Binulan a Mensahe iti Para iti Pigsa dagiti Agtutubo , Mayo 2024
Agbalinto a Nasayaat ti Amin Gapu Kadagiti Katulagan iti Templo
Dagiti naadaw a sao
EUA
Kakabsat, sipapakumbaba a paneknekak a bayat ti itatabunotayo iti templo, maipalagip kadatayo ti agnanayon a saguday dagiti espiritutayo, ti relasiontayo iti Ama ken ti nadiosan nga Anakna, ken ti kangrunaan a tarigagaytayo nga agsubli iti nailangitan a pagtaengantayo. …
Babaen ti naparegta a panangidaulo ni Presidente Nelson, pinapardas ti Apo, ken agtultuloyto a papardasenna, ti pannakabangon dagiti templo iti intero a lubong. Daytoyto ti mangted iti gundaway kadagiti amin nga annak ti Dios nga umawat kadagiti ordinansa ti pannakaisalakan ken pannakaitan-ok ken mangaramid ken mangtungpal kadagiti sagrado a katulagan.
Ti masansan a pannakiraman kadagiti ordinansa ti templo ti mangpataud iti pagtuladan ti debosion iti Apo. No tungpalenyo dagiti katulaganyo iti templo ken laglagipenyo dagitoy, awisenyo ti pannakikadkadua ti Espiritu Santo a mangpapigsa ken mangdalus kadakayo.
Babaen kadagiti katulagan iti pannakailantip iti templo a makaawattayo iti pammatalged dagiti naayat a koneksion ti pamilia nga agtultuloyto kalpasan ti ipapatay ken agpaut iti kinaagnanayon. Ti panangdayaw kadagiti katulagan ti panagasawa ken pamilia a naaramid iti templo ti Dios ti mangipaay iti salaknib manipud iti kinadakes ti kinaagum ken kinatangsit.
Sigurado a dumteng kadatayo amin dagiti pannubok, karit, ken sakit ti nakem. Awan kadatayo ti nawaya manipud iti “siit ti lasag” [kitaen iti 2 Taga Corinto 12:7–10]. Nupay kasta, bayat ti itatabunotayo iti templo ken pananglagiptayo kadagiti katulagantayo, makapagsaganatayo nga umawat iti personal a panangiturong manipud iti Apo.
Patpatgek a kakabsatko, paneknekak nga awanen ti napatpateg ngem ti panangdayaw kadagiti katulagan nga inaramidyo wenno mabalin nga aramidenyo iti templo.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, May 2024. Ilokano. 19298 864