2010–2019
Te Varua Maitai e te Heheuraa
Atopa 2010

Te Varua Maitai e te Heheuraa

Jay E. Jensen

Of the Presidency of the Seventy

Te Varua Maitai o te toru ïa o te melo o te Atuaraa, e mai te Metua e te Tamaiti, ua ite Oia i te mau mea atoa

Ei misionare apî i roto i te misioni fatata hoê matahiti te maoro, te tai‘o ra vau i te mau papa‘iraa mo‘a e i te mau parau a te mau aposetolo no te mau mahana hopea nei no ni‘a i te heheuraa e te Varua Maitai, ua tupu a‘e ra te hoê araraa maere i roto ia‘u : aita to‘u e iteraa papû no‘u iho, no ni‘a hoa râ i te Metua e te Tamaiti. Ua rave noa vau i ta‘u misioni ma te turu‘i noa i ni‘a i te iteraa papû o to‘u na metua faahiahia. No to‘u feaa ore i ta raua mau parau, aita vau i feruri e imi i to‘u iho iteraa i te pae varua. I te hoê pô no te ava‘e eperera i San Antonio, Texas i te matahiti 1962, ua ite a‘e ra vau e, no‘u iho to‘u ite e ti‘a ai. I roto i to maua piha na‘ina‘i, ua itehia ia‘u te hoê vahi i reira ho‘i e ti‘a ai ia‘u ia pure marû noa, no te ani e, « E te Metua i te Ao ra, tei ô nei anei oe ? E mea ti‘a ia‘u iho ia ite ! »

I te hoê taime i muri mai i te pô, ua tae mai ia‘u te ite na roto ia‘u iho no te taime matamua o to‘u oraraa, te vai mau nei te Atua e o Iesu. Aita vau i faaroo i te hoê reo puai, aita atoa i ite i te hoê taata no te ra‘i mai. Ua ite au mai ia outou atoa i ite ra – oia ho‘i, na roto i te « horo‘a-parau-ore-hia na te Varua Maitai » (PH&PF 121:26) e te varua o te heheuraa (hi‘o PH&PF 8:1-3), ma te parau faahau i to‘u varua (hi‘o PH&PF 6:23) e te parau hau i to‘u aau (hi‘o Alama 58:11).

Na roto i taua iteraa ra, ua riro vau ei ite no te a‘o a Alama ia « ara e ia faaitoito ho‘i i (to‘u) aau i te tamata i Ta’na parau » (Alama 32:27). Ua tupu teie mau parau e aore râ, teie mau huero ei mau tumu raau, oia ho‘i, ei mau raau rarahi o te iteraa papû. Te tamau noa nei â te reira ohipa na roto i te tahi atu â mau iteraa i ni‘a i te parau, e a tupu mai ai ho‘i te tahi atu â mau tumu raau o te iteraa papû, e i teie nei e uru raau rahi ïa tei faatumuhia i ni‘a i te heheuraa na roto mai, e na te Varua Maitai.

Te Varua Maitai o te hoê Horo‘araa Hiaaihia

A haere ai te Faaora i te fenua Amerika ua ma‘iti oia ahuru e ma piti pĭpĭ. Te hoê o Ta’na poro‘i ia ratou e i te mau taata no ni‘a ïa i te Varua Maitai. E oti a‘e ra Ta’na haapiiraa ia ratou, ua reva’tura te Faaora ma te fafau mai e, e ho‘i mai â oia i te mahana i muri iho. Ua haa te taata e ao noa‘e te pô ia rahi te taata e haaputuputu mai no te faaroo Ia’na.

Ua ruru te mau pĭpĭ i te taata i roto e 12 pŭpŭ no te haapii ia ratou i te mau mea ta te Faaora i haapii mai ia ratou. Te matamua o ta ratou mau haapiiraa o te faufaa ïa o te Varua Maitai. (Hi‘o 3 Nephi 11-18.) I reira ua tuturi te mau taata e ua pure ihora. To ratou hiaai rahi o te roaaraa i te Varua Maitai (hi‘o 3 Nephi 19:8-9).

Ua fâ mai te Faaora ia ratou ra e ua haapapû faahou mai i te faufaa o te Varua Maitai a pure ai oia i te Metua ra :

« E te Metua, te haamaitai nei au ia oe, o oe i horo‘a mai i te Varua Maitai i teie tau taata i ma‘itihia e au ra…

« E te Metua, te pure atu nei au ia oe na, ia horo‘a mai i te Varua Maitai ia ratou te faaroo i ta ratou ra mau parau » (3 Nephi 19:20-21).

