Mukenji wa ku Ngondo wa Liahona Ngondo Muitanu 2022
Bukola bua Tshidia tshia mu Munyuma
Ndi m usua kuelesha meji ne ngenzelu misunguluka itanu itudi mua kuangata bua kutuambuluisha bua kulama tshidia tshimpa tshia mu nyuma.
Bana betu baluma ne bakaji, ndi mununanga. Ndi nsanka ne tshipolu etshi tshindi natshi bua kuakula kunudi lelu. Ndi nsambila dituku dionsu bua nuikala bakubibua ku mabundi mabi a muluishi ne bua nuikala ne makanda a kuya batungunuka kumpala kupitshila mu ntatu yonsu inudi nayi.
Imua ntatu idi mikala majitu a nkaya adi muntu mukuabu kayi mua kumona. Mikuabu idi imueka ku mesu kua bantu. Bilumbu bia masalayi mu wesete wa Europe bidi imua ya ku yoyi. Mvua muikala ku Ukraine ne ku Russie misangu yabungi. Ndi munanga maloba awu, bantu abu, ne miakulu yabu. Ndi ndila ne nsambila bua bonsu badi bilumbu ebi bilenga. Bu ekelezia, tudi tuenza monsu mutudi mua kuenza bua kuambuluisha aba badi bakenga ne batata bua kupanduka. Tudi tuela dibikila kudi bonsu bua kutungunuka kujila biakudia ne kusambila bua bantu bonsu badi basamishibua ku tshimpidimbua etshi. Mvita yonsu idi dibenga kunemeka dibi dia bionsu bidi Yezu Kilisto wimanyina ne ulongesha.
Nansha umua wa kutudi kena mua kulondolola bisamba anyi bienzedi bia bakuabu anyi nansha bidimba bia mêku etu nkayetu to. Kadi tudi mua kudilondolola nkayetu. Dibikila dianyi lelu, bana betu baluma ne bakaji, ndia kuimanyika matandu adi afuna mu mutshima weba, mu nzubu weba, ne mu moyo weba. Jîkayi majinga onsu a kuenzela bakuabu bibi—nansha pikala majinga awu mikala a tshîji, a ludimi lutua, anyi a lukuna ne muntu udi mukuenzela bibi. Mupandishi wakatupesha mukenji wa kukudimuna ditama dikuabu,1 bua kunanga bena lukuna betu, ne bua kusambila bua aba badi batukengesha.2
Bidi mua kuikala bikola menamena bua kulekela tshîji tshidi tshikala pa bualu bulelela. Bidi mua kumueka bikola bua kubuikidila aba bena bienzedi bia tshinyangu bidi bitatshisha bantu badi kabayi bamanya bualu. Ne kabidi, Mupandishi mmutuelela dîyi bua “tubuikidila bantu bonu.”3
Tudi balondi ba Mfumu wa Ditalala. Mpidieu kupita bikondu bikuabu, tudi dijinga ne ditalala didi difuma anu kudi yeya. Mushindu kayi utudi mua kutekemena ditalala pa buloba patudi tuetu nkayetu katuyi tukeba ditalala ne dipetangana? BAna betu baluma ne bakaji, ndi mumanya ne tshindi nnulomba katshiena tshipepela to. Kadi balondi ba Yezu Kilisto badi ne bua kuleja tshilejilu tshia boloba bujima kulonda. Ndi nnusengelela bua nuenza monsu munudi mua kuenza bua kuimanyika matandu a nkaya adi mikala afuna mu mitshima yenu ne mu mioyo yenu.
Suayi ngela kashonyi pa dibikila dia tshienzedi edi mu kuakula bua muanda udi umvuluija bualu budi bufika mu kutangila ndundu wa basket.
Mu dinaya adi, tshitupa tshia kumpala tshivua mvita ya ditekenkejangana, tshisumbu tshionsu tshivua tshiela panyima pa tshikuabu. Nanku, mu tususa tutanu tua ndekelu tua tshitupa tshia kumpala, munayi wa panyima wa tshisumbu tshikuabu wakakupa ndundu muimpa wa point isatu. Ne kasusa anu kamua kashala, munayi wa muabu wakangata ndundu mumukupila bua kunaya ne kuelaye ndundu wa buzzer! Nanku tshisumbu etshi tshiakaya mu muaba wa dîkisha ne point inayi kumpala tshidia tshimpa tshimueka. Bakakumbana bua kutuala tshidia atshi mu tshitupa tshîbidi ne kutshimunabu dinaya.
