Togiola

LeGrand R. Curtis Jr.

O Le Fitugafulu

E ala atu ia Keriso, e mafai ai e tagata ona suia o latou olaga ma maua le faaolataga.

O loo i ai ni suafa eseese sa faaaoga e faasino i le Alii o Iesu Keriso. O nei suafa tatou te maua ai se vaaiga manino i itu eseese o le misiona togiola a le Alii. Mo se faataitaiga, silasila i le suafa “Faaola.” E tofu tatou ma se lagona o le uiga o le faaolaina, aua na i ai ni taimi na faaolaina ai i tatou taitoatasi mai se mea. A o ma laiti, sa ma taaalo ai ma lo’u tuafafine i se vaitafe i se vaa laitiiti, ma na ma o ese faavalevalea mai le vaega saogalemu e taaalo ai ma iu ai ina ma tafefea atu i le tafe i faigata e le mailoa i lalo atu o le vai. O le tali mai i le ma feei, na momo’e mai ai lo ma tamā e laveai ma faasaoina i maua mai le matautia o le vaitafe.Pe a ou mafaufau i le faaolaina, ou te mafaufau lava i lena aafiaga.

O le upu “Togiola” o loo aumai ai ni vaaiga manino talitutusa.O le “faaola” o le faatau mai po o le toe faatau mai.I le avea ai ma se mataupu faaletulafono, e faaola mai se fanua i le totogiina atoa o mokesi po o isi nonogatupe e aofia ai. I taimi o le Feagaiga Tuai, na aumai ai e le tulafono a Mose ni auala eseese e mafai ai ona faasaolotoina, pe faaolaina, ia auauna ma fanua, e ala i le totogiina o ni tupe (tagai i le Levitiko 25:31).

O se faaaogaina iloga faaletusipaia o le upu faaola e faatatau i le aveeseina mai o le fanauga a Isaraelu mai lo latou nofopoloaga i Aikupito. Ina ua mavae lena laveaiga, sa ta’u atu e Mose ia i latou: “Ona ua alofa lava Ieova ia te outou, … ua aumai ai outou e [Ia] i le aao malosi, na ia faaolaina foi oe ai le mea sa nofo pologa ai, ai le lima o Farao le tupu o Aikupito” (Teuteronome 7:8).

O le mataupu o le faaolaina e Ieova o tagata Isaraelu mai le nofopologa, o loo ta’ua faafia i tusitusiga paia. E masani lava, e faia lea mea ina ia faamanatu atu ai i tagata le agalelei o le Alii i le laveaiina o le fanauga a Isaraelu mai tagata Aikupito. Ae e faia foi e aoao ai i latou o le a i ai se isi, togiola e sili atu ona taua mo Isaraelu. Na aoao mai Liae: “Ma e afio mai le Mesia i le atoatoaga o taimi, ina ia mafai ona ia togiolaina le fanauga a tagata mai le pau” (2 Nifae 2:26).

Na tusia e le Fai Salamo: “Ae peitai e faaola e le Atua lo’u agaga ai le pule a le tuugamau” (Salamo 49:15).

Na folafola mai e le Alii e ala ia Isaia: “Ua ou soloia au solitulafono e pei o se ao uliuli, ma au agasala e pei o se ao: foi mai ia ia te au; aua ua ou faatauina oe” (Isaia 44:22).

Ioe, o le togiola o loo faatatau i ai nei mau e tolu, o le Togiola a Iesu Keriso. O le “faaolataga tele” lenei na tuuina mai e lo tatou Atua alofa (Salamo 130:7). E le pei o le togiola i lalo o le tulafono a Mose po o aiaiga faaletulafono i ona po nei, o lenei togiola e le oo mai e ala i “mea e pala, o le ario po o le auro” (1 Peteru 1:18). “O [Keriso] foi ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa” (Efeso 1:7). Na aoao mai Peresitene Ioane Teila e faapea, ona o le taulaga a le Faaola, “ua totogiina ai le aitalafu, ua faia le togiola, ua faataunuuina le feagagia, faamalieina le faamasinoga tonu, ma faia le finagalo o le Atua, ma o le mana uma ua … tuuina atu i aao o le Alo o le Atua” (Aoaoga a Peresitene o le Ekalesia: Ioane Teila [2001], 44).