Ia au i teie faaiteraa a te Buka a Moromona, ua taa maitai ia‘u i teie nei e, no te aha te peresideni Wilford Woodruff i parau ai e : « te horo‘a o te Varua Maitai o te horo‘a rahi a‘e ïa o te nehenehe e tuuhia i ni‘a i te tane. …

Aita (te reira) i taaotihia i te mau tane ana‘e, aita atoa i te mau aposetolo e aore râ, i te mau peropheta ana‘e ; no te mau tane e te mau vahine haapa‘o atoa te reira, e no te mau tamarii atoa tei nava‘i te paari no te farii i te evanelia a te Mesia » (Te Mau Haapiiraa a te Mau Peresideni o te Ekalesia : Wilford Woodruff (2004), 49).

E Horo‘a mai te Heheuraa i te mau Pahonoraa i te mau Tau Fifi

Te Varua Maitai o te toru ïa o te melo o te Atuaraa, e mai te Metua e te Tamaiti, ua ite Oia i te mau mea atoa (hi‘o PH&PF 35:19 ; 42:17). E rave rahi ti‘araa faufaa rahi To’na, te matamua roa o te haapiiraa e te faaite-papû-raa i te Metua e i te Tamaiti (hi‘o 3 Nephi 28:11). Te tahi atu ti‘araa, e heheu mai oia i te parau mau i te mau mea atoa ra (hi‘o Moroni 10:5) e e arata‘i oia ia rave i te maitai (hi‘o PH&PF 11:12)

Ua faaite mai te peresideni Thomas S. Monson i teie ti‘araa faufaa rahi o te riroraa ei arata‘i ia rave i te maitai. Te pee nei oia i te hi‘oraa o te Faaora « o tei hamani maitai haere ra » (Te Ohipa 10:38). Ua haapii mai oia i te faufaa rahi eiaha e ite ore i te hoê faaururaa pae varua no roto mai i te Varua Maitai, te hahaereraa i te hoê taata e te utuuturaa ia ratou e te faaoraraa te hoê.

Tera râ, i te tahi taime aita e vai ra te hoê mai te peresideni Monson, aita e taea‘e hahaere, aita e tuahine atuatu e vai ra no te utuutu i te taime e hinaarohia. I taua mau taime ra, ua titauhia ia‘u ia imi i te tamahanahana e te arata‘iraa a te Faaa‘o, te tahi ti‘araa o te Varua Maitai (hi‘o PH&PF 36:2).

Ta maua mootua iti o Quinton, e mea rahi roa to’na mau fifi i to’na fanau-raa-hia mai, e ua ora oia e toru hepetoma toe e matahiti ai, e i roto i taua area taime ra, ua tere tamau noa oia i te fare ma‘i, e i rapae i te fare ma‘i. Te ora ra maua te tuahine Jensen i te fenua Raparata i taua taime ra. Ua hinaaro roa maua ia parahi i rotopu i ta maua mau tamarii no te faaitoito ia ratou e ia faaitoito-atoa-hia maua na roto ia ratou. O teie ta maua mootua ta maua i here roa e i hinaaro roa e parahi i piha‘i iho ia’na. Ta maua noa, o te pure ïa, e ua na reira maua ma te u‘ana !

Tei roto maua o te tuahine Jensen i te hoê tere haati o te misioni i farii ai maua i te parau e, ua pohe o Quinton. Ua ti‘a noa a‘e ra maua i roto i te piha tomoraa o te hoê fare pureraa e ua tauahi e ua tamarû maua te tahi i te tahi. Te faaite papû atu nei au ia outou e, ua tae mai te hau i roto ia maua mai ô mai i te Varua Maitai ra, te hoê hau eita e roaa ia feruri e tae roa mai i teie mahana (hi‘o Philipi 4:7). Ua riro atoa maua ei ite no te horo‘a parau-ore-hia na te Varua Maitai i roto i te oraraa o ta maua tamaiti e te tamahine huno‘a e ta raua mau tamarii tei faahitihiti i te parau no taua taime ra ma te faaroo, ma te hau e ma te mahanahana.

Te Heheuraa e te Buka a Moromona

Na taua horo‘a o te heheuraa atoa ra i faauru i to‘u iteraa papû no ni‘a i te Buka a Moromona. Ua tai‘o vau, ua haapii, ua imi e ua popou i te reira i te mau taime atoa. Ua heheu mai te Varua Maitai ia‘u i te parau mau e te hanahana o te reira.

Ua parau te peresideni Gordon B. Hinckley i te Buka a Moromona e, te hoê ïa o na ofa‘i tihi e maha o te Ekalesia, e te tahi atu e toru ra, o te Orama Matamua ïa a Iosepha Semita, te faaho‘i-raa-hia mai te autahu‘araa, e, oia mau roa, to tatou iteraa papû no ni‘a ia Iesu Mesia, te ofa‘i tihi rahi ia (a hi‘o Ephesia 1:19‐21). « Teie na horo‘a rahi e maha ta te Atua i horo‘a mai », te na reira ra Oia, « o te mau ofa‘i tihi aueue ore ïa o te tape‘a papû i te Ekalesia a Iesu Mesia i te Feia Mo‘a i te mau Mahana Hopea nei, e tae noa’tu i te mau iteraa papû e te ti‘aturiraa o to’na ra mau melo » (« Four Cornerstones of Faith », Liahona, Fepuare 2004, 7).