Tshidia tshidi muanda wa bukola. Tukatu bonsu batshimona mu mushindu umua anyi mukuabu—bu tshilejilu, mu mashinyi adi abandisha lubilu anyi mu dibenga kupetangana didi dikudimuka mu dikokangana.
Nanku ndi nkonka ne, ntshinyi tshidi mua kufuka tshidia tshia mu nyuma? Tudi bamanya bilejilu bia tshidia tshimpa anyi tshibi. Tudi bamanya balondi ba Yezu Kilisto batu balua kukudimuna moyo ne kukola mu ditabuija diabu. Kadi tudi bamanya kabidi bîtabi bavua ne budiambiki bâkakuluka mu njila. Tshidia tshidi mua kusaka mu mushindu mishilangana.
Katutu banji kuikala ne dijinga dikola dia tshidia tshia mu nyuma tshimpa bu mpidieu, bua kutshimuna lubilu ludi bimanyinu bibi ne bifîka bia bikondu bitupa. Tshidia tshia mu nyuma tshimpa, netshituambuluisha bua kutungunuka kumpala nansha mu bowa ne malu mafuka kudi bipupu, tsunami, dikoseka dia volcan, ne tshinyangu tshidi mvita ituala. Tshidia tshia mu nyuma tshidi mua kutuambuluisha bua kukandamena mabundi adi ka’ayi ajika, ne a mabi a muluishi ne kutshimuna kudienzeja kuenda bua kuluangisha tshishimikidi tshia mu nyuma tshietu.
Bienzedi biabungi bidi mua kuenza tshidia tshimpa tshia mu nyuma. Ditumikila, dinanga, didipuekesha, disadila, ne disakidila4 bidi bimua bia ku biobi.
Lelu ndi musua kuelesha meji ne bienzedi bisunguluka bitanu bitudi mua kuangata bua kutuambuluisha bua kulama tshidia tshia mu nyuma tshimpa.
Tshia Kumpala: Buelayi mu njila wa tshipungidi ne shalayimu.
Matuku mashala, ndi mupeta tshilota tshikola tshimvua mumonangana ne tshisumbu tshia bantu babungi. Bavua bangela nkonku yabungi, luvua luatamba kukonkibua luvua pa njila wa tshipungidi ne bua tshinyi udi ne mushinga.
Mu tshilota tshianyi, ngakumvuija ne tudi tubuela mu njila wa tshipungidi mu kuikala batambuishibua ne mu kuenza tshipungidi tshietu tshia kumpala ne Nzambi.5 Musangu yonsu utudi tuangata biakudia bia tshijila, tudi tulaya kabidi bua kuangata dina dia Mupandishi pa mutu wetu, bua kumuvuluka, ne bua kulama mikenji yenda.6 Mu dipingaja, Nzambi udi utujadikila ne tudi ne bua kuikala dituku dionsu ne Nyuma wa Mukalenga.
Pashisha tudi tuenza bipungidi bikuabu mu ntempelo, mutudi tupeta malaya manena. Milulu ne bipungidi bibi bitukanguila tshîbi ku bukola bua Nzambi. Njila wa bipungidi udi anu njila umua udi ulombola ku dizanjikibua ne moyo wa tshiendelela.
Mu tshilota tshianyi, mamu umua wakankonka mushindu udi muntu mukosa bipungidi bienda mua kualukila mu njila awu. Diandamuna dianyi ku lukonku luenda didi dilombola ku dielesha dia meji dianyi dîbidi:
Jandulayi disanka dia kukudimuna kua mutshima dituku dionsu.
Mushinga kayi udi nawu dikudimuna dia mutshima? Alama wakalongesha ne tudi ne bua kulongesha anu dikudimuna dia mutshima ne ditabuija mu Mukalenga.”7 Dikudimuna dia mutshima didi dilombibua kudi muntu mumanyi yonsu udi dijinga ne butumbi bua tshiendelela.8 Kakuena masunguluja to. Mu dibuluila kudi Muambi Joseph Smith, Mukalenga wakanyoka mu mêyi balombodi ba kala bualu kabavua balongesha bana babu lumu luimpa to.9 Kukudimuna mutshima tshidi nsapi ku ditungunuka. Ditabuija dikezuka didi ditusaka kumpala mu njila wa tshipungidi.
