Ua Tauto i Tatou Uma
Jeffery R. Holland
O Le Korama a Aposetolo e Toasefululua
Ou te talosagaina alii uma, talavou ma matutua, o umia le perisitua ina ia malolosi atu ma tuuto atili e molimau atu … o se molimau mo le lelei, se molimau mo le talalelei, se molimau mo le Atua.
I le agaga o lena viiga mamana ma le ofoofogia, ma faatasi ai ma le tatalo mamana a Elder Richard G. Hinckley i lo’u loto, ua ou fia talanoa sa’o atu ai i le po nei, uso e, ma e faaaofia ai i lena talanoa sa’o ia alii talavou o le Perisitua Arona.
Pe a tatou talanoa e uiga i le maoae tele o le Uluai Faaaliga a Iosefa Samita, o nisi taimi tatou te le talanoa tele i le feteenaiga taufaamata’u lea na muamua tupu, o se feteenaiga na faamoemoe e faaumatia ai le taulealea pe a mafai, ae a leai, ia taofia ai le faaaliga lea o le a oo mai. Tatou te le o toe talanoa tele e uiga ia Satani e sili atu nai lo le mea e tatau ai, ma ou te le o fia talanoa lava e uiga ia te ia, ae o aafiaga o le taulealea o Iosefa o loo faamanatu mai ai ia i tatou mea e manaomia e alii uma ona manatuaina, e aofia ai alii talavou uma, i lenei aofia.
Muamua, o Satani po o Lusifelo po o le Tama o Pepelo—pule a oe i se igoa e valaau ai—e moni o ia, o foliga moni lava o mea leaga. O ona faamoemoega ua i ai i tulaga faataumaoi uma, ma e gatete o ia pe a oo mai se malamalama togiola, i le tau lava o le mafaufau i le upumoni. Lua, e faavavau lava lona tetee i le alofa o le Atua, le Togiola a Iesu Keriso, ma le galuega o le filemu ma le faaolataga. O le a ia faasagatau atu i nei mea i soo se taimi ma soo se mea na te mafai ai. Ua ia iloa o le a faatoilaloina o ia ma tulia i fafo i le iuga, ae ua naunau o ia e faaumatia i le mea na te mafai ai le toatele o isi faatasi ma ia.
O a la nisi o togafiti a le tiapolo i lenei taua a o lamatia le ola e faavavau? O i lea ua toe aoao ai i tatou i ni aafiaga sa i ai i le Vao Paia. Sa tusi faamaumauina e Iosefa e faapea i se taumafaiga e tetee atu i mea uma o le a oo mai, sa tuu mai ai e Lusifelo “i lea mana se malosi ofoofogia sa taofia ai lo’u laulaufaiva ina ia le mafai ona ou tautala.”1
E pei ona sa aoao mai e Peresitene Boyd K. Packer i le taeao nei, e le mafai e Satani ona fasiotia se tagata. O se tasi lena o mea e tele e le mafai ona ia faia. Ae foliga mai o lana taumafaiga e taofi le galuega o le a tau faamanuiaina pe ana mafai ona ia taofia laulaufaiva o e faatuatua. Uso e, afai o le tulaga lena, o loo ou sailia i le po nei ni alii talavou ma matutua e popole tele i lenei taua i le va o le lelei ma le leaga ina ia auai ma tautatala atu. O loo tatou i ai i le taua, ma i nai minute o sosoo ai, ou te manao ia faaauai ni tagata i le taua.