Ua riro teie na horo‘a e maha ta te Atua i horo‘a mai ei tutau no to‘u faaroo e to‘u iteraa papû, e ua haapapûhia mai te reira ia‘u na roto i te heheuraa a te Varua Maitai. Tera râ, no te tahi tau minuti rii, te hinaaro nei au e rotahi te mana‘o i ni‘a e piti o teie na horo‘a ofa‘i tihi – te Orama Matamua e te Buka a Moromona. E mea faufaa roa ia haamata te reira na mea tata‘itahi i roto i te utuafare, i reira i fanauhia ai te tamarii i te metua maitai e i haapii-maitai-hia ai e raua (a hi‘o 1 Nephi 1:1). Ua aifaito noa te mau ohipa o te oraraa o Lehi e o Iosepha Semita (hi‘o 1 Nephi 1 e Iosepha Semita – Aamu 1) :

  • E hinaaro papû maitai to te tahi e to te tahi. Ua titauhia ia Lehi ia faaora ia’na iho e i to’na utuafare i te haamouraa oioi o Ierusalema, e to Iosepha Semita ra, o te iteraa ïa e teihea te Ekalesia mau.

  • Ua pure raua tata‘itahi

  • Ua farii raua tata‘itahi i te orama o te Metua e te Tamaiti.

  • Ua horo‘ahia te hoê buka ia raua tata‘itahi.

  • Ua haapii raua toopiti atoa.

  • Ua farii raua tata‘itahi i te heheuraa no ô mai i te Varua Maitai ra e na roto i te orama e te moemoea.

  • I te hopea ra, ua opua ino te taata iino ia raua. Ua horo ê o Lehi e to’na utuafare e ua ora. Ua taparahi-pohe-hia o Iosepha.

E tupu anei te maere ia ani te mau misionare i te feia imi ma te aau tae i te parau mau ia haamata i ta ratou tuatapaparaa i te Buka a Moromona i roto i te 1 Nephi ? Ua î roa teie buka i te Varua o te Fatu. I roto i teie mau pene matamua te vai ra hoê poro‘i maramarama maitai, oia ho‘i, ua horo‘ahia mai te heheuraa e te Varua Maitai eiaha i te mau peropheta noa i te mau metua tane atoa râ, e te mau metua vahine e te mau tamarii ho‘i.

E ite-tamau-noa-hia te poro‘i no ni‘a i te heheuraa e te Varua Maitai i roto i te taato‘araa o te Buka a Moromona. Ua haapotohia teie mau parau mau e te peropheta Iosepha Semita, « tei afa‘i i te Buka a Moromona e te mau heheuraa, e tei hea ta tatou haapa‘oraa ? Aita ia ta tatou » (Te Mau Haapiiraa a te Mau Peresideni o te Ekalesia : Iosepha Semita [2007], 196).

Ei feia mo‘a no te mau mahana hopea nei, e mau iteraa papû to tatou no te Buka a Moromona o tei horo‘ahia mai ia tatou na roto i te heheuraa, e te haapapû nei tatou e teie te haapa‘oraa e ta’na mau parau haapiiraa e parau mau ïa (hi‘o te omuaraa o te Buka a Moromona).

E mea mo‘a te mau ohipa a te Varua e te paari ia faaite. Tatou, mai ia Amona, te parau nei, « Inaha, te faaite atu nei ho‘i au ia outou, e ore e ti‘a ia‘u ia faaite atu i te hoê vahi iti a‘e o to‘u nei hinaaro » (Alama 36 :16)

No reira, ua riro vau ei ite e e mea mau te Varua Maitai e o Oia te faaite, te heheu parau, te tamahanahana, te arata‘i e te orometua hanahana.

Te faaite papû nei au ma te haehaa e, te ti‘a nei teie Ekalesia, teie haapa‘oraa mau e te ora i ni‘a i teie na ofa‘i tihi e maha. Te faaite papû nei au e, o Iesu Mesia mau te ofa‘i tihi rahi (hi‘o Ephesia 2:19-21). Te peresideni Thomas S. Monson e peropheta ïa na te Fatu e teie mau taata hoê 15 e parahi nei i muri ia‘u e mau peropheta mau ratou, e mau hi‘o, e mau aposetolo e e mau heheu parau. Te mau nei ratou i te autahu‘araa mo‘a e te mau taviri o te basileia. Te here nei au, te faatura nei e te paturu nei au ia ratou na roto i te i‘oa o Iesu Mesia ra, amene.