Ndi nnulomba bua kanutshinyi anyi kanunengeshi dikudimuna dia mutshima dienu to. Satana udi usanka ne kukenga kuetu. Kosayi malanda nenda. Ipatayi ngumvuilu yenda pambelu pa mioyo yenu! Bangishayi lelu bua kumanya disanka dia kulekela muntu wa tshifuaka.10 Mupandishi udi anu mutunanga kadi nangananga patudi tukudimuna mutshima. Wakalaya ne nansha mikuna mipita, ne tukuna tumbushibua … buimpa buanyi kabuakumbuka kunudi to.”11
Biwikala mumanya ne udi mushala ntanta ne njila wa tshipungidi anyi muya kula ne kuyi ne mushindu wa kupingana, atshi katshiena tshilelela to.12 Suaku uyukilala ne muepiskopo weba anyi mulombodi mukulu wa ditamba dieba. Yeya udi muena mudimu wa Mukalenga ne neakuambuluisha bua umanya disanka ne disulakana dia kukudimuna kua mutshima.
Mpidiewu, didimuisha: Dialukila ku njila wa tshipungidi kadiena diumvuija ne malu ne ikala mapepela to. Njila ewu udi mukola ne ku misangu udi umvuika bu dibanda didi ditshiokesha.13 Kadi dibanda edi, didi dienjibua bua kututêta ne kutulongesha, kulongolola bumuntu buetu, ne kutuambuluisha bua tuetu kulua bansantu. Tshidi anu njila umua udi ulombola ku dizanjikibua. Muambi umua14 wakumvuija “ngikadilu mubeneshibua ne wa disanka wa aba badi balama mikenji ya Nzambi. Munayi, badi babeneshibua mu malu onsu, a mu mubidi ne mu nyuma; ne bobu bikala ne lulamatu ku ditabuija tô ne ku ndekelu, badi bakidibua mu diûlu … [ne] badi basomba ne Nzambi mu ngikadilu wa disanka dia kashidi.”15
Kuendela mu njila wa tshipungidi, pamua ne dikudimuna dia mutshima, kudi kupa tshidia tshia nyuma bukola.
Uruguay
Dielesha dia meji dianyi disatu: Longayi bitangila Nzambi ne mushundu udiye ukuata mudimu.
Lumua lua ku ntatu minena yetu lelu ludi lua kufila dishinshintuluka pankatshi pa malelela a Nzambi ne mashimi a Satana. Ki bua tshinyi Mukalenga wakatudimuisha bua kusambila, bua tuetu kutshimuna Satana ne … kunyema mu bianza bia basadidi ba Satana badi benza mudimu wenda.”16
Mose wakatupesha mushindu wa tuetu kujandula pankatshi pa Nzambi ne Satana. Pakalua Satana bua kutêta Mose, wakamona dishintuluka bualu uvua muyukila ne Nzambi mpala ne mpala. Mose wakamanya Satana lukasa ne kumutuminaye dîyi bua umbuka17 Pakakandamana Satana, Mose uvua mumanya mushindu wa kubikila Nzambi bua kupeta diambuluisha diabungi. Mose wakapeta makanda a bunzambi ne kukanyinaye diabulu kabidi, umuambila ne, “Mbuka kundi, Satana, bualu mema nenkukuila anu Nzambi.”18
Tudi ne bua kulonda tshilejilu atshi. Umbushayi ngumvuilu ya Satana mu moyo wenu! Bua lusa kanumulondi mu “lupongu luenda lua dikenga ne diakabi dia kashidi.”19
Ne lubilu lukola, bujadiki budi kabuyi budishibua dituku dionsu “ku dîyi dimpa dia Nzambi”20 didi mua kuteketa. Nanku, bulembudi bua madingi a Satana budi ne: tudi dijinga ne kutendelela Mukalenga matuku onsu ne kulonga lumu luimpa luenda. Ndi nnusengelela bua nulekela Nzambi ikala kumpala mu moyo wenu. Mupeshayi tshipolu tshia diba dienu. Nuenu benza nanku, nutangila tshidi tshifikila tshiadia tshia mu nyuma tshimpa tshienu.