O taunuuga o lenei togiola e aofia ai le faatoilaloina o le oti faaletino mo fanau uma a le Atua. O lona uiga, ua faatoilaloina le oti faaletino ma o le a toetutu tagata uma. O le isi itu o lenei togiolaina e Keriso, o le manumalo lea i le oti faaleagaga. E ala mai i Ona puapuaga ma [Lona] maliu, ua totogi ai e Keriso ia agasala a tagata uma ae faalagolago lea i le salamo o le tagata lava ia.

O lea la, afai tatou te salamo, e mafai ona faamagaloina a tatou agasala, aua ua uma ona totogi le tau e lo tatou Faaola. O se tala fiafia lenei mo i tatou uma, “aua ua agasala tagata uma lava, ma ua le oo i le viiga mai le Atua” (Romans 3:23). O i latou o e ua matuai se ese mai ala o le amiotonu e matuai manaomia lava lenei togiola, ma afai latou te salamo atoatoa, o la latou lea mo le mauaina. Peitai o i latou o e sa galulue malosi e ola i ni olaga lelei latou te matuai manaomia foi lenei togiola, aua e leai se tasi e mafai ona oo atu i le afioaga o le Tama e aunoa ma le fesoasoani a Keriso. O lea la, o lenei togiola alofa ua mafai ai ona faamalieina tulafono o le faamasinoga tonu ma le alofa tunoa i olaga o i latou uma o e salamo ma mulimuli ia Keriso.

Maeu, mamalu ma atoa,

Le ata o le olataga,

Faamasino tonu ma alofa,

Ua tasi i Le paia!

“Ma’eu le Poto ma le Alofa,”Viiga, nu. 109.

Na aoao mai Peresitene Boyd K. Packer: “O loo i ai se Togiola, se Fautua, o lē o loo tu ma le lotomalie ma le gafatia e faamalie manaoga o le faamasinoga tonu ma tuuina atu le alofa tunoa ia i latou o e e salamo” (“The Mediator,” Ensign, May 1977, 56).

Ua tumu tusitusiga paia, tusi faitau, ma aafiaga o le olaga i tala o le togiola. E ala atu ia Keriso, e mafai ai e tagata ona suia o latou olaga ma maua le faaolataga. Ese lo’u fiafia i tala nei o le togiolaina.

E i ai sa’u uo sa le mulimuli i aoaoga a le Ekalesia a o talavou.Ina ua avea o ia ma se talavou matua, sa ia iloaina le mea sa ia misia e ala i le le ola i le talalelei. Sa salamo o ia, sui lona olaga, ma tuuto atu ia lava i le ola amiotonu. I se tasi aso, i le tele o tausaga talu ona mavae atu a maua fegalegaleaiga faaletalavou, sa ma fetaui ai i totonu o le malumalu. Sa susulu mai i ona foliga le malamalama o le talalelei, ma sa ou iloaina o ia o se tagata faamaoni o le Ekalesia sa taumafai e ola atoatoa i le talalelei. O lana tala, o se tala o le togiolaina.

Sa ou faatalanoaina i se tasi taimi se tamaitai mo le papatisoga, o lē sa tausalaina i se agasala matuia lava. I le taimi o le faatalanoaga, sa ou fesili atu iai pe na malamalama e le mafai ona ia toe faia lena agasala. Faatasi ai ma se salamo a’ia’i i ona foliga ma i lona leo, sa ia fai mai ai, “Peresitene ea, e le mafai ona ou toe faia lena agasala. O le mafuaaga lena ua ou fia papatiso ai—ia faamama ai au mai taunuuga o lena agasala leaga.” O lana tala o se tala o le togiolaina.

