E te Rave‘a Haavare a te Mea Ino ra
M. Russell Ballard
No te Pŭpŭ no te Tino Ahuru ma Piti Aposetolo
Te vai nei te ti‘aturiraa no te feia faatîtîhia e e tae mai teie ti‘aturiraa na roto i te Taraehara a Iesu Mesia.
Te mau taea‘e e te mau tuahine, e horo‘a mai te haamataraa o te tau toparaa rauere raau i ô nei i te Mou‘a Ofa‘i nei i te mau huru peni hanahana o te mau rauere raau mai roto mai i te matie e tae atu i te puatou, te uteute e te re‘are‘a. I te tau toparaa rauere e vai te taato‘araa o te natura i roto i te hoê tau tauiraa poto no te faaineine no te to‘eto‘e e te nehenehe paari o te tau hiona.
Ua riro ihoa râ te tau toparaa rauere raau ei taime oaoa no te feia hi nato, no te mea teie te taime e tura‘i ai te poia maha ore o te mau nato ia ratou ia amu i te maa no te faaitoito i to ratou mau tino no te paruru ia ratou i te taime e varavara ai te maa i te tau hiona.
Te fâ a te taata hi nato o te haruraa ïa i te nato na roto i te rave‘a haavare. E tuatapapa te taata tai‘a i te peu a te nato, te mata‘i, te opape, e te mau huru manumanu ta te nato e amu e te taime e ofaa’i taua mau manumanu ra. E e mea pinepine ïa oia i te hamani rima i te mau ainu ta’na e faaohipa. Ua ite oia e e ti‘a i teie nei mau manumanu haavare o te taamuhia i ni‘a i te mau matau na‘ina‘i ia riro ei rave‘a haavare rave-maita‘i-hia no te mea noa’tu te na‘ina‘i o te hape e ite ihoa te nato i te reira e eita oia e haru i te ra‘o.
Auê ïa te oaoa ia hi‘o i te hoê nato ia ou‘a mai roto mai i te pape, e ia amu i te ra‘o e ia aro e tae noa’tu ua rohirohi oia e ua hutihia oia. Te tata‘uraa o te faatitoraa ïa te ite e te aravihi o te taata tai‘a i te nato hanahana.
Ua riro te faaohiparaa i te mau ainu haavare no te rama e no te haru i te i‘a o te hoê ia hoho‘a no te rave‘a ta Lucifero e faaohipa pinepine no te faahema, no te haavare e no te tamata i te haru ia tatou.
Mai te taata hi nato o te ite e e na te poia e tura‘i i te nato, ua ite Lucifero i to tatou « poia » aore râ to tatou mau paruparu e e faahema oia ia tatou na roto i te mau ăpă haavare o te nehenehe, mai te mea e ravehia, e tapû i to tatou oraraa hau no te huti atu ia tatou i raro a‘e i to’na mana aroha ore. E haru e e tuu faahou te taata hi i te i‘a i roto i te pape, area o Lucifero eita ïa oia e vaiiho noa ia tatou ia haere. Ta’na fâ ïa roohia ïa te feia ta’na i haru i te ati mai ia’na ra te huru.
Ua parau o Lehi « No te mea ua ma‘iri oia [Lucifero] mai te ra‘i mai, e ua roohia oia i te ati e amuri noa’tu, ua titau atu ra oia i te pohe o te mau taata atoa » (2 Nephi 2:18).
E amui atu vau i to‘u reo i teie mahana i te mau reo o to‘u mau taea‘e, e e maramarama aravihi mau to Lucifero e te haavarevare. Te hoê o te mau rave‘a tumu ta’na e faaohipa i ni‘a ia tatou o to’na ïa aravihi i te haavare e i te huna no te haapapû ia tatou e te ino e mea maitai ïa e te maitai e mea ino ïa. Mai te haamataraa ihoa i roto i te Apooraa Rahi i te Ra‘i, ua titau Satane « ia haamou i te ti‘amâraa o te taata, o Ta‘u, ta te Fatu te Atua, i horo‘a no’na. …
« E i riro oia o Satane, oia ïa, o te diabolo, te metua o te mau haavare atoa, ia haavare e ia haamatapo i te taata, e ia arata‘i ia ratou ei tîtî ia au i to’na ra hinaaro » (Mose 4:3‐4).
