Shapita 3
Mfumu Benyamina udi utungunuka ne kuakula kuenda—Mukalenga wa Bukola Bonsu neasadila munkatshi mua bantu mu tshitanda tshia dîma—Mashi neapatuka mu kasosu konsu ka mubidi pakapikulaye bua mibi ya ba pa buloba—Lupandu ludi luluila amu ku dîna dienda—Bantu badi mua kulekela bumuntu bua panu ne kulua Bansantu ku njila wa Mulambu wa Mashi a Tshijila—Mpaji ya bantu babi neikala bu dijiba dia kapia ne nsufulu. Pabuipi ne 124 k.d.K.
1 Ne kabidi bana betu, ndi ndomba ntema yenu, bualu ndi ne mêyi makesa makuabu akunuambila; bualu monayi, ndi ne bintu bia kunuambila bidi bitangila bintu bidi bilua.
2 Ne bintu binganuambila bivua bimanyisha kudi muanjelu mutuma kudi Nzambi. Ne wakangambila: Bika; ne ngakabika, ne monayi uvua muimana kumpala kuanyi.
3 Ne wakangambila ne: Bika, ne umvua mêyi angakuambila; bualu mona, ndi mulua kukumanyisha lumu lulenga lua disanka dinena.
4 Bualu Mukalenga umvu masambila eba, ne wamonyi buakana bueba, ne wantumi bua kukuambila bua usanka; ne bua umanyisha bantu beba, bua buwujibua pabu ne disanka.
5 Bualu mona, tshikondu tshidi tshilua, ne katshiena kula to, ne ne bukola, Mukalenga wa Bukola Bonsu udi ukôkesha, uvuaku, ne udiku tshiendelela ne tshiendelela, nealua panshi munkatshi mua bana ba bantu kufuma mu diûlu, neikala ne tshitanda tshia dîma, ne nênda munkatshi mua bantu, wenza bishima bikola bu bia kôndopa babêdi, kubisha bafua, kuendesha balema, mpofu yapeta kumona kuayi, ne bapata matshi bumvua, ne kôndopa mabêdi a mishindu yonsu.
6 Ne neipata nyuma ya badiabulu, nyuma mibi idi misomba mu mitshima ya bana ba bantu.
7 Ne mona, neakenga ne matêtshibua, ne dikenga dia mubidi, nzala, nyota, ne mutshioku, mena kupita bidi muntu mua kukenga nabi, pa kumbusha lufu; bualu mona, mashi enda neapatuka mu kasosu konsu ka mubidi, bualu dipampakana dienda nedikala dikola bua bubi ne malu mapita bubi bia bantu benda.
8 Ne neabikidibua Yezu Kilisto, Muana wa Nzambi, Tatu wa diûlu ne wa buloba, Mufuki wa bintu bionsu kumbukila ku mbangilu; ne mamuenda neabikibua Maliya.
9 Ne mona, nealua kudi benda, bua lupandu lulua kudi bana ba bantu mena ku ditabuija mu dîna dienda; ne mena kunyima kua bionsu ebi nebamumona bu muntu, ne nebamba ne udi ne nyuma wa diabulu, ne nebamukuma mfimbu, ne nebamutshiamakaja.
10 Ne neabika ku bafua dituku disatu; ne mona, neimana bua kulumbuluishayi ba pa buloba; ne mona, bintu ebi bionsu bidi bienjibua bua dilumbuluisha diakana dilua kudi bana ba bantu.
11 Bualu mona, ne mashi enda adi apikula bua mibi ya badi bapona ku disambuka dia mikenji dia Adama, bavua bafua kabayi bamanya disua dia Nzambi buabu, anyi bavua benza mibi bua kupanga kumanya.
12 Kadi diakabi, diakabi kudi udi mumanya ne udi utombokela Nzambi! Bualu lupandu kaluena lulua kudi muntu wa nanku pa kumbusha ku dikudimuna dia mutshima ne ditabuija kudi Mukalenga Yezu Kilisto.
13 Ne Mukalenga Nzambi uvua mutuma bambi benda bansantu munkatshi mua bana ba bantu bonsu, bua kumanyisha bintu ebi kudi tshisa tshionsu, tshisamba tshionsu, ne muakulu onsu, nanku bua ewu yonsu witabuija ne Kilisto nealua, apeta dilekedibua dia mibi yenda, ne asanka ne disanka dinena menamena, mena bienza bu ukadi mumana kulua munkatshi muabu.
14 Kabidi Mukalenga Nzambi wakamona ne bantu benda bavua bantu ba nshingu mîminyina, ne wakabelela mikenji, mena mikenji ya Mose.
