Binulan a Mensahe ti Liahona , Nobiembre 2024
Umayto Manen ni Apo Jesucristo
Itan ti panawen a para kadakayo ken kaniak nga agsagana para iti Maikadua nga Yaay ti Apo ken Mangisalakantayo, ni Jesus a Cristo.
Patpatgek a kakabsatko, agyamanak ta pinaraburannak ti Apo a makisarita kadakayo.
Iti daytoy a komperensia, nakisarita kadatayo ti Apo babaen kadagiti katulonganna. Igunamgunamko nga adalenyo dagiti mensaheda. Usarenyo dagitoy kas litmus test no ania ti pudno ken saan bayat ti sumaganad nga innem a bulan.
Agarup lima a tawenen a maar-aramid ti pannakapreserba ken pannakapabaro ti Templo ti Salt Lake ken dadduma pay a paset iti Temple Square. Ipamatmat dagiti agdama a projeksion a malpas daytoy a trabaho iti ngudo ti 2026. Agyamyamankami kadagiti amin nga agtartrabaho iti daytoy dakkel a proyekto.
Iti napalabas nga innem a bulan, naidedikar wenno nangidedikarkami manen iti siam a templo iti lima a pagilian. Manipud ita agingga iti ngudo ti tawen, mangidedikarkami iti lima pay.
Ita nga aldaw maragsakankami a mangipakaammo kadagiti plano a mangipatakder iti 17 pay a templo. Dumngegkayo koma a siraraem bayat nga ipakaammok dagiti lokasion.
-
Juchitán de Zaragoza, Mexico
-
Santa Ana, El Salvador
-
Medellín, Colombia
-
Santiago, Dominican Republic
-
Puerto Montt, Chile
-
Dublin, Ireland
-
Milan, Italy
-
Abuja, Nigeria
-
Kampala, Uganda
-
Maputo, Mozambique
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alabama
-
Milwaukee, Wisconsin
-
Summit, New Jersey
-
Price, Utah
Patpatgek a kakabsatko, makitayo kadi ti agdama a mapaspasamak? Ikarkararagko a ditay koma palabsen ti kinatan-ok daytoy a kanito! Ti Apo pudno a papardasenna ti aramidna.
Apay a mangbangbangontayo kadagiti templo iti kasta nga awan kapadana a kapartak? Apay? Gapu ta binilinnatayo ti Apo nga aramidentayo dayta. Makatulong dagiti bendision ti templo a mangummong iti Israel iti agsumbangir ti belo. Makatulong pay dagitoy a bendision a mangisagana kadagiti tao a tumulong a mangisagana iti lubong para iti Maikadua nga Yaay ti Apo!
Kas impadto ni propeta Isaias, ken kas nailanad iti Messiahni Handel, inton agsubli ni Jesucristo, “maiparangarangto ti dayag ti Apo, ket makitanto ti amin a tattao.”
Iti dayta nga aldaw “ket isunto ti mangituray kadatayo: maawaganto iti Nakaskasdaw a Mammagbaga, Mannakabalin a Dios, Agnanayon nga Ama, Prinsipe ti Kappia.”
Agturayto ni Jesucristo nga agpadpada manipud iti daan a Jerusalem ken ti Baro a Jerusalem a “mabangonto iti kontinente ti America.” Manipud kadagitoy dua a sentro, iturongnanto dagiti aramid ti Simbaanna.
Iti dayta nga aldaw ti Apo maawaganto iti “Ari dagiti ar-ari ken Apo dagiti Appo.” Dagidiay Kaduana dagiti “naayaban, napili ken mapagtalkan.”
Kakabsat, itan ti panawen para kadakayo ken kaniak nga agsagana para iti Maikadua a Yaay ti Apo ken Mangisalakantayo, ni Jesus a Cristo. Itan ti panawen a pagbalinentayo a kangrunaan a prayoridadtayo ti kinadisipulotayo. Iti lubong nga adu dagiti banag a napigsa unay a mangsinga kadatayo, kasanotayo a maaramid daytoy?
Makatulong kadatayo ti regular a panagdayaw iti templo. Iti balay ti Apo, agpokustayo ken ni Jesucristo. Agsursurotayo maipapan Kenkuana. Mangaramidtayo kadagiti katulagan a sumurot Kenkuana. Maam-ammotayo Isuna. Bayat a tungtungpalentayo dagiti katulagantayo iti templo, ad-adda a magun-odtayo ti makapabileg a pannakabalin ti Apo. Iti templo, umawattayo iti proteksion manipud kadagiti panangdangran ti lubong. Mapadasantayo ti nadalus nga ayat ni Jesucristo ken ti Nailangitan nga Amatayo iti kasta unay a kinawadwad! Mariknatayo ti talna ken naespirituan a pammatalged, a maisupadi iti riribuk ti lubong.
Daytoy ti karik kadakayo: Tunggal napasnek a mangsapsapul ken ni Jesucristo ket masarakanna Isuna idiay templo. Mariknayonto ti asina. Masarakanyonto dagiti sungbat kadagiti makapaupay unay a saludsodyo. Ad-adda a maawatanyo ti rag-o ti ebangheliona.
Naammuak a ti kapatgan a saludsod a masapul a sungbatan ti tunggal maysa kadatayo ket daytoy: Siasino wenno ania ti pangtedak iti biagko?
