“Natalged kadagiti Bagyo,” Para iti Pigsa dagiti Agtutubo, Mayo 2022.
Binulan a Mensahe ti Liahona , Mayo 2022
Natalged kadagiti Bagyo
Dagiti Adaw
Datayo a maseknan para iti bagbagitayo ken para kadagiti patpatgentayo, adda namnama iti kari ti Dios a nangaramid iti maysa a natalged a lugar kadagiti umay a bagyo. …
Dagiti naimpadtuan a balikas ni Ari Benjamin ti mayaplikar kadatayo ita.
Inawisna dagiti taona ken datayo a mangbangon iti kakaisuna nga awan duadua a bato ti kinatalged, nga isu ti Mangisalakan. Inlawlawagna a nawayatayo nga agpili iti umisu ken biddut ket ditayo maliklikan dagiti bunga dagiti pilitayo.
Agbalbaliw ti nakaparsuaantayo tapno agbalin a kas maysa a bassit nga ubing, natulnog iti Dios ken ad-adda a managayat. Dayta a panagbalbaliw ti mangpaikari kadatayo tapno agragsak kadagiti sagut nga umay babaen ti Espiritu Santo. Ti panangkadkadua ti Espiritu ti mangliwliwa, mangtarabay, ken mangpapigsa kadatayo. …
No umay dagiti bagyo iti biag, mabalin a natibkerkayo agsipud ta nakatakderkayo iti rabaw ti bato ti pammatiyo ken ni Jesucristo. Dayta a pammati ti mangiturongto kadakayo iti inaldaw a panagbabawi ken agtultuloy a panagtungpal iti katulagan. Kalpasanna kanayonto a laglagipenyo Isuna. Ken babaen dagiti bagyo ti gura ken kinadangkes, mariknayonto ti kinatibker ken panangnamnama. …
… Kas maysa a naemma ken managayat nga anak, awatem ti tulongna. Aramiden ken tungpalenyo dagiti katulagan nga idiayana iti Ti Simbaan ni Jesucristo dagiti Santo iti Ud-udina nga Aldaw. Dagitoy ti mangpatibkerto kadakayo. Ammo ti Mangisalakan dagiti bagyo ken dagiti lugar ti kinatalged iti dalan nga agsubli Kenkuana ken iti Nailangitan nga Amatayo. Ammona ti dalan. Isu ti Dalan.
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, May 2022. Ilokano. 18351 864