O Tingbaot, Tingbaot
“O tingbaot, tingbaot,” Ol profet long Buk long Momon oli bin stap askem.1 Poen blong mi hem i blong talem strong long yufala blong faenem ol wei blong luksave mo tingbaot fasin blong kaen we i blong God.
Mi wantem talem tangkyu long kwaea long brodkas blong olgeta long moning ia, we i abaot Sevya mo glad blong luk se ol toktok blong wan long ol singsing ia we oli singsing long hem, “Hemia I Kraes,” we Presiden James E. Faust i bin raetem. Taem mi sidaon narasaed long Brata Newell, mo mi lei i go long fored blong hem mo askem, “?Olsem wanem long ol pikinini blong yu?” Hem i talem, “Taem Presiden Faust i bin stap sidaon long jea ia, hemia i wanem we hem i stap askem oltaem.” Mi no sapraes, from se Presiden Faust i oltaem olsem wan gudfala eksampol blong wan disaepol we oli tokbaot insaed long Miusik mo Ol Toktok tedei. Oltaem mi stap filim se taem bae mi gro i kam antap, mi wantem blong kam olsem Presiden Faust. Bambae i gat taem.
Taem ol pikinini blong mitufala oli bin smol, mi bin stat blong stap raetem daon smolsmol samting we i bin stap hapen evri dei. Bae mi talemaot long yufala olsem wanem nao i stat. Mi kam long haos let afta long wan smol wok blong Jos. Ples i tudak finis. Papa blong waef blong mi, we haos blong hem i kolosap long mifala, i mekem mi sek taem mi stap wokbaot i go fored long doa blong haos blong mi. Hem i stap karem fulap paep long solda blong hem, i wokbaot hariap mo hem i werem ol klos blong wok blong hem yet. Mi save se hem i bin stap mekem wan rod blong pamem wota long wan smol reva daon long hil kolosap long mifala i kam antap long propeti blong mifala.
Hem i smael mo toktok sloslo afta i hariap wokbaot pas bitim mi i go long dak ples blong gohed long wok blong hem. Mi wokbaot smol i go fored long haos, mo stap tingting long wanem we hem i stap mekem blong mifala mo taem mi kasem long doa, mi harem lo maen blong mi—i no long voes blong miwan—ol toktok ia: “Mi no stap givim long yu ol eksperiens ia blong yuwan. Raetem daon olgeta.”
Mi gobak long haos. Mi no go long bed. Nomata mi bin taet, mi tekemaot sam pepa mo stat blong raet. Mo taem mi bin mekem hemia, mi bin andastanem mesej we mi bin harem long maen blong mi. Mi mas raetemdaon blong ol pikinini blong mi oli ridim wan dei long fiuja, olsem wanem mi bin luk han blong God we i bin stap blesem famli blong mi. Apu man i no nid blong mekem wanem we hem i stap mekem blong mifala. Hem i save askem wan nara man blong mekem o, blong no mekem nomo. Be hem i stap givim seves lo mifala, ol famli blong hem, long wan wei we ol kavenan disaepol blong Jisas Kraes oli stap mekem oltaem. Mi save se hemia i tru. Mekem se mi raetem hemia daon blong mekem se ol pikinini blong mi oli save gat memori ia wan dei we taem oli nidim.
Mi stap raetemdaon smolsmol samting evri dei blong plante yia. Mi neva mestem wan dei blong raet nomata mi taed o mi mas wekap eli long moning blong statem wan nara dei. Bifo bae mi raet, bae mi stap tingting hevi long kwestin ia: “?Mi bin stap luk han blong God i stap kamaot blong tajem mifala o ol pikinini blong mifala o famli blong mifala tedei?” Taem mi stap tingting long hemia, wan samting bae i stat blong hapen. Taem bae mi stap tingtingbak ova long dei ia, bae mi luk pruf long wanem we God i bin mekem long wan long mifala mo mi no bin luksave long ol bisi taem blong dei ia. Taem hemia i stap hapen mo i stap hapen plante taem, mi kam blong luksave se taem mi stap traehad blong tingbaot, i bin letem God blong soem long mi wanem we Hem i bin mekem.
