“ເຮົາຢາກເຫັນພຣະວິຫານ,” For the Strength of Youth, ເດືອນພຶດສະພາ 2021.
ວັນເສົາພາກເຊົ້າ
ເຮົາຢາກເຫັນພຣະວິຫານ
ບົດຄັດຫຍໍ້
ຂ້າພະເຈົ້າຮູ້ວ່າພຣະວິຫານຂອງພຣະຜູ້ເປັນເຈົ້າ ເປັນສະຖານທີ່ສັກສິດ. ຈຸດປະສົງຂອງຂ້າພະເຈົ້າໃນມື້ນີ້ ໃນການກ່າວເຖິງພຣະວິຫານ ແມ່ນເພື່ອຈະເພີ່ມຄວາມປາດຖະໜາຂອງທ່ານ ແລະ ຂອງຂ້າພະເຈົ້າ ທີ່ຈະມີຄ່າຄວນ ແລະ ຕຽມພ້ອມສຳລັບຫລາຍໆໂອກາດກັບປະສົບການຢູ່ໃນພຣະວິຫານ ທີ່ຈະມາສູ່ເຮົາ. …
ຖ້າຫາກທ່ານ ຫລື ຂ້າພະເຈົ້າໄປພຣະວິຫານແບບບໍ່ບໍລິສຸດພຽງພໍ, ເຮົາຈະບໍ່ສາມາດໄດ້ເຫັນ, ໂດຍອຳນາດຂອງພຣະວິນຍານບໍລິສຸດ, ການສິດສອນທາງວິນຍານກ່ຽວກັບພຣະຜູ້ຊ່ວຍໃຫ້ລອດ ທີ່ເຮົາສາມາດໄດ້ຮັບຢູ່ໃນພຣະວິຫານ.
ເມື່ອເຮົາມີຄ່າຄວນທີ່ຈະຮັບເອົາການສິດສອນເຊັ່ນນັ້ນ, ແລ້ວຄວາມຫວັງ, ຄວາມສຸກ, ແລະ ການມອງໂລກໃນແງ່ດີຈະເຕີບໂຕຂຶ້ນຜ່ານທາງປະສົບການຂອງເຮົາໃນພຣະວິຫານ ຕະຫລອດຊີວິດຂອງເຮົາ. ຄວາມຫວັງ, ຄວາມສຸກ, ແລະ ການມອງໂລກໃນແງ່ດີ ມີໃຫ້ພຽງແຕ່ຜ່ານທາງການຮັບເອົາພິທີການຕ່າງໆທີ່ກະທຳຢູ່ໃນພຣະວິຫານສັກສິດເທົ່ານັ້ນ. ຢູ່ໃນພຣະວິຫານນັ້ນເອງທີ່ເຮົາສາມາດໄດ້ຮັບຄວາມແນ່ນອນໃຈ ເຖິງການເຊື່ອມຕໍ່ຄອບຄົວທີ່ແສນຮັກ ຊຶ່ງຈະຍືນຍົງຫລັງຈາກຄວາມຕາຍ ແລະ ສືບຕໍ່ໄປເຖິງນິລັນດອນ. …
… ແລະ ເຮົາຮູ້ວ່າ ຄວາມສຸກນິລັນດອນຂອງເຮົາ ແມ່ນຂຶ້ນຢູ່ກັບການກະທຳທີ່ດີທີ່ສຸດຂອງເຮົາ ໃນການສະເໜີມອບຄວາມສຸກອັນຍືນຍົງຢ່າງດຽວກັນນັ້ນໃຫ້ກັບຍາດພີ່ນ້ອງທັງຫລາຍ ເທົ່າທີ່ເຮົາສາມາດເຮັດໄດ້.
ຂ້າພະເຈົ້າມີຄວາມປາດຖະໜາເຊັ່ນກັນ ທີ່ຈະປະສົບຄວາມສຳເລັດໃນການເຊື້ອເຊີນສະມາຊິກໃນຄອບຄົວ ໃຫ້ມີຄວາມປາດຖະໜາທີ່ຈະມີຄ່າຄວນເພື່ອຮັບເອົາ ແລະ ໃຫ້ກຽດແກ່ພິທີການຜະນຶກຂອງພຣະວິຫານ. ນັ້ນຄືສ່ວນໜຶ່ງຂອງຄຳສັນຍາທີ່ຈະເຕົ້າໂຮມອິດສະຣາເອນໃນວັນເວລາສຸດທ້າຍ ຢູ່ທັງສອງຟາກມ່ານ.