Ti desisionko a mangsurot ken Jesucristo ti kapatgan a desision nga inaramidko. Bayat ti panageskuelak iti medisina, nakagun-odak iti pammaneknek maipapan iti kinadios ti Dios Ama ken ti Anakna a ni Jesucristo. Manipud idin ti Mangisalakantayo ti bato a nangibangonak iti biagko. Dayta a pili ti nangaramid iti amin a nagdumaan! Dayta a desision ti nangpasimple iti adu a dadduma pay a pangngeddeng. Dayta a pangngeddeng ti nangted kaniak iti panggep ken direksion. Nakatulong met dayta kaniak a mangsaranget kadagiti bagyo ti biag. Iburayko man ti dua a pagarigan:
Umuna, idi di ninamnama a pimmusay ni baketko a Dantzel, diak makontak ti asinoman kadagiti annakmi. Sadiay nga addaak nga agmaymaysa, naupay, ken agpakpakaasi iti tulong. Agyamanak ta babaen ti Espirituna, insuro ti Apo kaniak no apay a pimmusayen ti patpatgek a ni Dantzel. Gapu iti dayta a pannakaawat, naliwliwaak. Iti panaglabas ti panawen, nalaklakak a napagballigian ti ladingitko. Idi agangay, inkasarko ti patpatgek nga asawak a ni Wendy. Isu ti kangrunaan a paset ti maikadua a pagariganko.
Idi adda maysa a naituding nga annongenmi ken ni Wendy iti adayo a lugar, adda dagiti armado a mannanakaw nangitutok iti paltog iti ulok sada ginuyod ti gatilio. Ngem saan a nagputok ti paltog. Iti intero dayta a kapadasan, agpada a nagpeggad ti biagmi. Ngem nariknami ken ni Wendy ti di mailibak a talna. Dayta ti talna “a di matukod a panunoten.”
Kakabsat, liwliwaennakayto met ti Apo! Patibkerennakayto. Bendisionannakayto iti talna, uray iti tengnga ti riribuk.
Dumngegkayo koma iti daytoy a kari ni Jesucristo kadakayo: “Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti anghelko, a mangtarabay kadakayo.”
Awan ti limitasion ti abilidad ti Mangisalakan a tumulong kadakayo. Ti narigat a maawatan a panagsagabana idiay Getsemani ken idiay Calvario ket agpaay kadakayo! Ti awan patinggana a Pannubbotna ket para kadakayo!
Igunamgunamko kadakayo a mangbusboskayo iti panawen iti tunggal lawas—iti intero a panagbiagyo—tapno mapaadu ti pannakaawatyo iti Pannubbot ni Jesucristo. Maladingitannak kadagidiay nailumlom iti basol ken saanda nga ammo no kasano ti rummuar. Agsangsangitak para kadagiti makidangdangadang iti naespirituan wenno agmaymaysa a mangibaklay kadagiti nadagsen a dadagsen gapu ta dida maawatan ti inaramid ni Jesucristo para kadakuada.
Inawat ni Jesucristo dagiti basolyo , saemyo , ladingityo , ken dagiti sagubanityo . Saanyo a kasapulan nga ibturan dagita nga agmaymaysa! Pakawanennakayto no agbabawikayo. Bendisionannakayo iti kasapulanyo. Paimbagenna ti nasugatan a kararuayo. Bayat nga alaenyo ti sangolna, mariknayo a nalaglag-an dagiti dadagsenyo. No agaramid ken salimetmetanyo dagiti katulagan a mangsurot ken ni Jesucristo, maammuanyunto a temporario laeng dagiti nasaem a kanito ti biagyo. Dagiti panagsagabayo ket “alimonento ti rag-o ni Cristo.”
Saan a nasapa wenno naladaw unay nga agbalinkayo a matalek a disipulo ni Jesucristo. Iti kasta, naan-anay a mariknayunto dagiti bendision ti Pannubbotna. Ad-adda pay a nasamsamaykayto a tumulong a mangummong iti Israel.
Patpatgek a kakabsatko, iti masanguanan, agsublinto ni Jesucristo ditoy daga kas ti milenio a Mesias. Isu nga ita nga aldaw awisenkayo nga idedikaryo manen ti biagyo ken ni Jesucristo. Awisenkayo a tumulong a mangummong iti naiwaraswaras nga Israel ken mangisagana iti lubong para iti Maikadua a Yaay ti Apo. Awisenkayo a makisarita maipapan ken Cristo, mangpaneknek maipapan ken Cristo, maaddaan iti pammati ken Cristo, ken agrag-o ken Cristo!
Umaykayo ken Cristo ket “idatonyo ti sibubukel a [kararuayo]” Kenkuana. Daytoy ti sikreto ti biag a naragsak!
Ti kasayaatan ket mapasamak pay laeng iti masanguanan, patpatgek a kakabsatko, gapu ta umayto manen ti Mangisalakan! Ti kasayaatan ket mapasamak pay laeng iti masanguanan gapu ta papartaken ti Apo ti trabahona. Ti kasayaatan ket mapasamak pay laeng iti masanguanan bayat a naan-anay nga iturongtayo ti puso ken biagtayo ken ni Jesucristo.
Iburayko ti nadayaw pammaneknekko a ni Jesucristo ti Anak ti Dios. Siak ti disipulona. Mapadayawanak nga agbalin a katulonganna. Iti Maikadua a Yaayna, “maiparangarangto ti dayag ti Apo, ket makitanto ti amin a tattao.” Mapnonto dayta nga aldaw iti rag-o para kadagiti nalinteg!
Babaen ti bileg dagiti sagrado a tulbek ti priesthood nga iggemko, ipakdaarko daytoy a kinapudno kadakayo ken iti amin a lubong! Iti nagan ni Jesucristo, amen.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, November 2024. Ilokano. 19349 864