“Vajtswv lub Pov Thawj Hwj,” Ntxiv Dag Zog rau cov Tub Hluas Ntxhais Hluas, Yim Hli Ntuj 2021, 20–21.
Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Yim Hli Ntuj 2021
Vajtswv lub Pov Thawj Hwj
Lus Qhuab Qhia thiab Kev Khi Lus 84
Txhua tus tub hluas ntxhais hluas yuav tsum paub dab tsi txog lub pov thawj hwj thiab lawv txuas rau lub pov thawj li cas.
Puas tau muaj sij hawm thaum nyuaj rau yus to taub thaum twg ib lo lus muaj ob lub ntsiab? Piv txwv hais tias, lo lus Askiv earth txhais tias yog lub ntiaj teb uas peb nyob thiab cov av uas peb tsuj hauv qab peb xib taws. Ob lub ntsiab yeej yog lawm, tiam sis qhov uas yus xav hais yeej nyob ntawm seb yus hais txog dab tsi thaum yus hais lo lus ntawd. Yeej ua rau yus nyuaj to taub ntxiv, vim thaum yus hais earth ces txhais hais tias peb lub ntiaj teb, tiam sis kuj txhais tias cov av, vim cov av nyob hauv lub ntiaj teb no.
Kev Txhais lo Lus Pov Thawj Hwj
Ib lo lus uas muaj ob lub ntsiab hauv lub Koom Txoos yog pov thawj hwj. Lo lus no hais txog Vajtswv lub hwj chim thiab txoj cai. Tiam sis peb kuj hais lwm lub ntsiab txog lub pov thawj hwj uas tsis loj npaum li no—kom hais txog “lub hwj chim thiab txoj cai uas Vajtswv muab rau cov uas nws tsa tuav lub pov thawj hwj kom ua txhua yam pub rau Vajtswv cov me nyuam txais tau kev cawm seej.”1
Lub pov thawj hwj uas Nws muab rau tib neeg tsis yog Vajtswv lub hwj chim tag nrho. Daim duab no piav txog qhov no.
Nyob hauv daim duab no nej pom tau tej yam uas qhia txog Vajtswv lub hwj chim, uas yeej nyob mus ib txhis thiab tsis paub kawg. Nyob haud, nej kuj pom tej yam uas qhia txog lub hwj chim thiab txoj cai ntawm Vajtswv lub pov thawj hwj uas Nws muab rau cov txiv neej tsim nyog kom coj Khetos lub Koom Txoos.
Tej Koob Hmoov Los ntawm txoj Cai Pov Thawj Hwj hauv Koj lub Neej
Tag nrho cov koob hmoov ntawm lub pov thawj hwj no los muab rau tag nrho Leej Txiv Saum Ntuj Ceeb Tsheej cov ntxhais thiab cov tub uas Nws hlub. Cov lus thib ob yog cov koob hmoov uas los rau koj dhau los ntawm ib tug uas tuav cov yuam sij pov thawj hwj los sis ib tug uas tau txais txoj cai pov thawj hwj.
Nov yog raws li Vajtswv tus txheej txheem uas Nws tsa kom Nws lub Koom Txoos muaj kab muaj ke thiab kom tswj hwm Nws lub Koom Txoos hauv lub ntiaj teb no. Tej yam ntxiv uas qhia txog Vajtswv txoj cai pov thawj hwj yog ib pawg dikas los sis pawg xib hwb tus thawj tswj hwm uas muaj yuam sij coj nws pawg tej hauj lwm, ib leej txiv uas foom koob hmoov rau cov me nyuam hauv tsev, thiab cov kab ke thiab tej kev khi lus hauv lub tuam tsev.
Cov Txiv Neej, cov Poj Niam, thiab lub Pov Thawj Hwj
Txawm yog tsuas pub tsa cov txiv neej rau ib lub luag hauj lwm pov thawj hwj, Thawj Tswj Hwm Dallin H. Oaks, tus Pab Cuam thib Ib hauv Thawj Pawg Thawj Tswj Hwm, tau piav txog ib lub ntsiab cai tseem ceeb: “Lub pov thawj hwj yog Vajtswv lub hwj chim thiab txoj cai uas Vajtswv tso siab pub rau peb kom ua tau Nws txoj hauj lwm foom koob hmoov rau tag nrho Nws cov me nyuam. Pov thawj hwj tsis yog cov uas raug tsa rau ib lub luag hauj lwm pov thawj hwj los sis cov uas siv txoj cai pov thawj hwj. Cov txiv neej uas tuav lub pov thawj hwj tsis yog lub pov thawj hwj. … Peb yuav tsum tsis txhob hais tias cov txiv neej uas tau muab tsa yog lub pov thawj hwj.”2
Txawm yog peb tsis muab cov poj niam tsa rau lub pov thawj hwj, Thawj Tswj Hwm Russell M. Nelson piav hais tias, “thaum ib tug twg uas tuav lub pov thawj hwj cov yuam sij … tsa nej ua hauj lwm rau nej txoj kev hu, nej tau txais txoj cai pov thawj hwj kom ua nej txoj kev hu.”3 Tej yam uas qhia txog qhov no yog Koom Haum Ntxhais Hluas tej pawg thawj tswj hwm, cov ntxhais txib uas qhia txog txoj moo zoo, cov thawj coj hauv tej pawg ntseeg thiab ceg txheem ntseeg uas raug tsa mus qhia thiab coj, thiab cov neeg ua hauj lwm kab ke hauv lub tuam tsev.
Lub Hwj Chim Pov Thawj Hwj Ua rau Txhua Tus Tau Koob Hmoov
Cov koob hmoov uas nej cov tub hluas ntxhais hluas txais tau yog nej li dhau los ntawm tej kev khi lus uas nej ua thaum nej ua kev cai raus dej thiab nyob hauv lub tuam tsev. Txawm koj tsis muaj ib tug uas tuav lub pov thawj hwj hauv koj lub tsev, koj tseem yuav tau koob hmoov loas ntawm Vajtswv lub hwj chim pov thawj hwj nyob hauv koj lub neej thaum koj ua raws li koj tej kev khi lus (saib 1 Nifais 14:14).
Thaum peb ua raws li peb tej kev khi lus, peb txais tau cov koob hmoov uas txhawb peb lub zog thiab foom koob hmoov rau peb. Peb caw koj xav txog cov koob hmoov los ntawm lub pov thawj hwj hauv koj lub neej—cov koob hmoov uas los vim muaj Vajtswv lub hwj chim pov thawj hwj uas tsis paub kawg thiab cov uas los ntawm txoj cai pov thawj hwj uas muab rau neeg nyob hauv Vajtswv lub Koom Txoos.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, August 2021. Hmong. 17472 295