I teie mahana, te tamau noa nei â te aroraa i ni‘a i te ti‘amâraa o te taata tei horo‘ahia mai e te Atua. Ua haati Satane e ta’na mau teuteu ia tatou i ta ratou mau ăpă ma te ti‘aturi e e marua tatou e e haru tatou i ta’na mau ăpă ia nehenehe ia’na ia haru ia tatou na roto i te mau rave‘a haavare. Te faaohipa nei oia i te faatîtîraa no te haru ê atu i te ti‘amâraa. Mai te au i te Ditionare, te vai faatîtîraa i raro a‘e i te tahi mea o te auraroraa ïa i te tahi mea, te faarueraa ïa i te ti‘amâraa e te riroraa ei tîtî na te tahi raau aore râ te tahi peu o te tu‘ino i te oraraa.1
Te faaite mai nei te feia aivanaa ia tatou e te vai nei te hoê faanahoraa i roto i to tatou roro tei parauhia te pû no te faaoaoaraa.2 Ia faarahia te reira pû e te tahi mau raau taero aore râ mau peu, e faatere ïa te reira i te tufaa no to tatou roro o te faatere i to tatou mana taata, te haavâraa, te feruriraa e te ti‘araa morare. E arata‘i te reira i te taata faatîtîhia ia faaru‘e i te mea ta’na i ite e e mea ti‘a. Ia tupu ana‘e te reira, ua mau tatou i ni‘a i te matau e na Lucifero e faatere.
Ua ite Satane nahea ia faaohipa e ia haru ia tatou na roto i te mau tao‘a haavare e te mau peu no te faaoaoaraa poto. Ua hi‘opo‘a vau i te mana o te reira ia tamata ana‘e te hoê ia haru faahou i te faatereraa ia’na iho, ia haamatara ia’na i te mau peu ino e te faatîtîraa, e ia noaa faahou to’na faufaa e to’na ti‘amâraa.
E nehenehe ta te tahi o te mau raau taero, mai te mea e faaohipa-rahi-hia, e harû i te roro e e rave ê atu i te ti‘amâraa o te hoê taata mai te : nicotine (avaava), opium – ‘héroine’, ‘morphine’ e te tahi atu raau tinai i te mauiui; te mau raau faataoto; te cocaine; te ava; e te marijuana e te methamphetamines.
Te mauruuru nei au no te mau taote tei haapiihia i te horo‘a i te raau tano no te tamarû i te mauiui e te ati. E rave rahi râ te feia i roto i to tatou mau vahi nohoraa i teie mahana e tae noa’tu i to tatou iho mau melo, tei faatîtîhia e tei faaohipa rahi roa i te mau raau faati‘ahia e te taote. Ua ite o Lucifero, te metua o te mau haavare atoa, i te reira e te faaohipa nei oia i to’na mana no te haru ê atu i te ti‘amâraa o te hoê taata e ia haru i te taata faatîtîhia e to’na mau fifi ri‘ari‘a (hi‘o 2 Nephi 28:22).
Ua paraparau iho nei au i te hoê tuahine tei faaea na i roto i te tufaa rapaauraa roro no te hoê fare ma‘i i ô nei. Ua faaite mai oia ia‘u i to’na tere oto mai te ea maitai i te pae feruriraa e te pae tino, te hoê faaipoiporaa e te hoê utuafare faahiahia e tae atu i te ma‘i no te feruriraa, te ea haaparuparu, e te parariraa o to’na utuafare – ua haamata pauroa teie mau mea na roto i te faaohipa-rahi-raa i te raau tinai mauiui tei faati‘ahia e te taote.