Fasin blong talem tangkyu i bin stat blong gro moa insaed long hat blong mi. Testemoni i bin gro. Mi kam blong save gud moa se Papa blong yumi long Heven i stap harem mo ansarem ol prea blong yumi. Mi bin filim moa fasin blong talem tangkyu from wei ia blong save mekem wan hat i kam sofsof mo wan hat we i save kam klin, tru long Atonmen blong Sevya Jisas Kraes. Mo mi gro wetem moa tras se Tabu Spirit i save mekem yumi tingbaot evri samting—iven ol samting we yumi no stap luksave o stap gat intres long olgeta taem oli stap hapen.
Ol yia i pas. Ol boe blong mi oli gro i kam ol man. Wanwan taem bae wan long olgeta i kam mekem mi sapraes taem bae i talem, “Papa, mi bin stap ridim insaed long kopi blong jenol blong mi abaot taem …” mo afta bae hem i talem long mi abaot olsem wanem nao taem hem i stap ridim ol samting we i bin hapen longtaem finis i bin helpem hem blong luksave samting we God i bin mekem long dei blong hem tedei.
Poen blong mi hem i blong talem strong long yu blong faenem ol wei blong luksave mo tingbaot fasin blong kaen we i blong God. Bae i bildimap ol testemoni blong yumi. Maet yu no gat wan jenol. Maet yu no serem wanem we yu raetemdaon wetem olgeta we yu lavem mo we yu givim seves long olgeta. Be yu mo olgeta, bae i kasem blesing taem yu tingbaot wanem we God i bin mekem blong yufala. Yu tingbaot singsing ia we samtaem yumi stap singsing long hem: “Yu gat blesing Kaontem evriwan; mo bae yu sapraes long wanem we Lod i bin mekem.”2
Bae hem i no isi blong tingbaot. Blong stap laef long wan laef naoia wetem wan vel we i kavremap ae blong yumi, yumi no save tingbaot laef blong yumi bifo long wol ia wetem Papa blong yumi long Heven mo Pikinini blong Hem we i lavem tumas, Jisas Kraes; mo tu yumi no save luk wetem nomol ae blong yumi o gat wan risen blong luk han blong God long laef blong yumi. Blong stap lukluk ol samting olsem ia, i nidim Tabu Spirit. Mo i no isi blong stap klin inaf blong gat kampani blong Tabu Spirit long wan wol we i fulap long fasin nogud.
Hemia nao i from wanem fasin blong stap fogetem God i kam wan problem we i stap gohed blong hapen raon wetem ol pikinini blong Hem long taem we wol ia i bin stat. Tingting long ol taem blong Moses, taem God i givim mana mo tru ol bigfala merikel mo ol wei we man i save luk, I lidim mo protektem ol pikinini blong Hem. Ol profet oli gohed blong wonem ol pipol nomata oli stap kasem ol blesing finis, olsem we oltaem ol profet oli stap givim woning mo bae oli gohed oltaem: !Be yufala i mas lukaot gud! Yufala i no mas fogetem ol samting ya samtaem, we yufala i luk finis long ae blong yufala. Oltaem long laef blong yufala, bambae yufala i mas tingbaot ol samting ya.3
Mo jalenj ia blong stap tingbaot i oltaem kam wan had samting blong mekem blong olgeta we oli stap kasem plante blesing. Olgeta we oli stap fetful long God, bae Hem i lukaotem gud olgeta mo bae oli kam antap gud long graon. Hemia bae i kam olsem wan risal blong stap givim seves mo folem Ol Komanmen blong God. Be wetem ol blesing ia, bae i kam ol temtesen we bae i mekem wan i fogetem wea nao blesing ia i kam long hem. I isi blong stat blong filim se ol blesing oli no kam long wan Papa we i gat plante lav we yumi stap dipen long Hem, be we i kam long ol paoa blong yumiwan nomo. Ol profet oli stap ripitim toktok ia oltaem.
Mo olsem ia nao yumi save luk olsem wanem i giaman, mo tu we ol hat blong ol pikinini blong ol man i no stap strong; yes, yumi save luk we Lod long gudfala fasin blong hem we i no save finis i blesem mo mekem i kam antap gud olgeta we i putum tras blong olgeta long hem.
