Binulan a Mensahe ti Liahona , Mayo 2024

Agrag-o iti Sagut dagiti Tulbek ti Priesthood

Ni Presidente Russell M. Nelson

Presidente ti Ti Simbaan ni Jesucristo dagiti Santo iti Ud-udina nga Aldaw

Iturayan dagiti tulbek ti priesthood no kasano a mausar ti priesthood ti Dios a mangyeg kadagiti panggep ti Apo ken mangbendision kadagiti amin nga umawat iti naisubli nga ebanghelio.

Patpatgek a kakabsatko, ita nga aldaw ti maysa a napnuan pakasaritaan nga aldaw para kadakami ken Presidente Dallin H. Oaks. 40 a tawenen ti napalabas, idi Abril 7, 1984, idi nakanunongankami iti Korum dagiti Sangapulo-ket-dua nga Apostol. Nagrag-okami iti tunggal maysa ken tunggal sapasap a komperensia manipud idin, agraman daytoy. Nabendisionantayo manen iti sagrado a pannakaibukbok ti Espiritu. Namnamaek nga ulitenyonto nga adalen dagiti mensahe daytoy a komperensia kadagiti umay a bulan.

United Kingdom

Idi nayanakak, addan innem a maar-aramat a templo iti Simbaan—saggaysa iti St. George, Logan, Manti, ken Salt Lake City, Utah; kasta met iti Cardston, Alberta, Canada; ken Laie, Hawaii. Dua nga immun-una a templo ti nabiit a maus-usar iti Kirtland, Ohio, ken Nauvoo, Illinois. Bayat ti yaakar ti sibubukel a Simbaan iti laud, napilitan dagiti Santo a nangpanaw kadagita dua a templo.

Dinadael dagiti arsonista ti Templo iti Nauvoo babaen ti panangpuorda. Inulit a binangon daytoy ken kalpasanna indaton ni Presidente Gordon B. Hinckley. Ti Templo iti Kirtland ket rinugitan dagiti kabusor ti Simbaan. Idi agangay ti Templo ti Kirtland ket nagun-od ti Komunidad ni Cristo, a nangtagikua iti daytoy iti adu a tawen.

Idi napan a bulan impakaammomi a ginatang ti Ti Simbaan ni Jesucristo dagiti Santo iti Ud-udina nga Aldaw ti Templo ti Kirtland, agraman ti sumagmamano a napateg a napnuan pakasaritaan a lugar idiay Nauvoo. Bigbigenmi unay ti pateg dagiti nadungngo ken makagunggona iti tunggal maysa a panaglilinnawagmi kadagiti lider manipud iti Komunidad ni Cristo a nangiturong iti daytoy a tulag.

Ti Templo iti Kirtland

Addaan ti Templo iti Kirtland iti karkarna a kaipapanan ti Pannakaisubli ti ebanghelio ni Jesucristo. Sumagmamano a pagteng a napasamak sadiay ti naipadto iti adu a milenio ken kasapulan iti naisubli a Simbaan ti Apo tapno maipatungpal ti misionna iti ud-udina nga aldaw.

Ti kapatgan kadagitoy a pagteng ket napasamak iti Domingo ti Paskua ti Panangungar, Abril 3, 1836. Iti dayta nga aldaw, napasaran da Joseph Smith ken Oliver Cowdery ti agsasaruno a nakaskasdaaw nga isasarungkar. Umuna, nagparang ni Apo Jesucristo. Inrekord ti Propeta a “kasla dumardarang nga apuy dagiti mata [ti Mangisalakan]; puraw ti buokna a kas iti puro a niebe; naranraniag ti rupana ngem iti init; ket ti timekna kas iti anasaas ti dakkel a danum.”

Kabayatan daytoy nga isasarungkar, impatalged ti Apo ti kinasiasinona. Kinunana, “Siak ti umuna ken maudi; Siak ti nagbiag, siak ti napapatay; siak ti mangibabaet kadakayo iti Ama.”

Kalpasanna impakdaar ni Jesucristo nga inawatnan ti templo kas balayna ket inaramidna daytoy nakaskasdaaw a kari: “Iparangarangkonto ti bagik kadagiti taok a buyogen ti asi iti daytoy a balay.”

Mayaplikar daytoy napateg a kari iti tunggal naidaton a templo ita. Awisenkayo a mangutob no ania ti kaipapanan ti kari ti Apo para kadakayo mismo.