Pe manaomia ona ou usuina ni nai nota o le “Ua Tauto Tatou i le Taua”? Tou te silafia le laina e uiga i le “Matou faatali nei mo e ofo mai?”2Ioe, o le mea maoae e uiga i lenei valaau mo ē e o i le taua tatou te le talosagaina ni volenitia e faapa se fana pe togi se pomu. Leai, matou te mananao i ni fitafita o le a avea a latou auupega ma “afioga uma e tulei mai le fofoga o le Atua.”3O lea la o loo ou sailia i le po nei ni faifeautalai e le ofofuaina mai le taofia o o latou laulaufaiva ae o le a, faatasi ma le Agaga o le Alii ma le mana o o latou perisitua, e tatala ai o latou gutu ma tautatala atu i vavega. O ia saunoaga, na saunoa i ai uso ua maliliu atu, o le a avea ma ala e faatinoina ma o le a faatinoina ai e le faatuatua ia galuega silisili.”4
Ou te talosagaina faapitoa lava alii talavou o le Perisitua Arona ina ia nonofo sa’o i luga ma matau mai. Mo outou, se’i ou faafefiloia atu sina faatusatusaga faaafeleti. O se taua lenei o le ola ma le oti o loo tatou i ai e faasaga i sē o tetee mai, e ita ia te outou ma ita i lenei galuega, o le a ou tu latalata i o outou luma, muāisu i le muāisu, faatasi ma se lagona o le faananau fiafia i lo’u leo—e pei o foliga o se faiaoga pe a uma se taaloga ma na o le pau le mea e sili ona taua o le manumalo. Faatasi ai ma le taunuuga o le taaloga, o le mea lea e ta’u atu e le faiaoga lenei, o le taaalo i le taaloga lenei, e tatau ai i nisi o outou ona ola mama ia sili atu nai lo le mama o outou i ai i le taimi nei. I le taua lenei i le va o le lelei ma le leaga, e le mafai ona outou taaalo mo le fili i soo se taimi lava e oo mai ai faaosoosoga, ona e faamoemoe lea e suti lelei mo le Faaola i le malumalu ma le taimi o le misiona e pei lava e leai se mea na tupu. O le mea lena, au uo talavou, e le mafai ona outou faia. E le ulagia le Atua.
E i ai la sa tatou luitau tele, outou ma au. O loo i ai le faitau afe o alii talavou i le vaitausaga o le Perisitua Arona o loo i ai ifaamaumauga o lenei Ekalesia ua faamoemoe e avea ma faifeautalai i le lumanai. Ae o le luitau, o le faatumauina lea o na tiakono, aoao, ma ositaulaga ia lava le toaaga ma lava le agavaa e faauuina ai o ni toeaina ma auauna atu ai o ni faifeautalai. Tatou te manaomia la alii talavou ia ua i ai i le ’au ina ia tumau i le ’au ma tuu le fai o mea sese aua matou te manaomia outou e o i totonu o le taaloga ma taaalo i le mea e gata ai le malosi! E toetoe lava o tauvaga afeleti uma ou te iloa, e vaseina ai laina tuaoi i luga o le fola po o le malae lea e tatau ona tumau ai i totonu tagata tauva uma.Ia, ua vaseina foi e le Alii laina o le agavaa mo i latou ua valaauina e galulue faatasi ma Ia i lenei galuega. E leai se faifeautalai e le o mafai ona salamo mai ni agasala o feusuaiga po o gagana masoa po o le matamata i ata ponokalafi e faamoemoe e luiina isi ia salamo mai na mea. O le a le faatasi le Agaga ma oe ma o le a apili na upu i lou faa’i a o e tautala atu ai. E le mafai ona outou malaga i ala ua ta’ua e Liae o “ala faasaina”5 ma faamoemoe e taitai isi i le “ala lauitiiti ma le vaaapiapi”6 e le—mafai ona faia faapena.
Ae o loo i ai se tali i lenei luitau mo outou e pei foi ona i ai ni tali i luitau o lena tagata sailiili o le a outou o atu i ai. Pe o ai lava oe ma pe o le a se mea na e faia, e mafai ona faamagaloina oe. O outou uma taitoatasi e mafai ona lafoaia soo se solitulafono atonu o outou tauivi ai. Ae e le mafai ona outou faia e aunoa ma se tautinoga malosi i le talalelei, ma e le mafai ona outou faia e aunoa ma le salamo i le mea e manaomia ai. Ua ou talosagaina outou alii talavou ina ia mataalia ma ia mama. Pe a manaomia ai, ua ou talosagaina outou ia e mataalia ma iaemama.