Yes, mo yumi save luk long stret taem we hem i stap mekem i kam antap gud ol pipol blong hem, yes, long saed blong ol plantesen blong olgeta i kam plante, ol grup blong ol animol blong olgeta mo ol buluk blong olgeta, mo long gol, mo long silva, mo long evri fasin blong ol gudgudfala samting long evri kaen we i hapen; hem i letem olgeta i stap laef, mo i mekem olgeta i go fri aot long ol han blong ol enemi blong olgeta; i mekem ol hat blong ol enemi blong olgeta i kam sofsof blong oli no mekem ol faet agensem olgeta; yes, mo blong endem, i mekem evri samting from gudfala laef mo hapi blong ol pipol blong hem; yes, afta i taem we oli mekem ol hat blong olgeta i kam strong, mo fogetem Lod, God blong olgeta, mo purumbut andanit long ol leg blong olgeta Tabu Wan—yes, mo hemia i from ol gud taem blong olgeta mo bigfala sakses blong olgeta we i tumas.
Mo profet i gohed mo talem:“!Yes, hamas nao oli leftemap olgeta long hae tingting; yes, hamas nao oli kwik blong tok flas, mo mekem evri kaen fasin blong samting we i nogud; mo hamas nao oli slo blong tingbaot Lod, God blong olgeta, mo blong givim sora long ol advaes blong hem, yes, hamas nao oli slo blong wokbaot long ol rod blong waes tingting!”4
Sore from se, bigfala sakses i no wan risen ia nomo blong mekem se ol pipol oli fogetem God. I save had tu blong tingbaot Hem taem yumi stap fesem ol trabol long laef blong yumi. Taem yumi stap traehad long laef ia, olsem plante long yumi i stap mekem long saed blong stap pua o taem ol enemi blong yumi oli tok strong agensem yumi o taem we sik i no save kam oraet, enemi blong sol blong yumi bae i save sendem ivel mesej blong hem blong talem se i nogat God o sapos Hem i stap, bae Hem i no kea long yumi. Mekem se bae i had blong Tabu Spirit i tekem i kam long tingting blong yumi ol blesing we yumi bin stap kasem long laef blong yumi long ol taem we yumi smol pikinini mo long medel blong ol bigfala wari blong yumi.
I gat wan simpol samting we i save stopem rabis fasin ia blong stap fogetem God, ol blesing blong Hem mo ol mesej blong Hem long yumi. Jisas Kraes i bin promesem long ol disaepol blong Hem taem oli kolosap blong krusifaem Hem mo laef bakegen long ded blong Hem, afta oli karemaot Hem long olgeta mo i gobak antap long glori blong Papa blong Hem. Ol disaepol oli wantem blong save olsem wanem nao bae oli save stanap strong taem bae Hem i nomo stap wetem olgeta.
Hemia promes. I bin hapen long olgeta long taem ia . I save hapen blong yumi evriwan tedei:
“Mi mi talemaot ol tok ia long yufala long taem ia we mi mi stap yet wetem yufala.
“Mo Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.”5
Ki ia blong stap tingbaot mo kipim testemoni i stap strong oltaem, i blong gat Tabu Spirit olsem kompanion blong yu. Tabu Spirit nao i helpem yumi blong luk wanem we God i bin mekem blong yumi. Tabu Spirit nao i save helpem olgeta we yumi givim seves long olgeta blong luk wanem we God i bin mekem blong olgeta.
Papa long Heven i bin givim long yumi wan simpol paten blong save kasem Tabu Spirit, i no wan taem nomo, be blong stap gohed blong kasem long ol taem we tingting i fasfas long evri dei laef blong yumi. Paten ia oli stap ripitim long prea blong sakramen: Yumi promes se, oltaem bae yumi tingbaot Sevya. Yumi promes blong tekem nem blong Hem long yumi. Yumi promes blong folem ol komanmen blong Hem. Mo promes long yumi se, taem bae yumi mekem olsem, bae yumi oltaem gat Spirit blong Hem i stap wetem yumi.6 Ol promes ia oli wok tugeta long wan naesfala wei blong mekem ol testemoni blong yumi oli kam strong moa, mo long taem we bae i kam, tru long Atonmen bae i save jenisim ol fasin blong wan, sapos nomo yumi stap kipim pat blong promes blong yumi.
Tabu Spirit nao i testifae se Jisas Kraes i Pikinini blong Papa long Heven we i lavem yumi tumas mo wantem yumi blong kasem laef we i no save finis insaed long wanwan famli blong yumi wetem Hem. Iven wetem stat blong testemoni ia, yumi filim mo wantem blong givim seves long Hem mo blong obei ol komanmen blong Hem. Taem yumi gohed strong blong mekem hemia, bae yumi kasem presen ia we i Tabu Spirit blong i save givim long yumi paoa ia blong givim seves. Yumi kam blong luksave han blong God moa klia mekem se long ol taem i kam yumi no tingbaot Hem nomo be, yumi kam blong lavem mo, tru long paoa blong Atonmen, yumi kam moa olsem Hem.
