Ia Faaea noa i Ni‘a i te E‘a
Rosemary M. Wixom
Primary General President
Mai te mea e tape‘a maite tatou i ta tatou mau tamarii e ia pee i te arata‘iraa a te Faaora, e ho‘i paatoa tatou i to tatou utuafare i te ra‘i ra e ia paruruhia i te rima o to tatou Metua i te Ao ra.
Aita i maoro a‘e nei ua mata‘ita‘i au i te fanauraa o Kate Elizabeth iti. I muri a‘e i to’na taeraa mai i roto i teie nei ao e a tuuhia’tu ai i roto i na rima o to’na metua vahine, ua toro maira o Kate i to’na rima e ua tape‘a maira i te manimani rima o to’na metua vahine. Mai te huru ra e, te parau maira o Kate iti e, « Mai te mea e tape‘a maite vau, e tauturu mai anei oe ia‘u ia faaea noa i ni‘a i te e‘a no te ho‘i faahou i piha‘iho i to‘u Metua i te Ao ra ? »
I te hitu o to’na matahiti, ua roohia Iosepha Semita i te ma‘i fiva « typhoïde » e ua haape to’na avae. I taua taime ra, te faaohipa ra te taote Nathan Smith i te hoê rave‘a e nehenehe ai e rapaau i te avae haape. Ua titauhia i te taote Smith ia tapu i to’na avae ma te faataoto ore no te para‘u i te pe i roto i te ivi haape. Ua pato‘i o Iosepha i te uaina ei tamărû i te mauiui e ua pato‘i atoa oia ia taamuamuhia oia e ua parau oia e, « Te hinaaro nei au i to‘u metua tane ia parahi oia i ni‘a i te ro‘i e ia tape‘a ia‘u i roto i to’na na rima, i reira vau e rave ai i te mau mea atoa e titauhia ».1
No te mau tamarii atoa ati a‘e te ao nei, te parau atu nei matou e, « A tape‘a i to‘u rima. A tape‘a paari maitai. E faaea amui noa tatou i ni‘a i te e‘a no te ho‘i faahou i to tatou Metua i te Ao ra ra ».
E te mau metua, te mau metua ruau, te mau taata tapiri mai, te mau hoa, te mau ti‘a faatere no te Paraimere, e nehenehe tatou tata‘itahi e faatoro i te rima no te tape‘a mai i te mau tamarii. E nehenehe tatou e faaea, e tuturi i raro, e e hi‘o i roto i to ratou mau mata e ia ite i to ratou hinaaro hohonu ia pee i te Faaora. A tape‘a i to ratou rima. A haere na muri iho ia ratou. Tei ia tatou tera haamaitairaa ia tape‘a ia ratou i ni‘a i te e‘a o te faaroo.
Aita e tamarii e hinaaro e haere maoro oia ana‘e na ni‘a i te e‘a mai te mea e, e paraparau ti‘amâ tatou i ta tatou mau tamarii i te rave‘a no te faaoraraa. Ia maramarama ana‘e ratou i te rave‘a, e tauturu te reira ia ratou ia tape‘a i te mau parau mau e e mau tamarii ratou na te Atua e e rave‘a Ta’na no ratou, e ua ora na ratou i piha‘iho Ia’na i roto i te oraraa hou teie nei oraraa, e ua ou‘au‘a ratou i te oaoa no te haere mai i ni‘a i teie fenua, e na roto ho‘i i te tauturu a te Faaora e nehenehe tatou paatoa e ho‘i faahou i mua i te aro o to tatou Metua i te Ao ra. Mai te mea e, e maramarama ratou i te rave‘a e o vai ho‘i ratou, e ore roa ïa ratou e măta‘u.
I roto i te Alama 24, te tai‘o nei tatou e, « Ua aroha mai Oia i to tatou varua, mai ta’na e aroha atoa mai i ta tatou mau tamarii ; no reira… ia faaite-atoa-hia mai te rave‘a o te ora ia tatou mai te faaitehia i te mau u‘i i muri atu ra ».2
Ua haamata tatou i te faaite i te rave‘a o te ora i ta tatou mau tamarii na roto i te tape‘araa tatou iho i ni‘a i te auri.