E piti matahiti na mua’tu i ta maua aparauraa, ua pepe to’na tua i roto i te hoê ati pereoo uira. Ua horo‘a te taote i te hoê raau no te tamarû i te mauiui e ore e maraa i te faaoroma’i. Ua mana‘o oia e ua ti‘a ia’na ia titau i te tahi â mau raau, no reira ua rave huna oia i te mau parau a te taote no te mau raau e i te pae hopea ua faaoti oia i te hoo i te ‘héroïne’. Na te reira i arata‘i i to’na tape‘a-raa-hia i roto i te fare auri. Na to’na hiaai i te mau raau taero i vavahi i to’na faaipoiporaa. Ua faataa ê ta’na tane faaipoipo ia’na e ua tape‘a i te tiaauraa o te mau tamarii. Ua parau mai oia ia‘u e taa ê noa’tu i te tautururaa i te tamarû i to’na mauiui, ua horo‘a atoa mai te mau raau taero i te mana‘o oaoa puai e te au maitai no te tahi taime poto noa. No te tahi tau hora noa râ te faito raau tata‘itahi, e te faaohiparaa tata‘itahi e iti mai te taime e marû ai te mauiui. Ua haamata oia i te rave rahi i te mau raau e ua ô atu oia i roto i te faatîtîraa. Ua riro te mau raau taero ei oraraa no’na. Te pô hou vau i paraparau ai ia’na, ua tamata oia i te haapohe ia’na. Ua parau oia e eita e nehenehe faahou ia’na ia faaoroma‘i i te mauiui i te pae tino, te pae mana‘o e te pae varua. Ua ite oia e ua topa oia i roto i te hoê herepata e eita oia e matara faahou – aore e ti‘aturiraa faahou.
E ere te fifi o teie nei tuahine e te raau a te taote e te tahi atu faaohiparaa rahi i te raau taero i te hoê noa hi‘oraa ; te tupu nei te reira na piha‘iho ia tatou. I te tahi mau vahi ua rahi a‘e te feia e pohe nei i te raau a te taote, i te feia e pohe nei i roto i te mau ati pereoo uira.3 E te mau taea‘e e te mau tuahine, a faaatea ê ia outou i te mau huru raau taero atoa o te nehenehe e haru ia outou E nehenehe i te hoê noa hau‘araa i te tahi mea aore râ te hoê huero raau aore râ te hoê inuraa i te ava e arata‘i atu i te faatîtîraa. Ua parau mai te hoê taata inu ava tahito e, na te hoê noa inuraa e faatupu i te vahi huru ê i rotopu i te faatîtîraa aore râ te faaea-taero-ore-noa-raa. Ua ite Satane i te reira. Eiaha e vaiiho ia’na ia haru ia outou e ta’na mau ăpă haavare o te nehenehe e riro mai ei faatîtîraa.
I teie nei, te mau taea‘e e te mau tuahine, eiaha e hape i te auraa i te mea ta‘u e parau nei. Aita vau e faahapa nei i te mau raau a te taote no te feia i roohia i te mau ma‘i e nehenehe e rapaau i te mauiui rahi o te tino. Ua riro mau te reira mau raau ei haamaitairaa. Te mea ta‘u e parau atu nei e ti‘a ïa ia tatou ia pee maite i te rahiraa raau tei faataahia e te mau taote. E e ti‘a ia tatou ia vaiiho i taua mau raau ra i te hoê vahi papû eita e noaa i te mau tamarii aore râ i te tahi ê atu taata.
