“Ikala Ufunda,” Bua Dikankamika dia Bansonga, Ngondo wa Muandamuteketa 2021, 18– 19.
Mukenji wa ku ngondo Bua Dikankamika dia Bansonga Ngondo wa Muandamuteketa 2021
Ikala Ufunda
Kufunda kua bidi bilua mu meji eba paudi ulonga kudi mua kukuambuluisha mu kulonga.
Muena bukenji umua wakambila mulombodi wenda ne: “Musangu yonsu undi mbangisha kubala mifundu, ndi mbungila!” “Mbienza bu ne mifundu idi buanga budi buladika tulu!”
Mulombodi wenda wakamuandamuna ne, “Utu koku ufunda pautu ulonga anyi?”
“To,” ke muakandamuna muena bukenji.
“Bidi biteketa bua kubungila anyi kutuma meji kula paudi ubala tshianana,” ke muakamuambila mulombodi, “kadi mbikola paudi ukumbaja difunda!”
Mubelu uvua mulombodi wa bukenji ewu mufila kudi muena bukenji wa lutatu ewu, wakatuala dishintuluka. Nunku biwikala ukeba mushindu mupiamupia wa kukolesha kulonga kueba kua mifundu, teta peba. Paudi ufunda bua biudi ubala, neudimona peba mu didifila diabungi ne dilonga dimpa.
Eyi idi mishindu mikesa itudi bapeta idi yambuluisha.
Muanetu Muluma Steven Lund:
Ndi ndama dibeji ku bienza pandi mbala. Padi Nyuma untuma munkatshi mua kulonga kuanyi, ndi mfunda mitumu eyi pa dibeji.
Ngakapeta lungenyi kudi Mukulu Richard G. Scott (1928–2015) wa mu Mpuilu wa Bapostolo Dikumi ne Ibidi, wakamba ne: “Funda pa muaba mukubibua bintu bia mushinga biudi ulonga kudi Nyuma. Neumona ne paudi ufunda meji mimpa, makuabu abungi nealua. Kabidi, dimanya diudi upeta nedikalaku mu moyo weba mujima” (“To Acquire Knowledge and the Strength to Use It Wisely,” Ensign, June 2002, 32).
Ndi mumanya ne miaku eyi milelela. Pandi ndongolola bia kuakula ne malongesha, tshiena nya anu mu mifundu to, kadi kabidi mu bimvua mufunda pamvua nyibala.
Muanetu Muluma Ahmad Corbitt:
Ndi munanga kulonga pa biena bualu Ndi mbala mifundu ku tshibangidi too ne ku ndekelu, kadi ndi musua kubala kabidi mifundu pa biena bualu. Bu tshilejelu, ndi ndonga ne Buludiki bua Biena Bualu bua kupeta mifundu pa ditabuja anyi pa dikunguija dia Isalela. Ne tshiena anu ngangata mu dibeji to, kadi ndi mfunda tshindi ndonga bua kumanya ne ndi ntshiumvua menamena. Ntu ngumvua disanka bua bungi bua bintu bindi ngumvua pandi ngenza nunku. Ndi kabidi nsungula mifundu ya kukuata mu mutu.
Muanetu Muluma Bradley Wilcox:
Ndi ne mukanda wa malu anyi undi mfundila mifundu mu miaku yanyi nkayanyi. Bu tshilejelu, “Bualu muntu wa pa buloba udi muena lukuna wa Nzambi” (Mosiya 3:19) udi ulua ne “ Bualu muntu udi ne diditambisha ne kayi ukudimuna mutshima, udi usungula bua kuikala muena lukuna wa Nzambi, kadi Nzambi kena muena lukuna wenda to. Nzambi udi mulunda wenda muimpa.”
Ndi kabidi mfunda nkonko. Bidi mua kuikala nkonko ya bidi mu meji anyi kumpala kua kubala, anyi bidi mua kuikala nkonko idi ifuma ku bindi mbala. Mu mishindu yonsu, bidi binteka meji kaba kamua.
Bukola bua Kufunda Meji Eba
Umua yonsu wa kutudi mu bulombodi udi ulonga mifundu mu mishindu mishilangana, kadi tudi bonsu tufunda patudi tubala.
Kubala kudi kutuambuluisha bua kubueja meji ne ngumvuilu. Bidi bikala ne mushinga. Ne patudi tuakula anyi tubala, tudi tupeta ne tuenza bilondeshela meji ne ngumvuilu idi ifumina munda. Tudi tuela meji ne bidi bituambuluisha bua kumvua malelela a lumu luimpa bilenga.
Nsongaluma umua uvua mujandula bulelela ebu pavuaye mulombibua bua kuenza diyisha mu tshisangilu tshia biadidia bia tshijila. Uvua mumvua bantu babungi benza mayisha kadi kavua mua kuvuluka bitupa to. Ewu musangu uvua mushilangana Pakafundaye mu milongu diyisha dienda, kabiakamuambuluisha anu bua kuenza diyisha dilongolola, kadi wakadivuluka bua mutantshi mula.
Bia momumua bidi mua kukufikila mu kulonga kueba kua mifundu. Pawikala udi ubungila paudi ubulula mifundu yeba, diba ndikumbana bua kujuuka. Teta kulopola crayon, bika, anyi olodinatela ne bangisha kufunda. Neusankishibua bua dishintuluka didi dilua!
© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, April 2021. Tshiluba 17471 760