Ia tape‘a tamau ana‘e tatou i te auri, ua ti‘a ia tatou ia tuu i to tatou rima i roto i to ratou e ia haere amui na te e‘a piriha‘o e te apiapi. Te faarahi to tatou hi‘oraa maitai i roto i to ratou mata. E pee ratou i to tatou tere ia farii ana‘e ratou i te parururaa i roto i ta tatou mau ohipa Aita tatou e titauhia ia maitai roa – ia vai parau-ti‘a noa e te parau mau. Ua hinaaro te mau tamarii ia farii e mai te mea ra ua hoê ratou e o tatou. Ia parau te hoê metua e « e nehenehe tatou e na reira ! E nehenehe tatou e tai‘o utuafare i te mau papa‘iraa mo‘a i te mau mahana atoa » e pee mai te mau tamarii !
Teie ta te hoê utuafare e maha tamarii i papa‘i, « ua faaoti matou ia haamata na‘ina‘i noa no te mea, e mea poto roa te taime ara maitai o te tamarii. Aitâ ta maua tamarii matahiapo i ite atu ra i te tai‘o, tera râ, e nehenehe ta’na e faahiti i ta maua mau parau, no reira ua haamata matou e tai‘o i te Buka a Moromona, e toru noa a‘e irava i te pô hoê. E tai‘o ta‘u tane e o vau hoê irava ta te tahi e ta te tahi, e i muri iho e faahiti o Sydney i te hoê irava. Ua tai‘o matou e maha irava, i muri iho e pae, a haamata atoa ai te mau tamaroa i te faahiti i ta ratou iho irava. Oia mau, e ere i te mea ohie, tera râ, ua tamau noa matou. Ua tamata matou e haafaufaa i te rave-tamau-raa eiaha râ te vitiviti. E toru matahiti e te afa i oti ai ia matou te tai‘o i te Buka a Moromona. Ua oaoa roa matou i te otiraa ! ».
Te na ô faahou ra te metua vahine e, « Ua riro te tai‘oraa utuafare i te mau papa‘iraa mo‘a i te mau mahana atoa ei peu na to matou utuafare i teie nei. Ua matau roa ta maua mau tamarii i te reo o te papa‘iraa mo‘a, e te faaite nei ta‘u tane e o vau nei i te iteraa papû no ni‘a i te mau parau mau. Te vahi faufaa roa’tu, ua puai faahou te Varua i roto i to matou fare ».
Te maramarama ra nei outou i te ohipa a teie utuafare ? Ia hinaaro ana‘e tatou e tape‘a tamau i te parau a te Atua, e nehenehe ta tatou tai‘oraa i te mau papa‘iraa mo‘a e hoê noa‘e irava i te haamataraa. Aita i taere roa no te haamata. E nehenehe ta outou e haamata i teie nei.
Mai te mea e, aita tatou e haapii i ta tatou mau tamarii, na te ao nei ratou e haapii, e e nehenehe ta te mau tamarii e apo mai i te mau mea atoa ta te ao nei e haapii ia ratou i to ratou apî-roa-raa. Te mea ta tatou e hinaaro ia ite ratou i roto i te pae matahiti i muri nei, e mea ti‘a ïa ia paraparauhia ia ratou i teie iho mahana. A haapii ia ratou i roto i te mau huru faito atoa ; e ia riro te mau faaotiraa atoa, te mau hopearaa atoa, te mau tamataraa atoa ta ratou e farerei ei rave‘a haapiiraa ia ratou ia tape‘a i ni‘a i te mau parau mau o te evanelia.
O Shannon te hoê metua vahine apî roa, aita oia i mana‘o e, e haapii oia i ta’na mau tamarii i te mana o te pure a tomo ai ratou i roto i to ratou pereoo no te ho‘i i to ratou fare e 40 noa minuti te maoro. Aita hoê a‘e tapa‘o vero a faaru‘e ai ratou i te fare o to ratou mama ruau, ia haamata râ ratou i te tere i roto i te mou‘a, ua huri a‘e ra te hiona mama i roto i te vero hiona. Ua hamata te pereoo i te heehee na ni‘a i te purumu. Aita i maoro aita e ite-faahou-hia te purumu. Ua ti‘a i na tamarii na‘ina‘i roa ia ite i te fifi i taua taime ra e ua haamata raua i te ta‘i. Na ô atu ra o Shannon i te mau tamarii paari a‘e, o Heidi raua o Thomas, e 8 e e 6 matahiti, « E mea ti‘a ia orua ia pure. E hinaarohia te tauturu a te Metua i te Ao ra ia tae tatou i te fare ma te maitai. A pure eiaha tatou ia mau e eiaha tatou ia hee i rapae i te purumu ». Ua ruru noa to’na na rima a faahoro noa ai oia i te pereoo, tera râ, ua ti‘a ia’na ia faaroo i te muhumuhu o te mau pure iti na ni‘a iho noa mai te parahiraa i muri mai : « E te Metua i te Ao ra, a tauturu mai ia matou ia tae i to matou fare ma te maitai ; a tauturu mai ia matou eiaha matou ia hee i rapae i te purumu ».