Dielesha meji dinayi: Kebayi ne tekemenayi bishima.
Moloni udi utujadikila ne “Nzambi kena mulekela kuikala Nzambi wa bishima to.”21 Mukanda yonsu wa mu mifundu udi uleja mushindu udi Mukalenga ubuela mu mioyo ya aba badi bamuitabuija.22 Wakatapulula Mbuwa Mukunza, wakambuluisha Nefi bua kupandisha bitata bia tshiamua, ne wakapinguluja Ekelezia wenda kupitshila ku Muambi Joseph Smith. Bishima bionsu ebi biakangata mutantshi ne pamuapa kabivua tshivua bantu ba kala aba balomba kudi Mukalenga to.
Mu mushindu umua, Mukalenga neakubenesha wewa ne bishima biwamuitabuija yeya, “kakuyi kuela mpata to.”23 Enzayi mudimu wa mu nyuma bua kukeba ditabuija. Lombayi NZambi ne disambila bua kunuambuluisha bua kuenzejibua ne ditabuija dia nanku. Ndi nnulaya ne nudi mua kudimanyina ne Yezu Kilisto “ufila bukola kudi badi batshioka; ne kudi aba badi badi bateketa bua udi ubapesha makanda.”24 Bintu bikesa nebibandisha tshidia tshieba tshia mu nyuma bikola bipita bua umona Mukalenga udi ukuambuluisha bua kunyungisha mukuna wa mu moyo weba.
Taiwan
Dielesha meji ditanu: Imanyikayi matandu a mu moyo wenu.
Ndi ngamba kabidi dibikila dianyi bua kuimanyika matandu mu moyo wenu. Tumika mu didipuekesha, mu dikima, ne makanda a kubuikidila ne kukeba dibuikidila. Mupandishi wakalaya ne, bituabuikidila bantu mibi yabu, Tatu wetu wa mu Diûlu neatubuikidila petu yetu.25
Mu mbingu ibidi tudi tusekelela Pasaka. Kubangila lelu ne matuku alualua, ndi ngela dibikila kunudi bua nukeba mushindu wa kuimanyika matandu avua manupesha bujitu. Kudi mua kuikala tshienzedi tshia disakidila kudi Yezu Kilisto bua Bupikudi buenda anyi? Pikala dibuikidila dimueka dikola mpidieu, lomba bukola kupitshila ku mashi a bupikudi a Yezu Kilisto bua upeta diambuluisha. Wewa muenza nanku, ndi nnulaya ne nenupeta ditalala ne didikupa dia tshidia tshia mu nyuma.
Pavua Mupandishi muenza bupikudi bua bukua bantu bonsu, wakakangula njila bua ne aba badi bamulonda bapeta londapu, makanda, ne bukola bua busungidi. Manema a nyuma â adiku bua bonsu badi bakeba bua kumuteleja ne kumulonda.
Bana betu baluma ne bakaji, ne disengelela dionsu dia ku mutshima wanyi, ndi nnubikila bua nubuela mu njila wa tshipungidi ne nushala momu. Numanya disanka didi kukudimuna kua mutshima kua ku dituku kutuala. Nulonga bitangila Nzambi ne mushindu udiye ukuata mudimu. Nukeba ne nukemena bishima. Enzayi mushindu wa kujikija matandu mu nsombelu yenu
Nuenu bateka mu tshienzedi malu â, ndi nnulaya dikumbana dia kutungunuka kumpala mu njila wa tshipungidi ne tshidia tshikola, kabiyi kutangila ntatu inudi nayi. Ne ndi nnulaya makanda abungi bua kukandamena matêta, ditalala diabungi dia meji, budishikaminyi ku bowa, ne bobumua bunena mu mêku enu.
Nzambi udi ne moyo! Yezu udi Kilisto! Yeya udi ne moyo! Mmutunanga ne neatuambuluisha. Bua bobu ebu ndi njadika mu dina dia tshijila dia Musungidi wetu, Yezu Kilisto, amena.
© 2022 Kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, May 2022. Tshiluba. 18351 760