“Ebɛnadze na Hɛn Agyenkwa Ayɛ ama Hɛn?,” Ma Mbasirmba Enya Ahoɔdzen, Esusow Aketseaba 2021.
Asɔfodzi Nhyiamu
Ebɛnadze na Hɛn Agyenkwa Ayɛ ama Hɛn?
Woetwa no esinesin
Ebɛnadze na Jesus Christ ayɛ ama hɛn mu kor biara? Ɔayɛ biribiara a ohia kɛse wɔ hɛn ɔnnkyebo akwantu yi mu dze kɔ nkrabea a wɔahyehyɛ ama hɛn wɔ hɛn Ɔsor Egya ne nhyehyɛɛ mu. Mebɛkasa afa dɛm nhyehyɛɛ no botae tsitsir anan ho. …
Wusoɛr no ma hɛn nhumu na ahoɔdzen a yɛdze bɔsɔw ɔnnkyebo abrabɔ mu ɔhaw horow a hɛn mu kor biara na hɔn a yɛdɔ hɔn no behyia. Ɔma hɛn kwan fofor a yɛdze bɔhwɛ honandua mu, adwen mu, anaa nkã-tse mu esintɔ horow a wɔdze woo hɛn anaa yebenyaa no wɔ abrabɔ yi mu. Ɔma hɛn ahoɔdzen ma yɛdze sɔw awerɛhow, nkõgu, na abagura horow.
Wusoɛr no so ma hɛn nkamfo a ɔyɛ ndam dɛ yebesie Nyankopɔn ne mbrasɛm wɔ hɛn ɔnnkyebo abrabɔ yi mu. …
Hɛn Agyenkwa na Pomfo no sɔɔw amandzehu a yennkotum atse ase dze bɛyɛɛ afɔrbɔ ama adasamba nyina a wonu hɔnho no hɔn bɔn. Werdam afɔrbɔ yi dze papa mu dza ɔyɛ abɔsõ koraa no, eguambaa no a dzɛm nye nkekaa nnyi no ho, maa ɔbɔn mu bɔn kɛse koraa no, wiadze nyina bɔn no. …
… Jesus kyerɛkyerɛɛ hɛn nkwagye ho nhyehyɛɛ no. Nhyehyɛɛ yi Wiadze no Mbɔe, abrabɔ no botae, dza otsia ho hia a ohia, na nyimpa ne pɛ akyɛdze, kã ho. Ɔkyerɛkyerɛɛ hɛn so mbrasɛm na ahyɛmu a otwar dɛ yɛyɛ setsie na ayɛdze horow a otwar dɛ yenya mu sũahu a ɔdze hɛn bɛsan akɔ hɛn sor awofo nkyɛn. …
Hɛn Agyenkwa tse na onyim hɛn nsɔhwɛ, hɛn aperdzi, hɛn akoma mu yaw, na hɛn amandzehu horow, osiandɛ ɔpɛ mu ara Ɔfaa dɛm sũahu yi nyina mu dɛ ɔkã No Werdambɔ no ho. … Hɔn a wohu amandze wɔ ɔnnkyebo abrabɔ mu mbrɛwyɛ horow yi, ɔwɔ dɛ wɔkaa dɛ hɛn Agyenkwa so nyaa dɛm yaw yi bi ma ɔnam No Werdambɔ no do, Ɔma hɛn ahoɔdzen ma yetum dze gyina ano.