15 Ne wakabaleja bimanyinu, ne malu a dikema, ne bifuanyikiji, ne bindidimbi bia bungi bivua bitangila dilua dienda; ne kabidi bambi bansantu bakakula bitangila dilua dienda; ne kabidi bakapapisha mitshima yabu, ne kabakumvua ne mikenji ya Mose kayena ne mushinga to pa kumbusha ku njila bupikudi bua mashi enda.
16 Ne mena bu bana bateketa mua kuenza mibi, kabavua mua kusungidibua to; kadi ndi nnuambila ne badi babeneshibua; bualu monayi, bu mudi mu Adama, anyi ku tshifukibua, badi bapona, mena nanku, mashi a Kilisto adi apikula bua mibi yabu.
17 Ne menamena kabidi, ndi nnuambila, ne kakuakuikala dîna dikuabu difidibua anyi njila mukuabu anyi mushindu mukuabu udi lupandu mua kulua kudi bana ba bantu to, amu munda mua ne mu dîna dia Kilisto, Mukalenga wa Bukola Bonsu.
18 Bualu monayi udi ulumbuluisha, ne dilumbuluisha dienda didi dilulama; ne muana mukesa udi ufua mu buana buenda kena ujimina to; kadi bantu badi banua dipîshibua bua anyima yabu nkayabu pa kumbusha bobu badipuekesha ne balua bu bana bateketa, ne bitabuija ne lupandu luvua, ne ludi, ne neluikala, munda mua ne mu mashi a bupikudi bua Kilisto, Mukalenga wa Bukola Bonsu.
19 Bualu muntu wa panu udi muena lukuna kudi Nzambi, ne uvua nanku kumbukila ku dipona dia Adama, ne neikala nanku, bua kashidi ne kashidi, amu yeya mudifila ku masuisha a Nyuma wa Tshijila, ne mudivûla bumuntu bua panu ne mulua munsantu ku njila wa bupikudi bua Kilisto Mukalenga, ne mulua bu mudi muana muteketa, mutumikidi, mutudiji, mudipuekeshi, muena ditukija, muwula ne dinanga, muitaba bua kukôkela ku malu onsu adi Mukalenga umona makumbana bua kumubambidikila, mena bu mudi muana muteketa ukôkela tatuenda.
20 Ne menamena kabidi, ndi nnuambila, ne tshikondu netshilua tshiatangalaka dimanya dia Mupandishi mu tshisamba tshionsu, tshisa tshionsu, muakulu onsu, ne bantu bonsu.
21 Ne monayi, pafika tshikondu atshi, muntu nansha umua kakusanganyibua kayi mupila kumpala kua Nzambi, pa kumbusha bana bateketa, amu ku dikudimuna dia mutshima ne ditabuija mu dîna dia Mukalenga Nzambi wa Bukola Bonsu.
22 Ne mena mu mpindiewu, pawikala mulongesha bantu beba bintu bidi Mukalenga Nzambi weba mukupeshela mukenji bua ulongesha, apu mena kabakuikala kabidi bapîla ku mesu kua Nzambi, amu bilondeshila ku mêyi amvua mukuambila.
23 Ne mpindiewu ngakudi mêyi avua Mukalenga Nzambi mumpeshela mukenji bua ngakula.
24 Ne Mukalenga udi wamba nanku: Mêyi â neikala bu bujadiki bulelela bua kutuisha bantu aba, mu dituku dia dilumbuluisha; nebalumbuluishibua nawu, muntu yonsu bilondeshila ku bienzedi bienda, ne bidi bikala bimpa, anyi ne bidi bikala bibi.
25 Ne bikalabi bibi, nebapîshibua ku lumonu lubi lua dipîla diabu ne malu mapita bubi abu nkayabu, bidi bibapingaja panyima kumpala kua Mukalenga mu ngikadilu wa dikenga ne mpaji kayiyi ndekelu to, ne kudibu kabayi mua kupingana kabidi; bua nanku badi banua dipîshibua bua anyima yabu nkayabu.
26 Bua nanku, badi banua dikopu dia tshiji tshia Nzambi, bidi bululama kabuyi mua kuvila buabu kupita muvuabu mua kuvila ne Adama mupona bua bualu bua didia dia tshimuma tshikandika; bua nanku, lusa kaluena mua kuikala kabidi ne bunema pa mutu pabu bua kashidi to.
27 Ne mpaji yabu idi bu dijiba dia kapia ne nsufulu, ka ndimi idi kayiyi ijima, ne ka mishi idi ibanda mûlu bua kashidi ne kashidi. Nanku ki mudi Mukalenga mumpesha mukenji. Amena.