani Vua. A rokova o Jisu na kerekere oya, ka a tekivu me taubale o Pita e dela ni wai vei Koya. A sega ni yaco na leqa ni rai matua tiko vei Jisu o koya. Ia ena gauna e raica kina o Pita ni sa kaukauwa na cagi, sa tekivu me lutu dromu ka kacivi Jisu me vakabulai koya. “Sa qai dodoka sara na ligana ko Jisu, a sa taura.” Kau vakadinata sara ni na vueti keda cake tale ga o Koya.

Eda na vulica vakacava meda nuitaka na Kalou? Nanuma na malanivosa oqo mai vei Aisea:

“Kau na tokoni iko ena ligaqu imatau sa dau dina.”

Au vakadinadinataka ni kilai keda ka lomani keda na Tamada Vakalomalagi. Au vakadinadinataka nio Jisu Karisito e noda iVakabula ka Dauniveivueti. O Koya e salavata tiko kei keda; O Koya e vakaukauwataki keda tiko; O Koya e vukei keda tiko. Ka da nuidei nio Koya ena laveti, maroroi, ka tokoni keda nida nanuma na keda isema ni veiyalayalati vata kei Koya. Au kila ni Yalo Tabu e daunivakatakila ka dau kauta mai na vakanananu ki na noda vakasama kei na veika e vakilai ki yaloda. Au kila nio Elder Bedna e kacivi mai vua na Kalou, “ena parofisai, kei na veitabaki ni liga.” O koya e iApositolo ni Turaga, o Jisu Karisito.

Ena yacai Jisu Karisito, emeni.