Bulanan nga Mensahe sa Liahona, Mayo 2023
Mga Makigdaeton Kinahanglanon
Pwede kamo magpili nga makigbais ukon makig-uli. Ginapangabay ko kamo nga pilion ninyo nga mangin makigdaeton, karon kag sa tanan nga oras.
Mahal kong mga utod, nalipay ako nga makaupod kamo! Sining nagligad nga anom ka bulan, pirme ko kamo ginapanumdom kag ginapangamuyoan. Ginapangamuyo ko nga ipalab-ot sa inyo sang Balaan nga Espiritu kon ano ang gusto sang Ginuo nga inyo mabatian samtang nagahambal ako sa inyo karon.
Sang intern ako sa pagpang-opera madamo na nga tuig ang nagligad, nagbulig ako sa doktor nga nagautod sang tiil nga gin-ut-ot sang makalalaton nga gangrina. Mabudlay ang operasyon. Dayon, nadugangan pa gid, kay waay nahimo sing maayo sang isa namon ka upod ang isa ka ulobrahon, kag naglupok sa kaakig ang doktor. Sa iya kaakig, ginhaboy niya ang iya scalpel nga puno sang kagaw. Nagtupa ini sa akon braso!
Ang tanan sa operating room—magluwas sa nagamaoy nga doktor—nabalaka sa sining delikado nga paglapas sang pangginawi sa medisina. Maayo lang, wala ako malatni. Pero ini nga eksperiyensya naghatag sa akon sang pagtulun-an. Sa sina mismo nga tion, nangako ako sa akon kaugalingon nga bisan ano ang matabo sa akon operating room, indi gid ako magpadala sa akon mga emosyon. Nangako man ako sina nga adlaw nga indi gid ako manghaboy sang bisan ano tungod sa kaakig—scalpel man ukon mga tinaga.
Bisan karon, mga dekada na ang nagligad, ginapanumdom ko kon ang mahigko nga scalpel nga nagtupa sa akon braso mas mahigko pa bala sangsa dalit sang kasingki nga makita naton sa aton paghinambalanay sa isa kag isa kag sa madamo nga personal naton nga mga relasyon karon. Ang pagkasibilisado kag pagkadisente daw nadula na sa sining panahon sang pagbinahin-bahin kag mainit nga mga pagbinaisay.
Ang pagpamuyayaw, pagpangita-sala, kag pagpakalain sang iban daw ordinaryo na lang. Kadamo kaayo nga mga eksperto, mga pulitiko, mga artista, kag mga influencer ang nagahaboy pirme sang pagpanginsulto. Nabalaka gid ako nga kadamo sang daw nagapati nga pwede lang magpakahuya, magpakanubo, kag magpakalain sang bisan sin-o nga lain ang panan-aw sangsa ila. Madamo ang daw maabtik sa pagguba sang reputasyon sang iban gamit ang masakit nga mga tinaga!
Ang kaakig wala gid nagakumbinsi. Wala nagapabakod ang kaawayon. Ang pagbinaisay wala nagadala sang inspirado nga mga solusyon. Ang masubo, kon kaisa makita naton ang pamatasan sang kasingki bisan sa aton mga kaupdanan. Makabati kita parte sa mga nagapakanubo sa ila mga asawa kag kabataan, sang mga nagagamit sang kaakig para kontrolon ang iban, kag sang mga nagasilot sa mga miyembro sang pamilya paagi sa “indi pagsapak.” Makabati kita parte sa mga lamharon kag mga kabataan nga nagapang-bully kag sang mga empleyado nga nagapakalain sang ila mga kaupod sa trabaho.
Pinalangga kong mga kauturan, indi ini dapat. Bilang mga disipulo ni Jesucristo, kinahanglan naton mangin mga ehemplo kon paano makigbagay sa iban—labi na gid kon lainlain ang aton mga opinyon. Isa sa pinakahapos nga paagi para makilala ang tunay nga sumulunod ni Jesucristo amo ang kon paano niya ginatratar ang iban nga mga tawo.