Kalpasan ti isasarungkar ti Mangisalakan, nagparang ni Moises. Intalek ni Moises ken ni Joseph Smith dagiti tulbek para iti pannakaummong ti Israel ken ti panagsubli dagiti sangapulo a tribu.

Idi naggibus daytoy a sirmata, “nagparang ni Elias, ket intedna ti dispensasion ti ebanghelio ni Abraham” ken Joseph.

Kalpasanna nagparang ni Elias a propeta. Ti panagparangna ti nangipatungpal iti kari ni Malakias a sakbay ti Maikadua a Yaay, ibaon ti Apo ni Elias nga “isublinanto ti puso dagiti amma kadagiti annak, ken ti puso dagiti annak kadagiti ammada.” Intalek ni Elias dagiti tulbek ti bileg a mangilantip ken ni Joseph Smith.

Temple Square

Ti kaipapanan dagitoy a tulbek a maisubsubli ditoy daga babaen ti tallo a nailangitan a mensahero babaen ti panangiturong ti Apo ket saan a mabalin a palabsen. Dagiti tulbek ti priesthood ti mangbukel iti turay ken bileg ti panguluen. Dagiti tulbek ti priesthood ti mangituray no kasano a mabalin a mausar ti priesthood ti Dios a mangipatungpal kadagiti panggep ti Apo ken mangbendision kadagiti amin nga umawat iti naisubli nga ebanghelio ni Jesucristo.

Napateg a laglagipen a sakbay ti pannakaorganisa ti Simbaan, inted dagiti nailangitan a mensahero ti Aaronic ken Melchizedek Priesthood ken ni Propeta Joseph ken intedda kenkuana dagiti tulbek ti agpada a priesthood. Dagitoy a tulbek ti nangted ken ni Joseph Smith iti turay a mangorganisa iti Simbaan idi 1830.

Kalpasanna iti Templo ti Kirtland idi 1836, nasken ti pannakaited dagitoy tallo a nayon a tulbek ti priesthood—a dagitoy, tulbek ti pannakaummong ti Israel, tulbek ti ebanghelio ni Abraham, ken tulbek ti bileg a mangilantip—ket napateg. Dagitoy a tulbek ti nangipalubos ken ni Joseph Smith—ken ti amin a simmaruno a Presidente ti Simbaan ti Apo—a mangummong iti Israel iti agsumbangir ti belo, a mangbendision iti amin a natulagan nga ubbing babaen kadagiti bendision ni Abraham, a mangikabil iti mangratipika a pangilantip kadagiti ordinansa ken katulagan ti priesthood, ken mangilantip kadagiti pamilia iti agnanayon. Awan patinggana ken makapagagar ti bileg dagitoy a tulbek ti priesthood.

Ibilang no kasano koma ti pakaidumaan ti bukodmo a biag no saan a naisubli dagiti tulbek ti priesthood iti daga. No awan dagiti tulbek ti priesthood, saan kayo koma a naparaburan iti bileg ti Dios. No awan dagiti tulbek ti priesthood, makapagserbi laeng ti Simbaan a kas maysa a napateg a pannursuro ken timpuyog nga agpaay iti tao ngem saan a makapagpaay iti ad-adu pay. No awan dagiti tulbek ti priesthood, awan koma kadatayo ti makagun-od kadagiti kasapulan nga ordinansa ken katulagan a mangibegkes kadatayo kadagiti ay-ayatentayo iti agnanayon ken mangipalubos kadatayo nga agbiag a kadennatayo iti Dios iti kamaudiananna.

Dagiti tulbek ti priesthood ti mangiduma iti Ti Simbaan ni Jesucristo dagiti Santo iti Ud-udina nga Aldaw iti ania man a sabali nga organisasion iti daga. Adu a dadduma pay nga organisasion ti mabalin ken mangaramid a mangpasayaat iti biagyo ditoy a mortalidad. Ngem awan ti organisasion a mabalin ken mangimpluensianto iti biagyo kalpasan ti ipupusay.

Dagiti tulbek ti priesthood ti mangted kadatayo iti turay a mangted iti amin a bendision a naikari ken Abraham iti tunggal lalaki ken babai nga agtungtungpal iti katulagan. Ti aramid iti templo ti mangaramid kadagitoy a napipintas a bendision a sidadaan a magun-od ti amin nga annak ti Dios, sadino man wenno kaano man a nagbiagda wenno agbibiagda itan. Agrag-otayo koma ta adda manen ditoy daga dagiti tulbek ti priesthood!