Ia, uso e, ua matou talanoa atu ma le toa ia te outou aua o soo se mea lava e le talanoaina malosi, e seasea lava aogā. Ua matou talanoa atu ma le toa ona o Satani o se tagata moni ua naunau e faaumatia outou ma ua outou fetaiai ma ana faatosinaga i vaitausaga sili ona talavou. O lea ua matou taofimau mai ia te outou ma alaga atu i le malosi tele e pei lava ona matou iloa:
Faalogo!i le leo ua valaau mai;
Tatou auai!Tatou auai!7
Au uo talavou, ua matou manaomia le faitau sefulu afe o nisi faifeautalai i masina ma tausaga o i luma atu. E tatau ona o mai mai se faitau aofai faatupulaia o le Perisitua Arona o le a faauuina, mataalia, mama, ma agavaa e auauna atu.
Ia i latou sa auauna atu pe o loo auauna atu i le taimi nei, matou te faafetai atu mo mea lelei ua outou faia, faapea ma soifua na outou pa’i atu i ai. Ia outou manuia! Matou te faailoa atu foi o loo i ai nisi sa faamoemoe i o latou olaga atoa e fia auauna atu i ni misiona ae, mo mafuaaga faalesoifua maloloina po o isi faafitauli e le oo i ai lo latou malosi, ua le mafai ai ona fai. Tatou te faamamaluina ma le mitamita lenei vaega. Matou te iloa lo outou manao, ma e matou te faamalo atu i lo outou tuuto. Ua ia te outou lo matou alofa ma le faamemelo. Ua outou “i ai i le au” ma o le a outou i ai pea, e tusa lava pe ua aveesea outou ma le mamalu mai ni misiona faamamaluina.Ae ua matou manaomiaina le toatele o outou!
Ia, outou na le usoga o le Perisitua Mekisateko. Aua le ataata ma faalagolago i tua i le mafanafana o o outou nofoa. E le’i uma atu sa’u tala. Matou te manaomia le faitau afe o nisi ulugalii e auauna atu i misiona a le Ekalesia. O loo augani mai peresitene uma o misiona mo i latou. I soo se mea o latou auauna ai, o a tatou ulugalii e aumaia se tulaga faatagata matua i le galuega e le mafai e se aofaiga o ē ta’i 19 tausaga le matutua, pe o le a lava lo latou lelei, ona tuu mai.
Ina ia uunaia nisi ulugalii e auauna atu, ua faia e le Au Peresitene Sili ma le Korama a le Toasefululua se tasi o gaoioiga sili ona lototoa ma sili ona agalelei ua vaaia i le galuega faafaifeautalai i le 50 tausaga ua alu. Ia Me o lenei tausaga sa maua ai e taitai perisitua i le misiona se faasilasilaga e faapea o tau o fale mo ulugalii (ma e matou te talanoa atu na o tau o fale) o le a totogiina e tupe mo faifeautalai a le Ekalesia pe afai e sili atu le tau ma se aofaiga ua uma ona fuafuaina i le masina. O se faamanuiaga lava! O se fesoasoani lenei na auina mai le lagi e faaaoga i pili sili ona taugata o loo feagai ma o tatou ulugalii i a latou misiona. Ua fuafuaina foi e le Usoga e mafai ona oo atu misiona a ulugalii i le 6 po o le 12 masina, faapea foi ma le 18 po o le 23 e pei ona masani ai. I se isi tulaga matagofie, ua tuuina atu le faatagaga i ulugalii, ae totogi e i latou lava, e toe foi ai i le fale mo sina taimi puupuu mo ni faalavelave taua faaleaiga. Ma tuu le popole e faapea tou te o e tuitui i faitotoa pe tausi le faatulagaga lava lea e tasi e pei ona i ai i le au 19 tausaga! Matou te le o talosagaina outou e fai lena mea ae o loo i ai le tele o isi mea e mafai ona outou faia, faatasi ai ma se saolotoga tele i auala tou te faia ai na mea.