Maet yu askem se, “?Be olsem wanem proses ia i stat long laef blong wan we i no save eni samting nating abaot God, mo hem i klemem se i nogat memori long ol eksperiens long saed blong spirit?” Evriwan i gat ol eksperiens long saed blong spirit mo we oli no save luksave. Evri man mo woman we oli kam insaed long wol ia, oli bin gat Spirit blong Kraes. Olsem wanem nao spirit ia i wok, oli tokbaot insaed long buk blong Moronae:
From luk, Spirit blong Kraes, God i givim long evri man, blong hem i save gat save long samting we i gud aot long samting we i nogud; from samting ia, mi soemaot long yufala fasin blong jaj; from evri samting we i askem blong mekem samting we i gud mo blong winim tingting blong biliv long Kraes, i kamaot tru long paoa mo presen blong Kraes; from samting ia yufala i save gat save wetem wan save we i stret gud se samting ia i blong God.
Be eni samting we i winim tingting blong ol man blong mekem samting we i nogud, mo no biliv long Kraes, mo tanem baksaed long hem, mo no wok blong God, ale yufala i save gat save wetem wan save we i stret gud se samting ia i blong devel; from long fasin ia devel i stap wok, from hem i no winim tingting blong eni man blong mekem samting we i gud, no, i no gat wan; mo tu ol enjel blong hem; mo tu olgeta we i letem olgeta bakegen long hem. …
“From samting ia, mi askem strong long yufala, ol brata, blong yufala i mas stadi oltaem long laet blong Kraes, blong yufala i save gat save long samting we i gud aot long samting we i nogud; mo sapos bae yufala i holem taet long evri gud samting, mo no jajem hem, i tru we bae yufala i kam wan pikinini blong Kraes.”7
Mekem se, bifo ol pipol oli kasem raet blong presen ia we i Tabu Spirit, taem oli kasem konfemesen olsem ol memba blong Jos, mo iven bifo Tabu Spirit i konfemem trutok long olgeta bifo oli kasem baptaes, oli bin gat ol eksperiens finis long saed blong spirit. Spirit blong Kraes i stap finis, long taem we oli smol, mo i invaetem olgeta blong mekem gud mo wonem olgeta agensem ivel. Oli gat ol memori long ol eksperiens ia iven sapos oli no bin luksave se hem i wan eksperiens blong olgeta. Bambae memori ia i kambak long olgeta olsem ol misinari o yumi tijim olgeta toktok blong God mo oli harem. Bambae oli tingbaot filing blong glad o harem nogud taem oli tijim olgeta long ol trutok blong gospel. Mo memori ia blong Spirit blong Kraes bae i mekem hat blong olgeta i kam sofsof blong invaetem Tabu Spirit blong testifae long olgeta. Hemia bae i lidim olgeta blong folem ol komanmen mo blong wantem blong tekem nem blong Sevya long olgeta. Mo taem bae oli mekem, long wota blong baptaes, mo taem oli harem ol toktok we i kamaot long konfemesen “Kasem Tabu Spirit” we wan wokman blong God we i gat raet i talem, paoa blong oltaem stap tingbaot God bae i kam antap gud.
Mi testifae lo yufala se wom filing ia we yufala i bin gat long taem we yufala i bin lisin long trutok we oli bin tokbaot long konfrens ia, oli kam tru long Tabu Spirit. Sevya ia we i bin promes se Tabu Spirit ia bae i kam, i Pikinini ia we i gat ol glori, we Papa blong yumi long Heven i lavem tumas.
Tedei long naet mo tumoro long naet, maet yu prea mo tingting hevi mo askem kwestin ia: ?God i sendem wan mesej we i blong miwan nomo? ?Mi bin luk han blong God long laef blong mi o long laef blong ol pikinini blong mi? Bambae mi mekem hemia. Mo afta, bae mi faenem wan wei blong kipim memori ia blong dei we bae mi mo olgeta we mi lavem, bae mifala nidim blong tingbaot hamas God i lavem mifala mo hamas mifala i nidim Hem. Mi testifae se Hem i lavem yumi mo i blesem yumi bitim we plante long yumi i no bin luksave yet. Mi save se hemia i tru mo i mekem mi glad blong tingbaot Hem. Long nem blong Jisas Kraes, amen.