Kenya

Awisenkayo a mangibilang a siaannad kadagiti sumaganad a tallo a palawag:

1. Ti pannakaummong ti Israel ti pammaneknek nga ay-ayaten ti Dios ti amin nga annakna iti sadino man.

2. Ti ebanghelio ti Abraham ti kangrunaan a pammaneknek nga ay-ayaten ti Dios ti amin nga annakna iti sadino man. Awisenna ti amin nga umasideg Kenkuana—, “nangisit ken puraw, adipen ken nawaya, lalaki ken babai; … amin ket agpapada iti Dios.”

3. Ti bileg a mangilantip ket nailangitan a pammaneknek no kasano ti kadakkel ti ayat ti Dios iti amin nga annakna iti sadino man ken kayatna a pilien ti tunggal maysa kadakuada ti agawid Kenkuana.

Dagiti tulbek ti priesthood a naisubli ken ni Propeta Joseph Smith ti mangaramid a posible iti tunggal lalaki ken babai nga agtungtungpal iti katulagan tapno mangtagiragsak kadagiti nakaskasdaaw a personal a naespirituan a pribilehio. Adtoy manen, adu ti masursurotayo manipud iti sagrado a pakasaritaan ti Templo ti Kirtland.

Ti pangidaton a kararag ni Joseph Smith iti Templo ti Kirtland ket maysa a pagsursuruan maipapan no kasano a naespirituan a mangpabileg ti templo kadatayo tapno mangsango kadagiti karit ti biag kadagitoy maudi nga aldaw. Allukoyenkayo a mangadal iti dayta a kararag, a naisurat iti Doktrina ken Katulagan benneg 109. Dayta a pangidaton a kararag, a naawat babaen iti paltiing, isurona a ti templo ket ti “balay a pagkararagan, balay a pagayunuan, balay ti pammati, balay a pagadalan, balay ti gloria, balay ti urnos, balay ti Dios; ”

Daytoy a listaan dagiti kababalin ket ad-adda nga amang ngem iti panangiladawan iti maysa a templo. Maysa dayta a kari maipapan iti mapasamakto kadagiti agserserbi ken agdaydayaw iti balay ti Apo. Mabalin a mangnamnamada ti umawat kadagiti sungbat iti kararag, personal a paltiing, dakdakkel a pammati, pigsa, liwliwa, ad-adu a pannakaammo, ken ad-adu a bileg.

Ti oras iti templo ti mangtulong kadakayo nga agpanunot iti celestial ken mangsirmata iti no asinokayo a talaga, asino ti pakapagbalinanyo, ken ti kita ti biag a maaddaankayo iti kinaagnanayon. Ti masansan a panagdayaw iti templo pasayaatennanto ti wagas a panangkitayo iti bagiyo ken no kasano a maibagaykayo iti natan-ok a plano ti Dios. Ikarik dayta kadakayo.

Maikari pay kadatayo nga iti templo mabalin nga “awatentayo ti pakabuklan ti Espiritu Santo.” Panunoten no ania ti kaipapanan dayta a kari iti kaadda dagiti langit a silulukat para iti tunggal napasnek nga agsapsapul iti agnanayon a kinapudno.

Naibilin kadatayo nga amin nga agdaydayaw iti templo maaddaandanto iti bileg ti Dios ken dagiti anghel a “mangtengngel kadakuada.” Kasano ti panangpadakkelna iti panagtalekyo a makaammo a, kas maysa a naparaburan a babai wenno lalaki a naarmasan iti bileg ti Dios, saanyo a kasapulan a sanguen ti biag nga agmaymaysa? Ania a tured ti maitedna kadakayo a mangammo a talaga a tulongannakayonto dagiti anghel?

Kamaudiananna, naikari kadatayo nga “awan ti panangkadua ti kinadakes” nga agballigi kadagidiay agdaydayaw iti balay ti Apo.

Ecuador

Napateg ti pannakaawat kadagiti naespirituan a pribilehio a naaramid a posible iti templo iti tunggal maysa kadatayo ita.