South Africa
Ginklaro ini sang Manluluwas sa mga wali Niya sa duha ka bahin sang kalibutan. “Bulahan ang mga makigdaiton,” siling Niya.1 “Kon tampaon ka sa imo tuo nga guya, itaya man ang imo pihak nga guya sa iya.”2 Kag dayon, siyempre, ginhatag Niya ang sugo nga nagahangkat sa aton tanan: “Higugmaa ninyo ang inyo mga kaaway, pakamaayohon ninyo sila nga nagapakalain sa inyo, himoi sang maayo ang mga naakig sa inyo, kag pangamuyoi ninyo ang mga nagagamit sa inyo, kag nagahingabot sa inyo.”3
Antes Sia mapatay, ang Manluluwas nagsugo sa Iya Dose ka Apostoles nga magpalanggaanay pareho sang Iya pagpalangga sa ila.4 Kag dayon Iya gindugang, “Sa sini ang tanan nga tawo makahibalo nga kamo mga gintutun-an ko, kon maghigugmaanay kamo.”5
Ang mensahe sang Manluluwas maathag: Ang tunay Niya nga mga disipulo nagapabakod, nagapataas, nagapaisog, nagakumbinsi, kag nagapapagsik—bisan ano kabudlay sang sitwasyon. Ang matuod nga mga disipulo ni Jesucristo mga makigdaeton.6
Subong ang adlaw nga Domingo de Ramos. Nagahanda kita sa pagpamalandong sang pinakaimportante kag mahimayaon nga hitabo nga nasulat sa duta, ang Pagbayad-Sala kag Pagkabanhaw sang Ginuong Jesucristo. Isa sang pinakamaayo nga mga pamaagi nga tahuron naton ang Manluluwas amo ang mangin makigdaeton.7
Ang Pagbayad-Sala sang Manluluwas nagpatigayon nga malampuwasan naton ang tanan nga kalainan—dala na ang pagbinaisay. Tandaan ta gid: ang pagbinaisay matuod nga malain! Si Jesucristo nagsiling nga ang mga may “espiritu sang pagbinaisay” indi Iya kundi “iya sang yawa, nga amo ang amay sang pagbinaisay, kag ginasugyot [sang yawa] ang mga tagipusuon sang mga tawo sa pagpakigbais nga may kaakig, ang isa batok sa isa.”8 Ang mga nagaduso sang pagbinaisay nagapakigbahin sa hampang ni Satanas, nahibal-an man nila ukon wala. “Wala sing tawo nga makaalagad sa duha ka mga agalon.”9 Indi kita makasuporta kay Satanas paagi sa pagpasipala sa iban kag dayon magserbisyo gihapon sa Dios.
Pinalangga kong mga utod, importante ang pagtrato naton sa kada isa! Importante kon paano kita maghambal sa kag parte sa iban sa balay, sa simbahan, sa trabaho, kag online. Sini nga adlaw, ginapangabay ko nga makigbagay kita sa iban sa mas mataas, mas balaan nga paagi. Palihog pamatii sing maayo. “Kon may bisan ano nga butang nga matarong, matahum, ukon dungganon ukon dalayawon”10 nga pwede naton ihambal parte sa isa ka tawo—sing atubangay ukon bisan wala sia—amo ina dapat ang aton sulundan sa komunikasyon.
Kon may mag-asawa sa inyo ward nga nagbulagay, ukon isa ka lamharon nga misyonero nga nagpuli temprano, ukon tin-edyer nga nagaduhaduha sa iya testimonya, indi nila kinahanglan ang inyo paghusga. Kinahanglan nila maeksperiyensyahan ang putli nga gugma ni Jesucristo sa inyo mga tinaga kag mga aksyon.
Kon may abyan ka sa social media nga may mabaskog nga panan-awon sa pulitika ukon sa sosyedad nga nagalapas sa tanan mo nga ginapatihan, ang pagsabat nga may kaakig indi makabulig. Ang pagtukod sang mga taytay sang pag-intiendihanay mangin mas mabudlay himuon para sa imo, pero amo ina mismo ang ginakinahanglan sang imo abyan.