Uso e, mo mafuaaga faalesoifua maloloina, aiga, po o mea tau tupe, ua matou iloa o nisi o outou,o le a le mafai ona o i le taimi nei pe atonu foi e le mafai lava. Ae faatasi ai ma sina fuafuaga o le a mafai e le toatele o outou ona o.
Epikopo ma peresitene o siteki, ia talanoaina lenei manaoga i a outou fonotaga ma konafesi. Ia nonofo i luga o le tulaga i a outou sauniga ma vaavaai atu ma le agaga tatalo i le faapotopotoga mo ni uunaiga e uiga ia i latou e tatau ona maua se valaauga. Ona fautuaina lea o i latou ma fesoasoani i ai e faatulaga se aso mo lea auaunaga. Uso e, pe a tupu lena mea, ta’u atu i a outou avā afai e mafai ona outou tuua o outou nofoa faalue ma masini faatonutonu [mo TV] mo ni nai masina, e mafai foi ona latou tuua a latou fanau a fanau. O le a manuia lava na fanau pele, ma ou te folafola atu o le a outou faia mea mo i latou i le galuega a le Alii, i lalolagi e lē uma, ia e le mafai lava ona outou faia pe afai tou te nonofo i le fale ma faaalu le tele o taimi ma i latou. O le a se faamanuiaga sili atu e mafai ona tuu atu e matua matutua i a latou fanau nai lo le fai atu e ala i galuega ma upu, “I le aiga lenei, tatou te o e faamisiona!”
O le galuega faafaifeautalai e le na o le pau lea o se mea e manaomia ona tatou faia i lenei Ekalesia tele ma le ofoofogia. Ae toetoe lava o isi mea uma e manaomia ona tatou faia, e faalagolago i tagata faatoa faalogo i le talalelei a Iesu Keriso ma ua auai mai i lo tatou faatuatuaga. E mautinoa lava o le mafuaaga autu lena o le poloaiga mulimuli a Iesu i le Toasefululua— — “o lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia.”8Ma, seiloga lava e tupu lena mea, ona faatoa mafai lea ona oo mai le tele o faamanuiaga o le talalelei—lotogatasi o aiga, polokalama a le autalavou, folafolaga faaleperisitua, ma sauniga e taitai atu ai i tatou i le malumalu. Ae e pei ona molimau mai Nifae, e le mafai lava ona oo mai se mea o na mea seiloga e “ulu atu [se tasi] i le … faitotoa.”9 Ona o na mea uma e ao ona fai i le savaliga i le ola e faavavau, ua tatou manaomia ai le tele o faifeautalai e tatalaina lena faitotoa ma fesoasoani i isi e ulu atu i ai.
Ou te talosagaina alii uma, talavou ma matutua, o umia le perisitua ina ia malolosi atu ma tuuto atili e molimau atu, se molimau e le gata e faasagatau atu i le leaga ma ia, le pogai o mea leaga uma, ae o se molimau foi mo le lelei, se molimau mo le talalelei, se molimau mo le Atua. Uso e o vaitausaga uma, tatala o outou laulaufaiva ma vaai i vavega e fai e a outou upu i olaga o i latou “o e ua na o na taofia mai le upumoni ona ua latou le iloa le mea e maua ai.”10
Vave i le taua ia le tuai;
Pulou i le moni, talita ai.
Tu i le fu’a ua agi mai!
Savali ai fiafia i le nuu paia.11
I le suafa o Iesu Keriso, amene.