I te taime o te mau pure ua nâ te ta‘i a na tamarii na‘ina‘i, e ua faaea ratou i te tuo a ite ai ratou e ua tapirihia te hoê purumu e aita ratou e nehenehe e tere atea faahou. Ma te ara maitai, ua ho‘i faahou mai ratou i muri e ua itehia ia ratou i te hoê hotera no te pô. Ia tae a‘e ra ratou i roto i te hotera, ua tuturi ratou i raro e ua haamaitai i te Metua i te Ao ra no to ratou vai-maitai-noa-raa. I taua pô ra ua haapii te hoê metua vahine i ta’na mau tamarii i te mana o te tape‘a-papû-raa i ni‘a i te pure.
Eaha te mau tamataraa e farereihia e ta tatou mau tamarii ? Mai ia Iosepha Semita, e itehia i ta tatou mau tamarii te itoito no te « rave i te mea e titauhia ». Mai te mea e, e hinaaro mau to tatou ia tape‘a ia ratou e ia haapii ia ratou i te rave‘a a te Metua i te Ao ra na roto i te pure e te mau papa‘iraa mo‘a, e ite ratou e no hea mai ratou, eaha ta ratou ohipa i ô nei, e te haere nei ratou i hea.
I te pu‘e tau faahoturaa raau i ma‘iri a‘e nei, ua haere maua e ta‘u tane e mata‘ita‘i i te tu‘eraa popo a to maua mootua e maha to’na matahiti. Te vai ra te oaoa i ni‘a i te tahua tu‘eraa a horo ai te feia ha‘uti i te tahi vahi e te tahi vahi no te haru i te popo. Ia ta‘i râ te hi‘o no te faaotiraa, aita te feia ha‘uti i ite e, o vai tei upooti‘a e o vai tei pau. Ua haapa‘o ha‘uti noa ratou. Ua arata‘i te mau taata faaineine ia ratou no te aroha rima i te mau melo o te tahi pŭpŭ. I reira, ua ite a‘e ra vau i te hoê mea faahiahia roa. Ua ani te taata faaineine ia hamanihia te hoê aroa hanahana. Pauroa te mau metua, te mau metua ruau e te mau taata mata‘ita‘i atoa tei haere mai e mata‘ita‘i i te ha‘utiraa, ua ti‘a a‘e ra ratou paatoa i ni‘a e ua ana‘i ia ratou i ni‘a e piti reni te tahi i mua i te tahi, e ua hamani i te hoê fana ma te afa‘i i to ratou mau rima i ni‘a. Ua tuotuo noa te mau tamarii a horo ai ratou na rotopu i te mau taata paari e huro noa ra ia ratou, e na roto atu i te aroa i hamanihia e te mau taata mata‘ita‘i. I muri iho, ua amui atoa mai te mau tamarii no te tahi pŭpŭ i roto i te oaoaraa, inaha, ua haapoupouhia te taato‘araa o te feia ha‘uti – tei upooti‘a e tei pau – na te feia paari a horo ai ratou na ropu i te aroa hanahana.
I roto i to‘u feruriraa, te vai ra te tahi atu hoho‘a ta‘u. E au ra ia‘u e, te ite ra vau i te mau tamarii i te ora ra i te rave‘a, te rave‘a ta te Metua i te Ao ra i faaineine no te tamarii tata‘itahi. Te horo ra ratou na ni‘a i te e‘a piriha‘o e te apiapi i raro a‘e i te rima o te mau taata mata‘ita‘i tei here ia ratou, e ua oaoa ratou tata‘itahi i ni‘a i te reira e‘a.
Ua parau o Iakoba e, « Aue te rahi o te rave‘a o to tatou Atua ! »3 « E arata‘i mai te Faaora ia tatou ».4 Te faaite papû nei au e, mai te mea e tape‘a maite tatou i ta tatou mau tamarii e ia pee i te arata‘iraa a te Faaora, e ho‘i paatoa tatou i to tatou utuafare i te ra‘i ra e ia paruruhia i te rima o to tatou Metua i te Ao ra. Na roto i te i‘oa o Iesu Mesia ra, amene.