Ang pagbinaisay nagatabog sang Espiritu—pirme. Ang pagbinaisay nagapabakod sang sala nga pagpati nga ang pagkomprontahanay amo ang sabat para masolbar ang mga indi pag-intiendihanay; pero indi ina matuod. Ang pagbais isa ka pagpili. Ang pagkamakigdaeton isa ka pagpili. Pwede kamo magpili nga makigbais ukon makig-uli. Ginapangabay ko kamo nga pilion ninyo nga mangin makigdaeton, karon kag sa tanan nga oras.11
Mga kauturan, pwede naton bag-uhon ang kalibutan sing literal—isa ka tawo kag isa ka paghinambalanay tagsa ka tion. Paano? Paagi sa pagpakita kon paano dalhon ang mga kinalain sang opinyon nga may respeto kag matinahuron nga paghinambalanay.
Ang mga kinalain sang opinyon parte sang kabuhi. Kaupod ko kada adlaw ang mapisan nga mga alagad sang Ginuo nga wala pirme nagasanto ang panan-aw sa mga isyu. Nakahibalo sila nga gusto ko mabatian ang ila mga ideya kag tampad nga mga balatyagon parte sa tanan namon nga ginahambalan—labi na gid sa sensitibo nga mga isyu.
Ang duha ko ka talahuron nga mga manuglaygay, si Pangulong Dallin H. Oaks kag Pangulong Henry B. Eyring, dalayawon sa pamaagi sang pagpabutyag nila sang ila mga nabatyagan—labi na gid kon indi ini pareho. Ginahimo nila ini nga may tunay nga pagpalangga sa isa kag isa. Wala sang nagasiling nga mas maalam sia kag gani dapat gid niya ipakigbato ang iya panindugan. Wala sa ila sang nagapakita nga kinahanglan nila magpaindisanay. Tungod pareho sila nga puno sang gugma sa isigkatawo, “ang putli nga gugma ni Cristo,”12 ang amon pagbinagbinag sarang magiyahan sang Espiritu sang Ginuo. Palangga ko gid kag ginatahod ining duha ka mga tawo!
Ang gugma sa isigkatawo amo ang pangontra sa pagbinaisay. Ang gugma sa isigkatawo amo ang espirituhanon nga regalo nga nagabulig sa aton nga malampuwasan ang kinaugali nga tawo, nga dalok, sensitibo, bugalon, kag mahisaon. Ang gugma sa isigkatawo amo ang mayor nga kinaiya sang tunay nga sumulunod ni Jesucristo.13 Ang gugma sa isigkatawo ang nagalarawan sang isa ka makigdaeton.
Kon ipaubos naton ang aton kaugalingon sa atubang sang Dios kag magpangamuyo upod ang tanan nga kusog sang aton mga tagipusuon, hatagan kita sang Dios sang gugma sa isigkatawo.14
Ang mga ginbugayan sining langitnon nga regalo malaba sing pasensya kag mabuot. Wala sila nagakahisa sa iban kag wala sila nagapaminsar sang ila kaugalingon nga importansya. Indi sila madali mangakig kag wala sila nagapaminsar sang malain sa iban.15
Mga kauturan, ang tunay nga gugma Cristo amo ang sabat sa kagamo nga nagahalit sa aton sa karon. Ang gugma sa isigkatawo nagatulod sa aton nga “magpas-an sang palas-anon sang isa kag isa”16 imbes nga magdugang sang palas-anon sang kada isa. Ang tunay nga gugma ni Cristo nagatugot sa aton nga “magtindog bilang mga saksi sang Dios sa tanan nga mga tinion kag sa tanan nga mga butang”17—labi na gid sa tensyonado nga mga sitwasyon. Ang gugma sa isigkatawo nagatugot sa aton nga ipakita kon paano maghambal kag mag-akto ang mga lalaki kag babayi nga sumulunod ni Cristo—labi na gid kon nagapangatubang sang kritisismo.
Tandai, wala ako nagahambal parte sa “kalinong sa bisan ano nga bili.”18 Nagahambal ako parte sa pagtratar sang iban sa pamaagi nga nagaugyon sa pagtuman sang kasugtanan nga inyo ginahimo kon mag-ambit kamo sang sakramento. Nagapangako kamo nga pirme panumdumon ang Manluluwas. Sa mga sitwasyon nga emosyunal kag puno sang kaawayon, ginahagad ko kamo nga dumdumon si Jesucristo. Magpangamuyo nga makaangkon sang kaisog kag kaalam para ihambal ukon himuon kon ano ang Iya himuon. Kon sundon naton ang Prinsipe sang Paghidaet, mahimo kita nga Iya mga manugpatigayon sang paghidaet.