Te vai atoa nei te mana‘ona‘oraa rahi no ni‘a i te tahi mau peu ino o te faatîtîraa, mai te pere e te mau hoho‘a faufau tei tu‘ino i te taata e parare nei i roto i to tatou sotaiete. A haamana‘o, te mau taea‘e e te mau tuahine, te mau huru faatîtîraa atoa o te auraroraa ïa i te tahi mea, te faarueraa ïa i te ti‘amâraa e te riroraa ei tîtî no te tahi mea. No reira e ti‘a ia amuihia i ni‘a i taua tabula ra te mau ha‘utiraa video e te haaponoraa i te parau poro‘i na roto i te niuniu afa‘ifa‘i. Te parau nei te tahi feia ha‘uti video e, te ha‘uti nei ratou i te roaraa e 18 hora i te mahana no te tapae i tera e tera faito o te ha‘uti, ma te haapa‘o-ore-raa te tahi mau tufaa no to ratou oraraa. E nehenehe te haaponoraa i te mau poro‘i na roto i te niuniu afa‘ifa‘i, e riro te faufaa rahi no te aparauraa i rotopu i te auraa taata i te mou roa. Aita i maoro a‘e nei ua parau mai te hoê episekopo ia‘u e te ti‘a ra e piti o ta’na feia apî i piha‘iho te tahi i te tahi no te hapono i te parau poro‘i na roto i te niuniu afa‘ifa‘i ma te paraparau ore te tahi i te tahi.
Te faaite nei te ma‘imiraa a te taote e te faatîtîraa e « ma‘i ïa no te roro ? »4 E parau mau te reira, te ti‘aturi nei râ vau e ia noaa te hoê taata i roto i te rima o Satane, e riro atoa te reira ei ma‘i no te varua. Noa’tu eaha te huru faatîtîraa e topa’tu i roto, te vai noa ra te ti‘aturiraa. Ua haapii te peropheta Lehi i ta’na mau tamaroa i teie parau mau mure ore : « No reira, e mea ti‘amâ te mau taata i te pae tino nei ; e ua horo‘ahia mai te mau mea atoa ia ratou e maitai ai te taata. E e mea ti‘a ia ratou ia rave i te ti‘amâ e te ora mure ore, na roto i te Arai rahi o te taata atoa, e ia imi i te tîtîraa e te pohe, mai te au i te tîtîraa e te mana o te diabolo » (2 Nephi 2:27).
Mai te mea te vai ra te hinaaro o te hoê taata tei faatîtîhia ia upooti‘a mai, te vai ra ïa te hoê e‘a e arata‘i atu i te ti‘amâraa varua – te hoê e‘a no te faaatea ê mai i te faatîtîraa – te hoê e‘a tei tamatahia. E haamata te reira na roto i te pure – ma te aau tae, te aparauraa u‘ana e te tamau noa i tei Hamani i to tatou mau varua e mau tino – to tatou Metua i te Ao ra. Hoê â huru ia ofati ana‘e tatou i te hoê peu ino aore râ ia tatarahapa ana‘e tatou i te mau huru hara atoa. Te rave‘a no te tauiraa i to tatou aau, to tatou tino, to tatou mana‘o, e to tatou varua tei roto ïa i te mau papa‘iraa mo‘a.
Ua a‘o mai te peropheta Moromona ia tatou e : « No reira e au mau taea‘e here, e pure atu i te Metua ma te puai hope o te aau ia î outou i teie nei aroha… ia riro outou ei tamarii na te Atua… e ia tamâhia ho‘i tatou atoa mai ia’na i mâ » (Moroni 7:48).
Te faaite papû mai nei teie e te tahi atu mau papa‘iraa e rave rahi ia tatou e te vai nei te ti‘aturiraa no te feia faatîtîhia, e e tae mai teie ti‘aturiraa na roto i te Taraehara a Iesu Mesia e na roto i te faahaehaaraa ia’na iho i mua i te Atua, ma te taparu e ia faati‘amâhia i te faatîtîraa e te pûpûraa i to tatou aau atoa Ia’na na roto i te pure u‘ana.
