“ພຣະຜູ້ຊ່ວຍໃຫ້ລອດຂອງເຮົາໄດ້ເຮັດຫຍັງເພື່ອເຮົາ?,” For the Strength of Youth, ເດືອນພຶດສະພາ 2021.
ພາກຖານະປະໂລຫິດ
ພຣະຜູ້ຊ່ວຍໃຫ້ລອດຂອງເຮົາໄດ້ເຮັດຫຍັງເພື່ອເຮົາ?
ບົດຄັດຫຍໍ້
ພຣະເຢຊູຄຣິດໄດ້ເຮັດຫຍັງເພື່ອເຮົາແຕ່ລະຄົນ? ພຣະອົງໄດ້ເຮັດທຸກສິ່ງທຸກຢ່າງທີ່ຈຳເປັນຕໍ່ການເດີນທາງຂອງເຮົາ ຜ່ານຄວາມເປັນມະຕະ ເພື່ອໄປຫາຈຸດໝາຍປາຍທາງທີ່ລະບຸຢູ່ໃນແຜນຂອງພຣະບິດາເທິງສະຫວັນຂອງເຮົາ. ຂ້າພະເຈົ້າຈະກ່າວເຖິງຫລັກທຳສີ່ຢ່າງຂອງແຜນນັ້ນ. …
ການຟື້ນຄືນພຣະຊົນຊ່ວຍເຮົາໃຫ້ມີທັດສະນະ ແລະ ຄວາມເຂັ້ມແຂງທີ່ຈະອົດທົນກັບການທ້າທາຍໃນຊ່ວງມະຕະ ທີ່ເຮົາແຕ່ລະຄົນ ແລະ ຄົນທີ່ເຮົາຮັກໄດ້ປະເຊີນ. ມັນມອບວິທີໃໝ່ໃຫ້ເຮົາທີ່ຈະເບິ່ງຄວາມບົກພ່ອງທາງຮ່າງກາຍ, ທາງຈິດໃຈ, ຫລື ທາງອາລົມ ທີ່ເຮົາມີມາແຕ່ເກີດ ແລະ ໄດ້ມາລະຫວ່າງຊີວິດມະຕະ. ມັນໃຫ້ຄວາມເຂັ້ມແຂງແກ່ເຮົາ ເພື່ອອົດທົນກັບຄວາມໂສກເສົ້າ, ຄວາມອ່ອນແອ, ແລະ ຄວາມອຸກອັ່ງ.
ການຟື້ນຄືນພຣະຊົນກໍໃຫ້ແຮງຈູງໃຈທີ່ມີພະລັງ ເພື່ອໃຫ້ຮັກສາພຣະບັນຍັດຂອງພຣະເຈົ້າລະຫວ່າງຊີວິດມະຕະຂອງເຮົາ. …
ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ ໄດ້ທົນກັບຄວາມທຸກທໍລະມານທີ່ບໍ່ສາມາດເຂົ້າໃຈໄດ້ ເພື່ອໃຫ້ກາຍເປັນການເສຍສະລະແທນບາບຂອງມະນຸດທຸກຄົນຜູ້ຈະກັບໃຈ. ການເສຍສະລະຊົດໃຊ້ນີ້ໄດ້ມອບສິ່ງທີ່ດີທີ່ສຸດ, ລູກແກະທີ່ບໍລິສຸດບໍ່ມີຕຳນິ, ແລກກັບຄວາມຊົ່ວຮ້າຍທີ່ສຸດ, ບາບຂອງທັງທົ່ວໂລກ. …
… ພຣະເຢຊູໄດ້ສິດສອນເຮົາເຖິງແຜນແຫ່ງຄວາມລອດ. ແຜນນີ້ລວມທັງການສ້າງ, ຈຸດປະສົງຂອງຊີວິດ, ຄວາມຈຳເປັນຂອງການກົງກັນຂ້າມ, ແລະ ຂອງປະທານແຫ່ງອຳເພີໃຈ. ພຣະອົງຍັງໄດ້ສິດສອນເຮົາເຖິງພຣະບັນຍັດ ແລະ ພັນທະສັນຍາ ທີ່ເຮົາຕ້ອງເຊື່ອຟັງ ແລະ ພິທີການທີ່ເຮົາຕ້ອງມີປະສົບການ ເພື່ອຊ່ວຍເຮົາກັບຄືນໄປຫາບິດາມານດາໃນສະຫວັນຂອງເຮົານຳອີກ. …
ພຣະຜູ້ຊ່ວຍໃຫ້ລອດຂອງເຮົາຮູ້ສຶກ ແລະ ຮູ້ຈັກການລໍ້ລວງຂອງເຮົາ, ການດີ້ນລົນຂອງເຮົາ, ໃຈທີ່ເຈັບປວດຂອງເຮົາ, ແລະ ຄວາມທຸກທໍລະມານຂອງເຮົາ, ເພາະພຣະອົງໄດ້ເຕັມພຣະໄທປະເຊີນກັບມັນທັງໝົດ ຊຶ່ງເປັນພາກສ່ວນໜຶ່ງຂອງການຊົດໃຊ້ຂອງພຣະອົງ. … ທຸກຄົນທີ່ທຸກທໍລະມານກັບຄວາມອ່ອນແອໃດໆຂອງຊ່ວງມະຕະ ຄວນຈື່ຈຳວ່າພຣະຜູ້ຊ່ວຍໃຫ້ລອດໄດ້ປະເຊີນກັບຄວາມເຈັບປວດນັ້ນຄືກັນ, ແລະ ວ່າຜ່ານທາງການຊົດໃຊ້ຂອງພຣະອົງ, ພຣະອົງໄດ້ສະເໜີມອບຄວາມເຂັ້ມແຂງໃຫ້ເຮົາແຕ່ລະຄົນເພື່ອອົດທົນກັບມັນ.