A o ou asiasi atu i konafesi faalesiteki ma isi fonotaga i ni tausaga e le’i mamao atu, sa ou tauaveina le valaau a Peresitene Monson e laveai i tagata e le malolosi i le Ekalesia. I se tasi konafesi faalesiteki, sa ou faamatalaina ai se tala e uiga i se tagata le malosi o le Ekalesia o lē sa toe foi mai ma malosi atoatoa ina ua asia o ia e lona epikopo ma isi taitai i lona fale, ma ta’u atu ia te ia, sa manaomia o ia, ma valaauina o ia e galue i le uarota. Sa le gata ina taliaina e le alii o loo i le tala le valaau, ae sa suia foi lona olaga ma amioga ma avea ai ma tagata malosi atoatoa i le Ekalesia.

Sa i ai sa’u uo i le aofia lea sa ou faamatalaina ai le tala lena. Sa iloa lelei lava le suia o ona foliga a o faamatalaina le tala. Sa ia auina mai ia te au se i-meli i le aso na sosoo ai ma faamatala mai, na mafua ona faaalia ona lagona ootia i le tala, ona o le tala o le toe malosi mai o lona tamā faaletulafono i le Ekalesia sa tutusa lelei lava ma le tala sa ou faamatalaina. Fai mai o ia, o se taunuuga o se asiasiga faapena a le epikopo ma se valaauga e auauna atu i le Ekalesia, na toe iloilo ai e lona tamā faaletulafono lona olaga ma lana molimau, faia ni suiga tetele i lona olaga, ma taliaina le valaau. O lena tamalii na toe faatoagaina mai ua 88 tagata e tupuga mai ia te ia o loo avea ma ni tagata malolosi o le Ekalesia.

I se fonotaga i ni nai vaiaso mulimuli ane, sa ou faamatalaina ai na tala e lua. O le aso na sosoo ai, sa ou maua ai se isi i-meli sa amataina faapenei “O le tala foi lena a lo’u tamā.” O lena i-meli, mai se peresitene o le siteki, na faamatala ai le auala na valaaulia ai lona tamā e auauna atu i le Ekalesia, e ui ina sa le’i toaga o ia ma sa i ai ni ana amioga sa manaomia ona suia. Sa ia talia le valaaulia, ma i le faagasologa, sa salamo, ma iu ai ina avea o se peresitene o le siteki sosoo ai ma le avea ma se peresitene o le misiona, ma sa faataatia ai le faavae mo ana fanau e avea o ni tagata faamaoni o le Ekalesia.

O ni nai vaiaso mulimuli ane, sa ou faamatalaina ai ia tala uma e tolu i se isi konafesi faalesiteki. Ina ua uma le fonotaga, sa sau se alii ia te au ma ta’u mai, ele o se tala lena a lona tamā. Ae o lanatala lena. Sa ia faamatala mai e uiga i mea na tutupu lea na taitaiina atu ai o ia e salamo ma toe foi mai e auai atoatoa i le Ekalesia. Sa ou faalogo i lea tala ma lea tala o le togiolaina.

E ui ina e le mafai lava ona tatou toe totogia le Togiola mo le mea na Ia totogia mo i tatou, ae o le fuafuaga o le faaolataga e manaomia ai a tatou taumafaiga sili ona lelei ina ia salamo atoatoa ai ma fai le finagalo o le Atua. Sa tusia e le aposetolo o Orson F. Whitney:

Faaola, Togiola o lo’u agaga,

O Lona aao malosi ua ou atoa ai,

O Lona mana matagofie ua siitia ai au

Ma tumu ai la’u ipu oona!

Se a se upu faafetai ou te fai atu,

Le Atua alofa o Isaraelu.

Le mafai na toe totogi atu, Le Alii e,

Ou te alofa i lau afio. O Lau upu mama,

O lo’u fiafia lea,

Ou te olioli i le aso, o a’u miti i le po?

Ia ou ta’uta’u atu pea,

Ma atagia lou finagalo i lo’u olaga.

(“Savior, Redeemer of My Soul,” Hymns, no. 112)

E tuuina atu la’u molimau i le mana o le Togiola a Keriso. A tatou salamo ma o mai ia te Ia, e mafai ona tatou maua faamanuiaga uma o le ola e faavavau. Ina ia tatou faia faapea, ma maua o tatou lava tala o le togiola, o la’u tatalo lea i le suafa o Iesu Keriso, amene.