Patpatgek a kakabsatko, adtoy ti karik. Awanto ti mangtulong kadakayo nga ad-adda pay a kumpet a naimbag iti landok a pagkaptan ngem iti panagdaydayaw iti templo a masansan no ipalubos dagiti kasasaadyo. Awanto ti mangsalaknib kadakayo nga ad-adda pay no maipasangokayo kadagiti angep ti kinasipnget ti lubong. Awanto ti mangpabileg iti pammaneknekyo ken Apo Jesucristo ken ti Pannubbotna wenno mangtulong kadakayo a mangipaawat iti natan-ok a plano ti Dios nga ad-adda pay. Awanto ti mangep-ep iti ti espirituyo nga ad-adda pay iti panawen ti panagsaem. Awanto ti manglukat kadagiti langit nga ad-adda pay. Awan!

Ti templo isu ti ruangan nga agturong kadagiti kaindaklanan a bendision nga insagana ti Dios para iti tunggal maysa kadatayo, ta ti templo ti kakaisuna a lugar ditoy daga a mabalin a pangawatantayo iti amin dagiti bendision a naikari ken ni Abraham. Dayta ti gapuna nga ar-aramidentayo ti amin a kabaelantayo, babaen ti panangiturong ti Apo, tapno ad-adda a magun-od dagiti miembro ti Simbaan dagiti bendision ti templo. Ngarud, maragsakankami a mangipakaammo a planomi a mangbangon iti maysa a baro a templo iti tunggal maysa kadagiti sumaganad a 15 a lokasion:

• Uturoa, French Polynesia

• Chihuahua, Mexico

• Florianópolis, Brazil

• Rosario, Argentina

• Edinburgh, Scotland

• Brisbane, Australia south area

• Victoria, British Columbia

• Yuma, Arizona

• Houston, Texas south area

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuela

Patpatgek a kakabsatko, paneknekak a daytoy ti Ti Simbaan ni Jesucristo Dagiti Santo iti Ud-udina nga Aldaw. Isu ti pangulona. Datayo dagiti disipulona.

Agrag-otayo koma iti pannakaisubli dagiti tulbek ti priesthood, a mamagbalin a posible a pagragsakantayo ti tunggal naespirituan a bendision a natallugod ken maikaritayo nga awaten. Paneknekak iti sagrado a nagan ni Jesucristo, amen.

© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, May 2024. Ilokano. 19285

Dagiti Nagadawan

1. Pinunuak ti bakante iti Korum dagiti Sangapulo-ket-dua a napanawan a puesto idi Enero 11, 1983, iti ipapatay ni Elder LeGrand Richards. Pinunuan ni Elder Oaks ti napanawan a puesto iti Enero 11, 1984, iti ipapatay ni Mark E. Petersen.

2. Septiembre 9, 1924.

3. Ti pannakaidaton ti naulit a nabangon a Templo iti Nauvoo Illinois ni President Gordon B. Hinckley ket napasamak idi Hunio 27, 2002, ti maika-158 nga anibersario ti kinamartir da Joseph ken Hyrum Smith.

4. Maysa a lawas laeng kalpasan ti panangidaton ni Propeta Joseph Smith iti Templo iti Kirtland.

5. Doktrina ken Katulagan 110:3.

6. Doktrina ken Katulagan 110:4.

7. Doktrina ken Katulagan 110:7.

8. Kitaen iti Doktrina ken Katulagan 110:11.

9. Doktrina ken Katulagan 110:12. Daytoy ti panagtalinaed ti kari nga inaramid ti Apo ken ni Abraham rinibu a tawen kasakbayanna (kitaen iti Genesis 18:18; 1 Nephi 15:18).

10. Kitaen iti Malakias 4:5–6.

11. Kitaen iti Doktrina ken Katulagan 110:13–16.

12. Kitaen iti Doktrina ken Katulagan 13; 27:7–8, 12.

13. Kitaen iti Doktrina Ken Katulagan 20:1–4.

14. Idi imbaga ti Apo ken ni Joseph Smith a daytoy a dispensasion ti panawen nga “awan ti maiparit” (Doktrina ken Katulagan 121:28), gapu ta naisubli dagitoy a tulbek ti priesthood ditoy daga.

15. Kitaen iti Doktrina ken Katulagan 95:8; 109:22.

16. Kitaen iti Doktrina ken Katulagan 132:45–46.

17. 2 Nephi 26:33; nainayon ti panangyunay-unay.

18. Doktrina ken Katulagan 109:8.

19. Doktrina ken Katulagan 109:15.

20. Doktrina ken Katulagan 109:22

21. Kitaen iti Doktrina Ken Katulagan 109:24–26.

22. Kayatna a sawen ti balikas ti Dios.

23. Kitaen iti Doktrina ken Katulagan 110:12; 132:29–30.