Sa sini nga punto mahimo nga nagapanumdom kamo nga makabulig ini nga mensahe sa isa ninyo ka kilala. Siguro nagahandum kamo nga makabulig ini sa iya nga mangin mas mabuot sa inyo. Kabay pa matuod! Pero nagalaum man ako nga binagbinagon ninyo sing maayo sa inyo tagipusuon kon bala may mga tinipik sang bugal ukon kahisa nga nagapugong sa inyo nga mangin makigdaeton.19
Kon seryoso kamo sa pagbulig tipon sang Israel kag sa pagtukod sang mga relasyon nga magadugay tubtob sa mga katubtuban, subong na ang tiyempo nga ipaiway ang paghinakit. Subong na ang tiyempo sa pag-untat sa pagpakigbato nga ikaw lang gid ang sundon. Subong na ang tiyempo sa pag-untat sa paghimo sang mga butang nga daw nagapatihin sa iban kay basi mangakig ka. Subong na ang tiyempo sa paglubong sang inyo mga armas sa pagpakig-away.20 Kon ang imo panghambal puno sang pagpanginsulto kag pag-akusar, subong na ang tiyempo nga ipahigad ini.21 Magatindog kamo nga mabaskog sa espirituhanon nga mga lalaki ukon babayi nga sumulunod ni Cristo.
Ang templo makabulig sa aton pagtinguha. Makabaton kita sang gahum sang Dios didto, nga nagahatag sa aton sang ikasarang nga mapakigbatuan si Satanas, ang nagasulsol sang tanan nga kaawayon.22 Tabuga ang iya impluwensya sa inyo mga relasyon! Tandai nga ginatabog man naton ang kaaway tagsa nga ginabulong naton ang indi pag-intiendihanay ukon sa pagpaiway nga masaklaw. Sa baylo, mapakita naton ang hamili nga kaluoy nga kinaiya sang tunay nga mga disipulo ni Jesucristo. Ang mga makigdaeton nagatabog sang kaaway.
Himuon naton bilang isa ka katawhan nga mangin tunay nga kasanag sa bungyod—ang kasanag nga “indi malipdan.”23 Ipakita naton nga may matawhay, matinahuron nga pamaagi sa pagsolbar sang komplikado nga mga isyu kag mas maalam nga paagi sa paglubad sang indi pag-intiendihanay. Samtang ginapakita ninyo ang gugma sa isigkatawo nga tanda sang matuod nga mga sumulunod ni Jesucristo, padakuon sang Ginuo ang inyo mga pagpaninguha nga masobra pa sangsa pinakamataas ninyo nga mahunahuna.
Uruguay
Ang kawsa sang ebanghelyo amo ang pinakadako nga kawsa sa kalibutan. Ginaagda Niya ang tanan nga magpalapit sa Iya, “itom kag puti, ulipon kag hilway, lalaki man kag babayi.”24 May lugar para sa tanan. Pero, wala sing lugar para sa diskriminasyon, pagpakanubo, ukon tanan nga klase sang kaawayon.
Pinalangga kong mga kauturan, manug-abot pa ang pinakamaayo para sa mga nagapangabuhi sa pagpabakod sang iban. Sini nga adlaw ginahagad ko kamo nga usisaon ang inyo pagkadisipulo sa konteksto sang inyo pagtrato sang iban. Ginabendisyunan ko kamo sa paghimo sang bisan ano nga pagliwat nga kinahanglanon para nga ang inyo pamatasan mangin dungganon, talahuron, kag nagarepresentar sang matuod nga sumulunod ni Jesucristo.
Ginabendisyunan ko kamo nga buslan ang kasingki sang pagpasensya, ang kaawayon sang pag-intiendi, kag pagbinaisay sang paghidaet.
Buhi ang Dios! Si Jesus amo ang Cristo! Nagatindog Sia sa ulohan sining Simbahan. Iya kita mga alagad. Buligan Niya kita nga mangin mga makigdaeton Niya. Ginasaksi ko ini sa sagrado nga ngalan ni Jesucristo, amen.
© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, May 2023. Language. 19025 861