E nehenehe ta te feia faatere no te Autahu‘araa e tauturu ia ani mai te feia tei faatîtîhia i te tauturu ia ratou. Mai te mea e hinaarohia, e nehenehe ta ratou e faahaere atu ia ratou i te feia aravihi i te LDS Family Services. E noaa ohie noa te faanahoraa no te faaoraraa i te feia tei faatîtîhia, tei iritihia mai roto mai i na taahiraa 12 a te Alcoholics Anonymous na roto i te LDS Family Services.
Ia ratou o te faaruru nei i te hoê faatîtîraa aore râ te hoê melo i roto i te utuafare, te parau faahou atu nei au, te taviri no te farii i te puai varua no te imi i te hau e no te haavî i te hoê hiaai faatîtî, o te pure u‘ana ïa. Ua here te Metua i te Ao ra i te taato‘araa o Ta’na mau tamarii, o te haamauruuru Ia’na e o te faaite i te faaroo mau Ia’na. A ani Ia’na i te puai no te haavî i teie nei faatîtîraa ta outou e ite nei. A tuu i te te‘ote‘o i te hiti e a fariu i to outou oraraa e to outou aau Ia’na. A ani ia î outou i te mana o te here mau o te Mesia. E ti‘a ia outou ia na reira e rave rahi mau taime, te faite papû nei râ vau ia outou, e nehenehe to outou tino, mana‘o e varua e tauihia, e tamâhia e e faaorahia – e e ti‘amâ ïa outou. Ua parau Iesu, « O vau te maramarama o teie nei ao, o te pee mai ia‘u ra, e ore ïa e haere noa i te pouri, e maramarama ora ïa to’na » (Ioane 8:12).
No te mea ho‘i e ta tatou fâ o te riroraa ïa mai to tatou Faaora e ia nehenehe ia tatou ia ora i piha‘iho i to tatou Metua i te Ao ra, e ti‘a ïa ia tatou tata‘itahi ia ite i te faahuru-ê-raa rahi o to tatou aau tei faaitehia e te peropheta Alama i roto i te Buka a Moromona. (hi‘o Alama 5:14). E ti‘a i to tatou here no to tatou Metua i te Ao ra e i te Fatu ra o Iesu Mesia ia itehia i roto i ta tatou mau ma‘itiraa e mau ohipa i te mau mahana atoa. Ua fafau mai raua i te hau, te oaoa, e te poupou i te feia o te haapa‘o i ta Raua mau faaueraa.
E te mau taea‘e e te mau tuahine, ia ara paatoa tatou i te mau ra‘o haavare o tei tuuhia mai i mua ia tatou e te taata hi haavare ra, o Lucifero. Ia farii tatou i te paari e te ite varua no te ite e no te pato‘i i ta’na mau horo‘araa fifi e rave rahi.
E, no outou o tei topa i roto i te mau huru faatîtîraa atoa, te vai nei ïa te ti‘aturiraa no te mea te here nei te Atua i te taato‘araa o Ta’na mau tamarii, e no te mea e nehenehe te mau mea atoa e tupu na roto i te Taraehara e te here o te Fatu ra o Iesu Mesia.
Ua ite au i te haamaitairaa faahiahia no te ho‘iraa mai o te nehenehe e faaora i te hoê taata i te mau fifi no te faatîtîraa. O Iehova to tatou Tia‘i, e ore roa tatou e ere ia ti‘aturi ana‘e tatou i te mana no te Taraehara. Ua ite au e, e nehenehe ta te Fatu e faaora i te taata mai roto mai i te faatîtîraa, mai ta te aposetolo Paulo i parau atu, « E tia ia‘u te mau mea atoa nei i te Mesia, tei tauturu mai ia‘u ra » (Philipi 4:13). Te pure nei au, e to‘u mau taea‘e e mau tuahine, e penei a‘e e te feia o tei haruhia i roto i teie tamataraa i teie taime o to ratou oraraa, e e te na reira nei au ma te haehaa na roto i te i‘oa o Iesu Mesia, amene.